मत्तयाल 22
22
मरमिना बोजनम वेसुड
(लूकाल 14:15-24)
1येसु मरुंदि मल्का, लोकुल्कुंक वेसुडि वेहासेक इल्हा वळकालय दल्गतोर. 2स्वर्ग राज्येम वरोर राजानलेसीं मंता. ओर ओना मर्रिना मरमिंकु उंदि कुळ्पु इरतोर. 3आ कुळ्पुंकु बोर्कुन अय्ते केय्सि मत्तोरो, ओर्कुन केय्सि तायालय, ओना दासुल्कुन लोहतोर. गानि ओर वायोम इंचि इत्तुर. 4वायोम इंचि इत्तारित्ते, मर्रा इच्चुर दासुल्कुन राजाल इल्हा वेहट इंचि लोहतोर, “हुळाट, मीहाटीं नना कुळ्पु इरतन, बल्सता कुर्रा आनि कोंदा कोयतन, कुसिरगुडा वेसि तयार मंता. अदुनहाटीं मिमेट गाटो तिनालय ताकट इंचि इंटु,” इत्तोर.
5-6राजाल वेहिनागानि, राजाना पोल्लेता कदर कियाकोंटा, इच्चुर ओरा पोलाल्कुनहेके होत्तुर, इच्चुर बारे ओरा कबळ दंदानहेके होत्तुर. इच्चुर बारे राजाना दासुल्कुन पीसि तंचि हव्किसि पोहतुर. 7अस्के राजांक इरगा होंग वाता. पजा राजाल ओना सिपाइल्कुन लोहचि, ओना दासुल्कुन हव्कतोर्कु हव्किसि ओरा सहरकु तडमि दोस्सा वेहतोर.
8पजा राजाल ओना दासुल्कुंक इल्हा वेहतोर. “मरमिना कुळ्पु तयार मंता. गानि केयता मनकालोर बेसटुर आयुर. 9अदुनहाटीं मिमेट हर्कुन पीसि, गल्लीं, बजारकुन पीसि होंचि दोर्कुतोर अंटोर्कुन गाटो तिनालय केय्सि तटु,” इंचि इत्तोर. 10अस्के दासुल्क, हर्कु, गल्लीं पीसि होंचि बेसतोर, सेड्डोर अंटोर्कुन जमा कीसि तत्तुर. अस्के मरमिना लोते हेडमितुर निंडिस होत्तुर.
11अस्के वाता हेडमितोर्कुन राजाल हूळतस्के, मरमिन लोप्पो मरमिन लायक बेसता कपडिं केरुवा#22:11 बेसता कपडिं केरुवा आत्मिक रीतिते बेस मनवोर, पडना पिस्वर होळसियवोर. वरोर मनकल ओन्क दिसतोर. 12अस्के राजाल ओन, “निमे मरमिन लोप्पो बेसता कपडिं केरुवा, मरमिना मंडाता#22:12 मंडा इत्ते पंदिर आंद. हिळु बल्हा वातिन?” इंचि ओन पूसकीतोर गानि आ मनकल बतले वळका हिल्लोर. 13अस्के राजाल ओना जीतागाह्कुन केय्सि, “ईना कय्क-काल्क दोहचि, पलाते हीकटते पोहचीम्ट. अगा मनानोर अळसेके, वरगेयसेके, पल्कु कोर्कसेक मनांतुर,” इंचि इत्तोर.
14पजा, “केयतोर वेल्लेटुरे मंतुर. गानि पेर्कुत्तोरु मात्रम इच्चुरे मंतुर,” इंचि येसु वेसुड वेहामळ आपतोर.
