लूकाल 5
5
पत्रु, याकोब आनि योहान येसुना पज्जो दांतुर
(मत्तयाल 4:18-22; मरकुस 1:16-20)
1उंदि रोजु येसु गेनेसरेत#5:1 गेनेसरेत दीन गालिल इंचिगुडा इंतुर. इनना समुद्रमतगा नित्तिसि पेनदा पोल्लें वेहासेक मत्तोर. येसु ओड्डुनपोर्रो नित्तिसि पेनदा पोल्लें वेहनेंके, आ पोल्लें केंजालय अगा वेल्लेने लोकुल्क ओना सुट्टु जमा आतुर. 2अस्के येसु समुद्रम ओड्डुनगा रोंडु डोंगन हूळतोर. जिम्मां पियानोर डोंगानाल रेय्सि ओरा ओल्लां नोर्सेक मत्तुर. 3येसु, अव डोंगानाल वरोर सिमोन पत्रु इननोना डोंगाते एकतोर. एकसि, अंटोर्क बेस केंजा वायना इंचि अद डोंगातुन ओड्डुनाल इच्चुर लक्कु ओसि निप्सा इंचि वेहतोर. ओर डोंगातुन लक्कु निपिस्ता पजा, येसु डोंगाते उद्दिसि लोकुल्कुंक पेनदा पोल्लें वेहालय दल्गतोर.
4पेनदा पोल्लें वेहमळ आता पजा, “डोंगातुन वेल्ले लोतु मत्तगा ओसि मिमेट ओल्लां मर्रा वाटट,” इंचि येसु सिमोनुन इत्तोर. 5अस्के, “गुरु! मोमोट नर्का पल्हीं तिप्पल्क अरतोम, माकु उंदिंका जिम्मा दोर्काहिल्ले, गानि निमे इंचेके मंतिन अदुनहाटीं नना ओल्ला वाटंतन,” इंचि सिमोन इत्तोर. 6पजा सिमोन आनि ओना दंटातुर येसु वेहताप कीतुर अय्ते वेल्लेने जिम्मां अर्सि ओरा ओल्लां हर्रालय आतां. 7ओल्लां हर्रंतां बारे इंचि वेरे डोंगाते मत्ता ओरा दंटातोर्कुन आसरा आयालय सय्गें कीसि केयतस्के, ओर वासि रोंडु डोंगाने जिम्मां निहतुर, अस्के ओरां रोंड डोंगा इंका मुळगालय आतां. 8-9वेल्लेन जिम्मां अरतद हूळसि, सिमोन पत्रु आनि ओना दंटातुर वेल्ले इचंत्रम आतुर. अस्के सिमोन येसुना काल्कुना पोर्रो अरसि, “सामि, नना पापि मनकन आंदुन, नीवा दग्गेरा मनना लायक हिल्लेन,” इंचि इत्तोर. 10अल्हेने जब्दि इननोना मर्क याकोब, योहान, ईर सिमोन पत्रुना दंटातोरे आंदुर, इचंत्रम आतुर. अस्के, “निमे वेरिय्मा, गानि इंदकेटाल निमे मनकालोर्कुन पीसि वायानोन आकिन,” इंचि येसु सिमोनुन इत्तोर.
11पजा ओर ओरा डोंगां ओड्डुंक तत्तुर. तच्चि अव अन्नि अग्गेन होळसि ओना पज्जो होत्तुर.
येसु कुस्ट रोगमतोन बेस कींतोर
(मत्तयाल 8:2-4; मरकुस 1:40-44)
12उंदि रोजु येसु उंदि सहरते मत्तोर. अगा वरोर मनकल कुस्टरोगमते पूरा निंडसि मत्तोर. ओर येसुन हूळसि ओना काल्कुनपोर्रो अर्सि, “सामि, निमे इन्कुत्ते नाकुन बेस किया पर्रांतिन,” इंचि विनंति कीतोर.
