Mataio 10
10
10. PAKANA.
1Ma i watapa diat a winunu ma ruadi a nuna tara‐na‐wawera, ma i tari ta diat a naka kon u diat a kum tebaran, ba diat a lurua diat, ma diat a wakadelpa tiba na ugan a malapag, ma tiba na ugan a malmalum kai.
2Lenkumi a iadiat a winunu ma ruadi a kum apositolo: ia ba i muka Simon a iana bulug Petero ma Andrea dina; Iakob na tun Sebedaio, ma Ioane dina; 3Filipo ma Batolomaio; Tomas ma Mataio a telona; Iakob na tun Alifaio, ma Tataio; 4Simon a tenatoltu; ma Iuda Iskariot, ia ba i ogopa i. 5Iesu i tula diat a winunu ma ruadi kumi, ma i wapua diat lenkumi, Koniku muat wan u ra akapi a nu ra Tara‐igen, ma koniku muat wan u ra kum taman a nu ra Samaria: 6Muat wan ku korom diat a kum sipi diat rara i ra tamanin Israel. 7Ma ba muat wan, muat a wawera wanwan, ma piri lenkumi, i marawai ma ku a matanitu ko ra maua. 8Muat wakadelpa diat a tara diat malapag, walaunpa diat a kum minat, wamaramarek diat a kum lepa, lurua diat a kum tebaran: muat rakanbiapai ma ku, muat a tari biai ma ku. 9Koniku muat wagana a kold, ma ra siliva, ma ra barasa u ra numuat in a kop; 10koniku a ka‐na‐kiniwa kup a numuat winawan, koniku ta ruwin a mulina malu, ba ta kum robo, ba ta in a buka: kuma i takado ku ba di tari a na utna korom a tenawogoro.
11A kum wanua‐na‐ruma ma ra kum taman rap ba muat wan uni, muat auare kup te ba i koina iai; muat a ki nana in tuk ut u ra bug ba muat a wan taka iai. 12Ba muat ruk u ra ruma, muat a wewatai. 13Ma, ba a ruma kuma i ka, a malmal in ki uni: ba pa in ka muat madekuai ma. 14Ia bulug ba pa i wamanatug muat, ma pa i walogoro a numuat pirapira, ba muat pari tak u ra ruma, ba tak u ra taman kuma muat tataguai mun a kabu‐na‐pia ko ra kakimuat. 15Iau piri ligtatuna ta muat, kura in aka kinalik a wanua Sodom ma Komora u ra bug na nakokon, in aka akit a taman kuma.
16Boboi, Iau tulai muat, ma muat welara ma ra kum sipi na liwan ta diat a kum wolifa: ia kuma i ka uni ba muat manana le ra kum ui, ma ra niomuat in koina le ra tabun. 17Muat katom kup diat a tara: kuma diat a taram aruai muat korom a mata ra nakokon, ma diat a rapu muat u ra nudiat kum ruma na lotu: 18Ma diat a ben muat na ra matadiat a kum kovana, ma ra kum tui un iau, ba a wakinilag muat korom diat, korom diat kai a Tara‐igen. 19Ba diat taram aruai muat, koniku muat nunukdokodoko muat, lena muat a piri lelawai, ba awa muat a piri: kuma u ra pakan a bug kuma din tari ta muat a lig i ka ba muat a piri. 20Kuma pa muat piri, A Nio‐ra‐Tama‐muat ia i piri u ra balamuat. 21Ra tenalik kai in taramaruai tenalik korom a winiruana, ma ra tamana na tunalik: a kum nat bulug diat a turu ma diat a pet‐kabinpa a winirua ra tamadiat. 22A tara rap kai kura diat a nunukakaka un muat u ra iag: ma ia ba i turu pătpătuan in tuk u ra tintinipina, ia kuma din walaunpa i. 23Ba diat pet‐na‐bilbil un muat u ra taman bi, muat kala kariu u ra igen: kuma iau piri ligtatuna ta muat. In wan pat na Tu‐ra‐muana ba pa muat ial utbai u ra kum taman rap u Israel.
24Pa ta disaipel i gala u ra nuna tenawawera, pa ta wetula kai i gala u ra nuna tadaru. 25I gala korom a disaipel ba diara welara ma ra nuna tenawawera, korom a wetula kai ba diara welara ma ra nuna tadaru. Ba diat watugi Beelisibul, korom a kabinalig‐u‐ra‐ruma, diat a watug akiti kai korom diat ba diat ki nana. 26Ia kuma koniku muat buruta diat uni: kuma a lig rap ba di burugbatai, din rakanarai; ma ra lig rap ba i tana ino, din nunurai ma. 27A lig kuma iau wepa mai ta muat u ra boboto, muat a wepa mai bulug u ra kapakapa: ma ra lig muat walogoro‐inoi u ra teligamuat muat a wapua uni na te u ra kum ruma. 28Koniku muat buruta diat ba diat um larapai ku a panidi, ma diat kana um larapai a niodi: muat buruta ia ku ba in petakaruai ma a niodi ma ra panidi kai u Kiena. 29Pa di wiurai duk ta ru kinkinalik na pika kup rā pakan a măni lik? Ma pa ta pa diara i puka ino na pia ko ra Tamamuat: 30di luk‐a‐rapta a weu na lorimuat. 31Koniku muat burut; kuma i gala akit a matana korom muat u diat a mogoro na kinkinalik na pika. 32Ia kuma in pira‐wea iau nara matadiat a tara, ag pira‐wea i na ra matan Tamag i ki u ra maua.
34Koniku muat kanapi lena iau wan urin ba ag paki a malmal u vuravura: iau pa iau wan urin ba ag paki a malmal, a win a pakat ia. 35Kuma iau wan urin lena ag pam weranata diara a muana ma tamana, ma ru tebuan diara tabuna kai. 36Ma diat ba diat ki u ra matakin te a nuna iabara ku diat. 37Ia ba i mari akit ku tamana ma nana, ma iau a kinalik ku, pa in ka korom iau. 38Ia kai ba pa i lo a nuna kabai ma i patap un iau, pa in ka korom iau. 39Ia ba i komonobatpa a nuna lalaun, kura in pet‐rararuai; ma ia ba i pet‐raraua a nuna lalaun un iau kura in auarepa i.
40Ia ba i wamanatug muat, i wamanatug iau kai, ma ia ba i wamanatug iau i wamanatug ia ba i tula iau urin. 41Ia ba i wamanatug a parofita u ra ia ra parofita, kura in rakan a wedok ba in wewaot ma ra parofita; ia kai ba i wamanatug a tenapetoduru u ra ia ra tenapetoduru, kura in rakan a wedok ba in wewaot ma ra tenapetoduru. 42Ia kai ba in wainimta rā pa diat a kum kinkinalik bi, ma ra la na madirig na pala u ra ia ra disaipel, iau piri ligtatuna ta muat pa in panai kon i a nuna wedok.
Currently Selected:
Mataio 10: RAI
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1896.
