Johanes 11

Jesu hingeni Lasarus.

1-2Hom ndramed i da med, ngarn Lasarus ber Betanien. Aga gor ad Maria, e ndern Marta. Aga Maria, i da gin daui ndrelgei ngohondonreen le mandrn ad Ndorlaben, ma i gin sibui, gin hinen bosou ndegen le lomon. Bison asor Lasarus i da le berle aden, iab gin hedi i. 3Sor rendegien le ndro Jesu, sor bai: Ndorlaben, e lele, i ge, uo da golnisden i, i med. 4Be Jesu gin hirong i, i boi: I de somad bui, iab aden gle bamugueni Jehova i gabmugueni ndurn gleri. 5-6Jesu golnisden Marta e ndern ma Lasarus. Be i gin hirong le iab aden, i dandon maruo le gor ogo. 7Boen i vong le ndro su lao aden: Iou beg dogi lie le gor Judea. 8Su lao aden, su bode: Ndorlaben, hanu su Juda beg daii uo le bad, malabo uo beg dogi le ndro su lie? 9Jesu i bodeie: Klok masongul e ruo i da le rang si. Ar homo i dogi lorang, ndegen de glos bui, i ilndri mernal, i da hinganen. 10Ar homo ir dogi lobing, ndegen ir los le bad i de danen lele hebsa bui. 11Be i gin vong nongen dagara, boen i boi: Gous adu Lasarus i da medir, io beg dogi le ndro i, beg hingeni i. 12Su lao aden bodeie: Ndorlaben, ar i medir aga i hian ge, i mamaren lie. 13Jesu i gin hanguruen i ginmad. Su gin hanguruen i da gin bosoui le medriu aden, i da horuan ndro su ndramed. 14Malabo Jesu i vong le ndro su monen: Lasarus i ginmad gane. 15Io mugmug ge, io da le gor aden bui, io beg henunuen mu, le boro ndoui ordo hian ge. Malabo iou beg dogi le ndro Lasarus. 16Malabo Thomas, ngarn aden ndur marmao, i vong le ndro su lao ad Jesu: Du gao, du la born ndro i, du gamed bersi ndro i.

