लूकाल 7
7
येसु वरोर अदिकारिना सेवाकुन बेस कींतोर
(मत्तयाल 8:5-13)
1लोकुल्कुंक वेहना मत्ता अन्नि पोल्लें वेहतारित्ते येसु कपर्नाहुम होत्तोर. 2अगा वरोर रोम सरकारता दरोगाल मत्तोर. ओना वरोर दासुड बिमारते हायनाल आसि मत्तोर. ओन दरोगाल बागा पावरम कियुंदुर. 3आ दरोगाल येसुना बारेमते बस्के अय्ते केंजतोरो, अस्के इच्चुर यहुदि पेद्दाल्कुनतोनि, “मिमेट येसुनगा होंचि, ‘दरोगाना दासुड बागा बिमारते मंतोर, ओन बेस कियालय नीकुन वा इंचि वेहालय माकुन लोहतोर,’ इंचि वेहाट,” इत्तोर. 4-5ओर येसुनगा वासि, “आ दरोगाल बेसतोर आंदुर, ओर मावा यहुदि लोकुल्कुन पावरम कींतोर. ओर मावाहाटीं दर्मसास्त्रम कराहना लोनगुडा दोहचीतोर, अदुनहाटीं निमे ओन्क सहायम कीम,” इंचि येसुन बतिमलाडसेके विनंति कीतुर.
6अस्के येसु ओरतोनि पेय्सतोर. ओर दरोगाना लोतुक दग्गेरा एवतस्के, ओर ओना दंटातोर्कुन येसुनहेके इल्हा वेहालय लोहतोर. “सामि, निमे तकलिप अरमा. निमे नावा लोन वायानच्चो पेद्दातनम नहगा हिल्ले.#7:6 यहुदिल्क वेरे जातितोरा लोह्कुने होनाकोंदुर. 7अचोने आयका नना नीकु कलियाना लायकगुडा हिल्लेन. अदुनहाटीं निमे सिराप उंदि पोल्ले इन, नावा जीतागाड बेस आंतोर. 8बारित्ते, ननागुडा वरोर अदिकारिना कय्दा हिळु कबळ कींतन. नावा कय्दा हिळुगुडा सिपाइल्क मंतुर. नना बोनना वरोन ‘होन’ इत्ते ओर दांतोर, इंकावरोन ‘वा’ इत्ते ओर वांतोर. इंका नावा दासुन, ‘इद कीम’ इत्ते ओर कींतोर.”
9इद केंजसि येसुंक वेल्ले इचंत्रम आता. अस्के पजोळ्क तिरियसि, ओना पज्जो वासेक मत्ता मंदितुन इल्हा इत्तोर, “नना वेहानद केंजट, इस्राएल लोकुल्कुन लोप्पोगुडा इच्चोन विस्वासम मत्ता मनकल नाकु बग्गेन दोर्का हिल्लोर.”
10येसु सामिनहेके लोहचीता दंटातोर मल्सि दरोगाना लोन वातस्के ओना दासुड बेस आसि दिसतोर.
येसु वरोर हाता मनकन जीवा अरहंतोर
11पजा येसु नाईन इनना नाटेनहेके पेय्सतोर. ओनतोनि ओना सिस्युल्क इंका वेल्लेटुर लोकुल्क मत्तुर. 12येसु नाटेने होळियाना गेटुना दग्गेर्क एवतोर, अच्चोटेन वरोन हातोन बोंदा दोसालय ओसेके मत्तुर. हातोना यावल मुंडामोसि मत्ता. दानकु ईर वरोरे मर्रि मत्तोर. नाटेनोर वेल्लेटुर लोकुल्क दानतोनि पेय्सतुर. 13येसु सामिंक दान हूळसि दया वाता, अस्के “निमे अळमा बाई,” इंचि, 14दग्गेरा होंचि पाडेतुन इटतोर. अस्के पाडेतुन कांजानोर अग्गेन आगतुर. अस्के येसु, “पेडा तेदा!” इंचि हातोन इत्तोर. #7:14 मूसाना नियम परकारम, पाडेतुन इटते मुट्टुड इनुंदुर. 15इत्तस्के, आ हासोत्ता पेडल तेदिस उद्दिसि वळकालय दल्गतोर. पजा येसु ओन ओना यावंक अप्पजेपतोर.
