Yohanis 13

Yesus cuci Antua pung murid-murid pung kaki

13:1-20

1Di muka orang Yahudi pung hari basar Paska, Yesus tau kalo su waktu par Antua pi kasi tinggal dunya ni la bale kombali par Antua pung Bapa. Antua salalu sayang orang-orang yang parcaya Antua yang ada di dunya ni. Mala sampe mati, Antua tetap kasi unju kalo Antua paleng sayang dong.

2Waktu Yesus deng Antua pung murid-murid ada makang malang sama-sama, Setang pung Raja su garu-garu Yudas pung hati par jual Antua. Dia tu Simon Iskariot#13:2 Simon Iskariot pung arti, ‘Simon dari kampong Kariot’. pung ana laki-laki. 3Yesus tau kalo Antua pung Bapa su angka Antua par pegang kuasa par samua-samua. Antua jua tau kalo Antua tu datang dari Allah la nanti bale par Allah. 4Tagal itu, Antua badiri dari meja makang tu, la buka Antua pung baju panjang luar, la ambe kaeng sapanggal, kong ika akang di Antua pung pinggang. 5Abis itu, Antua sirang aer dalang loyang kacil satu la mulai cuci Antua pung murid-murid pung kaki. Abis cuci dong pung kaki, Antua seka dong pung kaki kasi karing deng kaeng yang taika di Antua pung pinggang tu. 6Pas sampe di Simon Petrus, dia bilang par Antua kata, “Tuhan#13:6 Tuhan: Teks bahasa Yunani pake kata kurie, yang bisa pung arti ‘Tuhan’, ‘tuang’, ‘bapa’, ka ‘guru’. e! Masa Tuhan musti cuci beta pung kaki tu bagemana?”

7Yesus jawab dia kata, “Petrus! Apa yang Beta ada biking ni ale balong bisa mangarti akang sakarang, mar nanti dari balakang baru ale bisa mangarti akang.”

8Mar Petrus bilang par Antua kata, “Jang Tuhan! Sampe mati jua Tuhan seng bole cuci beta pung kaki!”

Mar Yesus bale bilang par dia kata, “Kalo Beta seng cuci ale pung kaki, ale seng bisa dapa bagiang sama-sama deng Beta pung orang-orang.”

9La Simon Petrus bilang par Antua kata, “Sio Tuhan e! Kalo bagitu, jang cuma beta pung kaki sa, mar beta pung tangang deng kapala lai jua!”

10Yesus bilang par dia, “Orang yang su mandi cuma parlu cuci dia pung kaki sa, tagal dia pung badang samua su barsi. Kamong samua memang su barsi, mar ada yang seng.” 11Yesus bilang bagitu tagal Antua su tau sapa yang mau jual Antua. Tagal itu Antua bilang, “Mar ada yang seng.”

12Abis Antua cuci dong samua pung kaki, Antua bale pake Antua pung baju panjang luar, la bale ka Antua pung tampa kombali. Abis itu Antua tanya dong kata, “Kamong mangarti apa yang Beta biking tadi tu ka seng? 13Kamong biasa panggel Beta par Tuang Guru ka par Tuhan to? Itu memang batul, tagal Beta ni kamong pung Guru deng Tuhan. 14Jadi, kalo Beta yang jadi kamong pung Tuhan deng Guru ni sa cuci kamong pung kaki, kamong jua musti cuci laeng deng laeng pung kaki lai.#13:14 Yesus kasi conto yang luar biasa, tagal par orang Yahudi, biasa jongos yang cuci orang laeng pung kaki. 15Tagal Beta su kasi conto par kamong, jadi kamong jua musti biking macang apa yang Beta su biking par kamong tu.

16Dengar bae-bae tagal apa yang Beta bilang ni batul! Jongos seng labe basar dari dia pung bos. Bagitu lai deng orang yang dapa utus, dia seng labe basar dari orang yang utus dia. 17Kamong su tau samua yang Beta su bilang tu. Jadi kalo kamong biking akang, kamong nanti dapa berkat. 18Apa yang Beta bilang ni bukang soal kamong samua, tagal dari kamong ada satu orang yang nanti seng dapa berkat. Beta tau samua orang yang Beta su pili pung tabiat. Mar, Beta jua pili dia biar apa yang ada dalang Allah pung Tulisang tu musti jadi. Allah pung Tulisang tu bilang, ‘Beta pung tamang yang biasa dudu makang sama-sama deng Beta di meja makang, dia tu nanti tikang Beta dari balakang.’#Lagu-Lagu 49:10

19Beta bilang samua tu par kamong sakarang ni, biar kalo samua tu jadi, kamong nanti parcaya kalo Beta ni Antua, sama deng apa yang Beta su bilang tu.#13:19 Lia catatan kaki di Yohanis 8:24. Lia jua Yesaya 43:11; Yohanis 8:58. 20Dengar bae-bae tagal apa yang Beta bilang ni batul! Sapa yang tarima orang yang Beta utus, itu dia su tarima Beta. La sapa yang tarima Beta, itu dia su tarima Allah yang utus Beta.”

