Марк 14

1Дыууӕ боны фӕстӕ хъуамӕ уыдаид Куадзӕн ӕмӕ Донгонд дзулты бӕрӕгбон. Алчертӕ ӕмӕ динамонджытӕ агуырдтой Йесойыл хинӕй рацӕуыны ӕмӕ Йӕ амарыны фадат 2ӕмӕ тӕрхӕттӕ кодтой: «Ӕрмӕст бӕрӕгбоны нӕ, науӕд адӕм сызмӕнтдзысты».

3Йесо уыди Вифанийы, хъотырӕй рынчын Симоны хӕдзары. Фынджы уӕлхъус куы бадти, уӕд Ӕм бацыди иу сылгоймаг дурынимӕ, йӕ мидӕг та уыди, нард, зӕгъгӕ, цы зайӕгой хонынц, уымӕй конд сыгъдӕг ӕмӕ зынаргъ хӕрздӕфгӕнӕн. Сылгоймаг дурыны хъуыр асаста ӕмӕ хӕрздӕфгӕнӕн Йесойы сӕрыл уадзын райдыдта. 4Иуӕй-иутӕ рамӕсты сты ӕмӕ дзырдтой: «Цӕмӕн хъуыди уый бӕрц хӕрздӕфгӕнӕн хардз кӕнын? 5Ӕртӕсӕдӕ динарӕй фылдӕрыл ӕй ауӕйгӕнӕн куы уыди, уыцы ӕхца та — мӕгуыртыл байуарӕн». Ӕмӕ бустӕ кодтой сылгоймагыл. 6Фӕлӕ сын Йесо загъта: «Ныууадзут ӕй, цӕмӕн ӕй къӕмдзӕстыг кӕнут? Уый хорз хъуыддаг сарӕзта Мӕнӕн. 7Мӕгуыртӕ ӕдзух уӕ фарсмӕ сты, ӕмӕ уӕ кӕд бафӕнда, уӕд-иу сын баххуыс кӕнут, Ӕз та ӕдзух уемӕ нӕ уыдзынӕн. 8Сылгоймаг, йӕ бон цы уыди, уый бакодта: Мӕ баныгӕныны размӕ Мын Мӕ буар хӕрздӕфгӕнӕнӕй байсӕрста. 9Ӕцӕг цы у, уый уын зӕгъын: Фарны Уац ӕгас дунейы кӕмдӕриддӕр айхъуыса, уым ацы сылгоймаджы ӕрымысынӕн, цы сарӕзта, уый тыххӕй загъдӕуыдзӕн».

10Уӕд Иудӕ Искариот, дыууадӕс ахуыргӕнинагӕй иу, ацыдис алчертӕм, цӕмӕй сын Йесойы сӕ къухмӕ ратта. 11Куы йӕм байхъуыстой, уӕд бацин кодтой ӕмӕ йын ӕвзист ӕхцайӕ зӕрдӕ бавӕрдтой. Ӕмӕ Иудӕ сӕ къухмӕ сын Ӕй раттыны фадат агуырдта.

12Донгонд дзулты бӕрӕгбоны фыццаг бон, Куадзӕны уӕрыкк ӕргӕвдыны бон, ахуыргӕнинӕгтӕ Йесойы бафарстой: «Куыд Дӕ фӕнды, кӕдӕм Дын ацӕуӕм Куадзӕны фынг ӕрӕвӕрынмӕ?» 13Уый Йӕ ахуыргӕнинӕгтӕй дыууӕйы арвыста ӕмӕ сын бафӕдзӕхста: «Ацӕут сахармӕ. Уым уыл сӕмбӕлдзӕн иу адӕймаг доны дурынимӕ, ӕмӕ-иу ацӕут йӕ фӕдыл. 14Кӕдӕм бацӕуа, уыцы хӕдзары хицауӕн-иу зӕгъут: „Ахуыргӕнӕг фӕрсы: Мӕ ахуыргӕнинӕгтимӕ Куадзӕны уӕрыккӕй кӕм саходон, Мӕ уыцы уат кӕм ис?“ 15Уый уын уӕллаг уӕладзыджы равдисдзӕни стыр ӕмӕ ӕфснайд уат, уым-иу фынг ӕрӕвӕрут». 16Ахуыргӕнинӕгтӕ араст сты, бацыдысты сахармӕ ӕмӕ ӕппӕт дӕр, Йесо сын куыд загъта, афтӕ ссардтой ӕмӕ Куадзӕны фынг ӕрӕвӕрдтой.

