मत्तयाल 23
23
दर्मसास्त्रम कराहना गुरुल्क आनि परिसिल्कुना होंग
(मरकुस 12:38-40; लूकाल 11:37-52; 20:45-47)
1सिस्युल्कुन आनि अगाटा मंदितुन हूळसि येसु इत्तोर गदा, 2“दर्मसास्त्रम कराहना गुरुल्कुंक आनि परिसिल्कुंक मूसाना नियम कराहना हक्कु मंता. 3-4इंचि ओर तेहते तेदा पर्रुवा मोता दोह्चि मनकालोरा हट्टनपोर्रो इर्रंतुर गानि आ मोतातुन कांजसि ओयनेंके वेलु दोस्सि आसरागुडा आयुर. अदुनहाटीं ओर मीकु बतल-बतल वेहंतुरो अव अन्नि कीसेके ताकटु, गानि ओर कीताप मात्रम कियमट.”
5ओर ओरा कबाह्क लोकुल्क हूळना इंचि कींतुर. पेनदा पोल्लेन रासि, तायित्कुने निहचि पेद्दा-पेद्दा दुम्में ओरा दंडा कयकुंक, कप्पर्क दोहकुंतुर. ओरा कपडिना कोंगुल्कु जिल्लर-जल्लर होळसींतुर. लोकुल्क ओर्कुन “सादु” इनागोम इंचि इल्हा कींतुर.#व्यवस्ताविवरन 11:18; गिनति 15:37-41 6अचोने आयाका दर्मसास्त्रम कराहना लोह्कुने, कुळ्पुकुने पेद्दाल्क उद्दाना जेगाते उदमळ इत्ते ओर्क वेल्ले इस्टम. 7हाटुमकुने जोहार वेहागोटकुनमळ, मनकालोराहेंदाल गुरु इंचि केया वेहकुनमळ ओर्कु बेस अनपिच्चंता.
8गानि मिमेट अंटोर दादालोर-तम्मुह्क आंदिर, मीवा अंटोरा गुरु वरोरे. अदुनहाटीं मिमेट मीकुन “गुरु” इंचि इनागोटकुन्मटु. 9स्वर्गमते मनना पेने मीवा बाबाल आंदुर, अदुनहाटीं इद बूमिते मिमेट बोने “बाबा” इंचि इनमटु. 10अल्हेने मीकु वरोरे सामि मंतोर, ओर किरिस्तु आंदुर. अदुनहाटीं मीकुन बोरे “सामि” इंचि केया मन्नि. 11गानि बोर अय्ते पेनदा मुन्ने अंटोर्कन्ना पेद्दा आयालय हूळांतोर, ओर अंटोरा सेवा कियानोर आयिर. 12बोर अय्ते, ओनद ओरे पेद्दा इनकुनानुर, पेन ओन सिन्ना किय्यार. अल्हेने बोर अय्ते पेनदाहाटीं सिन्ना आसि ताकांतोर, ओन पेन पेद्दा किय्यार.
13अरे डोंगि परिसिल्क आनि दर्मसास्त्रम कराहना गुरुल्कुनिटा, मीक गोसा तप्पो. स्वर्ग राज्येमते होनानोरा हर्रि मिमेट बंद कीतिर. मिमेट अय्ते होन्निर, होनानोर्कुनगुडा होन्ना हिय्यिर.
14अरे डोंगि दर्मसास्त्रम कराहना गुरुल्क आनि परिसिल्कुनिटा, मीकु गोसा तप्पो. मुंडामोस्ता मुर्ताह्कुन मुळाहंतिर. अल्हेने लोकुल्कुंक हुप्सालय वेल्लेनजेम पारतना कींतिर. मिमेट डोंगिर्क आंदिर! मीकु पेन एक्को सिक्सा हिय्यार.#23:14 इद वचनम कोन्नि पांडु लिपिने हिल्ले.