17Jesu i gin me le gor Betanien, Lasarus i da le ngaibad aden, i medir mahahu. 18Betanien aga gor i da baghege le Jerusalem, heb eluen bui. 19Su Juda mabosanged su da ndro Marta sor Maria, su beg rederhi sor le bison, i da ginmad. 20Be Marta gin hirong, Jesu gin me, i sohal sal le ndro i. Maria i dandon le um. 21Marta i vong le ndro Jesu, i boi: Ndorlaben, be uo da le gor, biso de ginmad bui. 22Io dono longu hendre be uo soling le ndro Jehova le longu hendre, i ghengen i le ndro uo. 23Jesu i bodeie: bisom i gedne lie. 24Marta i bode: Io dono i, i gedne lie le ngad aden le rang manden i da beg meher. 25Jesu i vong le ndro i, i boi: Ndoui masi le hingeni su ndramed, le hinen su mamaren i da ndro io, ar homo boro ndoui ordo, i horuan ge lie, be mandrn na gmed. 26Homo ma homo i da boro ndoui ordo le rang ogo, i de somad bui, i da mamaren ge sidegesi. Uo danem boro i ie? 27I bodeie: Ehe Ndorlaben, io gin boro i uo Mesias, uo Ndur Jehova i da beg meher le boan. 28Nongen ogo boen, i bieni Jesu i loh ndern Maria, i bahurhur, i boi: Ndorlaben gorda, i loh uo. 29Be Maria gin hirong i, i dne roud, i hilou le ndro Jesu ge. Jesu de gin me lundiegor masou. 30I dandon le logna, Marta gin sohal sal le ndro i. 31Su Juda su da le um ad Maria, su da gin me, beg rederhi i, be su ilndri, i gin ndne roud, i hilou ge, su hanguruen, i beg hilou gle ngaibad, beg reng la. Su ndrbon. 32Maria i gin meher ndro Jesu, i los le boan baghege le ndegen, i vong le ndro i, i boi. Ndorlaben, be uo gorbo, biso i de ginmad bui. 33Be Jesu ilndri i, i da gin reng, ma su Juda masi su da dang, su loholo, meluan i irgu leri. 34Boen i ndemani su: Mu gin doni i oho? Su bodeie: Ndorlaben, gme ndro du, e lele it. 35Ndurmarn i da le begmarn. 36Su Juda su boi: E lele, i golnisden i manden ge. 37Su holel asu, su vong, su boi: I da gin regurdueni su ndramed, begmarsu bui, derbe i de gin sobani i bui, i da ginmad malabo? 38Ndrnen Jesu i irgu lie. I gin me baghege le ngad, aga ngaibad, bad manden i da le marbohon. 39Jesu i vong le ndro su: Hedi bad ogo giao. Marta, bison ad ndramed i da ginmad, i vong le ndro i, i boi: Ndorlaben, i borah, i medir mahahu malabo. 40Jesu i bodeie: Io de gin vong de la ndro uo bui, ar uo gboro ndoui ordo, uo gilndri engerang ad Jehova? 41Su hedi bad lendi, Jesu i dendrai le belengan, i raring, i boi: Bo Domo, io bamugueni uo, uo ha hirong soling ordo. 42Io dono i, uo hirong io sidesi. E lele su masi su da baghege, le longu asu ge, io ndemani uo dagara, io ha lengi, su gboro i, su dansu i, uo ge gin rendegien io. 43Boen i loh le ngasen ndoun: Lasarus, am ogo! 44I da ginmad, i gin me dala, salo i da le ndegen e nemen su gin nhui leri. Dagara bormarn gle salo si. Jesu i vong le ndro su: E rumburdi i le salo masi, i girgai le um aden.

Su labenen beg daii Jesu.

45Su Juda mabosanged, su da gin meher ndro Maria, be su gin ilndri gelman ad Jesu, su boro ndoui aden. 46Su holel asu, su la ndro su Pharisi, su boharni le ndro su gelman ogo. 47Su ndurhian, ma su Pharisi, dagara su labenen ber gor su la goure, su vong, su boi: Iou gob sa, ndramed ogo i hinen gelman mabosanged. 48Heb eluen bui muren su masi su lao aden ge, boen su Rom su gmeher, su ghedi gor adu gle asu. 49Homo asu, ngarn Kaivas, aga ndurhian asu Juda le uru ogo, i vong le ndro su, de danmu hebsa bui, 50de danmu hanguruen heb monen bugane. I hian hanu, homo ge i na gmed le ndro su masi, de su masigane su na gmed, su gina momen ge. 51I gin vong nongen dagara gle ndoui aden bui, i gin boharni longu ogo le ndoui ad Jehova, i ndurhian asu Juda le uru ogo. I de danen i bui, Jesu na gmed, beg rumburdi su masi. 52Su Juda ge bui, su mbunana ad Jehova masigane, su da masumbue le gor masigane. I beg rui su me goure. 53Su gin vong me goure, beg daii Jesu. 54Jesu i gorni, i bieni gor Jerusalem, i dogi le marboga, i gina le gor si, ngarn Evraim. I dandon le gor ogo eluen hebe. Ma su lao aden lie.

55Uru asu Juda le ndurmeh gin me baghege. Su mabosanged ber gor hoger e hoger su dogi le gor Jerusalem, beg dirhor le um ad Jehova. 56Su gahi Jesu su da le lobohonum ad Jehova, su vong me goure, su boi: Uo hanguruen sa, i gmeher le gor Jerusalem de bui? 57Su ndurhian ma su Pharisi su gin bai, ar homo i danen Jesu i da oho, i gobharni le ndro su, su beg hosi i.

Currently Selected:

Johanes 11: LLENT

Highlight

Copy