13अस्के येसु कय मुन्नेळ्क कीसि ओन इट्सि इल्हा इत्तोर, “निमे बेस आयगोम इंचि मनसु मंता, बेस आम,” इंचि इत्ता इन्मळे ओना कुस्टरोगम पुरागा होत्ता. 14पजा, “इगे जर्गतद बोनके वेहमा. गानि निमे होंचि मीवा पेर्मांक हुप्सा. पजा मूसाल वेहता मोक्कु हीम. अस्के निमे बेस आतिन इंचि लोकुल्कुंक एरपाट आंता,”#लैव्यवस्ता 14:1-32 इंचि येसु ओन्क गट्टिगा वेहतोर. 15निमे बोर्के वेहमा इंचि येसु वेहचि मत्तोर गानि ओना पोल्ले मुन्नेटकन्ना एक्को लोकुल्कुंक तेळियसेक होत्ता. अदुनहाटीं वेल्लेन लोकुल्क ओना पोल्लें केंजालय, बिमारकुनाल बेस आयालय ओना पज्जो-पज्जो वायुंदुर. 16गानि येसु बोरे हिल्वगा अलग-सलग होंचि पारतना कियुंदुर.
येसु लकवा बिमारतोन बेस कीतोर
(मत्तयाल 9:1-8; मरकुस 2:1-12)
17येसु उंदि रोज वरोन लोन पेनदा पोल्लें वेहनेंके, अगा परिसिल्क,#5:17 परिसिल्क इत्ते इगे परिसिल्कुना गेंगनोर मत्तुर. आनि दर्मसास्त्रम कराहना गुरुल्क उदिस मत्तुर. ओर गालिल आनि यहुदिया एरियाना अन्नि नाहकुनाल, अल्हेने येरुसलेम सहरताल वासि मत्तुर. पेनदा ताकत येसु सामिनगा मत्ताहेंके बिमारतोर्कुन बेस कियुंदुर. 18हूळा! अस्के इच्चुर लोकुल्क वरोर लकवा बिमारतोन कटुलते वाटसि येसुनगा तत्तुर. तच्चि येसु उद्दिसि मत्तगा लोप्पो ओयालय हूळतुर. 19गानि अगा वेल्ले गर्दि मत्ताहाटीं ओर लोता लोप्पो ओया पराहिल्लुर. अस्के ओर बतल कीतुर इत्ते लोतपोर्रो एकतुर, कटुल पियानच्चो बोंगा कीसि येसु लोप्पो बगा अय्ते उदिस मत्तोरो ओन्क सवरगा आ लकवा बिमारतोन कटुल्क कटुले ओना मुन्ने रेहतुर. 20येसु, ओरा विस्वासमतुन हूळसि, “कोको, नीवा पापाल्क मापि आतां,” इंचि लकवा बिमारतोन इत्तोर.
21अस्के दर्मसास्त्रम कराहना गुरुल्क आनि परिसिल्क केंजसि, “पेनदा अपमानम कियानोर, ईर बोर आंदुर? पेनदुन होळसि इंका बोरे पापाल्कुन मापि किया पर्रुर,” इंचि ओर-ओरे मनसुने विचारम कियालय दल्गतुर. 22येसु सामि, ओरा मनसुना विचारमतुन एरपाट कीसि, “मी मनसुने इसोंटा विचारम बारि कींतिर? 23बद अल्कगा मंता? ई बिमारतोन, ‘नीवा पापाल्क मापि आतां’ इनमळा? हिलाकोंटे, ‘तेदिस ताका’ इनमळा? 24गानि मनकना रूपमते पुटतोन नाकु, ई बूमिपोर्रोटा पापाल्कुन मापि कियना अदिकारम मंता इंचि मीकु हुप्संतन,” इत्तोर. इंचि, “नना नीकु वेहासेके, निमे तेदसि कटुल पीसि लोन होन,” इंचि लकवा बिमार आतोन इत्तोर.
25अस्के ओर बिराना अंटोरा मुन्ने तेदसि, बद कटुलते अय्ते ओर मींडसि मत्तोर अद कटुल पीकुंचि, पेनदुन तल्सकुंचेके लोन होत्तोर. 26अद हूळसि, अगा मत्तुर अंटोर वेल्लेन इचंत्रम आसि, पेनदुन तल्सकुनालय दल्गतुर. पजा वेरियसि, “इदवेरादाका मोमोट बस्केने इसोंटा इचंत्रम आयना कबाह्क हूळा हिल्लोम,” इंचि इनालय दल्गतुर.