16अगा मत्तोर अंटोर्क वेर्रे दल्गता, ओर वेरियसि, “पेन दाना लोकुल्कुंक सहायम कियालय वाता, मना नड्डुम दाना पेद्दा कबुरतोन लोहचीता,” इल्हा इंचेके पेनदुन तल्सकुनालय दल्गतुर. 17येसुना इद पोल्ले यहुदिया एरिया आनि पक्का पीसि मत्ता अन्नि नाह्कुने तेळियसि होत्ता.
योहान ओना सिस्युल्कुन येसुनहेके लोहंतोर
(मत्तयाल 11:2-6)
18-19जर्गतव इव अन्नि पोल्लेना बारेमते, बापतिस्मा हियना योहान जेलने मननेंके ओना सिस्युल्क होंचि ओन्क वेहतुर. अस्के ओर, ओना सिस्युल्कुनाल इव्वुर्कुन केय्सि, “बोर अय्ते पिसागोटनोर वायानद मत्ता, ओन निमेन ना? हिलाकोंटे मोमोट इंकावरोना एदुर हूळमळा?” इंचि पूसकियालय ओर्कुन सामिनगा लोहतोर. 20अस्के ओर सामिनगा वासि, “गुरु, ‘बोर अय्ते पिसागोटनोर वायनद मत्ता, ओन निमेन ना? हिलाकोंटे मोमोट इंकावरोना एदुर हूळमळा?’ इंचि नीकुन पूसकियालय, बापतिस्मा हियना योहान माकुन लोहतोर,” इंचि इत्तुर.
21अस्केने येसु, बिमार मत्तोर्कुन, नोप्पिनोर्कुन, देय्याल्क पीसि मत्तोर्कुन इल्हा वेल्लेटोर्कुन बेस कीतोर, वेल्लेटुर गुड्डोर्कुना कळकु दिस्सानाल कीतोर. 22पजा ओर्कु इल्हा जवाब हीतोर. “इंदके मिमेट बतल अय्ते हूळतिर, केंजतिर अद होंचि योहानुंक वेहट. गुड्डोर्क हूळसंतुर, कुंटोर्क ताकसंतुर, कुस्टरोगम आतोर बेस आसंतुर, सेव्टोर्क केंजसंतुर, हातोर्कुंक जीवां अरसंतां आनि गरिबोर्कुंक बारे बेसता कबुर एवसंता. 23बोर अय्ते नावा बारेमते अन्समन्स किय्योर, ओन्के आसिर्वाद दोर्कंता,” इंचि इत्तोर.
येसु योहानुना बारेमते वेहंतोर
(मत्तयाल 11:7-19)
24योहानुना सिस्युल्क अगटाल पेय्सि होत्तस्के, योहानुना बारेमते लोकुल्कुंक येसु इल्हा वेहालय दल्गतोर, “मिमेट बय्लि जेगाते बतल हूळालय होत्तिर? वळिक ऊंगना जाडितुना? 25हिलाकोंटे मिमेट बतल हूळालय होंचि मत्तिर? मेत्तटा कपडिं केर्ता मनकन हूळालय होत्तिरा? हुळाट! मेत्तटा कपडिं केर्रानोर आनि सिरमंतुल्क राजवाडाने मनांतुर, बय्लि जेगाते आयो! 26अय्ते मरि मिमेट बतल हूळालय होत्तिर? पेनदा कबुरतोन हूळालय होत्तिरा? हो! नना मीकु वेहासेक मंतन, मिमेट बोन अय्ते हूळतिर ओर पेनदा कबुरतोनकन्ना बच्चोरो पेद्दा मंतोर. 27ओना बारेमते पेन मुन्नेने इल्हा वेहचि मत्ता.