15अरे डोंगि दर्मसास्त्रम कराहना गुरुल्क आनि परिसिल्कुनिटा! वरोन मीवा मतमते तायालय मिमेट देसे-देसेम तिरियसि बूमि-मब्बु उंदि कींतिर. ओर मीलोप्पो वातस्के, मिमेट ओन मीकन्ना एक्को पापमते अरहचि नरकमते लोहंतिट, दानहाटीं मीकु बच्चोर पेद्दा गोसा वायार.
16अरे, हर्रि हुप्संतोम इनना गुड्डिर्कनिटा! मिमेट इंतिर गदा, बोर अय्ते पेनदा गुळिता ओट्टु तिंतोर, ओन्क बतल आयो. गानि बोर अय्ते गुळि लोप्पोटा बंगारमता ओट्टु तिंतोर, ओन्क मात्रम आ ओट्टु परकारम ताका पींता, इंचि इंतिर. दानहाटीं मीकु बच्चोर पेद्दा गोसा वायार.
17अरे गुड्डिर! बद पेद्देद, बंगारमा बंगारमतुन पवित्र कियना गुळिआ? 18इंका इल्हा इंतिर गदा, बोरन्ना पेन गद्देता ओट्टु तिंचि दान परकारम ताकाकोंटे बतल आयो, गानि पेन गद्देपोर्रो वाटता उपारमता ओट्टु बोर अय्ते तिंतोर, ओन्क मात्रम आ ओट्टु परकारम ताका पींता.
19अरे गुड्डिर्कनिटा! पेन गद्दे पेद्देदा मरि पेन गद्दे हेंदाल पवित्र आयना दानपोर्रो वाटता उपारम पेद्देदा? 20अदुनहेंके बोर पेन गद्देता ओट्टु तिंतोर, ओर पेन गद्देपोर्रो मत्ता अन्निटवुना ओट्टु तित्तापे. 21अल्हेने बोर अय्ते गुळिता ओट्टु तिंतोर, ओर गुळिते मनना पेनदा ओट्टु इंका तिंतोर. 22बोर अय्ते स्वर्गमता ओट्टु तिंतोर, ओर पेनदा राजगद्दे आनि राजगद्देपोर्रो उदिस मनानोनद इंका ओट्टु तिंतोर.
23अरे डोंगि दर्मसास्त्रम कराहना गुरुल्क आनि परिसिल्कुनिटा, मीक गोसा तप्पो. बारित्ते मिमेट पुदिना, जिल्करा, सोप इसोंटा पंटातालगुडा पदि तूसकुनाल उंदि तूस पेनदुक हींतिर. गानि न्यायमते तिरियमळ, दया कियमळ, पेनदापोर्रो विस्वासम इरमळ इसोंटव दर्मसास्त्रमता बेसता पोल्लेन मिमेट होळसीतिर. पदि तूसकुनाल उंदि तूस पेनदुक हियमळ इद बेसे. गानि इद कीसेक-कीसेक अवुनगुडा होळसाकोंटा ताका मत्तिर. 24हर्रि हुप्संतोम इनना गुड्डिर्कनिटा! मिमेट नुल्लेतुन बारे वडा पीसि उंटिर गानि लोटापेटातुन बारे हूळवा अल्हे मिंगांतिर.
25अरे डोंगि दर्मसास्त्रम कराहना गुरुल्क आनि परिसिल्कुनिटा, मीकु गोसा तप्पो. बारित्ते, मिमेट गिन्नें-गिलासकु सिराप लोकुल्कुंक दिसालय पलाताल तोमसि साप कींतिर, गानि लोप्पो मात्रम मीवा कराब गुनाल्क, पापाल्क निंडिस मंतां.
26अरे गुड्डि परिसिल्कुनिटा! मुन्ने मीवा गिलासकु-गिन्नेन लोप्पोटाल तोमसि नोर्राटु, अस्के अव पलातालगुडा बेस दिसंता.
