Mareko 6
6
6. A PAKANA.
1Ma i wan ko ra bual kuma; ma wan u ra nuna bual; ma diat a nuna kum tara wawera diat weuru mai. 2Ma ba Bug Tabu i wan pat, i wawera diat u ra ruma na lotu: ma ra kum tara magoro diat kakaian ba diat walogoro uni, ma diat lena, A muana kumi i rakanpai taka wai a kum lig bi? Awa bulug a manana di tari tana, awa bulug a kum lig na kakaian i petpeti? 3Pate duk kag a kapinta kumi, na tun Maria, ma ra tenalik Iakobo, ma Iose, ma Iuda, ma Simona? ma diat a kum tenalik tebuan pa diat tana duk ma dat? ma diat pukpukui uni. 4Ma Iesu i piri ta diat, Di ururu u ra parofita u ra kum bual igen, diat ku u ra nuna bual, ma ra kum takuni, ma nuna taman ku pa diat ururu uni. 5Ma i kana pam larapai ta lig dekdekina u ra bual kuma, i paki ku a limana un ta kabanadi a tara diat malapag ma walaun diat. 6Ma i kakaian kuma pa diat nurutaun i.
Ma i wan taliut u ra nundiat taman ma wera diat.
7Ma I watai korom i diat a Winunu‐ma‐ruadi, ma tulaua diat diat a wan a ruruadi; i tari ta diat kai a nakakon u diat a kum tebaran pikoina: 8Ma i wapua diat koniku diat a kipi a utna u ra nundiat winawan, ta win a buka ku; konima kai a utna na winagan, konima a ka, ma konima a mani u ra nundiat kopkop. 9I piri bulug diat a wan ma ra kum robo u ra kakidiat: ma koniku diat kopi ta ruadi a mulina malu. 10Ma i piri ta diat bulug, lenkumi, Ba muat ruk u ra ruma, muat ki uni in tuk u ra bug muat a wan ko ra bual kuma. 11Ma ra kum bual rap pa diat pinaria ma muat, ma pa diat walogoro muat, ba muat wan ko ra bual kuma, muat tataguai a kabu‐na‐pia ko ra kakimuat in wakinilag u diat. 12Ma diat wan kon i, ma diat wawera diat a kum tara diat a nunukpuku. 13Ma diat lu‐ruai magoro a kum tebaran ma diat magigitai ma ra dagi magoro diat a kum tara diat malapag, ma di walaunpa. 14Ma Eroda a Kig i walogoroi; kuma a iana i winarag: ma i piri, lena, Ioane a Tena‐papitaiso i lalaun balet ko ra mat, ia kuma di pam papai uni a kum dekdek na lig bi. 15Ra magan kai a tara diat, lena, Ilaita bi. Ra magan kai diat lena, a parofita bi, len ba ra pa diat a kum parofita. 16Ma Eroda, ba i walogoroi uni, i piri, lena, Ioane bi, ia ba iau poko kutuai a lorina, i lalaun balet. 17Kuma Eroda i wetula a tara ma diat pam‐a‐kotopai Ioane, ma warukta i u ra ruma na balbalat bati, i peti a lig kuma kup Erodiasa, a tebuan a nun Filipo na tenalik: kuma i taula ma i. 18Kuma Ioane i piri tan Eroda, lenkumi, Pa i ka ba muru taula ma ra tebuan a nun temlik. 19Ma Erodiasa i tebuai Ioane, ma i ligna umuai; ma i kana pet larapai; 20Kuma Eroda i buruta Ioane, kuma i nunurai lena a tena pet‐oduru ia ma ra muana pet na kurai a makirana ma i tama ura ia. Ma ba i walogoroi a nuna pirapira, i laklakon tauni a balana; ma i walogoroi ma kaia uni. 21Ma ba bug na weputa i wan pat, a bug kuma di butai Eroda uni, i lapira diat a nuna kum Tadaru ma diat a kum Tadaru na wineum ma ra kum Tadaru Kalilaia kai. 22Ma ba ra tunalik taurara a nun Erodiasa i ruk na ruma na lakara, Eroda i kaia uni ma diat bulug diat wagan ugai ma i; ma ra Kig i piri tan taurara, lena, un arig tag a lig rap ba u nemi, ag tari tam. 23Ma i weliman uni, lenkumi, Ta lig u arig tag, ag tari tam ba i galapi len ba iau palau ui u rā papara u rā nug matanitu. 24Ma i pari u na taman, ma piri tan nana, lenkumi, A wa duk ta lig ag arig tana? Ma i piri tana, un arig a lorin Ioane a Tena‐papitaiso. 25Ma i ruk balet ma wan kaka korom a Kig, ma arigi, lenkumi, Iau nemi ba un tari tag a lorin Ioane na Tena‐papitaiso u ra kupep. 