Luke 15
15
U RA NUNUKPUKU.
Luke 15
1Diat rap a kum telona ma ra kum tenapetakakai diat wan karai korom i, lena diat a walogoro i. 2Ma diat a kum te Faresaio ma ra kum tena‐timtimu diat alalai, ma diat piri lenkumi, A muana kumi i palug ma diat a kum tenapetakakai, ma i wagan ugai ma diat.
3Ma i wapua diat u ra pirapira welwelara kumi. 4O oi na pa muat, ba rā mara a nuna sipi, ma rā pa diat i wan rara, pa in wan talurai diat a mara toltatakai u ra bil, ma in auare kup ia ba i rara. ba in auarepai balet? 5Ma ba i auarepai i pakipai u ra pupuakina, ma i kaia uni. 6Ma ba i wan pat u ra matākina i ben ugai diat a kum kakuna ma ra kum tepana, ma i piri ta diat, Dat a kaia, kuma iau auarepai balet a nug sipi, ia ba i rara. 7Iau pira ta muat, Diat a kaia lenkuma u ra maua u ra tenapetakakai i nukpuku i, ma kinalik u diat a mara toltatakai a kum tenapetoduru, a nunukpuku pa i ka korom diat.
8Ma ra tebuan, ba i paki no pakan a măni, ma ta pakana i kip‐baiauai; pa in wakup a lamp duk, ma in arup a ruma, in auare nakuru kupi, ba in auarepai balet? 9Ma ba i auarepai, i ben ugai diat a kum kakuna ma ra kum tepana, ma i piri ta diat, Dat a kaia, kuma iau auarepai balet a pakana kuma ba iau kip baiauai. 10Iau pira ta muat, Len kai kuma di maig na ra matadiat a kum agelo a nun Nara u ra tenapetakakai i nukpuku i.
11I wapua diat balet lena, Rā muana ru na tunalik muana; 12a murumuru i piri tan tamana lena, Tamag, un palauta iau u ra nug ta utna. Ma I palau diara u ra nuna utna. 13Pa ta magoro na bug na muru, na tunalik murumuru i rakan‐a‐rapa a nuna utna, ma i wan igen mai u ra wanua welwelik; ma i warapuai iai a nuna utna u ra ma kirana pikoina.
14Ba i warapua a nuna utna rap a minolo i wan pat u ra bual kuma; ma i kapan utna kabin. 15Ma i wan korom te u ra wanua kuma ma i ki nana; ma i tula i u ra nuna pinapam lena in tabara diat a kum boro. 16Ma i lig korom a pani ra utna kuma a kum boro diat ani: ma pa te i tabara i uni. 17Ba i manana balet i piri lenkumi, Magoro na kum wetula a nun tamag, di takom diat, diat mauru ma diat ankopota a diat utna, ma iau kuri iau pot na minat ma ma ra minolo! 18Ag, turu, ăg wan balet korom tamag, ag piri tana lena Tamag, iau pet akakai korom maua, na ra matam kai: 19ma iau pa iau ka ba din watugi balet lena, na tumlik iau: un putata iau le ra num wetula u dok i. 20I turu, ma i wan balet korom tamana. Ba i welwelik utbai a tamana i bobo i, i mari, i kala korom i, i ratpa i, ma I dum i. 21Na tunalik i piri tana, Tamag iau pet akakai korom maua, na ra matam kai: pa iau ka ba din watugi balet lena, na tumlik iau. 22A tamana i piri ta diat a nuna kum wetula, Muat kipi urin ta kokoina malu, muat wa kopta i uni; muat pata a lalai u ra limana, ma ra robo u ra kakina: 23Muat kipi urin kai ta nat na pulumakau, ia ba i bira, muat a umdokoi, dat an ani, ma dat a maig mai: 24kuma na tuglik bi i a mat, ma i lalaun balet: i wan rarapa, ma kuri balet ma. Ma diat pet kabin a maig uni.
25Na tunalik a mu kana i tana kubai u ra pinapam: ma ba i wan karai tau na ruma i walogoro in tulal ma ra nila kara. 26I watai korom i rā pa diat a kum wetula, ma i tiri, lena, Awa duk a lig kumi muat peti? 27I piri tana, Temlik i a wan pat; ma tamam i umdoko a nat na pulumakau, ia ba i bira, kuma i bobopa i balet, ma i lalaun nakuru ku. 28Ia bulug i pet na tutu, ma pa in ruk; ma tamana i pari korom i, ma i wamaram i. 29I piri tan tamana, Magoro na tinoan iau taram pa ut korom ui uni, ma pa iau wabulbul utbai a num ta pirapira, ma pa u tari utbai tag ta nat na me, ba miat a maig mai ma ra kum tepag: 30ma ba i wan balet pat urin na tumlik bi, ia ba i warapua a num utna u ra pet na baraman, u umdokoi kup i a nat na pulumakau, ia ba i bira! 31I piri tana, Na tuglik, u ra bugbug na wanua rap dara ki ugai, ma ra lig rap ba iau paki, a num ut. 32I ka ku ba dat maig ma dat kaia: kuma temlik bi i a mat, ma i lalaun balet; i wan rara pa ut mun, ma kuri balet ma.
Currently Selected:
Luke 15: RAI
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1896.