“हूळा! नना नीकन्ना मुन्नेने नावा कबुरतोन लोहंतन,
निमे वायानाहाटीं ओर हर्रि तयार कींतोर.”#मलाकी 3:1
इंचि दर्मसास्त्रमते रासि मंता. 28“नना मीकु वेहानद बतल इत्ते, पुट्तोराव्टेटाल योहानुंकन्ना पेद्दा बोरे हिल्लोर. अय्नागानि पेनदा राज्येमते सिन्ना मनकलगुडा योहानुंकन्ना पेद्दोडे,” इंचि वेहतोर.
29अस्के वेल्लेटुर लोकुल्क आनि कर वसुल कियानोरगुडा येसु वेहता पोल्लेन केंजतुर. केंजसि, पेनदा हर्रि नीतिता हर्रि, इंचि इत्तुर. ओर्क अंटोर्क योहान मोदालेन पेनदा पोरोलते बापतिस्मा हीसि मत्तोर. 30गानि परिसिल्क आनि मूसाना नियम बेस तेळियतोर बारे योहानुनाहेंदाल पेनदा पोरोलते बापतिस्मा एतुवा, पेन ओर्क हुपिस्ता हर्दे ताका हिल्लुर.
31-32मर्रा येसु इल्हा वळकालय दल्गतोर, “ई पीळिता लोकुल्क बोरालेसीं मंतुर इंचि, ओर्कुन बोरा लोप्पो कल्पकन? मिमेट अय्ते चौकुने उद्दिसि, वरोंक-वरोर केय्सि,
“मोमोट मीहाटीं दुक्कमता पाटां पारतोम, अयना मिमेट अळा हिल्लिर.
मोमोट मीहाटीं तूरीला उह्कुतोम, गानि मिमेट एगरा हिल्लिर,
इंचि इनना पिलाल्कुनालेसीं मंतिर.”
33“अल्हेने बापतिस्मा हियना योहान एक्कोते एक्को ओक्कापोद्दु मनुंदुर. अंगुर पंडिना पानकमगुडा उनाकोंदुर, अयना मिमेट ओन, देय्यम पीता इंचि इत्तिर. 34गानि मनकना रूपमते पुटतोन नना तिंचेके-उंचेके वातन. गानि मिमेट मात्रम, ‘हुळाट, ओर बच्चोर तिंतोर, बच्चोर उंटोर? कर वसुल कियानोर आनि पापि लोकुल्क ओना दंटातोर आंदुर,’ इंचि नाकुन इंतिर. 35गानि पेनदा बुद्दि नीतितद आंद इंचि, दाना बुद्दिते ताकानोर कियाना कबाह्कुन पोर्रोटाल तेळियंता.”
पापि मुरतळ येसुना काल्कुंक अत्तर निय होकता
36उंदि मल्का सिमोन इनना वरोर परिसि मनकल ओना लोन गाटो तिनालय येसुन केयतोर. अस्के येसु ओना लोन होंचि गाटो तिनालय उदतोर. 37हुळाट! आ नाटेने उंदि पापि मुरतळ मत्ता. येसु वरोर परिसिन लोन गाटो तिंचंतोर इंचि दान्क तेळियतस्के अद उंदि बंडाता गुर्गिते बेस गमागमा गब्बु वायना अत्तर निय पीसि वाता. 38वासि येसुना पज्जो नित्तिसि अळसेके दाना कळ्कुनाल पोंगाना एरतोनि येसुना काल्कुन नहालय दल्गता. पजा दाना केल्कुनतोनि उसुमसेके, ओना काल्कुन बुर्सेके अत्तर निय होकुंदु.#7:38 यहुदिल्क गाटो तिनालय उदतस्के ओर मडगद्दे वाट्सि उद्दुर. टेबलहेके वंगिसि, काल्कुन गोडच्चो पज्जोळ्क मल्हाचि उद्दंतुर. अदुनहाटीं आ मुरतळ पज्जोटाल वासि येसुना काल्कुन बुर्सेके निय वळियापर्ता. 39अल्हा कियानद हूळसि, बोर अय्ते येसुन केयतोरो आ परिसि इल्हा इन्कुत्तोर गदा, “इद अय्ते पापि मुरतळ आंदु! ईर निजमे पेनदा कबुरतोर आसि मत्ते, ओन इट्टानद बसोंटा मुरतळ आंद इंचि ओन्क तेळियसि मनवळ. पापि मुरतळ इटते मुट्टुळ इंचि दान इट्टा हियाकोन्नेर,” इंचि ओर इनकुत्तोर.