येसुन तप्पुने दोर्का पियालय परिसिल्कुना उपायाल्क
(मरकुस 12:13-17; लूकाल 20:20-26)
15पजा परिसिल्क अगटाल पेय्सि उंदगा जमा आसि, येसुन बल्हा किसन्ना ओर वळकाना पोल्लेतेन ओना तप्पु दोर्का पियाना इंचि उपायम कियालय दल्गुतुर. 16परिसिल्क येसुन पसांचना उपायाल्क कीसि, ओरा इच्चुर सिस्युल्कुन हेरोद राजाना मनकालोरतोनि ओनाहेके लोहचीतुर. ओर येसुनगा होंचि इल्हा इत्तुर. “गुरु, निमे निजम वळ्कानोन, पेनदा हर्दा बारेमते सत्तेमते करहानोन आंदिन इंचि माक एरपाट मंता. बोर बतल इनिनागानि दाना पिकिरगुडा किय्यिन, निमे लोकुल्कुना मोकम हूळसि वळ्किन, इदिंका माकु एरके.#22:16 इगे रोंडु पार्टिं मंतां, उंदि परिसिल्कुना पार्टि इंकुंदि हेरोद राजाना पार्टि. परिसिल्कुंक कैसर राजांक कर दोहमळ न्यायमेना, आयोना? गानि हेरोदना पार्टितोर मात्रम कैसर राजांक कर दोहमळ गावाले इंतुर. 17अय्ते माकु वेहा. नियम परकारम, कैसर#22:17 कैसर इद राजाना पोरोल आयो. रोम सरकारते अन्निटकन्ना पेद्दा पदवि आंद. राजांक कर दोहमळ न्यायमेना आयोना? नीवा विचारमते बतल मंता?” इत्तुर.
18ओरा कोंटे उपायाल्क येसुंक मुन्नेटाले एर्का मत्ताहाटीं ओर ओर्कुन इल्हा इत्तोर. “ए डोंगिरिटा, बारि नावा पट्टु हूळांतिर? 19मिमेट कर दोहना कोत्ता नाकु हुप्सट,” इत्तोर. अस्के आ लोकुल्क ओन्क उंदि एंडि बंडि हुपिस्तुर. 20हुपिस्तस्के, “इद एंडि बंडिपोर्रो बोना पोटुवा आनि पोरोल मंता?” इंचि येसु ओर्कुन पूसकीतस्के, 21“कैसर राजानद,” इंचि ओर इत्तुर. पजा येसु ओर्कु वेहतोर. “बद कैसर राजानद मंता, अद कैसर राजांक हीम्टु, बद अय्ते पेनदाद मंता, अद पेनदुक हीम्टु.” इत्तोर.
22येसुना पोल्लें केंजसि, ओर्कु इचंत्रम आता. पजा ओर अगटाल होत्तुर.
इच्चुर सदुकि लोकुल्क येसुन पसांचंलय हूळंतुर
(मरकुस 12:18-27; लूकाल 20:27-40)
23अदे रोजु इच्चुर सदुकिर येसुनगा वातुर (ईर हासि मर्रा जीवाते तेदमळतुन ईर नम्मुर.) 24वासि इल्हा सवाल पूसकीतुर, “गुरु, मूसाना नियम परकारम, वरोर मनकल पिलाल्क आयाका मुन्नेन हायानय्ते ओना मुत्तोनतोनि ओना तम्मुर मरमिं आसि, हातोना वंसम बेर्सागोटालय पिलाल्कुन कना परांतोर. 25अय्ते महगा एडुर दादाल-तम्मुह्क मत्तुर. पेद्दा दादाना मरमिं आतां गानि पिलाल्क आयाका मुन्नेन ओर हातोर. पजा ओना मुत्तोन ओना तम्मुर मरमिं आतोर. 26आ तम्मुरगुडा पिलाल्क आयाका मुन्नेन हातोर. पजा ओना पज्जोटोर दान मरमिं आतोर ओरगुडा हातोर. इल्हा एडुरगुडा दानतोनि मरमिं आसि पिलाल्क आयाका मुन्नेन हातुर. 27अंटोर हाता पजा, आ मुरतळगुडा हाता. 28अय्ते हातोर अंटोर मर्रा जीवाते तेदतस्के, आ एडुर लोप्पोटाल अद बोना मुत्तो आयार? बारित्ते, ओर एडुरगुडा दान मरमिं आसि मत्तुर,” इत्तुर.
