Lukas 18
18
Sombayang tarus deng jang pata samangat
18:1-8
1Satu kali bagini, Yesus carita ande-ande satu par Antua pung murid-murid, par kasi inga dong par sombayang tarus deng jang pata samangat. 2Antua bilang, “Satu kali bagini, di kota satu ada hakim satu. Dia seng taku Allah deng seng master deng sapa-sapa. 3Di kota tu jua ada janda satu. Dia jaga pi tarus-tarus par hakim tu la bilang, ‘Bapa e, tolong beta biar beta pung musu seng rampas beta pung hak!’
4Satu dua kali, hakim tu seng pastiu deng apa yang janda tu minta. Mar lama-lama, dia mulai bapikir dalang hati kata, ‘Biar kata beta ni seng taku Allah deng seng master deng sapa-sapa, 5mar tagal janda tu tinggal kong biking pastiu beta, labe bae beta tolong dia deng dia pung parkara tu. Kalo seng, skang dia tinggal kong datang tarus-tarus par biking pusing beta!’ ”
6La Tuhan Yesus bilang kata, “Coba pikir hakim yang jahat tu pung kata-kata. 7Kalo dia sa bisa tolong janda tu, apalai Allah! Antua pasti biking apa yang batul par orang-orang yang Antua su pili, yang minta tolong dari Antua siang-malang. Antua seng tunggu lama-lama par tolong dong. 8Dengar Beta bilang par kamong! Antua pasti capat biking apa yang batul par dong. Mar kalo Beta Ana Manusia ni bale kombali ka dunya, Beta masi dapa orang yang parcaya Beta ka seng?”
Allah tarima orang yang sadar dia pung dosa
18:9-14
9Yesus jua carita ande-ande laeng par orang yang suka anggap diri batul di muka Allah la anggap orang laeng seng pung arti apapa. 10Yesus bilang, “Satu kali bagini, ada dua orang pi sombayang di Tampa Sombayang Pusat. Yang satu orang Farisi la yang satu lai tu tukang tagi pajak. 11Orang Farisi tu badiri sombayang dalang hati kata, ‘Sio Allah e! Beta minta dangke banya dari Allah, tagal beta seng sama deng orang laeng yang suka pancuri, hidop seng batul, ka suka maeng serong. Beta jua minta dangke banya, tagal beta seng sama deng tukang tagi pajak yang badiri di sabala sana tu. 12Beta puasa satu minggu dua kali deng kasi parpuluhang dari beta pung hasil karingat samua.’
13Mar tukang tagi pajak tu badiri sadiki jau dari orang laeng, mala seng barani angka muka ka atas. Dia cuma pukul-pukul dia pung dada la bilang, ‘Sio Tuhan Allah e! Tolong kasi unju Tuhan Allah pung hati bae par beta jua! Beta ni orang bardosa!’ ”
14Yesus bilang lai kata, “Dengar Beta bilang par kamong! Waktu tukang tagi pajak tu pulang ka ruma, Allah su kasi ampong dia deng su anggap dia batul di muka Antua, mar orang Farisi tu seng. Barang sapa yang angka diri, Allah nanti kasi jatu dia. Mar sapa yang anggap diri seng pung arti apapa, Allah nanti angka dia.”#Matius 23:12; Lukas 14:11
Yesus kasi berkat par anana kacil
18:15-17
(Matius 19:13-15; Markus 10:13-16)
15Satu kali bagini, orang-orang bawa anana kacil par Yesus biar Antua taru tangang par kasi berkat par dong. Waktu Antua pung murid-murid lia itu, dong tagor orang-orang tu. 16Mar Yesus panggel anana kacil tu la bilang par Antua pung murid-murid kata, “Kasi biar anana kacil tu datang par Beta! Jang pele-pele dong, tagal orang-orang yang macang dong tu yang jadi Allah pung orang-orang waktu Antua pegang parenta jadi Raja. 17Dengar bae-bae tagal apa yang Beta bilang ni batul! Sapa yang seng mau biking diri macang deng ana kacil par tarima Allah parenta dia, dia seng bisa jadi Allah pung orang waktu Antua pegang parenta jadi Raja.”
Orang kaya susa jadi Allah pung orang-orang
18:18-30
(Matius 19:16-30, 20:17-19; Markus 10:17-31)
18Satu kali bagini, orang Yahudi pung pamimping satu tanya Yesus kata, “Tuang Guru yang bae! Beta musti biking apa biar beta bisa hidop tarus-tarus deng Allah?”