Yesus kasi tau soal sapa yang mau jual Antua

13:21-30

(Matius 26:20-25; Markus 14:17-26; Lukas 22:21-23)

21Abis Yesus bilang bagitu, Antua pung hati paleng susa paskali la Antua bicara tarang-tarang par Antua pung murid-murid tu kata, “Dengar bae-bae tagal apa yang Beta bilang ni batul! Satu dari kamong nanti jual Beta.”

22Antua pung murid-murid langsung baku nganga. Dong samua tabingong-bingong. Dong seng tau yang Antua maksud tu sapa.

23Dari Antua pung murid-murid samua, ada satu orang yang Antua paleng sayang. Dia dudu di Antua pung sabala kanang. 24Jadi Simon Petrus kode dia par tanya Antua kata yang Antua maksud tu sapa. 25Jadi dia rapat-rapat Antua la bisi-bisi, “Tuhan, yang Tuhan maksud tu sapa?”

26Yesus jawab dia kata, “Nanti kalo Beta colo roti dalang kua la kasi akang par satu orang, itu dia tu suda yang Beta maksud.”

Abis bilang bagitu, deng Antua ambe roti sapanggal la colo akang dalang kua kong kasi akang par Yudas, Simon Iskariot pung ana laki-laki tu. 27Pas Yudas tarima roti tu dari Antua, Setang pung Raja langsung maso ka dalang dia pung pikirang. La Yesus bilang par dia, “Apa yang ose mau biking, biking akang capat-capat suda.”

28Mar dari samua yang ada makang sama-sama deng Antua tu, seng ada satu orang lai yang mangarti mangapa kong Antua bilang bagitu par Yudas. 29Mar tagal dia yang pegang kas kepeng, ada babarapa orang yang pikir kata mangkali Yesus suru dia par pi bali apapa yang dong parlu par biking pesta Paska, ka par pi kasi derma par orang-orang kasiang.

30Abis Yudas tarima roti tu, seng rekeng satu dua tiga lai dia langsung pi kaluar. Waktu itu tu su malang.

Parenta yang baru

13:31-38

31Pas Yudas su pi kaluar, Yesus bilang par Antua pung murid-murid di situ kata, “Sakarang ni su waktu par Beta Ana Manusia ni dapa angka tinggi-tinggi. La tagal apa yang nanti jadi par Beta tu, Allah nanti dapa puji-puji. 32Kalo apa yang nanti jadi par Beta biking sampe Antua dapa puji-puji, Antua jua nanti biking sampe Beta dapa puji-puji. Seng lama lai Antua mau biking akang. 33Anana e! Tinggal sadiki tempo sa Beta ada sama-sama deng kamong. Kamong nanti cari Beta, mar kamong nanti seng bisa datang ka tampa yang Beta mau pi tu. Dolo Beta parna bilang akang par orang Yahudi pung pamimping-pamimping la sakarang ni Beta bilang akang par kamong lai.#Yohanis 7:34

34Tagal itu, Beta kasi parenta baru par kamong: Kamong musti baku sayang! Sama deng Beta sayang kamong, kamong jua musti baku sayang satu deng laeng. 35Kalo kamong baku sayang macang bagitu, samua orang nanti tau kalo kamong tu Beta pung murid-murid.”

36La Simon Petrus tanya Antua, “Tuhan! Tuhan mau pi ka mana?”

Yesus jawab dia kata, “Beta mau pi ka tampa yang ale seng bisa pi sakarang. Mar satu waktu ale nanti pi ka sana lai.”

37La Petrus tanya Antua lai, “Tuhan, mangapa kong beta seng bisa iko Tuhan sakarang? Beta siap mati par Tuhan!”

38Yesus bilang par dia kata, “Ale mau mati par Beta? Dengar bae-bae tagal apa yang Beta bilang ni batul! Waktu ayang pai balong bakuku lai, ale su manyangkal tiga kali kalo ale seng kanal Beta.”

Currently Selected:

Yohanis 13: ABMA

Highlight

Copy