29अस्के येसु ओर्क इल्हा जवाब हीतोर. “मिमेट दर्मसास्त्रमतुन आनि पेनदा ताकततुन एरपाट कियाका तप्पु अर्तम कीकुंचंतिर. 30बारित्ते हातोर मर्रा जीवाते तेदानुर अस्के, ओर मरमिं आयुर, मरमिं कीसिगुडा हिय्युर. गानि ओर स्वर्गमता पेनदा दूतनलेसीं मनांतुर. 31-32गानि हातोर मर्रा जीवाते तेदानुर इंचि दर्मसास्त्रमते वेहचि मंता, अद बतल इत्ते, ‘नना अब्राहाम, इसाक आनि याकोबुना पेनदुन आंदुन,’#निर्गमन 3:6 इंचि पेन इत्ता. अदुन हद्विसि दाना अर्तम बस्केने एरपाट किय्या हिल्लिरा? इंचि अद हातोरा पेन आयो गानि जीवाते मनानोरा पेन आंद,” इल्हा येसु इत्तोर.
33येसु इच्चोन वळ्कतारित्ते, अगा मत्ता लोकुल्क ओना पोल्लें केंजसि इचंत्रम आतुर.
अन्निंकन्ना पेद्दा पोल्ले बद्दु?
(मरकुस 12:28-34; लूकाल 10:25-28)
34येसु सदुकिर्कुन वळकाकोंटा कीतोर इंचि परिसिल्कुंक तेळियतारित्ते ओर जमा आसि येसुनहेके वातुर. 35ओरा लोप्पो मूसाना नियम बेस तेळियतोर वरोर मत्तोर, ओर येसुना पट्टु हूळालय, 36“गुरु, मूसाना नियम लोप्पो अन्निंकन्ना पेद्दा आदेस बद आंद?” इंचि येसुन सवाल पूसकीतोर.
37अस्के, “निमे नीवा सामि आता पेनदुन पूरा मनसुनाल, पूरा आत्माताल, पूरा बुद्दिताल पावरम कीम. 38इदे अन्निंकन्ना पेद्दा आनि मोदोलता आदेस आंद. 39रोंडो आदेस बतल इत्ते, नीवद निमे बच्चोन पावरम कींतिनो, अचोने पावरम इंकावरोनगुडा कीम. 40इव रोंडु आदेसकुना आदारम पोर्रेने मूसाना नियम आनि पेनदा कबुरतोर रासता पुस्तकाल्क मंतां.” इंचि येसु जवाब हीतोर.
येसु परिसिल्कुन सवाल पूसकीतोर
(मरकुस 12:35-37; लूकाल 20:41-44)
41पजा परिसिल्क उंदगा जमा आसि मत्तस्के, येसु ओर्कुन उंदि सवाल पूसकीतोर. 42“किरिस्तुना बारेमते मीवद बतल विचारम मंता? ओर बोना मर्रि आंदुर?” अस्के, “ओर दाविदना मर्रि आंदुर,” इंचि परिसिल्क इत्तुर.
43-44अस्के येसु ओर्कुन इल्हा इत्तोर. “अय्ते, दाविद पवित्र आत्माते निंडसि इल्हा इत्तोर. सामि नावा सामिन इत्तोर, बदवेरदाका अय्ते नीवा पगातोर्कुन नीवा काल्कुनगा तायोन, अदवेरदाका नावा तिना बाजुंक उद्दिसि मन.#बजन संहिता 110:1 45कुद्दु दाविद ओन सामि इंचि इत्तोर अय्ते ओर दाविदना मर्रि बल्हा आया परांतोर?” इत्तोर.
46अस्के ओर बोरे येसुना पोल्लेक जवाब हिया पराहिल्लुर. आ रोजुनाल येसुन बद्दे सवाल पूसकियालय बोर्कु हिम्मत आयाहिल्ले.
Currently Selected:
मत्तयाल 22: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
