Mabandela 41
41
1Eliki ete, o bosuku bo mibu mibale mobimba, Palo aloti, mpe, bakeka, atemi o nkako ’ebale sika. 2Mpe, bakeka, elabwi kum’o ebale ngombo li bene ncambo, ndamu be mpe li boyongoko: mpe lili bikoko. 3Mpe, bakeka, ngombo li bene nciso ncambo lilabwi kum’o ebale o mbis’e lingo, bobe be mpe li boyondoko; mpe litemi bele‐bele na ngombo li bene nciso sik’o nkako ’ebale. 4Angani ngombo li bene bobe be mpe li boyondoko lili ngombo li bene ncambo ndamu be mpe li boyongoko nye. Mpe Palo ayumwi.
5Mpe atutumi ngoli bisa mpe aloti liloto li mabale: mpe, bakeka, nkata li masangu ncambo lipimi o mwete moko, 6line mpe lilamu. Mpe, bakeka, nkata ncambo li bipo bosulwaka na mompe mo esete, lipimi o mbis’e lingo. 7Mpe nkata li bipo limini nkata ncambo line mpe lilamu. Mpe Palo ayumwi, mpe, bakeka, eliki liloto.
8Eliki ete na ntongo molimo mo yeye moyotwi, mpe atindi nobianga balomoli ba Ezipeto banco, mpe bampele ba likani banco ba yengo: mpe Palo abasakoli liloto li yeye; nd’eliki nde mok’oyisi nomalimbol’ombe Palo ka.
9Angani mpomb’e babateli ba bikatela alobi ombe Palo, yeye ’te, “Ngai nakoyindola mayese ma ngai busa boye: 10Palo ayakwi na basali ba yeye, mpe ankelisi o ndako e mpomb’e bakweti, ngai na mpomb’e batumbi ba bingwele. 11Mpe biso loloti lilot’o mokolo moko, ngai na yeye; loloti li moto li moto ete nde ndimbo e liloto li yeye. 12Mp’eliki na biso ongo nkwayindo, O‐Ebele, mosali ombe mpomb’e bakweti; mpe lomosakoli, mpe yeye alolimboleli maloto ma biso; ombe moto na moto ete nde liloto li yeye alimboli ntina. 13Eliki ete, s’et’e lolimboleli yeye, eliki bongo; ngai ambutinyi o lotomo lo ngai, mpe yeye amokomi nkingo.”
14Angani Palo atindi nobianga Yosepa, mpe bamobeki na lobangu kum’o ndako e bokelisi: mpe akengi lole, mpe ayenzi bilamba bi yeye, mpe aweli ombe Palo. 15Mpe Palo alobi ombe Yosepa, yeye ’te, “Nasoloto liloto, mp’enga nde moko te okoyisa nolilimbola: mpe nasoyoka na ntin’e yo, et’e koyoka yo liloto okoyisa nolilimbola ntina.”
16Yosepa abekoli Palo, yeye ’te, “Enga nde na ngai ka: Nyambe akope Palo mbeko e nyile.”
17Angani Palo alobi ombe Yosepa, yeye ’te, “O liloto li ngai, bakeka, ngai natemi o nkako ’ebale sika: 18mpe, bakeka, elabwi kum’o ebale ngombo li bene ncambo, 19li boyongoko mpe lilamu be; mpe lili bikoko: mpe, bakeka, ngombo li bene nciso ncambo lilabwi o mbis’e lingo, lika kwa‐kwa, bobe be mpe li boyondoko, li bobe bo nga nde ngai nani o bon’o nc’encoki’ Ezipeto ka. 20Mpe ngombo li bene li boyondoko mpe bobe be lili ngombo li bene li nconco li boyongoko nye: 21mp’e sili lingo nolile nye, eliki nde o yis’oyeban’ete lili lingo ka; nde liliki nani bobe be ete o mabandela. Bongo nayumwi.
22“Angani naboni o liloto li ngai, mpe, bakeka, nkata li masangu ncambo lipimi o mwete moko, li bonyalaka mpe lilamu: 23mpe, bakeka, 24nkata ncambo li bonyitaka mpe bipo, bosulwaka na mompe mo esete, lipimi o mbis’e lingo: angani nkata li bipo limini nkata lilamu ncambo wa: mpe nalisakoli ombe balomoli; nd’eliki nde moko te oyisi nolindimbolela ngai ntina.”
25Angani Yosepa alobi ombe Palo, yeye ’te, “Liloto limbe Palo linga lioko: ma nga Nyambe lende bokeli akomasakol’ombe Palo. 26Ngombo li bene ncambo ndamu linga mibu ncambo; mpe nkata li masangu lilamu linga mibu ncambo: liloto linga lioko. 27Ngombo li bene ncambo li boyondoko mpe bobe be lilabwi o mbis’e lingo linga mibu ncambo, mpe nkata ncambo li mpamba li bosulwaka na mompe mo esete: bingo bikozala mibu ncambo mi molaka.
