Joh. 4
4
Jesus samba sinanalep tai Samaria
1Kele aiagai Tuhan Jesus araarepman tai Parise sipasiului Jesus le maigi samba siraunia le maigi bele pei kai Johannes, 2– kenanen ta tubunia Jesus amasirau, sipasiuluinia le, – 3kaddiuakenangan Judea, ei nia minca ka Galilea. 4Tapoi ta moi ta isabau laggai Samaria.
5 #
1Mos. 33:19; Jos. 24:32 Ia geti sege nia ka sara laggai ka tobbou Samaria sipuoni Sikhar simalegere ka mone sikau Jakob siburu ka togania kai Josep. 6Ai sedda sumur siugguk Jakob. Amasaggongan poi Jesus muenung, uddetnakenangan tubunia ka bebet sumur. Ka teteret nenda aimututugge sulu.
7Lepa oi sara sinanalep tai Samaria masiaisu oinan. Kuanangan ka matania Jesus, “Ake kaku loku.” 8Aipoi sipasiuluinia ameian sia ka laggai masisaki kan.
9 #
Ezra 4:1-5; Neh. 4:1, 2 Kuana le kamatania sinanalep tai Samaria, “Kipa galai nutitiddou kaku lo, ekeu tai Jahudi, aku sinanalep tai Samaria?” (Taipaooba le poi sia tai Jahudi tai Samaria.)
10Aleginangan nia Jesus, “Ke nuagai bai panguruat Taikamanua, samba kasei sikua ka matam, ake kaku loku, ta isosoppi nupanindogi nia, akenangan kekeu oinan sipuririmanua.”
11Kuanangan ka matania sinanalep, “Tuan, beri seseilu ta anai kekeu, makeru pei bagei sumur nene; kaipa te ibabara kekeu oinan sipuririmanua? 12Ekeu pei le pa abeu ka taikebbukatmai si Jakob, sipasiaake ka kai sumur nene? Nene le lonia samba tatogania samba tarimeunia.”
13Aleginangan nia Jesus, “Sangamberi silo oinan nene, maooggou le nia minca, 14tapoi silo oinan akenenku, ta maooggou nia buru. Aipoi oinan kaunenku ka sia, bailiu ka bagania bubuakat oinan sipuguguruk sipasikakau ka tubunia purimanuaiat sitaitatata!”
15Kuanangan ka matania sinanalep, “Tuan, ake kaku oinan nenda, buian kumaoggou minca, samba buian kuoi minca se masiaisu oinan.”
16Kuanangan ka matania Jesus, “Kenan boiki nusogai simanteunu, lepa oi ekeu minca se.”
17“Ta anai simanteuku,” ngangan sinanalep.
Kuanangan ka matania Jesus, “Aisesengan sikuam, ta anai simanteunu. 18Aipoi limangan sia simanteunu, samba sibabara ka tubum kineneiget, ta simanteunu, bulatnia sikuam.”
19Kuanangan ka matania sinanalep, “Tuan, kineneiget makolou kaku, nabi le ekeu. 20Taikebbukatmai ka leleu nene rapanindogi Taikamanua, tapoi kam masikua, sarat ka Jerusalem le kudduat masipanindogi Taikamanua.”
21Kuanangan ka matania Jesus, “Oi sinanalep, kau imatonem bagam kaku, babara te jamnia geti, ta ka leleu nene, ta ka Jerusalem nupanindogi kam Ukkui. 22Kam nupanindogi kam taiagaietmui, kai geti kuagai kai panindogietmai; aipoi puaragat ka tai Jahudi le ibabara. 23Tapoi babara te geti jamnia, samba kineneigetnan, sia sipaninindou sipulelelek ka geget Taikamanua samba pubulanan le rapanindogi Ukkui; sipaninindou kele nenda poi siobat Ukkui. 24Ketsat le Taikamanua, oto sipanindogi nia, buita ka geget Ketsat samba pubulanan ipanindogi nia.”
25Kuanangan ka matania sinanalep, “Kuagai leu momoi geti Mesias sipuoni Kristus. Amoian geti nia, poiliatnangan sangamberinia ka matamai.”
26Kuanangan ka matania Jesus, “Aku te nia sipatiboake ekeu.”
