Lukas 20

Orang Yahudi pung pamimping-pamimping tantang Yesus

20:1-8

(Matius 21:23-27; Markus 11:27-33)

1Satu kali bagini, Yesus ada kasi balajar orang banya di orang Yahudi pung Tampa Sombayang Pusat pung kintal deng kasi tau soal Allah pung Kabar Bae. La imam-imam kapala, guru-guru Torat, deng orang Yahudi pung pamimping-pamimping datang 2tanya Antua kata, “Coba bilang dari mana Ale dapa hak par biking samua tu? Sapa yang kasi hak tu par Ale?”

3La Antua jawab dong kata, “Beta jua mau tanya kamong lai. Coba bilang par Beta, 4dari mana Yohanis dapa hak par baptis orang? Dari Allah ka manusia?”

5La dong mulai baku bicara soal itu kata, “Kalo katong jawab, ‘Dari Allah’, Dia nanti bilang, ‘Kalo bagitu, mangapa kong kamong seng parcaya Yohanis?’ 6Mar kalo katong jawab, ‘Dari manusia’, orang banya ni nanti lempar katong deng batu sampe mati, tagal dong parcaya kalo Yohanis tu Allah pung juru bicara.”

7Jadi dong jawab, “Katong seng tau akang dari mana.”

8La Yesus bilang par dong kata, “Kalo bagitu, Beta jua seng mau bilang dari mana Beta dapa hak par biking samua tu.”

Orang Yahudi pung pamimping-pamimping tu sama deng orang-orang yang kalesang kabong anggor

20:9-19

(Matius 21:33-46; Markus 12:1-12)

9La Yesus carita ande-ande satu par orang banya kata, “Satu kali bagini, ada satu orang buka kabong anggor. Tarus, dia kasi sewa akang par babarapa orang par kalesang akang. Abis itu, dia pi ka negri laeng la tinggal lama di sana.#Yesaya 5:1-2 10Waktu su musing pete bua anggor, dia suru dia pung jongos satu par pi ambe dia pung bagiang dari orang-orang yang kalesang kabong tu. Mar, dong pukul jongos tu la suru dia pulang deng tangang kosong. 11Abis itu, dia suru dia pung jongos satu lai pi par dong. Mar dong bale pukul jongos tu deng biking malu dia, la suru dia pulang deng tangang kosong. 12Tarus, dia bale suru dia pung jongos satu lai. Mar dong pukul jongos tu lai sampe luka-luka la buang dia ka luar kabong.

13Akang pung laste, tuang kabong tu bilang, ‘Beta musti biking apa? Labe bae beta suru beta pung ana laki-laki yang beta paleng sayang tu jua. Dong pasti taru hormat par dia.’

14Mar, waktu orang-orang yang kalesang kabong tu lia tuang kabong pung ana tu, dong laeng bilang par laeng kata, ‘Dia ni yang nanti dapa kabong ni! Mari katong bunu dia biar katong bisa dapa kabong ni!’ 15Tarus, dong hela dia kaluar dari kabong tu la bunu dia.”

La Yesus tanya orang banya tu kata, “Kalo tuang kabong anggor tu datang, dia nanti biking apa orang-orang yang kalesang kabong tu? 16Dia nanti datang la bunu dong la kasi kabong tu par orang laeng kalesang akang.”

Dengar bagitu, dong bilang par Yesus kata, “Jang paskali Bapa e!”

17Yesus nganga dong la bilang kata, “Kalo kamong bilang bagitu, kira-kira Allah pung Tulisang yang bilang kalo orang yang Allah su Angka par Kasi Salamat Manusia nanti seng dapa tarima, macang deng batu yang tukang-tukang su buang tu pung arti apa? Akang bilang kata,

‘Batu yang tukang-tukang su buang tu,

Akang su jadi batu pandasi yang paleng panting.’#Lagu-Lagu 118:22

18Sapa sa yang jatu di atas batu tu, dia nanti ancor. La sapa sa yang dapa tindis dari batu tu, dia nanti ancor sampe jadi abu.”

19Orang Yahudi pung imam-imam kapala deng guru-guru Torat tau kalo Yesus ada sindir dong deng ande-ande tu. Jadi, dong mau tangkap Antua oras itu jua, mar dong taku orang banya.

Orang Yahudi pung pamimping-pamimping usaha par biking Yesus bicara sala soal pajak

20:20-26

(Matius 22:15-22; Markus 12:13-17)

20Tarus, orang Yahudi pung imam-imam kapala deng guru-guru Torat taru kira Yesus tarus. Dong utus mata-mata yang biking diri macang deng orang bae-bae par datang tanya-tanya Yesus. Dong harap Antua bicara singgung pemerinta Roma, biar dong bisa pegang Antua pung kata-kata la lapor Antua par gubernur yang pung kuasa par hukum Antua. 21Mata-mata tu bilang par Antua kata, “Tuang Guru e, katong tau kalo apa yang Tuang Guru bilang deng ajar tu batul. Tuang Guru jua seng lia-lia muka, mar kasi tau Allah pung mau deng batul. 22Jadi, kalo iko katong pung atorang agama, katong bisa bayar pajak par Raja Basar Roma ka seng?”

23Mar Yesus tau dong pung akal busu tu la bilang par dong kata, 24“Coba kasi unju kepeng gobang perak satu par Beta kamari! Sapa pung gambar deng nama di kepeng ni?”