17Куы баизӕр ис, уӕд Йесо ӕрбацыди Йӕ дыууадӕс ахуыргӕнинагимӕ. 18Ӕмӕ фынджы уӕлхъус куы бадтысты, уӕд Йесо загъта: «Ӕцӕг цы у, уый уын зӕгъын: уӕ иу Мыл — ныртӕккӕ Мемӕ къӕбӕр чи хӕры, уый — гадзрахатӕй рацӕудзӕни». 19Уыдон ӕрӕнкъард сты ӕмӕ Йӕ радыгай фӕрсын райдыдтой: «Уый ӕз уыдзынӕн, мыййаг?» 20Йесо сын загъта: «Дыууадӕсӕй иу, цӕхдоны Мемӕ йӕ къӕбӕр чи тулы, уый. 21Ӕниу, Адӕймаджы Фырт фӕцӕуы, Сыгъдӕг Фысты куыд загъдӕуы, афтӕ. Фӕлӕ сар йӕ сӕр, гадзрахатӕй Йыл чи рацӕуа, уымӕн. Уыцы адӕймаг куы нӕ райгуырдаид, уӕд ын хуыздӕр уыдаид».

22Фынджы уӕлхъус куы ӕрбадтысты, уӕд Йесо Йӕ къухмӕ райста дзул, Хуыцауӕн арфӕ ракодта, ӕрсаста йӕ, алӕвӕрдта сӕм ӕй ӕмӕ загъта: «Айсут ӕмӕ хӕрут — уый Мӕ Буар у». 23Уый фӕстӕ райста сӕны кӕхц, Хуыцауӕн арфӕ ракодта, алӕвӕрдта сӕм ӕй, ӕмӕ дзы се ’ппӕт дӕр бануӕзтой. 24Ӕмӕ сын загъта: «Уый Мӕ Туг у — уымӕй фидаргӕнгӕ у Ног Фидыд, ӕмӕ уый бирӕты сӕрвӕлтау ныккӕлдзӕни. 25Ӕцӕг цы у, уый уын зӕгъын, сӕнӕфсиры сӕнӕй нал бануаздзынӕн, цалынмӕ Хуыцауы Паддзахады ног сӕнӕй бануазон, уӕдмӕ». 26Уый фӕстӕ азарыдысты арфӕйы зарӕг ӕмӕ Елеоны хохмӕ ацыдысты.

27Йесо сын загъта: «Ахсӕв Мӕ уе ’ппӕт дӕр ныууадздзыстут, уымӕн ӕмӕ фыст ис: „Ӕрцӕвдзынӕн фыййауы, ӕмӕ фысты дзуг ныххӕлиу уыдзӕн“. 28Фӕлӕ куы райгас уон, уӕд-иу Мӕ Галилейы агурут».

29Уӕд Ын Петр загъта: «Иууылдӕр Дӕ куы ныууадзой, уӕддӕр Дӕ ӕз нӕ ныууадздзынӕн». 30Йесо йын загъта: «Ӕцӕг цы у, уый дын зӕгъын: ахсӕв уасӕг дыууӕ хатты нӕма ныууасдзӕн, афтӕ Мыл ӕртӕ хатты атигъ кӕндзынӕ дӕхи». 31Фӕлӕ Петр ноджы ныфсджындӕрӕй дзырдта: «Демӕ мӕ амӕлын куы бахъӕуа, уӕд дӕр Дыл ӕз мӕхи нӕ атигъ кӕндзынӕн». Афтӕ дзырдтой иннӕтӕ дӕр.

32Уӕд ӕрцыдысты, Гефсимани кӕй хонынц, уыцы бынатмӕ. Йесо Йӕ ахуыргӕнинӕгтӕн загъта: «Цалынмӕ кувон, уӕдмӕ уал ам абадут». 33Йемӕ акодта Петр, Йаков ӕмӕ Иоанны. Мӕлӕты тас бацыди Йӕ зӕрдӕйы, ӕмӕ ӕрхӕндӕг кӕнын райдыдта. 34Уӕд сын загъта: «Мӕ уд мӕрдон хъынцъым кӕны; ам Мӕм фӕлӕуут, ма-иу бафынӕй ут». 35Йӕхӕдӕг иу чысыл ӕддӕдӕр ацыди, ныддӕлгом ис зӕххыл ӕмӕ куывта, цӕмӕй Йӕм разӕй цы тухӕн ӕнхъӕлмӕ кӕсы, уый гӕнӕн ӕмӕ амалӕй ма бавзара: 36«Аввӕ, Мӕ Фыд, Дӕуӕн ӕппӕт дӕр у Дӕ бон. Ацы хъизӕмӕртты кӕхц Мын ма бадар. Фӕлӕ, Мӕн куыд фӕнды, афтӕ нӕ — Дӕу куыд фӕнды, афтӕ уӕд». 37Йесо Йӕ ахуыргӕнинӕгтӕм ӕрбаздӕхт ӕмӕ сӕ фынӕйӕ баййӕфта. Ӕмӕ Петрӕн загъта: «Симон, фынӕй дӕ? Ӕнӕ фынӕйӕ иу сахат нӕ бафӕрӕзтай? 38Уӕхи цӕттӕ дарут ӕмӕ кувут, цӕмӕй фыдӕвзарӕны ма фӕцудат. Уд фидар у, буар та — лӕмӕгъ».