40अस्के येसु ओना मनसुन एरपाट कीसि, “सिमोन, नीकुन उंदि पोल्ले पूसकियना मंता,” इंचि इत्तस्के ओर, “वेहा गुरुजी,” इंचि इत्तोर. 41अस्के येसु उंदि वेसुड वेहतोर, “इव्वुर मनकालोर वरोर सावकारनगटाल बाकि तेंडतुर, वरोर बारे हेय्युं नुह्कु, इंकावरोर बारे एबै एंडि बंडिं. 42गानि ओर बाकि दोहा पराहिल्लुर. अदुनहाटीं सावकार ओरा इव्वुरा बाकितुन मापि कीतोर. अय्ते इंदके ओरा इव्वुरा लोप्पोटाल सावकारुन बोर एक्को पावरम कींतोर, वेहा?” इंचि पूसकीतोर. 43अस्के, “बोर अय्ते एक्को बाकि मत्तोर, ओरे एक्को पावरम कियानुर बारे,” इंचि सिमोन इत्तोर. इत्तस्के, “निमे बरोबर वेहतिन,” इंचि येसु ओन इत्तोर.
44येसु मुरतटहेके तिरियसि सिमोनुन इल्हा इत्तोर, “निमे ई मुरताटुन हूळा. नना नीवा लोन वातन, निमे नावा काल्क नोर्रालय एरगुडा हिय्या हिल्लिन. गानि इद बारे दाना कांडेह्कुनतोनि नावा काल्कुन नाहचि, केल्कुने उसुमता.#7:44 यहुदि रिवाजते, लोन बोरन्ना वाते ओर्कु काल्क नोर्रालय एर हीसि बुग्लीं बुर्रांतुर. 45निमे नाकुन बुर्सि जोहार किया हिल्लिन, गानि नना लोप्पो होळियतस्केटाल इद नावा काल्कुन बुर्सेके मंता. 46निमे नावा तल्लक निय होकसि नाकु कदर हिया हिल्लिन, गानि इद नावा काल्कुंक वेल्लेन दराता अत्तर निय होकता. 47अदुनहाटीं नना नीकु वेहानद बतल इत्ते, दाना अन्नि पापाल्क मापि आतां इंचि अद वेल्लेन पावरम कीता, गानि बोनद इच्चुने पापम मापि आता, ओर इच्चुने पावरम कींतोर.”
48पजा येसु, “नीवा पापाल्क मापि आतां,” इंचि आ मुरतटुन इत्तोर. 49अस्के, “ईर बोर आंदुर, ओनद ओर पेन इन्कुंचि, पापाल्कुन मापि कींतोर?” इल्हा ओनतोनि गाटो तिंचेक उदिस मत्तुर अंटोर ओरद-ओरे वळ्ककुनालय दल्गुतुर. 50पजा, “निमे नावापोर्रो विस्वासम कीताहाटीं पेन नीकु मुक्ति हीता, निमे सांतिते होन,” इंचि येसु आ मुरतटुन इत्तोर.
Currently Selected:
लूकाल 7: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