Dong jawab Antua kata, “Raja Basar Roma pung gambar deng nama.”

25La Antua bilang par dong kata, “Kalo bagitu, apa yang jadi Raja Basar Roma pung hak, kasi akang par dia. La apa yang jadi Allah pung hak, kasi akang par Antua.”

26Jadi, dong seng bisa ika Antua deng Antua pung kata-kata sandiri di muka orang banya tu. Dong taherang-herang dengar Antua jawab dong bagitu sampe dong tado sa.

Orang mati nanti hidop kombali

20:27-40

(Matius 22:23-33; Markus 12:18-27)

27Abis itu, babarapa orang dari kalompok Saduki datang par Yesus. Kalompok Saduki seng parcaya kalo orang mati nanti hidop kombali.#Utusang pung Carita 23:8 Dong tanya Antua kata, 28“Tuang Guru e, Allah pung Juru Bicara Musa su tulis parenta satu ni par katong orang Yahudi: Kalo ada laki-laki satu kaweng la mati mar seng ada pung ana, dia pung sudara laki-laki musti kaweng deng dia yang su mati tu pung bini, biar dia pung sudara tu pung ana bisa jadi dia yang su mati tu pung ana.#Carita Ulang 25:5

29Satu kali bagini, ada laki-laki tuju ade-kaka. Dari dong tuju tu, yang nomor satu kaweng deng parampuang satu. Mar laki-laki tu mati seng ada pung ana. 30Tarus, yang nomor dua kaweng deng dia pung konyadu tu. Mar dia mati deng seng ada pung ana lai. 31Bagitu lai deng yang nomor tiga. Akang jadi bagitu tarus sampe yang bongso. Dong tuju-tuju mati seng ada pung ana. 32Akang pung laste, janda tu jua mati lai. 33Jadi, katong mau tanya Tuang Guru do. Nanti waktu Allah kasi hidop samua orang yang su mati kombali, bagemana deng janda tu? Kira-kira sapa yang nanti jadi dia pung laki? Barang dong tuju tu samua su kaweng deng dia.”

34Tarus Yesus bilang kata, “Orang-orang yang hidop di dunya sakarang ni, dong kaweng. 35Mar orang-orang yang Allah anggap pantas par dapa kasi hidop kombali dari kamatiang la hidop tarus-tarus deng Antua di dunya baru, dong seng kaweng lai. 36Barang, dong hidop tarus-tarus macang deng malekat-malekat yang jua seng bisa mati. Dong su jadi Allah pung anana, tagal Antua su kasi hidop dong kombali.

37La soal orang-orang mati nanti hidop kombali, Musa su parna kasi unju soal itu waktu dia carita apa yang jadi di rumpu baduri yang tabakar. Waktu itu, Tuhan Allah bilang par dia kata, ‘Beta ni Allah yang Abraham, Isak, deng Yakub ada somba.’#Kaluar dari Mesir 3:6 38Waktu Musa bilang bagitu, dong tiga memang su mati, mar dong pung roh tetap hidop deng ada somba Allah. Jadi, Antua bukang Allah dari orang mati, mar orang hidop. Barang par Allah, samua orang tu hidop.”

39Abis dengar Yesus bilang bagitu, guru Torat babarapa orang bilang, “Tuang Guru e! Apa yang Tuang Guru bilang tu batul paskali!” 40Mulai dari oras itu, dong seng barani tanya apapa dari Antua lai.

Yesus tu Raja Daud pung Tuhan deng turunang

20:41-44

(Matius 22:41-46; Markus 12:35-37)

41Abis jawab barapa orang dari kalompok Saduki tu, Yesus tanya dong kata, “Orang bilang kata Orang yang Allah su Angka par Kasi Salamat Manusia tu Raja Daud pung turunang. Itu batul. Mar kalo iko kamong, Antua tu Raja Daud pung turunang sa ka? 42Barang, Daud sandiri bilang dalang kitab Lagu-Lagu kata,

‘Tuhan Allah su bilang par beta pung Tuhan kata:

Mari dudu di Beta pung sabala kanang, tampa paleng panting, 43sampe Beta kasi kala Ale pung musu-musu la biking dong tundu par Ale.’#Lagu-Lagu 110:1

44Jadi, kalo Daud sandiri panggel Orang yang Allah su Angka par Kasi Salamat Manusia tu par ‘beta pung Tuhan’, Antua mau jadi Raja Daud pung turunang tu bagemana lai?”

Jang iko guru-guru Torat pung kalakuang

20:45-47

(Matius 23:5-7; Markus 12:38-40)

45Waktu orang banya tu ada dengar Yesus bicara, Antua bilang par Antua pung murid-murid kata, 46“Kamong musti ati-ati deng guru-guru Torat. Dong suka bajalang kasana-kamari pake dong pung baju panjang luar yang bagus-bagus biar orang-orang tau kalo dong tu orang basar. Dong sanang kalo orang-orang taru hormat par dong di pasar-pasar. Dong jua suka dudu di muka kalo ada di tampa-tampa sombayang ka di pesta makang basar.#Lukas 11:43 47Dong parlente janda-janda par rampas janda-janda tu pung harta samua. La par tutu dong pung kajahatang, dong sombayang lama-lama biar orang anggap kalo dong tu orang bae-bae. Dong itu pasti nanti dapa hukumang yang labe barát.”

Currently Selected:

Lukas 20: ABMA

Highlight

Copy