Luk 23

Jisɔs ka nibri Falet na Ɛrɔd

(Mat 27:1,2,11-14; Mak 15:1-5; Jɔn 18:28-38)

1Ka abɔngɔ abokogho wɔɔ ba ajɔ ka nkɔn atam amo na Jisɔs ka mfo a Gɔbanɔ Falet. 2Ka ajam naragha adɛ alaghɛ, aragha, “Warr emoyog si munnu yɔfa asɛb efegheayɔ akɛ anɛ ɛbrɛɛ. Atɔ mbɔ si aki kpe taksi ɛkɛ Sisa, afɛnɛ arag si yɛ are Kras, nton.”

3Ka Falet abɔmmɔ Jisɔs, “Wɔyɔ ore nton a Jus?”

“Wɔyɔ ɔrag na,” Jisɔs akpɛ.

4Ka Falet atɔ nton a Baɛjɔ Ɔsɔwɔ na ɛbɔngɔ, “Ndɛyɛ ejighi ji munnu yɔ agbɔ.”

5Ka mbɔ ayim fa ka ajaa ya atɔ Falet, “Nekpene ɛnɛ yɛ ɛbagha na efegheayɔ ɛkɛ anɛ wɔɔ ka Judia. Ajam nekpene ka Galili tɛtɛ amisi fa nani ka Jɛrusalɛm.”

6Sa ayog ji mbɔ aragha, Falet abɔmmɔ si “Jisɔs nnɛ Galilian yɔ?” 7Ngara ya agbɛrɛ si Jisɔs aru ka mfo bi ere ka nɔyɔ Ɛrɔd, Falet atoɛ akɛ Ɛrɔd, ya atam a jɔ ka Jɛrusalɛm ka ngara yi.

8Ka nete ɛyɛbɛ Ɛrɔd sa ayɛ Jisɔs, atebsi mba ama rab ya asɛb si ayiɛ. Ɛrɔd amoyog ebe mbe bi Jisɔs ya ane, asɛb si ka ane ndenge yi atɔngɛ. 9Ɛrɔd abɔmmɛ ebe abɔmmɔ, ka Jisɔs jaji ariɛkpɛ. 10Nton a Baɛjɔ Ɔsɔwɔ na bekpena ejighi ayimi fa, aragha akora adɛ alagha Jisɔs. 11Ka Ɛrɔd na ɔsɔja ɛbɛ atoɛ afɛnɛ akanɛ. Alebɛ anɔba abɔ́, ka Ɛrɔd atoɛ akɛ Falet. 12Jam ka ofo bi Ɛrɔd na Falet akɔnɔ na atɛ, eyoghoyogho ajɔ ka ujing.

13Falet abeng aton a Baɛjɔ Ɔsɔwɔ na abokogho na anɛ aba amakɔn, 14ka atɔ mbɔ, “War ɛba na munnu yɔfa ɛmɛ kɛm si ajɔ asɛb efegheayɔ akɛ anɛ brɛ. Mmɔ bɔmmɔ abɔmmɔ ka nibri ɛnɛrɛ ka ndɛyɛ mfo bi agbɔ ejighi si war ɛragha. 15Ɛrɔd titi, ariyɛ mfo bi agbɔ ejighi ka atoɛ afɛnɛ akɛ warr; si war ɛyɛ, arine jaji ji efumu na nuku. 16Ka nnumɛ nfɛnɛ nsighɛ abɔ.” 17(Ka kpere eyighi Sing sighi Gɔbanɔ ya ayighi nnɛ wiwi ka mgbɔkɔbɔ asighi abɔ.)

18Ka ɛbɔngɔ wɔɔ abenge, “Ba sɔng na munnu yɔfa! Ɛkɛ warr Barabas!” 19(Barabas atoɛ mgbɔkɔbɔ ateb eburu ji ɛgbɔ ka ɛjɛbɛ na anɛ ba akpɔ.)

20Falet asɛb mba sa asighi Jisɔs abɔ, Falet afɛnɛ arag na mbɔ. 21Ka mbɔ arigɔ nebenge, “Koɛ! Koɛ!”

22Ka arag na mbɔ ka mkpɛ ɛsa: “Jɛji? Bagha ejighi ji ja agbɔ? Ndɛyɛ ji ane ji ebenge ka nuku. Ka nnumɛ nfɛnɛ nsighi abɔ.” 23Ka abenge gbogbo Falet kɛ nɔyɔ ekoɛ, ka ebenge mbɔ ɛsɛrɛ Falet asighi abɔ. 24Ka Falet atama ane si mbɔ asɛbɛ. 25Ka Falet asighi Barabas abɔ, nnɛ ya ato mgbɔkɔbɔ ka efegheayɔ na eyon a nnɛ, ka asighi Jisɔs abɔ akɛ mbɔ.

Sa ako Jisɔs ka ete njang ɛnɛ

(Mat 27:32-44; Mak 15:21-32; Jɔn 19:17-27)

26Si ɔsɔja ajɔ amo na Jisɔs, akɔrɔ munnu ya abengɛ si Simɔn ya aru ɛjɛbɛ Sarene, Simɔn ajɔ amo ya Jɛrusalɛm ka ane a asɔn ete njang ɛnɛ atɔɔngɔ Jisɔs ka njam. 27Ebe anɛ atɔngɛ, kpɛnɛ abaka ba ajɔ anan. 28Jisɔs amanga abri mbɔ arag, “Abaka Jɛrusalɛm, ba kim nan; ba nan biji ɛbrɛ na abɔ brɛ. 29Ka ngara aragha bagha yi ɛragsi, ‘Ɛnara ɛjɔ ɛkɛ abaka ba arifɔ abɔ, nna ya akagha tɔghɔ wɛn mmɔ na abɛn ya mmɔ akagha tɔghɔ yab!’ 30Ka

“ ‘atɔ atakpa akonkon, “Gbɔ nyɛghɛ warr!”