39Ногӕй та иуварс ацыди ӕмӕ куывта, уымӕй размӕ куыд куывта, афтӕ. 40Ӕмӕ сӕм куы ӕрбаздӕхти, уӕд та сӕ фынӕйӕ баййӕфта; сӕ цӕстытӕ ӕруӕззау сты, ӕмӕ Йын цы дзуапп раттаиккой, уый нӕ зыдтой. 41Ӕртыккаг хатт дӕр та сӕм бацыди ӕмӕ сын загъта: «Ныр дӕр ма фынӕй кӕнут ӕмӕ уӕ фӕллад уадзут? Фаг у, рӕстӕг ӕрцыд: мӕнӕ Адӕймаджы Фырты тӕригъӕдджынты къухмӕ дӕттынц. 42Сыстут ӕмӕ цӕуӕм! Уӕртӕ Мӕ уӕйгӕнӕг ӕрбаввахс ис».

43Йесо Йӕ ныхас нӕма фӕци, афтӕ фӕзынди Иудӕ, дыууадӕс ахуыргӕнинагӕй иу, йемӕ — бирӕ адӕм кӕрдтӕ ӕмӕ хъилтимӕ: алчертӕ, динамонджытӕ ӕмӕ адӕмы хистӕртӕ йын сӕ йемӕ рарвыстой. 44Уӕйгӕнӕг семӕ афтӕ ныхасгонд уыди: «Кӕмӕн аба кӕнон, Уый Йесо у. Ӕрцахсут Ӕй ӕмӕ Йӕ аивӕй акӕнут». 45Ӕмӕ куыддӕр ӕрбахӕццӕ ис, афтӕ комкоммӕ бацыди Йесомӕ ӕмӕ Йын загъта: «Равви!» Ӕмӕ Йын аба кодта. 46Уыдон дӕр Ӕм фӕлӕбурдтой ӕмӕ Йӕ ӕрцахстой. 47Йӕ разы чи лӕууыд, уыдонӕй чидӕр кард фелвӕста, алчеры цагъары дзы ныццавта ӕмӕ йын йӕ хъус ахауын кодта. 48Уӕд Йесо адӕмӕн загъта: «Цыма абырӕджы ахсут, уыйау Мӕм кӕрдтӕ ӕмӕ хъилтимӕ куы рацыдыстут. 49Ӕз ӕрвылбон уемӕ Кувӕндоны уыдтӕн, ахуыр кодтон адӕмы, ӕмӕ Мӕ нӕ ахстат. Фӕлӕ Сыгъдӕг Фысты цы загъд ис, уый хъуамӕ сӕххӕст уа».

50Уӕд Ӕй ахуыргӕнинӕгтӕ иууылдӕр фӕуагътой ӕмӕ лидзынмӕ фесты. 51Иу ӕрыгон лӕппу, йӕ бӕгънӕг буар ӕмбӕрзӕны ӕрбатыхта, афтӕмӕй цыди Йӕ фӕдыл; ӕфсӕддонтӕ йӕм фӕлӕбурдтой. 52Лӕппу сын ӕмбӕрзӕн сӕ къухы фӕуагъта ӕмӕ бӕгънӕгӕй алыгъди.

53Йесойы бакодтой алчермӕ. Сауджынтӕ, адӕмы хистӕртӕ ӕмӕ динамонджытӕ ӕмбырдӕй уыдысты уым. 54Петр дӕрддзӕфгомау цыди Йесойы фӕдыл суанг алчеры кӕрты онг. Уым хъахъхъӕнджытимӕ ӕрбадти ӕмӕ йӕхи артмӕ тавта.

