Yohanis 17

Yesus pung sombayang

17:1-26

1Abis Yesus bilang samua hal tu par Antua pung murid-murid, Antua angka muka ka langit la sombayang kata, “Sio Bapa e! Ini ni akang pung waktu. Beta minta biar Bapa taru hormat par Bapa pung Ana ni, biar Bapa pung Ana ni jua taru hormat par Bapa lai. 2Bapa su kasi kuasa par Beta par ator samua orang di dunya ni, biar Beta bisa biking samua orang yang Bapa su kasi par Beta tu par hidop tarus-tarus deng Bapa. 3Hidop tarus-tarus tu pung arti, dong kanal Bapa deng Yesus Kristus ni. Bapa tu Allah yang batul, seng ada yang laeng. La Yesus Kristus ni orang yang dapa utus dari Bapa par datang ka dunya ni. 4Beta su kasi unju Bapa pung kuasa yang hebat di dunya ni deng cara kasi klar tugas-tugas yang Bapa kasi par Beta biking tu. 5Tagal itu sio Bapa e, Beta minta biar Bapa biking Beta dapa hormat kombali di muka Bapa, sama deng waktu Beta dapa hormat sama-sama deng Bapa waktu dunya ni balong ada.

6Beta su kasi kanal Bapa par orang-orang yang Bapa su kasi par Beta, yang asal dari dunya yang jahat ni. Dong tu Bapa pung orang-orang, mar Bapa su kasi dong par Beta. Dong su biking apa yang Bapa bilang. 7Sakarang dong su tau kalo samua yang Beta ajar deng biking tu, akang asal dari Bapa sandiri. 8Barang, Beta su kasi tau apa yang Bapa bilang par Beta la dong su tarima apa yang Beta bilang tu. Dong tau batul-batul kalo Beta ni datang dari Bapa. Dong jua parcaya kalo Bapa yang utus Beta.

9Bapa e, Beta sombayang par Beta pung murid-murid. Beta seng sombayang par orang-orang di dunya ni, mar par orang-orang yang Bapa su kasi par Beta ni, tagal dong ni Bapa pung orang-orang. 10Samua orang yang Beta pung, itu jua Bapa pung lai. La samua orang yang Bapa pung, itu jua Beta pung lai. La dari dong, Beta su dapa hormat. 11Beta seng tinggal di dunya ni lai, tagal sakarang ni Beta su mau bale par Bapa. Mar dong masi tinggal di dunya ni. Sio Bapa yang kudus e! Jaga dong deng Bapa pung kuasa yang Bapa su kasi par Beta tu jua, biar dong samua satu hati, sama deng Katong dua jua satu hati. 12Waktu Beta masi ada sama-sama deng dong, Beta jaga dong deng kuasa yang Bapa su kasi par Beta. Beta jaga dong biar dong salamat, cuma ada satu orang sa yang seng. Dia tu yang su dapa putus par mati tarus. Itu jadi biar apa yang su tatulis dalang Bapa pung Tulisang tu jadi.#Lagu-Lagu 41:10; Yohanis 13:18

13Sio Bapa e! Sakarang ni Beta su mau bale par Bapa. Mar, Beta bilang samua ni waktu Beta masi ada dalang dunya ni biar Beta pung orang-orang pung hati sanang, sama deng Beta pung hati sanang lai. 14Beta su kasi tau Bapa pung ajarang par dong la dong su tarima akang. Tagal itu, orang-orang yang seng parcaya Beta dalang dunya ni binci dong. Barang, dong yang tarima Beta pung ajarang tu seng sama deng orang-orang tu, sama deng Beta jua seng sama deng orang-orang tu lai. 15Beta seng minta Bapa ambe dong dari dunya ni, mar Beta minta biar Bapa jaga dong dari Setang pung Raja yang tukang biking kajahatang tu.#17:15 Teks bahasa Yunani pake kata poneros yang pung arti ‘orang yang jahat’ ka ‘kajahatang’. Jadi, nats ni jua bisa pung arti, “Bapa jaga dong dari samua-samua yang jahat”. 16Dong seng sama deng orang-orang yang seng parcaya Beta dalang dunya ni, sama deng Beta jua seng sama deng orang-orang tu lai.

17Tolong dong par jadi Bapa pung orang-orang yang iko Bapa pung mau tarus sa, tagal dong parcaya Bapa pung ajarang yang batul tu. Apa sa yang Bapa bilang tu, itu ajarang yang batul. 18Sama deng Bapa su utus Beta datang ka dalang dunya ni, Beta jua utus dong ka antero dunya ni lai. 19Beta su kasi Beta pung diri antero-antero par biking Bapa pung karja. Beta biking bagitu par dong pung bae, biar dong jua bisa dapa pili par jadi Bapa pung orang-orang, tagal dong parcaya Bapa pung ajarang yang batul tu.

20Bapa e! Beta sombayang bukang cuma par dong sa, mar par samua orang yang nanti parcaya Beta tagal dengar apa yang dong ajar lai. 21La Beta minta biar Bapa biking dong samua satu hati, sama deng Katong dua jua satu hati. Beta jua minta biar Bapa biking dong deng Katong satu hati, biar samua orang di dunya parcaya kalo Bapa yang utus Beta. 22Beta su biking dong dapa hormat, sama deng Bapa biking Beta dapa hormat. Beta biking bagitu biar dong samua satu hati, sama deng Katong dua jua satu hati. 23Beta satu hati deng dong la Bapa satu hati deng Beta, biar dong samua batul-batul satu hati. Hal itu jadi biar orang-orang di dunya ni tau kalo Bapa yang utus Beta deng kalo Bapa jua sayang dong, sama deng Bapa sayang Beta.

24Bapa e! Beta minta biar orang-orang yang Bapa su kasi par Beta tu ada sama-sama deng Beta di Beta pung tampa tu, biar dong bisa lia Beta dapa hormat dari Bapa. Bapa kasi hormat par Beta tagal Bapa paleng sayang Beta dari waktu dunya ni balong ada lai.

25Sio Bapa yang salalu biking apa yang batul e! Orang-orang di dunya ni seng kanal Bapa, mar Beta kanal Bapa. Beta pung orang-orang jua tau kalo Beta ni orang yang Bapa utus. 26Beta su kasi kanal Bapa par dong. Beta nanti biking bagitu tarus, biar dong bisa rasa Bapa pung sayang sama deng Beta rasa Bapa pung sayang deng biar dong satu hati deng Beta lai.”

Currently Selected:

Yohanis 17: ABMA

Highlight

Copy