Luk. 21

Panguruat sinanalep silumang simageba

1Kele ailoggouake matania Jesus, itconangan sia simakayo rabulukngake panguruatda ka bagat petit bulagat panguruat. 2Iitco leu sara sinanalep silumang simageba masibulukngake rua rimis ka bagat peti nenda. 3Kuanangan Jesus, “Kukua nia ka matamui, sibulukngakenen sinanalep silumang simageba nene pei le maigi ka sibulukngakenenda sabagei. 4Aipoi sangamberida sibara ka legei pukayoatda le arakau panguruatda, tapoi silumang nene geti ka gebania le aikau, ia te sangamberi purimanuaiatnia.”

Ipoiliat Jesus pagalaiat kararagat Uman Taikamanua

(Mat. 24:1-2; Mrk. 13:1-2)

5Ai piga pa sia sipasititiboi pagalaiat Uman Taikamanua kopet laingenia kalulut pabukkubukku simalatsat samba panguruat sikaura sirimanua. Kuanangan Jesus, 6“Babara te gogoinia, sangamberi siitcomui nene, beri sara bukku sipalalakke mulelegei, sangamberinia le turaragatnake.”

Gejat baga samba paoreat

7Lepa nounourangan Jesus sipasiuluinia, “Guru pigamoi ibabara nene? Samba aponia katuaggaiatnia kei bara nene?”

8Kuanangan Jesus, “Pagaba kam, bui rapepeake kam. Maigi poi siooi geti masipuoni oningku, kuarangan, “Aku te nia! samba ‘Aiailingan teterenia.’ Bui nutut kam sia. 9Bara nuarep kam katuareman pasaggangan samba pulamagat, bui nutugege kam. Aipoi ta moi ta ibara boiki sangamberinia nene, tapoi tapei ia ne kalepakat polak.”

10Lepa kuanangan minca ka matada, “Tususuru le geti bangsa sara masisaggangi bangsa bagei samba purimataat sara masisaggangi purimataat bagei. 11Babara te geti ngeungeu polak simaron samba kaipa kaipa bara pulajeat samba sorobut laggai. Bara leu kalotoakenen samba kiseiakenen ka manua. 12Tapoi kei bara sangamberi nene ralalaba samba rapaooreji re kam; segeakerangan leu kam ka uma parurukat samba ka penjara; pagiritrangan kam ka matada tai rimata samba sipasiukum kalulut oningku. 13Ka bagat nene te ibailiu kam simunengake aku. 14#Luk. 12:11, 12 Oto siddoni kam ka bagamui, bui imakarat bagamui pagalaiat tiboakenenmui. 15Ai leu kuake nia ka kam tiboiet samba sikut paatuat, bui ioi raalegi kam saggakmui ele rasakkala sikuamui. 16Samba tubut eppumui leu inganganduake kam, sasarainamui, simalegere ka tubumui, sasuruakmui; samba piga pa ka talagamui ramateiake. 17Sangamberi sirimanua malaga baga ka tubumui kalulut oningku. 18Tapoi beri sangantaili alaimui ta malilimai. 19Ke nuomake kam nia, ta isosoppi nupurimanua kam.”

Pagalaiat katukataikat Jerusalem

(Mat. 24:15-21; Mrk. 13:14-19)

20“oto ke nuitco kam ragoilik Jerusalem tai saladdu, agaimuian amalegerengan te katukataikatnia. 21Ka teterenia nenda kasei sikuddu ka Judea, kau ratuitui raei ka leleu; sikuddu ka bagat kota kau rabela, samba sikuddu ka mone, bui ratoili ka laggai. 22#Hos. 9:7 Gogoi pasilumunan poi gogoi nenda, bule ipuaili sangamberi sinuratnakenen ka Surat Sipunenan. 23Katainangan te ka saina sibara suruket samba sipasitotottoni toga ka gogoi nenda. Babara poi paoreat sabeu ka laggai nene, samba ukuman Taikamanua ka bangsa nene. 24Ai simamatei ka son lanjau, sabagei rambit sia bangsa bagei orejetda; samba Jerusalem rapaperaki sipuarat sabulungan, teret sappuru tetere sinetereakenen ka sia.”

Kaoijanan Togatsirimanua

25 # Jes. 13:10; Jehz. 32:7; Jol. 2:31; Pamoil. 6:12, 13 “Lepa geti bara patuaggaiat ka matat sulu, ka laggo samba ka panyanyat. Malotorangan sirimanua ka polak nene, paingonangan sia raarep ipuukku samba ipujaa koat. 26Pakaddonangan sirimanua lotora rangenaake apa sibabara ka sangalio polak nene, mangeungeu poi ron manua. 27#Dan. 7:13; Pamoil. 1:7 Ka teterenia nenda itcorangan Togatsirimanua ioi ka tanairusa ka gege samba pulatsanan sabeu. 28Ke aitaddaakean sangamberinia nene, rioake kam tubumui, teilaake kam matamui, amalegerengan poi puaragatmui.”

Masialaki nganturat ka sileu

(Mat. 24:32-35; Mrk. 13:28-31)

29“Lepa tiboinangan Jesus ka matada pasikat: Itco le kam loinat sileu ele loina bagei. 30Ke nuitco kam amusinulangan, agaimuian amalegerengan te legeu manua. 31Kisedda leu te ke nuitco kam ibara sangamberinia nene, agaimuian amalegerengan te Purimataat Taikamanua. 32Kukua nia ka matamui: tapei tatata reddenan nene puailinangan sangamberinia nene. 33Manua samba polak tatata le, tivoietku geti ta tatata buru.”

Kau mariuriu mumata

34“Pagaba kam tubumui, bui nututuri kam pukokom samba pulolo simapuinengen, samba masipaatu purimanuaiat polak, bui sinulut ioi gogoi Tuhan ka kam. 35Kele jalo le poi ioi gogoi ka sangamberi sirimanua ka polak nene. 36Oto kau imariuriu nupumata samba nupanindou kam, ioi nukatsiliake kam sangamberi sibabara geti, samba ioi nupurio kam ka matat Togatsirimanua.”

37 # Luk. 19:47 Sinago, Jesus mungantoman ka Uman Taikamnua, sinoibo geti ei nia ka leleu Tula mugogoi. 38Senen simancep oi sia sirimanua simigi ka matania ka Uman Taikamanua masiarep ngantomannia.

Currently Selected:

Luk. 21: MWV

Highlight

Copy