Ka atɔ akonkon “Bono warr!” ’

31Ka anɛ anena mbe bifa akɛ ete ji ere mbɛr, ka jɛ ɛwɛmɛ ɛkɛ iku a ete?”

32Ɔsɔja emo na Jisɔs na abunu aba ba ane abibi afɛ sa ama yon. 33Ngara ya asi ka mfo bi abeng si Akpagha bisi#23:33 Mfo bi ya abo akpagha bisi anɛ. , fayɔ ya akoɛ, na abunu aba ba ane abibi afɛ, ako wiwi ka ɔbɔ bunu yɔga ka ɔbɔ baka Jisɔs. 34Jisɔs akag njɔ, “Nsɛ, tamsighi mbɔ, atebsi anyim ji ya ane.” Ka atob nafanga sɔng agbɛrɛ sa abanga abɔ́ a ɛyɛ.

35Sa anɛ ayim fa asɛngɛ, anɛ bisi ayɔnɛ. Ka mbɔ arag, “Yɛ anaghɛ anɛ baga, nɔngɔ atam anagha nɛnɛ arena are Kras, nnɛ yɔ Ɔsɔwɔ asanga.”

36Ɔsɔja ɛtama ɛba ɛmɛ akanɛ. Akiɛ amanga amam 37ka arag, “Orena nton a Jus, nagha nana.”

38Ayɛnɛ, ka bɔsɔ ete njang ɛnɛ ɛjɛ: fa nton a jus.

39Nne a abibi afɛ wiwi ya atɔg ka ete njang ɛnɛ arag abibi ano akɛ Jisɔs: Arag “Wɔ sang ore Kras? Nagha nana ɔtam ɔnagha warr!”

40Ka nne a abibi afɛ yɔga ayamɛ. “Wɔ Ɔsɔwɔ ɔrɔmɔ bɛghɛ,” ka arag, “Ateb ɛkpɔghɔ nuku nini? 41Anumu warr ka ji ene, Ka munnu yɔfa ebibi jaji arine.”

42Ka amanga abri Jisɔs arag, “Gbɔnter ɛyaa ɔmanna ba ka oton ɛba.”

43Jisɔs akpɛɛ, “Ntɔa kɛdɛdɛghɛ, ɛnɛji ɔjɔ nanaa ka nnɔbɔ a mfo bi abeng si Faradas.”

Nuku Jisɔs

(Mat 27:45-56; Mak 15:33-41; Jɔn 19:28-30)

44Ka ngara yi njon ame kpere niyimi ka bokorisi, ejingi ebono nsisi yi wɔɔ tɛtɛ nkrangka ɛsa ka efen. 45Ka njon agɔ nayagha. Ka ekpeghe nju Ɔsɔwɔ ka Jɛrusalɛm ɛya ɛja baba. 46Ka Jisɔs arag gbogbo, “Nsɛ, mmisighi abɔ ka etughu ɛjaa nkia wɔ.” Sa arag na akpɔ.

47Ntakpa nnɛ ɔsɔja Rom, ayɛ ji ɛmɛwɛmɛ, atig Ɔsɔwɔ arag, “Kɛdɛdɛghɛ munnu yɔfa afɔfɔ.” 48Ngara yi anɛ wɔɔ agba sa ayɛ ji ɛwɛmɛ, afu abɔ ka nggang amo esiyiri esiyiri. 49Anɛ wɔɔ ba agbɛrɛ Jisɔs nnɔbɔnnɔbɔ na abaka ba atɔngɛ ka Galili aba, ayimi daghadagha, ayɛ ji ɛwɛmɛ.

Sa asam Jisɔs

(Mat 27:57-61; Mak 15:42-47; Jɔn 19:38-42)

50Ka munnu ya abengɛ si Josɛf, ajɔ nnɛ wiwi ka ɛbɔngɔ abokogho a Jus, etingi nnɛ ya arijɔ ane ebibi, 51ya aritama na ji abokogho aragha na ji ane. Aru ka ɛjɛbɛ ji abeng si Arimatia, ka Judian, ajɔ abri si oton Ɔsɔwɔ ɛba. 52Ka Josɛf ama abɔmmɔ Falet sa akiɛ iku Jisɔs. 53Ka Josɛf ama sɛnɛ iku Jisɔs afuɛ ka anɔba abɔ́ ama akag ka ɔnam bi asam ka natan, nkuanɛ yayi fa akagha tɔghɔ bo. 54Ofo bi ɛjɔ ofo etongo mbe anɔngɔ ka ofo esiayɔ bi ɛkpa jam. 55Abaka ba aru na Jisɔs ka Galili atɔɔngɔ Josɛf amayɛ ɔnam na sa abo iku Jisɔs. 56Ka afɛnɛ njam ka etek ama tongo nnyan yi eyughu nyɛbɛ nasan na akuu ya ayughu mfɔm. Ka ofo esiayɔ asiayɔ si ejighi ɛtɔngɔ.

Currently Selected:

Luk 23: NDD Nta

Highlight

Copy