27Ka teteret nenda, bara sia sipasiuluinia. Tenan le kisei ka bagada raitco Jesus ipatiboake sinanalep. Tapoi beri sia sara sipasikukua ka matat sinanalep, “Apa nuaala se?” ele masinounou Jesus, “Nupatitiboake koi sinanalep nene?”
28Ia geti galaknangan lalaisunia sinanalep, toili nia ka laggai, kuanangan ka matada taikalaggaiat, 29“Sita nuitco kam sara sirimanua sikua ka mataku sangamberi sigalaiku; baleu niangan pa Kristus?” 30Ia geti bela sia sangamberida ka laggai, ei sia masiamiake Jesus.
31Ka oggaknia nenda, nanarangan nia sipasiuluinia, kuarangan, “Rabbi, mukom!”
32Kuana le ka matada, “Ai kaku katku taiagaietmui.”
33Kuarangan sipasiuluinia pasasambada, “Ai pa sia sipasikakau kannia?”
34Kuanangan ka matada Jesus, “Katku ia te mugalai siobat bagat sikoiniake aku samba masilepaake galajetnia. 35Nukukua tebai kam, ‘Ai le epat ngalaggo ibara pasimoneiat.’ Tapoi kukua nia ka matamui: Loggouake pei kam nuitco kam mone, amaraan buania, moneietnan! 36Kise pei le aisiloan upania sipugagalai, samba iruruake bua purimanuaiat sitaitatata, bule imakere rapuangka baga sipangangaram samba sipasigegetai. 37Bulatnia tebai tiboiet nene, ‘Sabagei mangaram, sabagei masigetai.’ 38Kukoiniake kam masimonei taigagalaietmui, sabagei le amasaggo tubu mugalai, kam masipuuktungi sigalaira.”
39Maigi sia tai Samaria ka laggai nenda amatonem baga ka Jesus, kalulut tiboiet simunengakenen sinanalep, ‘Ipoiliat ka mataku sangamberi sigalaiku.’ 40Kele arasege tai Samaria ka tubut Jesus, tiddourangan ikuddu ka sia; pukuddunangan sedda rua ngagogoi.
41Sara pei aramaigi simatonem baga ka tubut Jesus kalulut tiboietnia. 42Kuarangan ka matat sinanalep, “Taan kalulut tiboietnu aimatonem bagamai, tubumaian aiarep nia samba akuagaian kai sinene te bulat Sipaarau taikapolak.”
Ialeake togat pagugulet Rimata Jesus
(Mat. 8:5-13; Luk. 7:1-10)
43Pasat rua ngagogoi tuitui Jesus sedda ei nia ka Galilea. 44#Mat. 13:57; Mrk. 6:4; Luk. 4:24 Tubunia poi Jesus amasikua, ta abeu nabi ka laggainia. 45#Joh. 2:23 Kele aisege ka Galilea, alarangan nia tai Galilea, araitcoan poi sangamberi sigalainia ka Jerusalem ka Punen Paska.
46 #
Joh. 2:1-11
Lepa ei minca Jesus ka Kana tobbou Galilea, ka sigalainia oinan ibailiu anggur. Ai sara pagugulet rimata ka Kapernaum, aimubebesi togania simanteu. 47Kele aiarep kaooi Jesus ka Galilea barania ka Judea, ei nia ka Jesus manindou bule ioi ka Kapernaum masialeake togania simalegere matei. 48Kuanangan ka matania Jesus, “Ke tapei nuitco kam katuaggaiat samba kiseiet, ta matotonem bagamui.”
49Kuanangan ka matania pagugulet rimata, “Konan le Tuhan, bui imatei togaku.”
50Kuanangan ka matania Jesus, “Kenanan, aimuririmanua togam.”
Tonem bagania sirimanua nenda ka tiboiet sikuat Jesus ka matania, tuituinangan leu et. 51Ai nia totoili, oi sapaguguletnia masipaseseake nia masisegeake ka matania puririmanuan togania.
52Isenangan sia jam piga aimale togania. Kuarangan, “Sokat bobo sara sinago aitata roketnia.” 53Repdepnangan ukkuinia, jam nenda te aikua ka matania Jesus, “Aimuririmanua togam.” Matonemnangan bagania samba sangalalepnia.
54Ia te kerek sikaruania sigalai Jesus sioinia ka Galilea barania ka Judea.
Currently Selected:
Joh. 4: MWV
Highlight
Share
Copy
Want to have your highlights saved across all your devices? Sign up or sign in
@LAI 2015