28“Linya linga zambi li lobi ngai ombe Palo: ma nga Nyambe lende bokeli Yeye akomasakol’ombe Palo. 29Bakeka, mibu ncambo mi boyike be mimoy’o nc’e Ezipeto encoki: 30angani o mbis’e mingo mibu ncambo mi molaka mikoya; mpe boyike boncoki bokosabwibwa moi o nc’e Ezipeto; 31mpe molaka mokosinisa nce; boyike bokozala nde o yeban’o nce ka na ntin’e molaka monya mokokita; nowela mongo mokozala mo monyoko be. 32Mpe nowela liloto likibibwi nkibisa libale, linga nowela zambi liokendibwa na Nyambe, mpe Nyambe akolitukinya.
33“Bongo sik’awa Palo se asolo mot’o likani mpe na likoka, mpe amolabola kā o nc’e Ezipeto. 34Palo se akela liye, mpe alabola bakengeli o nce, mpe ayonginy’ekakoli yoko e bitano, ekakoli yoko e bitano, o nc’e Ezipeto o mibu ncambo mi boyike. 35Mpe tika bango bayonginya boli boncoki bo mibu miye milamu mimoya, mpe babomba masangu soke na loboko lo Palo o bikanga, mpe tika babobatela. 36Bongo boli bonya bokozala libomba n’etondo e nce yek’o mibu mi molaka, mokoya o nc’e Ezipeto; ete nc’ezala nde o sinana bosinanaka na molaka ka.”
37Zambi liliki lilamu o miso mambe Palo, mpe o miso ma basali ba yeye banco. 38Palo alobeli basali ba yeye, yeye ’te, “Lokoyisa nokula moko ete nde oyo, onga na molimo mombe Nyambe eto?” 39Mpe Palo alobi ombe Yosepa, yeye ’te, “Nowela Nyambe asokolakisa maye manco, 40enga nde moko na likani mpe na likok’ete nde yo ka: okozala kā o ndako e ngai, mp’ete nde munya mo yo bato ba ngai banco bakokongibwa: tu se o ngwende e bokongi ngai nakopita yo bone.”
41Palo alobi ombe Yosepa, yeye ’te, “Bakeka, nasokolabola kā o nc’e Ezipeto encoki.” 42Mpe Palo alongoli libaku li elemb’o mosei mo yeye, mpe alisubii o mosei mo Yosepa, mpe amoswiisi bilamba bi mbenza ndamu, mpe amoswiisi bwamba bo wolo o nkingo; 43mpe amotambwisi o ekolel’e libal’eliki na yeye; mpe batotwi o boso bo yeye ete, “Boyumbaka mabolongo:” mpe amolaboli kā o nc’e Ezipeto encoki. 44Palo alobeli Yosepa ete, “Ngai nanga Palo, mpe tu se na yo ekozala nde moto te okonetola loboko lo yeye soko lokolo lo yeye o nc’e Ezipeto encoki.”
45Palo atomisi lina li Yosepa Sapenata‐panea; mpe amopesi Asenata e mwan’o mwene ombe Potipala e ngang’e Ono azala mwasi o yeye. Mpe Yosepa akongoli nc’e Ezipeto ku‐ku. 46Yosepa aliki mibu bweli e temi yeye o miso mambe Palo e mokonzi o Ezipeto. Yosepa apimi kum’o miso mambe Palo, mpe akongoli o nc’e Ezipeto encoki.
47O mibu ncambo mi boyike nc’eboti na mabutaka. Mpe ayonginyi 48boli boncoki bo mibu ncambo mi liki boli boyike o nc’e Ezipeto, mpe abombi boli o bikanga: boli bo masala maliki zonga n’etuka n’etuka, abombi o bingo. 49Bongo Yosepa abombi masangu ete mise mi libeke, boyike be, yek’e tiki yeye bosekisi nowela maliki motuya bosengaka.
50Bana babale ba bampele babotibwi ombe Yosepa o yambo e mobu moyi molaka, ba moboteli Asenata e mwan’o mwene ombe Poti‐pala e ngang’e Ono. 51Yosepa atomisi lina li mwan’o nconco Manase#41:51 Manase — Bolimbisi.: “Nowela,” elobi yeye, “Nyambe asondimbisa bonyingwi bo ngai boncoki, mpe bomboka bombe sango e ngai boncoki.” 52Mpe lina li mwan’o babale amotomisi Epulaima#41:52 Epulaima — Boboti.: “Nowela Nyambe aonzalisa na bobotani o nc’e monyoko mo ngai.”
53Angani mibu ncambo mi boyike, boliki o nc’e Ezipeto, misuki. 54Mpe mibu ncambo mi molaka mibandi noya, ete nd’e lobi Yosepa: mpe molaka mokiti o nce lincoki; nde o nc’e Ezipeto enco eliki boli. 55Mp’e kiti nc’e Ezipeto encoki pata na molaka, bato baleli boli ombe Palo: mpe Palo alobi ombe Ba‐Ezipeto banco, yeye ’te, “Bokeke ombe Yosepa: ma kobolobela yeye, bomakelaka.”
56Molaka molali o nc’encoki: mpe Yosepa aliboli ndako li bibombela binco, mpe ateki ombe Ba‐Ezipeto; mpe molaka moliki mokoti o nc’e Ezipeto. 57Mpe ba nce linco bayi o Ezipeto ombe Yosepa nosomba masangu; nowela molaka moliki mokoti o nce linco.
Currently Selected:
Mabandela 41: BANGI
Highlight
Share
Copy
Want to have your highlights saved across all your devices? Sign up or sign in
Published by the Baptist Missionary Society 1905-1916.
