Luk 19

Jisɔs na Sakieus

1Jisɔs anam ka Jɛriko ajɛn asing ka ɛjɛbɛ ji. 2Munnu wiwi ajɔ nton a ba ɛkiɛ taksi abengɛ si Sakieus ka ajɔ ɛfanga nnɛ. 3Ajɔ alɔg sa ayɛ nagana nnɛ yɔ Jisɔs are, ka arima ayiɛ atebsi agbɛnɛgbɛnɛ sɛ ɛbɔngɔ esono. 4Ka abɛ amo kisi ama ayar ntakpa ete sɔng ayɛ Jisɔs, atebsi asing ka mba yi.

5Ngara yi Jisɔs asi ka mfo bi, atab amar abri ka bɔsɔ atɔa, “Sakieus, sɛnɛ ba ɛbanɛban. Ɛnɛji njɔ ka nju ɛyɛ.” 6Ka Sakieus asɛnɛ ɛbanɛban ama kpere Jisɔs na ɛyɛbɛ nete.

7Anɛ wɔɔ ba ayɛ ji ɛwɛmɛ ajam kpɛn, “Jisɔs amomo nereb ka nju a nne a abibi afɛ.”

8Ka sakieus atam ayimi atɔ Ntaa, “Ntaa, yɛ! Nkɔghɔ ɛja mbe ɛbaa nkɛ akpak, ka kpere nnɛ yi nneɛ amar, ntɔnɔ tɔnɔ nkiɛ ka mkpɛ ɛnɛ.”

9Ka Jisɔs atɔɛ, “Ɛnɛji nanagha ɛma ba ka nju yi, atebsi munnu yɔ, atama, re mmɔ a Abraam. 10Ka Mmɔ a Munnu aba ama sɛb afɛnɛ anagha anɛ ba atantan.”

Ɛbɛɛ akpugha ya abeng si Mina

(Mat 25:14-30)

11Sa anɛ ajɔ ayongo atɔng ka kpere ejo ji Jisɔs ajɔ arag, Jisɔs atuu mbɔ ɛbɛɛ ngara yi ame kpere Jɛrusalɛm ka anɛ akana si oton Ɔsɔwɔ ɛjam munu. 12Ka arag: “Munnu wiwi ya aru ka ɛyagha oton amo ka ndaba mba ɛka sɔng akonɛ oton ka afɛnɛ. 13Sɔng atam abeng abɔanju ɛbɛ wobo ka akɛ kpere nnɛ akpugha mina#19:13 Mina akpugha ya akɛ nnɛ ya ane noto ka afo atanarɔn . Ka atɔ mbɔ, ‘Kɔ akpugha yafa ene nigbingi, tɛtɛ mmannafɛnɛ.’

14“Ka munnu yɔ asagga anɛ ɛbɛ sagga, ka ato bɛrɔghanto sa ama tɔɛ, ‘Warr erisɛb munnu yɔ sa ajɔ nton ɛwɛrɛɛ.’

15“Ka akono kono munnu yɔ oton, ka afɛnɛ njam. Naosunosu abeng abɔanju ɛbɛ ba akɛ akpugha ama yimɛ ka nibri, sɔng agbɛrɛ nsing asɛ ya anɛ.

16“Mgbɔghamba nnɛ aba ama rag, ‘Ntaa, akpugha yɔ ɔkɛm nnɛ nsing akpugha mina wobo mkpɛnɛ na yɔ ɔkɛm.’

17“Nsɛnju arag, ‘Omene etingi mmɔanju ɛwaa! Si omene nkokomo noto yi nkia, kɔ ɛjɛbɛ wobo wɔ ofe.’

18“Ɛtɔɔngɔ mmɔanju aba ama rag, ‘Ntaa, nnɛ nsing mina ɛrɔn mkpɛnɛ na yɔ ɔkɛm.’

19“Nsɛnju ɛwɛ akpɛ, ‘Wɔ fe ɛka bɔrɔn.’

20“Ka mmɔanju yɔga aba ama rag, ‘Ntaa, yɛ mina ɛya; nkɔ mbar ka afiafɔng. 21Ɔbɔn enem ɛkia, atebsi wɔ nkora munnu yɔ. Ɔkɔghɔ ji erijɔ jaja ɔfɛnɛ ufu ji ori bɔm.’

22“Nsɛnju atɔɛ, Wɔ ebibi mmɔanju! ‘Nkɔghɔ ano nnyɔ ɛyɛ nnuma. Wɔ yɔ onyi si mmɛ nde nkora munnu, nkɔghɔ ji erijɔ jajaa nfɛnɛ nfu ji ndi bɔm? 23Nang ka orikag akpugha ɛyaa ka nju etonga akpugha, sɔng nkru mankɔ na nkonanjam?’

24“Ka atɔ anɛ ba ayim fa, ‘Tabɛ mina ɛyɛ ɔkɛ mmɔanju ya akpe mina wobo.’

25“Ka atɔɛ, ‘Ntaa, eyoghoyoghoga akpe mina wobo!’