55Уыцы рӕстӕг алчертӕ ӕмӕ ӕгас синедрион агуырдтой ӕвдисӕйнӕгтӕ Йесойы ныхмӕ, цӕмӕй Йын марыны тӕрхон рахӕссой, фӕлӕ сӕ къухы ницы ӕфтыд. 56Бирӕтӕ мӕнгӕвдисӕн лӕууыдысты Йӕ ныхмӕ, фӕлӕ сӕ ныхас кӕрӕдзиуыл нӕ бадти. 57Цалдӕрӕй дзы сыстадысты ӕмӕ загътой: 58«Мах нӕхи хъустӕй фехъуыстам, Уый афтӕ кӕй дзырдта: „Ӕз ацы Кувӕндон — адӕймаг кӕй сарӕзта, уый — фехалдзынӕн ӕмӕ ӕртӕ бонмӕ сараздзынӕн ӕндӕр, адӕймаджы къухӕй конд чи нӕ уа, ахӕм“». 59Фӕлӕ уыдонӕн дӕр сӕ ныхӕстӕ кӕрӕдзиуыл нӕ бадтысты.

60Уӕд алчер размӕ ралӕууыд ӕмӕ Йесойы бафарста: «Дӕ ныхмӕ цы дзурынц, уымӕн ницы дзуапп дӕттыс?» 61Фӕлӕ Йесо ницы дзырдта, йӕ дзыхӕй иу ныхас дӕр не схауд. Алчер Ӕй ногӕй бафарста: «Ды дӕ Чырысти, Арфӕгонд Хуыцауы Фырт?» 62Йесо загъта: «Ӕз дӕн. Ӕмӕ сымах „Адӕймаджы Фырты фендзыстут Ӕппӕтхъомысы рахизфарс бадгӕ ӕмӕ уӕларвон ӕврӕгътыл ӕрцӕйцӕугӕ“». 63Уыцы ныхӕстӕм алчер йӕ уӕлӕдарӕс фӕйнӕрдӕм арӕдывта ӕмӕ загъта: «Цавӕр ӕвдисӕнтӕ ма нӕ хъӕуы? 64Хуыцауы куыд фауы, уый уӕхӕдӕг фехъуыстат. Цы хъуыды уӕм ис?»

Се ’ппӕт дӕр Ӕй банымадтой аххосджыныл, марыны тӕрхон рахӕссыны аккаг у, зӕгъгӕ. 65Ӕмӕ Йыл чидӕртӕ тутӕ кӕнын райдыдтой, Йӕ цӕсгом-иу Ын бамбӕрзтой, цавтой Йӕ ӕмӕ Йын дзырдтой: «Кӕд пехуымпар дӕ, уӕд Дӕ чи ныццавта, уый-ма базон». Хъахъхъӕнджытӕ дӕр Ын Йӕ рустӕ цавтой.

66Ныр Петр та бынӕй, кӕрты, уыди. Алчеры лӕггадгӕнӕг сылгоймӕгтӕй иу уырдӕм бацыди. 67Петры артмӕ йӕхи тавгӕ куы федта, уӕд ӕм ӕдзынӕг ныккасти ӕмӕ загъта: «Ды дӕр Назаретаг Йесоимӕ уыдтӕ». 68Фӕлӕ Петр нӕ басасти: «Цытӕ дзурыс, ӕз уымӕн ницы зонын ӕмӕ, цы дзурыс, уый ӕмбаргӕ дӕр нӕ кӕнын». Уыйадыл ӕддаг кӕртмӕ рацыди, ӕмӕ уалынмӕ уасӕг ныууасыд. 69Лӕггадгӕнӕг сылгоймаг та йӕ уым дӕр ауыдта ӕмӕ, йӕ фарсмӕ чи лӕууыд, уыдонӕн загъта: «Ай уыдонӕй у». 70Ӕмӕ та Петр уӕддӕр нӕ басасти. Чысыл фӕстӕдӕр, уым чи лӕууыд, уыдон ногӕй загътой Петрӕн: «Нӕ, ды дӕр бӕлвырд уыдонӕй дӕ, уымӕн ӕмӕ галилейаг дӕ. [Де ’взаджы здӕхт дыл комдзог цӕуы.]» 71Уӕд Петр ард хӕрын ӕмӕ Хуыцауӕй сомы кӕнын райдыдта: «Кӕй кой кӕнут, ӕз уыцы Адӕймаджы нӕ зонын». 72Уӕд уасӕг дыккаг хатт ныууасыд. Ӕмӕ Петры зӕрдыл ӕрлӕууыдысты Йесойы ныхӕстӕ: «Уасӕг дыууӕ хатты нӕма ныууасдзӕн, афтӕ Мыл ӕртӕ хатты атигъ кӕндзынӕ дӕхи». Ӕмӕ кӕуын райдыдта.

Currently Selected:

Марк 14: ОссБ

Highlight

Copy