Luk 24

Jisɔs aminyimi

(Mat 28:1-10; Mak 16:1-8; Jɔn 20:1-10)

1Ka efurusu bribri ka mgbɔghamba ofo ka nsɛ, abaka ba akɔ nnyan yi eyughu nyɛbɛ nasan yi mbɔ atongo amo na yi ka ɔnam. 2Sa asi, ayɛ sa amibingi natan ka ɔnam abo ka nkɔ, 3ka ngara yi anam ka ɔnam ariyɛ iku Ntaa Jisɔs. 4Sa ajɔ akana ateb ji ɛmɛwɛmɛ ɛkɛ iku Jisɔs, naosunosu ayɛ abunu aba ayɔbɔ abɔ́ ya ayagha nasi mgbambri ayim alagha mbɔ. 5Ɔbɔn ene abaka ba ajɛbɛ bisi ka nsisi, ka abunu ba atɔ mbɔ, “Jɛ ɛsɛrɛ ka ɛsɛb nnɛ a mber ka ɛbɔngɔ akuanɛ? 6Jisɔs fa arem; aminyimi ka nuku! Ba gbɔnter ji atɔ war ngara yi yɛ akpagha re nanɛrɛ ka Galili: 7‘Asighi Mmɔ a Munnu abɔ akɛ ba ene a abibi afɛ, akoɛ, ka ɛtɔɔngɔ afo asa afɛnɛ anyimi.’ ” 8Ka abaka ba agbɔnter a ano ya Jisɔs atɔ mbɔ.

9Ngara yi abaka ba aru ya ɔnam afɛnɛ ya etek, atɔrɔ mbe bi wɔɔ atɔ asɔgba Jisɔs wobo na wiwi na anɛ baga wɔɔ. 10Abaka ba atɔrɔ mbe bi atɔ afɔsil a Jisɔs ajɔ Meri Magdalin, Jɔana, Meri ji nnyɛ Jemsi, na abaka baga ba ajɔ na mbɔ. 11Ka asɔgba aritama ji abaka ba atɔ mbɔ, atebsi ano ya ajɔ nasi ɔdɛmmɛ akɛ mbɔ. 12Ka Fita atam abɛ ɛban amo ka ɔnam. Ngara yi asi ka ɔnam, agɔngɔ ayɛ anɔba abɔ́ ya afu Jisɔs anɔng nanting, ka Fita afɛnɛ njam, akana ka nete ɛnɛ ji ɛmɛwɛmɛ.

Ka mba ya amogho Ɛmmas

(Mak 16:12,13)

13Ka ofo bi asɔgba Jisɔs aba ajɔ amo ka ɛjɛbɛ ji abeng si Ɛmmas, ekpere mal esimma ka usi ka Jɛrusalɛm. 14Ajɔ arag na atɛ ateb kpere ejo ji ɛmɛwɛmɛ. 15Sa ajɔ arag mbe bi na atɛ, Jisɔs fɔnɔ aba ama ajɛn na mbɔ; 16ka ane mbɔ si akiɛ renge.

17“Jisɔs abɔmmɔ mbɔ, Yɛ ɛrag jɛ na atɛ ɛjɛnɛ emogho?”

Mbɔ asa ayimi, ajɛbɛ bisi nasi anɛ ba are ka esiyiri. 18Nsɔgba wiwi yi abengɛ si kleofas, abɔmmɔ Jisɔs, “Wɔ yɔ nanting yɔ ore njɛnanɛ fa ka Jɛrusalɛm ya akagha yog mbe bi ɛmɛwɛmɛ ka afo ya asingsing.”

19Jisɔs abɔmmɔ, “Bagha mbe?”

“Mbe bi ɛwɛmɛ ateb Jisɔs nnɛ a Nasarɛt,” mbɔ akpɛ. “Ajɔ mbono Ɔsɔwɔ, na nsam ka naragha nono na nene ka nibri Ɔsɔwɔ na anɛ wɔɔ. 20Nton a Baɛjɔ Ɔsɔwɔ na anɛ bisi ɛbrɛ asighɛ abɔ akɛ sa ayon, ka akoɛ ka ete njang ɛnɛ; 21Ka warr ɛjɔ ekonoekpo si yɛyɔ ya abagha ama anagha warr Isɛrɛl, ka abɔ anɛ ba ujing ɛbrɛ. Kpɛnɛfa, ɛnɛji ka afo asa yi mbe bi wɔɔ ɛwɛmɛ. 22Ka kpɛnɛfa, abaka ɛbrɛɛ bamɔng ane biji ɛkpɔ warr. Ɛnɛji ka efurusu bribri mbɔ amo ka ɔnam. 23Ka iku Jisɔs ariyɛ. Ka abaka ba aba ama tɔ warr sa ayɛ baɛnjɛl nasi amaranju, ba arag si Jisɔs are mber. 24Ka abunu bamɔng ka ɛbɔngɔ ɛjɛrɛɛ amo ka ɔnam, ayɛ nsɛrɛ si abaka ba aragha, ka ariyɛ iku Jisɔs.”

