Lukas 8

Parampuang-parampuang yang bantu Yesus dong

8:1-3

1Seng lama abis itu, Yesus bajalang koliling kota-kota deng kampong-kampong par kasi tau Kabar Bae soal Allah pegang parenta jadi Raja. Antua pung murid sapulu dua orang tu iko Antua, 2bagitu jua deng babarapa parampuang lai. Dari parampuang-parampuang tu, ada yang Yesus parna user setang dari dong deng ada lai yang Antua parna kasi bae dari panyaki. Satu dari dong tu Maria, yang orang jaga panggel par Makdalena.#8:2 Maria Makdalena tu pung arti ‘Maria dari kota Makdala’. Yesus parna user tuju setang dari dia. 3Ada lai Kusa pung bini Yohana. Kusa tu Gubernur Herodes pung orang-orang karja pung pamimping. Deng ada Susana deng parampuang banya laeng lai.#Matius 27:55-56; Markus 15:40-41; Lukas 23:49 Dong parampuang-parampuang ni pake dong pung kepeng par bantu Yesus deng Antua pung murid-murid.

Ande-ande soal orang bakabong satu deng biji-biji yang dia ambor

8:4-15

(Matius 13:1-23; Markus 4:1-20)

4Satu kali bagini, orang banya kawang-kawang datang dari kota-kota la bakumpul par dengar Yesus pung ajarang. La Yesus mulai carita ande-ande satu par dong. Antua bilang, 5“Satu kali bagini, ada orang bakabong satu pi ambor biji-biji di dia pung kabong. Waktu dia ambor biji-biji tu, ada yang jatu di jalang la dapa inja dari orang deng dapa tetu dari burung sampe abis. 6Ada biji-biji jua yang jatu di tana yang babatu. Jadi waktu akang batumbu, akang jadi layu tagal tana tu karing. 7La ada biji-biji lai yang jatu di rumpu baduri la batumbu sama-sama deng rumpu baduri tu. Mar, rumpu baduri tu garser la gepe akang sampe akang seng bisa babua. 8Mar ada biji-biji lai yang jatu di tana yang bagus. Akang batumbu la babua. Akang pung hasil saratus kali labe banya dari yang dia ambor.” Abis carita ande-ande tu, Antua tabaos par dong kata, “Sapa ada pung talingang, dengar apa yang Beta bilang tu bae-bae!”

9Abis itu, Antua pung murid-murid tanya Antua soal ande-ande tu pung arti. 10La Antua jawab dong kata, “Allah su kasi ijin kamong par tau rahasia-rahasia soal bagemana Antua pegang parenta jadi Raja. Mar par orang laeng, Beta carita akang deng ande-ande sa biar apa yang su tatulis dalang Allah pung Tulisang tu jadi. Akang bilang kata,

‘Biar kata dong lia bae-bae lai,

mar dong seng tau akang pung arti.

Biar kata dong pasang talingang bae-bae lai,

mar dong seng mangarti jua.’#Yesaya 6:9-10

11Jadi ande-ande tu pung arti bagini: Biji-biji tu Allah pung ajarang. 12Biji yang jatu di jalang tu orang yang dengar Allah pung ajarang, la Setang pung Raja datang ambe akang dari dong pung hati, biar dong jang parcaya la salamat.

13Biji yang jatu di tana yang babatu tu orang yang dengar Allah pung ajarang la tarima akang deng hati sanang paskali. Mar dong seng kuat, macang deng tanamang yang pung akar seng maso dalang tana bae-bae, jadi dong pung parcaya seng batahang lama. Waktu dong susa deng sangsara, dong langsung bale balakang dari Allah.

14Biji yang jatu di rumpu baduri tu orang yang dengar Allah pung ajarang, mar abis itu dong tinggal kong pikirang deng dong pung hidop hari-hari, gila harta, deng cuma mau hidop sanang-sanang sa. La deng bagitu, dong pung hidop seng bawa hasil yang bae.

15La biji yang jatu di tana yang bae tu orang yang dengar Allah pung ajarang tu la simpang akang dalang dong pung hati yang barsi deng bae. Dong tetap pegang ajarang tu deng hidop iko Allah pung mau biar kata dapa susa apa sa.”