26“Ee nton yi akpɛ, ‘Nɔngɔ mmɛ ntɔ kpere nnɛ ya anɛ nsing ka ji akiɛ, akpɛnɛ ɛga, ka nnɛ ya arinɛ nsing a jaji, araggasi mankokomo ya akpe atabɛtaba. 27Ka anɛ baujing ɛbaa ba arisɛbsi mmɛ njɔ nton a mbɔ, ba na mbɔ fa eyon mbɔ ka nibri ɛnaa.’ ”

Jisɔs anam ka Jɛrusalɛm si Nton

(Mat 21:1-11; Mak 11:1-11; Jɔn 12:12-19)

28Si Jisɔs akan nutuu ɛbɛɛ ji, ajɛn amo kisi, amogho ya Jɛrusalɛm. 29Sa ajɛn akpere Bɛtfej na Bɛtani ka nkɔa Nkonkon a Olib, ato asɔgba aba amo kisi, atɔ mbɔ, 30“Sɔng ga ka ɛjɛbɛ ji ere kisi, sɔ ɔnama, ɔyɛ ndɔra nnyanɔsɔn ya akan fa, yi nnɛ akaghatɔghɔ komo. Fɔngngɔ ɔba nabi fa. 31Ka kpere nnɛ ya abɔmma si, ‘Nang ka ɔfɔngngɔ?’ Tɔɛ si, ‘Ntaa asɛbsɛb.’ ”

32Ka anɛ ba ato mbɔ amo kisi amayɛ nsɛrɛ si Jisɔs atɔ mbɔ. 33Sa ajɔ afɔngngɔ, abɔfɔnɔ abɔmmɔ mbɔ, “Nang ka ɛfɔngɔ ndɔra nnyanɔsɔn yi?”

34Asɔgba akpɛ, “Ntaa asɛbsɛb.”

35Ka aba na ndɔra nnyanɔsɔn ama kɛ Jisɔs. Ka akɔ akpagha bɛnɛmɛ mbɔ abono ka mfo bi anɛ ajɔ afɛnɛ afe Jisɔs akomo. 36Sa ajɔ amo, anɛ ajug akpagha bɛnɛmɛ mbɔ ayan ka mba.

37Ngara yi akpere Jɛrusalɛm, ka mfo bi mba asɛnɛ amo ya Nkonkon a Olib, ntakpa ɛbɔngɔ asɔgba ɛyɛ agɔngɔ niyighi ka atighi Ɔsɔwɔ gbogbo ka akpɔgisi a mbe ya amene amar mbɔ ayɛ.

38“Ɛnara ɛjɔ ɛkɛ Nton ya abagha ka mbeng a Ntaa!”

“Nanaa ka etek Ɔsɔwɔ na negere ɛjɔ ɛkɛ Ɔsɔwɔ ya are ka bɔsɔ!”

39Ka Bafarisi bamɔng ka ɛbɔngɔ atɔ Jisɔs. “Nkpekpene, yam asɔgba ɛya agɔ ɛkan!”

40Jisɔs akpɛ, “Ntɔ war, agɔ na ɛkan, atan agɔngɔ nitighi Ɔsɔwɔ gbogbo.”

41Sa aba akpere Jɛrusalɛm ayɛ ɛjɛbɛ, anan ateb ji ɛwɛmɛ ɛkɛ anɛ ba ɛjɛbɛ ji 42arag, “Nasi enyinyi ji ɛbagha na nanaa ɛnɛji, ka munu ɔyɛm, atebsi amawarbar. 43Ka ngara aragha bagha yi anɛ baujing ɛbrɛ akag ɛba asibi war, ka agbanga war asibi, aba war akag. 44Arɔbɔ war kapakpa na anɛ ɛbrɛ. Nju yayi asam ka ɛyagha ɛjɛ, atebsi eritama ngara yi Ɔsɔwɔ aba sa ama nagha war.”

Jisɔs amo ka Nju Ɔsɔwɔ

(Mat 21:12-17; Mak 11:15-19; Jɔn 2:13-22)

45Ngara yi Jisɔs anam ka Nju Ɔsɔwɔ ka ajam nakama ba egora mbe ka nna nju sa aru. 46Atɔ mbɔ, “Ayɛnɛ ka nwɛr Ɔsɔwɔ si, ‘Nju ɛyaa ajɔ nju a njɔ’ ka ɛmɛfɛnɛ ɛkɔ ɛnɔngɔ ‘mfo bi anyaju abibi.’ ”

47Jisɔs ajɔ akpene ka nju Ɔsɔwɔ kpere ofo. Ka nton a Baɛjɔ Ɔsɔwɔ, bekpena ejighi na anɛ bisi ka ɛbɔngɔ anɛ ba ajɔ alɔg sa ayonɛ. 48Ka ariyɛ mba, atebsi anɛ wɔɔ ajɔ ayongo atɔng akiɛ, arisɛbsi nono nani esing mbɔ.

Currently Selected:

Luk 19: NDD Nta

Highlight

Copy