25Ka Jisɔs atɔ mbɔ, “War adɛmmɛ anɛ, nang ka eritama ɛbanɛban ji mbono Ɔsɔwɔ aragha! 26Ka Kras ayɛyɛ niyiri mbe bi sɔng afɔ negere ɛnɛ.” 27Ka Jisɔs ajam nɔtɔrɔ mbe bi Mosis na Abono Ɔsɔwɔ wɔɔ ayɛnɛ ka nwɛr Ɔsɔwɔ atebɛ atɔ mbɔ. 28Si Jisɔs na asɔgba ɛyɛ aba akpere ɛjɛbɛ ji ajɔ amo, Jisɔs ane nasi akpagha na amogho kisi. 29Ka mbɔ agɔrɛ kɛtingitingi, “Ka fa nanɛrɛ, nogo emekpere; ofo ɛmakan.” Ka Jisɔs amo ama ka na mbɔ.

30Ngara yi ajig na mbɔ ka okpokoro, akɔ brɛk, akag Ɔsɔwɔ same, akɛbɛ ajam mbɔ nɛkɛ. 31Ka amar asar mbɔ arengɛ, ka atara asighi mbɔ. 32Ka arag na atɛ nɔyɔ ka, “Nete ɛjɔ ɛyɛbɛ warr sa aribi mbe bi ayɛnɛ ka nwɛr Ɔsɔwɔ atɔ warr sɛ ɛjɔ ɛjɛn ka mba.”

33Asɔgba ya aba atam naosunosu afɛnɛ ya Jɛrusalɛm, gayɔ ya akɔrɔ asɔgba wobo na wiwi, na baga ba ajɔ na mbɔ, agba mfo bibi 34ka arag “Ɛdɛdɛghɛ ji! Ntaa amɛ fɛnɛ anyimi ajɔ ka nekpen, Simɔn amɛ yɛ.” 35Ka asɔgba ɛyɛ aba ba afɛnɛ Emmas atɔ mbɔ ji ɛwɛmɛ ka mba si mbɔ arengɛ ka ngara yi akɛbɛ brɛk.

Jisɔs aru asɔgba ɛyiɛ

(Mat 28:16-20; Mak 16:14-18; Jɔn 20:19-23; At 1:6-8)

36Si mbɔ akpagha ragha ateb mbe bi, Jisɔs fɔnɔ aru ama yimi ka ɛbɔngɔ mbɔ ka atɔ mbɔ, “Nanaa ɛjɔ nanɛrɛ.”

37Ɔbɔn ene mbɔ, ateb akana si mbɔ ya ayɛ nkuanɛ. 38Ka atɔ mbɔ, “ɔbɔn ene war jɛ, ka nang ka nete ɛnɛrɛ eson na mfab? 39Sɛngɛ abɔ ɛyaa na ajaa ɛyaa, Mmɛ fɔnɔ yɔ! Ba kɔmɔm ɛyɛ; nkuanɛ emumu na ɛkab akpem, ka mmɛ mkpekpe.”

40Ka ngara yi ama rag mbe bi wɔɔ, atɔngɔ mbɔ abɔ ɛyɛ na ajaa. 41Ɛyɛbɛ nete na ɛkpɔghɔ biji ɛsɛrɛ mbɔ ariwanga atama, ka abɔmmɔ mbɔ, “Ekpekpe jɛ ɛnɛghɛ fa?” 42Ka akiɛ nnya alab ya ananaa, 43ka ataba anɛ fa ka nibri mbɔ.

44Ka Jisɔs atɔ mbɔ, “Jina ji ntɔ war ngara yi mkpagha nde nanɛrɛ: Kpere ejo ji ayɛnɛ atebem ka nwɛr a ejighi Mosis na Abono Ɔsɔwɔ na Sam ɛwɛmɛwɛmɛ.”

45Ka ane mbɔ, ka sɔng kpere ji ayɛnɛ ka nwɛr Ɔsɔwɔ eribi mbɔ. 46Ka atɔ mbɔ, “Jina ja ayɛnɛ: Kras ayɛ niyiri akpɔ ka ɛtɔɔngɔ afo asa afɛnɛ anyimi ajɔ ka nekpen, 47anɛ arag ano Ɔsɔwɔ ka mbeng ɛyɛ atɔ eying kpakpa, ya abagha na ɛyanga nekpen na ɛtamasighi abibi afɛ jam ka Jɛrusalɛm. 48War ba ɛjɔayɛ mbe bi ɛwɛmɛ. 49Nto Mbara Nɛfɛb nkɛ war yi Nsɔjaa atama sa ato: ka ba jɔ fa ka Jɛrusalɛm tɛtɛ Ɔsɔwɔ akɛ war nsam ya ru ka bɔsɔ.”

Akɔ Jisɔs amo ya bɔsɔ

(Mak 16:19,20; At 1:9-11)

50Ka atɔɔngɔ Jisɔs aru ya Jɛrusalɛm amo ya Bɛtani, ka atab abɔ ɛyɛ ka bɔsɔ akag njɔ anara mbɔ. 51Sa ajɔ anara mbɔ, atamasighi mbɔ ka akɔɛ amo ya bɔsɔ. 52Ka asɔgba Jisɔs akɛmɛ agba akagɛ ka afɛnɛ ya Jɛrusalɛm na ntakpa ɛyɛbɛ nete. 53Ka ajɔ ka nju Ɔsɔwɔ akagha Ɔsɔwɔ kpere ngara.

Currently Selected:

Luk 24: NDD Nta

Highlight

Copy