कर वसुल कियना लेवि इनानोन येसु केयतोर
(मत्तयाल 9:9-13; मरकुस 2:14-17)
27पजा येसु अगटाल होननेंके, कर वसुल कियना नाकातगा लेवि#5:27 लेवि लेवि येसुना सिस्युड आतोर, पजा ईना पोरोल मत्तयाल इंचि अरता. मत्तयाल रासतद बेसता कबुर ईरे रासतोर. पोरोलता वरोर कर वसुल कियानोन हूळतोर. हूळसि ओन, “नावा पज्जो वा,” इंचि इत्तस्के 28ओर, ओनगा मत्तव अन्नि अग्गेन होळसि ओना पज्जो होत्तोर.
29पजा लेवि येसुन ओना लोन केय्सि, उंदि पेद्दा बोजनम हीतोर. अगा वेल्लेटुर कर वसुल कियानोर, इंका वेरेटोर लोकुल्क येसुनतोनि उद्दिसि गाटो तिंचेके मत्तुर. 30अस्के परिसिल्क आनि ओरा दर्मसास्त्रम कराहना गुरुल्क येसुना सिस्युल्कुनगा वासि, “कर वसुल कियानोरतोनि#5:30 कर वसुल कियानोर ईर रोम सरकारनाहाटीं कर वसुल कियुंदुर. आनि यहुदि लोकुल्क रोम सरकारनाहाटीं कबळ कियानोर्कुन हय्साकोंदुर. आनि पापि लोकुल्कुनतोनि मिमेट तिनुळ-उनुळ बारि तिंतिर,” इंचि गुल्गालय दल्गतुर.
31अस्के येसु ओर्कु इल्हा जवाब हीतोर, “बिमार हिल्वोर्कुंक डाक्टरना अव्सरम मन्नो गानि बिमार मत्तोर्कुंक डाक्टरना अव्सरम मनंता. 32नना नीतिमंतुल्कुन केयालय आयो गानि पापि लोकुल्कुन मनसु मार्सकुननाहाटीं केयालय वातन,” इंचि इत्तोर.
ओक्कापोद्दुना बारेमते येसु कराहता पोल्लें
(मत्तयाल 9:14-17; मरकुस 2:18-22)
33पजा अगा मत्ता लोकुल्क येसुन इल्हा पूसकीतुर, “योहानुना सिस्युल्क अय्ते ऊके ओक्कापोद्दु मनंतुर, पारतनागुडा कींतुर. अल्हेने परिसिल्कुना सिस्युल्कगुडा कींतुर, गानि नीवा सिस्युल्क अय्ते बस्केळ्क तिंचेक-उंचेके मनंतुर. अल्हा बारि?” 34अस्के येसु ओर्क इल्हा वेहतोर, “मरमिन पेडल मरमिं वाता हेडमितोरतोनि मननेंके, ओर्कुन ओक्कापोद्दु मना वेहा परकिटा? वेहा पर्रिर. 35गानि मरमिन पेडल ओरागटाल लक्कु आयाना रोजकु वायनुं, अव रोजकुने ओर ओक्कापोद्दु मनानुर.”
36पजा, येसु ओर्क इंकुंदि वेसुडि वेहतोर. “बोरे आयिर, पूना कप्पिडतुन हराह्चि पळाना कप्पिड्क अंटा वाट्सि कुट्टोर. ओक्कला ओर अल्हा कियानय्ते पूना कप्पिड अय्ते हेळसि दांते, अल्हेने पूना कप्पिडता तुकडा पळाना कप्पिड्क सोकगुडा दिस्सो. 37अल्हेने पूना अंगुर पानकमतुन, पळाना तोलपुर्काते बोरे दोस्सुर. अल्हा दोसते अद अंगुर पानकम, पळाना तोलपुर्कातुन हराह्चि पोंगिस दांता. पजा आ तोलपुर्कागुडा नासडेम आंता. 38अल्हा कियवा पूना अंगुर पानकम पूना तोलपुर्कातेन दोसना. अस्के तोलपुर्कातुन हरहो. 39बोरे आयिर, पळाना अंगुर पानकम उट्टारित्ते, पूना अंगुर पानकम गावाले इन्नोर. ओर पळाना अंगुर पानकमे बेस मंता इंचि वेहांतोर.”
Currently Selected:
लूकाल 5: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