Taru kira Allah pung ajarang biar kamong mangarti akang

8:16-18

(Markus 4:21-25)

16Yesus carita ande-ande satu par orang banya kata, “Seng satu orang lai yang bakar palita la tutu akang deng sempe ka taru akang di bawa koi to? Dong pasti taru akang di tampa yang tinggi biar samua orang yang maso ka dalang ruma bisa dapa lia akang pung tarang.#Matius 5:15; Lukas 11:33 17Bagitu jua, seng ada apapa satu yang tasambunyi yang nanti seng bisa dapa tau, deng seng ada apapa satu yang tatutu mati yang nanti seng bisa dapa lia ka dapa kasi tau par orang banya.#Matius 10:26; Lukas 12:2 18Tagal itu, dengar Beta pung ajarang bae-bae, jang sampe sala mangarti. Sapa sa yang mangarti apa yang Beta bilang, Allah nanti biking dia labe tamba mangarti lai. Mar sapa yang seng mangarti akang, biar kata dia cuma tau sadiki sa, Antua nanti ambe akang dari dia.”#Matius 13:12, 25:29; Lukas 19:26

Yesus pung sudara par sapa

8:19-21

(Matius 12:46-50; Markus 3:31-35)

19Satu kali bagini, Yesus pung mama deng sudara-sudara datang par baku dapa Yesus. Mar dong seng bisa datang dekat Antua tagal orang banya. 20La satu orang bilang par Antua kata, “Tuang Guru e, Tuang Guru pung mama deng sudara-sudara ada badiri di luar mau baku dapa deng Tuang Guru.”

21Mar Yesus bilang par orang banya tu kata, “Orang-orang yang dengar Allah pung ajarang la biking akang, dong tu Beta pung mama deng Beta pung sudara-sudara.”

Yesus kasi tado anging ribut basar

8:22-25

(Matius 8:23-27; Markus 4:35-41)

22Satu kali bagini, Yesus bilang par Antua pung murid-murid kata, “Mari katong balayar ka sabala dano.” Jadi dong nai parau la balayar. 23Waktu dong ada balayar, Yesus tatidor. Skrek bagini, anging ribut basar datang la galombang pukul badang parau sampe aer maso amper pono parau tu la dong amper tinggalang. 24Tarus, Antua pung murid-murid kasi bangong Antua kata, “Tuang Guru, Tuang Guru e! Katong su amper tinggalang!”

Tarus Antua bangong la hokmat anging deng galombang basar tu kata, “Tado!” Langsung anging deng galombang tu barenti sampe dano tu licing macang deng minya. 25Tarus Antua bilang kata, “Kamong parcaya Beta ka seng?”

Dong samua takotang deng taherang-herang la laeng bilang par laeng kata, “Antua ni sapa, sampe anging deng galombang jua iko Antua pung parenta?”

Yesus user setang dari laki-laki satu yang takanal

8:26-39

(Matius 8:28-34; Markus 5:1-20)

26Yesus deng Antua pung murid-murid balayar sampe di orang Gerasa pung daera, yang ada di dano Galilea pung sabala, baku tangada deng propinsi Galilea. 27-29Di daera tu, ada laki-laki satu dari kota dekat situ yang takanal la setang hela-hela dia tarus. Jadi, orang-orang di kota rante dia pung kaki tangang. Mar biar kata dong jaga dia tarus, dia bisa kasi putus rante-rante tu la setang bawa dia ka tampa-tampa yang sunyi. Jadi, dia su lama seng tinggal di ruma lai, mar tinggal di kubur-kubur, deng jua su lama talanjang bulat.

Waktu Yesus turung ka dara, orang yang takanal tu pi par Antua. Pas dia dapa lia Antua, dia bataria la tikang lutu di muka Antua. Abis itu, Yesus parenta setang yang ada dalang dia tu kata, “Kaluar dari dia!”

Mar setang tu jawab Antua deng suara basar kata, “Yesus, Allah yang Paleng Tinggi pung Ana e! Se ada pung urusang apa deng beta? Beta minta kalo bole jang siksa beta jua.”

30Tarus Antua tanya dia kata, “Ose nama sapa?”

Dia jawab, “Beta nama Legion.”#8:30 Legion tu bahasa Latin par tantara Roma satu kalompok yang pung banya anam ribu orang. Dia bilang bagitu tagal setang paleng banya ada dalang dia. 31La setang-setang tu minta deng sunggu-sunggu dari Yesus par jang suru dong pi ka lobang paleng kadalang tampa setang-setang dapa hukum.

32Di dekat situ ada babi sakawang yang cari makang di badang gunung. La setang-setang tu minta deng sunggu-sunggu dari Yesus kata, “Sio Yesus e! Kasi biar katong maso ka dalang babi-babi tu jua!”

Antua kasi ijin setang-setang tu maso ka dalang babi-babi tu.

33La setang-setang kaluar dari orang yang takanal tu la maso ka dalang babi-babi. Tarus, babi-babi tu lari buang diri dari jurang ka dalang dano la mati tinggalang.

