Mataio 18
18
10. PAKANA MA 8.
1U ra pakan a bug kuma a kum disaipel diat wan korom Iesu, ma diat tiri lena, O oi duk i gala akit u ra matanitu i ra maua? 2Ma i watai korom i rā nat kinalik ma i watur i na liwan ta diat, 3ma i piri lena, Iau piri ligtatuna ta muat, ba pa muat tapuku, lenkuma a kum kinkinalik na nat muat, muat kana ruk u ra matanitu i ra maua. 4Ia ba i wakinalik i, le ra nat lik bi, ia ku kuma in gala u ra matanitu i ra maua. 5Ia ba i wamanatug ta nat kinalik len bi, u ra iag, i wamanatug iau: 6ma ia ba i pet a rarapa rā pa diat a kum kinkinalik bi ba diat nurutau un iau, i ka korom i ba di wakabaronota i u ra wat pi di ububa padi mai, ma di walop a murugua i u ra lamana.
7Akaina lig korom diat a vuravura u ra kum lig i pet a raradi! A kum lig i pet a raradi in wan pat ku; ma akaina lig korom ia ba i pet kabinpai! 8Ba a limam, ba kakim i pet a rara ui, un pokokutuai, ma un ogigenuai kon ui: kuma i ka korom ui ba u ruk u ra lalaun ma rā ku a limam, ba rā ku a kakim, ma pikoina korom ui ba ru limam rap, ba ru kakim rap, ma din og ui u ra ugan pa in mat. 9Ba a matam i pet a rara ui, un wili, un ogigenuai kon ui: kuma i ka korom ui ba u ruk u ra lalaun ma rā ku a matam, ma pikoina korom ui ba ru in matam rap, ma din og ui u Kiena a ugan i kup iai.
10Koniku muat tebua ra pa diat a kum kinkinalik bi; kuma iau piri ta muat a nudiat kum agelo diat bobo liklik a matan Tamag i ki u ra maua. 12Muat kanapi lelawai? Ba ta mara na sipi a nun ta muana, ma rā pa diat i wan rara, pa in wan talura diat duk a tiwa na noina ma tiwa, ma in wan u ra kum tagai, in auare kup ia ba i wan rara? 13Ma ba i auarepai, iau piri ligtatuna ta muat, i kaia akit uni, ma kinalik u diat a tiwa na noina ma tiwa kuma pa diat wan rara. 14Len kai kuma, a Tamamuat i ki u ra maua, pa i nemi lena in wirua rā pa diat a kum kinkinalik bi.
15Ba temlik i petakakai korom ui, ui ku un wan korom i, ma un pira weai tana a makirana: ba i walogoro ui, u rakanpa temlik. 16Ba pa i walogoro ui, un benpa te ba ta ruadi duk, mutul a wan ugai korom i, kuma din urutatuna u ra pirapira a nun ruadi ba tuldi a tenawapua. 17Ba i patut ma pa i walogoro diara, un wapuanai korom a Ekelesia: ma ba i patut in walogoro a Ekelesia kai, un madekua i, lena in welara korom ui le ra muana igen ba a telona. 18Iau piri ligtatuna ta muat, A lig rap ba muat doi u vuravura, ia kai din doi u ra maua: ma ra lig rap ba muat palai u vuravura, ia kai din palai u ra maua. 19Iau piri balet ta muat, ba ta ru papa muat diara wepak u vuravura u ra lig diara an arig i tana, kura a Tamag i ki u ra maua in peti korom diara. 20Kuma ba ta ruadi ba ta tuldi ditul ki ugai u ra yag, kura ag ki na liwan ta ditul.
21Ma Petero i wan korom i, ma i tiri lena, Tadaru, tea pakan teglik in pet akakai korom iau, ma pa ag mag i uni? Un ta limadi ma ruadi a pakan duk? 22Iesu i piri tana, Pa iau piri tam lena, Limadi ma ruadi ku a pakan; ba limadi ma ruadi a noina a limadi ma ruadi a pakan ia. 23Kuma a matanitu ko ra maua diara welara ma ra tui ba i ligna tiri diat a nuna kum wetula. 24Ma ba i tiri kabin diat, di benpa te korom i ba pa i kelei utbai tana a nuna no nomara ma talant. 25Kăbi pa nuna ta lig ba in kele mai tana, a nuna tadaru i nakokon un i lena din wiura i, ma ra nuna tebuan ma ra kum na tunaliklik, ma ra lig rap i paki, ba din kelei balet mai. 26Ia kuma a wetula i puka na pia nana, ma i arig i lena, Tadaru, un komonopa iau mun, ma kura ag kele waraptai balet tam. 27A tadaru a nu ra wetula kuma i mari, ma i madekua i lena koniku in kelei balet. 28A wetula kuma i pari u na taman ma diara wetorom ma ra wetula bulug, a tepana, ba pa i kelei utbai tana a nuna mara na denarion; ma i pam i, ma i bigkokor i, ma i piri tana, Un kelei balet a utna pa u kelei utbai. 29Ma ra tepana i puka na pia ma i arig i lena, Un komonopa iau mun, ma kura ag kelei waraptai balet tam. 30Ma i patut i: i wan ma ut ma i warukta i u ra ruma na boboto, ba in tana iai un ta pupukai kuma in kele‐baletai uni a lig rap ba pa i kelei utbai. 31Ma diat a kum tepana ba diat bobo a lig di petai, i tapunuk akit uni a baladiat, ma diat wan korom a nudiat tadaru ma diat wapua i u ra lig rap di petai. 32Ma ra nuna tadaru i watapa i korom i, ma i piri tana, Akaina wetula ui, u ra num ararig ku iau madekua ui lena koniku un kelei balet a nug gala na utna kuma: 33pa i ka duk korom ui ba u mari a tepam lenkuma iau mari ui? 34Ma ra nuna tadaru i kămkămiak na maruna, ma i taram‐arua i ta diat a kum tenawagugut un ta pupukai kuma in kelei balet uni a nuna dinau rap. 35A Tamag i ki u ra maua, in pet lenkuma korom muat, ba pa muat madekuai ligtatuna u ra balamuat, a kum kakumuat, ko ra binabalu i ra lig pikoina diat peti korom muat.
Currently Selected:
Mataio 18: RAI
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1896.