26Ma ra Kig i tapunuk akit; ma u ra nuna weliman, ma u diat kai diat wagan ugai ma i, pa i ligna patut uni. 27Ma ra Kig i tulaua ma ut te ko diat a nuna kum tara wineum, ma tulai in kipi a lorin Ioane; ma i wan ma poko kutui a lorina u ra ruma na boboto, 28Ma i kipi a lorina u ra kupep ma i tari tan taurara; ma ra taurara i kipi korom nana. 29Ma ba diat a nuna kum tara wawera diat walogoropai, diat wan ma diat lopai a minatina, ma pakitai u ra bual na minat. 30Ma diat a kum aposetolo diat tolug ugai korom Iesu; ma diat pirapuana uni u ra lig rap diat a petai ma u ra lig rap diat ā wawera diat a kum tara uni. 31Ma i piri ta diat, lenkumi, Muat in, dat wan igen u ra bil, muat manatug kinalik i ai. Kuma magoro a tara diat wanwan, ia kuma, diat kana wagan uni a diat utna. 32Ma diat ka u ra aka ma wan igen u ra bil diat ma ku. 33Ma diat a kum tara diat boboi diat ba diat wan, ma magoro kai diat nunura diat, ma diat kala ugai ko ra matan taman rap, ma diat kala liai diat u ra bual kuma. 34Ma ba i wan wetulut i boboi diat a magoro kum tara, ma i makil a balana u diat, kuma diat tana biaku le ra kum sipi ba pa ta nudiat tena warua: ma i wera diat u ra magoro a lig. 35Ma ba make i ki leke, a nuna kum tara wawera diat wan koromi, ma diat lena, A bil ku kumi ma ra keke i pot na lop: 36Un tula‐ruai diat, diat a wan u ra bual matiti kumin ma u ra kum taman kai, diat a kuli adiat utna na winagan. 37Ma ia, i piri ta diat, lenkumi, Muat ma muat tabara diat. Ma diat piri tana, Ka miat a wan duk ma kuli a utna i welara ma ra ru mara na denarion, ma tabara diat mai ni? 38Ma i piri tan diat, Teadi a kem na falaoa i tana ta muat? wan ma witag. Ma ba diat nunurai, diat piri tana, Limadi, ma ru win a ian. 39Ma i tula diat diat piri ta diat a kum tara rap, diat a ki tau u ra uali. 40Ma diat ki akākana, a kum akana ta mara, ma ra kum akana kai ta lim na noina. 41Ma i rakanpai a lima na kem na falaoa ma ruwin a ian, ma i tatada u ra maua, ma karik pa, ma bik weranai a kum kem na falaoa; ma i tari ta diat a kum tarawawera diat palau diat uni; i webaianai bulug a ruwin a ian un diat rap. 42Ma diat rap diat wagan ma diat mauru. 43Ma diat tom ugai a mutamuta na utna, i welara ma ra noina ma ruadi a ka diat wategpai, ma ra mutamuta na ian kai. 44Ma diat diat ani a kem na falaoa a lima na no mara diat a tara. 45Ma Iesu i wakoto diat a nuna kum tarawawera diat ka u ra aka, ma wan muka tau u ra papara danim u Betesaita, ma ia ku in tuluai diat a kum tara. 46Ma ba i rap a nunu pirapira korom diat i wan toto u ra tagai in arig i ai, 47Ma ba malurap, a aka i tana pugan u ra tai, ma ia ku i tana nakono. 48Ma i bobo diat diat begbeg ma ku u ra gala na walua, kuma a dadaip taka na muka, ma i wan na te u ra danim korom diat, u ra nuna wat na pakana lauma u ra marum; ma i wan len ba i pot na wan lika diat. 49Ma diat ma, ba diat bobo ia i wan na te u ra tai, diat kanapi bakai a tebaran ia, ma diat kulkulai; kuma diat rap diat boboi, ma diat burut uni. 50Ma i pira‐kakai korom diat, lenkumi, Muat manatug ma: Iau ku kumi; koniku muat burut, 51Ma i ka ma ut u ra aka ma diat; ma dadaip i tamarit; ma i leklakon tauni a baladiat; 52Kuma pa diat manana u ra lig i a peti u ra kum kem na falaoa, ma i maliu tau a baladiat.
53Ma ba diat karot, diat pukai u ra bual Kenesareta, ma diat pitakototai a aka u nakono. 54Ma ba diat irok tak’ u ra aka, a kum tara rap diat nunura kakai ia, 55Ma diat kala wetulut u ra papara bual rap kuma, ma diat lopai a kum tara malapag u ra nudiat ininep, u ra paparina bual kuma ba diat walogoroi i tana i ai. 56Ma u ra kum bual rap i wan uni, ba taman duk, ba wanua‐na‐ruma duk, ba na bual ku, diat pakitai a nudiat tara malapag u ra matana bug, ma diat arig tana, lena, diat a tuktuki a titina ku a nuna malu ma diat rap diat tuktai diat lalaun balet uni.
Currently Selected:
Mareko 6: RAI
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1896.