34Pas orang-orang yang jaga babi-babi tu lia bagitu, dong lari ka kota deng kampong-kampong yang baku dekat deng tampa tu la carita akang par orang-orang di situ. 35Dengar bagitu, orang banya kaluar dari kota deng kampong-kampong par lia apa yang su jadi. Waktu dong pi par Yesus, dong lia orang yang dolo takanal tu ada dudu dekat Yesus pung kaki. Dia pung pikirang su bale deng su pake pakiang. Pas lia bagitu, dong takotang.

36La orang-orang yang lia Antua kasi bae orang yang takanal tu carita akang par dong. 37Tarus, orang-orang Gerasa tu samua minta deng sunggu-sunggu dari Yesus par kaluar dari dong pung daera tu, tagal dong takotang paskali. Jadi Yesus dong nai parau la balayar kombali.

38Mar waktu Yesus mau pi, orang yang takanal tadi tu minta deng sunggu-sunggu dari Antua par iko Antua lai. Mar Antua suru dia pulang. Antua bilang, 39“Pulang ka ale pung ruma la carita samua yang Allah su biking par ale.” Jadi, dia pi ka antero kota la carita samua yang Yesus su biking par dia.

Yesus kasi hidop Yairus pung ana deng kasi bae parampuang satu yang dapa mens seng barenti-barenti

8:40-56

(Matius 9:18-26; Markus 5:21-43)

40Waktu Yesus bale dari sabala dano Galilea, orang banya tarima Antua tagal dong samua su tunggu-tunggu Antua. 41Tarus, ada orang satu yang nama Yairus datang ka situ lai. Dia tu satu dari orang Yahudi pung kapala tampa sombayang. Dia datang la tikang lutu di muka Yesus la minta deng sunggu-sunggu dari Antua par pi ka dia pung ruma, 42tagal dia pung ana parampuang satu areng-areng su amper mati. Ana tu mangkali umur sapulu dua taong.

Waktu Yesus masi di tenga jalang ka Yairus pung ruma, orang banya baku soso di pinggir-pinggir Antua. 43Dari orang banya tu, ada parampuang satu yang su sapulu dua taong dapa mens seng barenti-barenti. Seng ada satu orang lai yang bisa kasi bae dia. 44Dia maju iko Antua dari balakang, la sonto Antua pung baju panjang luar pung ujung. Oras itu jua dia langsung bae dari dia pung panyaki tu. 45Tarus Yesus bilang kata, “Sapa yang sonto Beta ni?”

Tagal seng ada yang mangaku, Petrus bilang, “Tuang Guru e, banya orang ada urung deng dong baku soso di pinggir-pinggir Tuang Guru.”

46Mar Yesus bilang kata, “Ada orang yang sonto Beta, tagal Beta rasa ada kuasa yang kaluar dari Beta pung diri.”

47Parampuang tu gamatar tagal dia sadar kalo apa yang dia biking tu su dapa tau. Jadi dia maju la tikang lutu di muka Antua la carita par Antua di muka orang banya soal mangapa kong dia sonto Antua deng bagemana dia langsung jadi bae. 48La Yesus bilang par dia kata, “Nona#8:48 Nona: Teks bahasa Yunani pake istila “Beta pung ana parampuang”. Yesus pake istila itu par kasi unju Antua pung rasa sayang par parampuang tu. e, tagal nona parcaya Beta, nona su bae. Pulang jua deng dame!”

49Waktu Yesus masi bicara deng parampuang tu, ada satu orang datang dari Yairus pung ruma la bilang par Yairus kata, “Bapa e, bapa pung ana tu su mati, jadi jang biking pastiu Tuang Guru lai.”

50Mar Yesus dapa dengar apa yang dong bilang tu. Jadi, Antua bilang par Yairus kata, “Jang taku, parcaya sa! Ale pung ana tu nanti bae.”

51Waktu sampe di Yairus pung ruma, Yesus seng mau satu orang lai maso iko Antua, cuma Petrus, Yohanis, Yakobis deng ana tu pung mama-papa sa. 52Samua orang manangis marata ana tu, mar Yesus bilang par dong kata, “Jang manangis! Ana ni seng mati, dia cuma tidor sa.”

53Orang banya tu tatawa Antua, tagal dong tau kalo ana tu su mati. 54Mar Yesus pegang ana tu pung tangang la bilang par dia kata, “Ana e, bangong!” 55Ana tu pung napas bale kombali, la oras itu jua dia bangong la badiri. Tarus, Yesus suru dong kasi makang dia. 56Dia pung mama-papa herang paskali, mar Yesus larang dong par jang carita apa yang su jadi tu par sapa-sapa.

Currently Selected:

Lukas 8: ABMA

Highlight

Copy