19La Yesus bilang par dia kata, “Mangapa kong ale bilang Beta bae? Seng ada satu orang lai yang bae, cuma Allah sa! 20Ale pasti tau Allah pung parenta yang bilang kata, ‘Jang maeng serong, jang bunu orang, jang pancuri, jang jadi saksi yang bicara seng batul-batul, deng musti taru hormat par mama-papa.’ ”#Kaluar dari Mesir 20:12-16; Carita Ulang 5:16-20
21La dia bilang par Antua kata, “Tuang Guru e, beta su biking samua tu dari beta masi kacil lai.”
22Dengar bagitu, Yesus bale bilang par dia kata, “Cuma masi ada satu lai yang ale musti biking. Pi jual ale pung harta samua la bage akang pung kepeng par orang-orang kasiang. Kalo ale biking bagitu, ale nanti dapa harta di sorga. Abis itu, datang kamari la iko Beta.”
23Waktu dia dengar bagitu, dia pung hati susa paskali, tagal dia paleng kaya.
24La Yesus bale muka nganga dia la bilang kata, “Orang kaya paleng susa jadi Allah pung orang-orang biar Antua pegang parenta jadi Raja par dong. 25Masi labe gampang onta saekor maso lobang jarong dari orang kaya jadi Allah pung orang biar Antua bisa pegang parenta jadi Raja par dia.”
26Orang-orang yang dengar Antua bilang bagitu bilang kata, “Kalo bagitu sapa bisa salamat?”
27Tarus Yesus bilang, “Memang manusia seng bisa kasi salamat dia pung diri sandiri, mar Allah bisa, tagal Antua bisa biking apa sa.”
28La Petrus bilang par Antua kata, “Tuang Guru e, katong ni su kasi tinggal katong pung samua-samua par iko Tuang Guru.”
29Tarus Yesus bilang, “Dengar bae-bae tagal apa yang Beta bilang ni batul! Sapa sa yang kasi tinggal dia pung ruma, ka dia pung bini, ka dia pung sudara laki-laki, ka dia pung orang tatua, ka dia pung anana, tagal mau kasi tau orang-orang kata Allah mau pegang parenta jadi Raja par dong, 30dia nanti dapa labe banya di jamang sakarang ni. La di dunya baru, dia nanti hidop tarus-tarus deng Allah.”
Yesus kasi tau soal Antua pung kamatiang
18:31-34
31Yesus panggel Antua pung murid sapulu dua orang tu la bilang par dong kata, “Sakarang ni katong ada bajalang ka kota Yerusalem. Di sana, samua yang Allah pung juru bicara su tulis soal Beta Ana Manusia ni, akang nanti jadi. 32Beta nanti dapa kasi par orang-orang bukang Yahudi par dapa hina, dapa tatawa, dapa luda, 33dapa cambok, deng dapa bunu. Mar akang pung tiga hari, Beta nanti hidop kombali.”
34Mar Antua pung murid-murid seng mangarti apa yang Antua bilang tu. Akang pung arti masi tatutu dari dong, sampe dong seng mangarti akang.
Yesus kasi bae orang buta
18:35-43
(Matius 20:29-34; Markus 10:46-52)
35Waktu Yesus su mau sampe di kota Yeriho, ada orang buta satu dudu di pinggir jalang minta-minta kepeng. 36Waktu dia dengar orang banya ada langgar, dia tanya orang-orang yang ada di situ kata, “Ada apa tu?”
37Dong bilang par dia kata, “Yesus orang Nasaret tu ada langgar.”
38Dengar bagitu, orang buta tu bataria, “Yesus, Raja Daud pung Turunang e! Tolong kasi unju hati bae par beta jua!”
39Orang-orang yang bajalang di muka Yesus dong tu tagor dia, suru dia tado. Mar dia bataria labe basar lai, “Raja Daud pung Turunang e! Tolong kasi unju hati bae par beta jua!”
40Tarus, Yesus barenti la suru orang bawa dia par Antua. Pas dia sampe di dekat Antua, Antua tanya dia kata, 41“Ale mau Beta biking apa par ale?”
La dia bilang par Antua kata, “Bapa,#18:41 Bapa: Teks bahasa Yunani pake kata kurie, yang bisa pung arti ‘Tuhan’, ‘tuang’, ‘bapa’, ka ‘guru’. beta mau dapa lia.”
42La Yesus bilang par dia kata, “Ale dapa lia! Tagal ale parcaya Beta, ale su bae!”
43Oras itu jua, dia bisa dapa lia la bajalang iko Yesus puji-puji Allah. La orang banya yang lia itu, dong samua puji-puji Allah lai.
Currently Selected:
Lukas 18: ABMA
Highlight
Share
Copy
Want to have your highlights saved across all your devices? Sign up or sign in
© 2022, Sinode Gereja Protestan Maluku
