YOANO 17
17
1Yesu wahanjikile yino yuma; iye nikuhetula meso jenyi kwilu, wambile ngwenyi, Tata, ola hiyeza; chichimieka Mwané, hanga Mwané nawa akakuchichimieke. 2Chizechene ngwe wamuhele chiyulo helu lia atu eswe, hanga akahane mwono wa mutolo kuli waze eswe hiunamwehe. 3Uno we mwono wa mutolo, hanga akanyingike yena mwe Zambi wamwenemwene umuwika, ni Yesu Kristu yoze yena wamutumine. 4Nakuchichimiekene hano hashi; se hingunamanununa chitanga chize wanguhele kulinga. 5Haliapwila, nguchichimieke, Tata, hamwe ni yena ni uhenya uze napwile nawo hamwe ni yena, muze te hashi kanda hapwa.
6Nasolwele jina lie kuli atu aze wanguhele a kuli akwa hashi; apwile nie, ni yena wanguhelo; o hanafungu liji lie. 7Haliapwila kananyingika yuma yeswayo wanguhele, ya kuli yena. 8Mumu maliji aze wanguhele, hingunaho, o aatambwile, anyingikine chamwenemwene nakatukile kuli yena, o afulielele yena wangutumine. 9Ngunalembe hali ayo; chishi kulemba hali akwa hashi, alioze hali waze hiunangwehe; mumu nie. 10Ni yuma yize yeswe niyami, niye; ni vize niye, niyami: kananguchichimieka nayo. 11Ni yami chishi nawa hano hashi, ni wano hwali hano hashi, yami mungwiza kuli yena. Tata Musandu, uafunge kama mu jina lia yena mwene, waze hiunangwehe, hanga akapwe umuwika, chizechene ngwe yetu. 12Muze napwile hamwe no hashi, naatangile mu jina lie waze hiunangwehe: naalayile, mba niumwe wa kuli ayo watokele, shina mwe mukwa utoke; hanga chisoneko chikamanunuke. 13Alioze haliapwila mungwiza kuli yena; ni yino yuma ngunahanjika hano hashi, hanga uwahililo wami ukazale tò muli ayo. 14Hingunahe liji lie; hi akwa hashi Kanaavwila kole, mumu o hi akwa hashi ko, chizechene ngwe yami hi nguli mukwa hashi ko. 15Chalembele hanga ukaachize hashi, alioze hanga ukaafunge kuli mwe mupi. 16O hi akwa hashi ko, chizechene ngwe yami hi nguli mukwa hashi ko. 17Uapwise asandu mu umwenemwene; liji lie we umwenemwene. 18Chizechene ngwe yena wangutumine hano hashi, chocho yami nawa hingunaatumu hashi. 19Mumu hali ayo nakulisela ku usandu, hanga ayo ene nawa akalisele ku usandu mu umwenemwene.
20Chipwe chalembele hali wano wika, alioze hali waze nawa mangufuliela mumu ha liji lio; 21hanga o eswe akapwe umuwika; chizechene ngwe yena Tata uli muli yami, ni yami nguli muli yena, hanga o nawa akapwe umuwika muli yetu; hanga akwa hashi akafuliele ngwe wangutumine. 22Ni uhenya uze hiunangwehe, hingunahewo; hanga akapwe umuwika chizechene ngwe yetu tuli umuwika; 23yami muli ayo, ni yena muli yami, hanga Ukaapwise umuwika liakulu; hanga akwa hashi akanyingike wangutumine, no hiunaazange chizechene ngwe hiunanguzange yami. 24Tata, ngunazange waze nawa hiunangwehe akapwe hamwe ni yami kuze nguli, hanga akatale uhenya wami, uze wanguhele; mumu wanguzangile shimbu kanda asela fundamentu ya hashi. 25A Tata, mukwa ululi, akwa hashi kakunyingikineko, alioze yami nakunyingikine; ni wano anyingikine ngwe wangutumine; 26naanyingikishine jina lie, mungukaanyingikisalio; hanga zango lize hiunanguzange nalio, likapwe muli ayo, ni yami muli ayo.
Currently Selected:
YOANO 17: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.
