YOANO 3

1Achi, kwapwile mutu wa kuli A-Fwariseu, jina lienyi Nikondemu, mukwa kuyula hakachi ka A-Yunda. 2Iye wayile kuli Yesu ha ufuku, wambile kuli iye ngwenyi, Longeshi, tunanyingika yena uli longeshi unakatuka kuli Zambi; mumu niumwe mahasa kulinga yilayi yize yena wakulinga shina Zambi mapwa hamwe nenyi. 3Yesu wamukumbulwile ngwenyi, Pundu, pundu, ngunambe kuli yena ngwami, Mutu kahashile kumona wanangana wa Zambi shina masemuka kwilu. 4Nikondemu yamba kuli iye ngwenyi, Ngwe kuchi mutu mahasa kusemuka muze mapwa mukulwana? Mahasa kunjila chisuho chamuchiali mu jimo lia naye akasemuke, nyi? 5Yesu wakumbulwile ngwenyi, Pundu, pundu, ngunambe kuli yena ngwami, Mutu kahashile kunjila mu wanangana wa Zambi shina masemuka ku meya ni kuli Spiritu. 6Chize chinasemuka ku musunya, musunya; ni chize chinasemuka kuli Spiritu, Spiritu. 7Kanda ukomoka ngwe hinamba kuli yena ngwami, Chanutamba kusemuka kwilu. 8Ye fuji muyipalika kweswe muyipala, ni yena muwivwa liji liayo, alioze kushi kunyingika kuze muyikatuka ni kuze muyiya: chocho apwa mweswe wakusemuka kuli Spiritu. 9Nikondemu wamukumbulwile ngwenyi. Ngwe kuchi yino yuma muyihasa kupwa? 10Yesu wamukumbulwile ngwenyi, Yena uli mwe longeshi wa A-Izalele hindu kwanyingikine yino yuma, nyi? 11Pundu, pundu, ngunambe kuli yena ngwami, Yetu twakuhanjika yize tunanyingika; twakushindakenya yize hitunamono; ni yenu kunushi kutambula Shindakenyo yetu. 12Kachi nanwambulwilanga yuma ya hashi, kunushi kufuliela, ngwe kuchi munufuliela kachi mungunwambulwila yuma ya mwilu? 13Mba niumwe wazezukile mwilu shina yoze wahulumukine mwilu, mwe Mwana Mutu, mwenawo mwilu mwali. 14Chizechene ngwe Mose azundwile kapela mu puya, chocho chatamba kuzundula mwe Mwana Mutu; 15hanga mweswawo mamufuliela, akapwe ni mwono wa mutolo.

16Mumu chocho Zambi wazangile akwa hashi, wechele Mwanenyi wa wika, hanga mweswawo mamufuliela, kechi katoka, alioze akapwe ni mwono wa mutolo. 17Mumu Zambi katumine Mwanenyi hano hashi, hanga akapatwile akwa hashi, alioze hanga akwa hashi alilamwine kuli iye. 18Yoze mamufuliela keshi kumupatwila: yoze keshi kufuliela hanamupatwila kulu, mumu kafulieleleko jina lia mwe Mwana wa wika wa Zambi. 19Uno we upatwilo, ngwo, Pangu hilineza hano hashi, ni atu azangile milima, hi pangu ko; mumu yitanga yo yapwile ya ungulungulu. 20Mumu mweswe wakulinga yipi keshi kuzanga pangu, keshi kwiza ku pangu, kuchina mamukumika ha yitanga yenyi. 21Alioze yoze wakulinga umwenemwene kakwizaza ku pangu, hanga akasolole yitanga yenyi, hanayilingi muli Zambi.

22Kulutwe lia yino yuma, Yesu wahetele ni tumbaji twenyi ku chifuchi cha Yundeya, washimbwileko hamwe no, nikupapachisa atu. 23Ni Yoano nawa wapwile nikupapachisa mu Enone hakamwihi ni Salini, mumu kwapwile meya anji kuze, ni atu apwile nikuyaya nikutambula upapachiso. 24Mumu Yoano kanda amumbila mu zuwo lia ususu.

25Kwapwile kashika mbandanga hakachi ka tumbaji twa Yoano ni A-Yunda ha kutwala ku kupemesa. 26O ayile kuli Yoano, ambile kuli iye ngwo, Longeshi, yoze wapwile hamwe ni yena kuze kanda lia Yordau, yoze wamushindakenyene, kumanyi, iye kakupapachisa atu, ni eswe kakuyaya kuli iye. 27Yoano wakumbulwile, ngwenyi, Mutu kahashile kutambula nichimwe shina mamwahacho kwilu. 28Yenwene nunashindakenya hali yami, ngwe nambile ngwami, Yami hi Kristu ko, alioze ngunatumiwa kulutwe lienyi. 29Yoze uli ni ndungi, mwe sandungi: alioze kasendo ka sandungi, yoze wakumana nikumwivwa, kakuwahilila chikolo mumu ha liji lia sandungi: uno uwahililo wami kashika unazala tò. 30Iye chamutamba kuya nikutoha, alioze yami changutamba kuya nikukehuluka.

31Yoze unakatuka mwilu iye helu lia eswe: ni yoze unakatuka hashi iye mukwa hashi, iye kakuhanjika ya hashi: yoze unakatuka mwilu iye helu lia eswe. 32Chize hanamono ni chize hanevu, chenacho kakushindakenya; alioze niumwe matambula Shindakenyo yenyi. 33Yoze hanatambula Shindakenyo yenyi hanase chinyingi chenyi ngwenyi, Zambi iye wamwenemwene; 34mumu yoze Zambi hanamutumu kakuhanjika maliji a Zambi: mumu keshi kuhana Spiritu ku njongo. 35Mwe Tata kakuzanga mwe Mwana; hanakunjika yuma yeswe mu kwoko lienyi. 36Yoze mafuliela mwe Mwana, mwono wa mutolo kali nawo; yoze keshi kwononoka kuli mwe Mwana, kechi kamona mwono, alioze utenu wa Zambi kuwatwama hali iye.

Currently Selected:

YOANO 3: Csa

Highlight

Copy