27अरे डोंगि दर्मसास्त्रम कराहना गुरुल्क आनि परिसिल्कुनिटा, मीकु गोसा तप्पो. बारित्ते मिमेट तेल्लटा सुन्ना होकता गोरिनसंटोर आंदिर. अव पलाताल हूळालय सक्कगा दिसंतां, गानि लोप्पो हूळते, पीनगुना बोक्कां कळियसि होंचि गब्बु पीसि मनंतां. 28अल्हेने मिमेट इंका पलाताल लोकुल्कुंक पक्का नीतिमंतुल्कुन लेह्का दिसंतिर. गानि मीवा पीट लोप्पो नडेह कियना बुद्दि, पापमता कबाह्क निंडिस मंता.
29अरे डोंगि दर्मसास्त्रम कराहना गुरुल्क आनि परिसिल्कुनिटा, मीकु गोसा तप्पो. बारित्ते, मिमेट पेनदा कबुरतोराहाटीं गोरिं दोहांतिर आनि नीतिमंतुल्कुना गोरिन सोक कींतिट. 30अल्हा कीसि मिमेट इंतिर, मोमोट पेद्दाल्कुना कालमते मंचि मत्ते, पेनदा कबुरतोर्कुन हव्कानेंके, ओर्क सायता आया कोन्नेम. 31इल्हा इंचि, “मोमोट पेनदा कबुरतोर्कुन हव्कतोरा वंसमतोर्कुम आंदुम,” इंचि मीवद मिमेटे उल्टा गवाइ वेहकुंतिर. 32अय्ते मिमेट मीवा पेद्दाल्क सुरुव कीता पापमतुन पूरा कीम्टु.
33ए तरासकुनसंटोरिटा! आनि नय तरास पोरिह्कुनसंटोरिटा! मिमेट बल्हा अयना नरकमते होनमळ तप्पो. 34अदुनहाटीं नना मीहेके पेनदा कबुरतोर्कुन, बुद्दिमंतुल्कुन आनि दर्मसास्त्रम कराहना गुरुल्कुन लोहांतन. मिमेट ओराव्टेटाल इच्चुर्कुन हव्ककिर, इच्चुर्कुन क्रुसुंक वेलाड वाटकिर, इच्चुर्कुन मीवा दर्मसास्त्रम कराहना लोह्कुने ओसि पोट्टेते तनकिर, तंचि ओर्कुन नार-नार तिराह्चि तिप्पल्क कीकिर.
35दीनहेंदाल, नीतिमंतुड आता आबेलनगटाल अय्ते गुळि आनि गद्दे नड्डुम मिमेट हव्कता बर्काना मर्रि जकर्याहनगड्क, बचटुर नीतिमंतुल्कुना नेत्तुर अय्ते ई बूमिपोर्रो पोंगागोटमळ जर्गता, आ अंटोरा नेत्तुरता दोसेम पूरा मीपोर्रो अर्रार. 36नना मीकु निजम वेहांतन, इव अन्नि पोल्लें ई पीळितोरपोर्रेन अर्रंतां.
37ए येरुसलेमतोरिटा, ए येरुसलेमतोरिटा! मिमेट पेनदा कबुरतोर्कुन हव्कानोर आंदिर, इंका पेन मिहगा लोहचीतोर पोर्रो मिमेट बंडां हुक्कानोर आंदिर. कोर्रु दाना पीसेन रेक्काना हिळु बल्हा जमा कींतनो, अल्हेन ननागुडा मीवा पिलाल्कुन जमा कियना इंचि बच्चुंगो मल्कां कोरतन. गानि मिमेट मात्रम कोराहिल्लिर. 38हूळा, इंदके मी लोतुन मीहाटीं कुल्ला होळ्समळ जर्गता. पूरा लोन बतल हिलाकोंटा आंता. 39नना मीकु वेहानद बतल इत्ते, “सामिना पोरोलते वायानोर आसिर्वाद दोर्कतोर,” इंचि बदवेरदाका अय्ते मिमेट इन्निरो अदवेरदाका नाकुन मर्रा हूळिर.
Currently Selected:
मत्तयाल 23: esg-Deva
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
