Mrk. 15

Jesus ka matat Pilatus

(Mat. 27:1-2, 11-14; Luk. 23:1-5; Joh. 18:28-38)

1Mamancep pei le purapatrangan tai imam sabeu, tai bajara tai Jahudi samba siagaisurat. Kaberangan Jesus, ambitrangan nia rasegeake nia kai Pilatus. 2Nounounangan nia si Pilatus, “Ele, rimatada tai Jahudi leu ekeu?”

Aleginangan nia Jesus, “Anukuangan.”

3Maigi arakau panganduat tai imam sabeu masijoake Jesus. 4Nounounangan minca Jesus si Pilatus, “Ta nuaalegi? Itco pei iginia panganduatda rajoake ekeu!”

5Tapoi taan aialegi Jesus, pat kisei ka bagania si Pilatus.

Raukum matei Jesus

(Mat. 27:15-26; Luk. 23:13-25; Joh. 18:39–19:16)

6Amatukelengan senen Punen Paska tubelaake sara siukumakenen siripot siobat bagada simigi. 7Ka teteret nenda ai sara sirimanua sipuoni si Barabbas atuukumake sambada sigalai pugaugapat, kalulut aramateiake sirimanua ka teteret pugaugapat. 8Oi sia sirimanua simigi kai Pilatus tiddourangan bule ibelaake sara siukumakenen kele simareirei. 9Nounounangan sia si Pilatus, “Noba kam kubelaake ka kam rimatada tai Jahudi nene?” 10Aiagaian poi si Pilatus, lagat bagada le tai imam sabeu aranganduake Jesus ka tubunia.

11Tubbuirangan bagada simigi tai imam sabeu bule si Barabbas le ibelaake ka sia. 12Kuanangan minca si Pilatus ka matada sirimanua simigi, “Oto kipangan le kugagalai ka tubut kuanenmui rimatada tai Jahudi?”

13Pugereirangan minca, “Siliktengaake le nia!”

14Kuanangan si Pilatus, “Aponia poi jo aigalai?”

Ia pei imakope rapugerei, “Siliktengaake le nia!”

15Bule isege bagada sirimanua simigi belaakenangan si Barabbas si Pilatus. Jesus geti ikau rabobo, lepa segeakenangan nia rasiliktengaake nia.

Rapaloloi Jesus tai saladdu

(Mat. 27:27-31; Joh. 19:2-3)

16Lepa ambitrangan Jesus tai saladdu ka pasiukuman ka kantor gubernur. Ruruakerangan sangamberi aleira tai saladdu. 17Leppeiakerangan leppei simabonan ka tubut Jesus, tikairangan rui kiritnia, kaurangan nia ka utenia. 18Taddaakerangan raroroi nia kuarangan, “Salam, rimatada tai Jahudi!” 19Boborangan utenia manggea, lujirangan nia, purapporangan ka matania. 20Lepa arapaloloi nia, golokrangan leppei simabonan ka tubunia, leppeiakerangan minca leppeinia. Lepa ambitrangan nia rasiliktengaake nia.

Katusiliktengaat Jesus

(Mat. 27:32-44; Luk. 23:26-43; Joh. 19:17-27)

21 # Rm. 16:13 Ka tengan enungan ailirangan sara sirimanua sipuoni si Simon tai Kirene, ukkui Aleksander samba Rufus barania ka mone; kaurangan nia ibairat siliktengan Jesus. 22Ambitrangan Jesus ka sara kudduat sipuoni Golgota, tibonannia, “Leleu Lakkupat”. 23Lepa kaurangan lonia anggur pagalu mur, tapoi ta ioba ilo nia. 24#Psalm. 22:19 Ia geti siliktengaakerangan nia. Lepa parubeirangan bibilet tubunia sipauktukngakenen, bule raagai rubeiatda senenda.

25Bobo siba simancep arasiliktengaake nia. 26Ka pata ka siliktengan Jesus raottotnake surat masikua paluluat jojoakenenda nia, “Rimatada tai Jahudi”. 27#Jes. 53:12 Samba rasiliktengaake leu rua sipasimamatei, sara kai kattoet, sara kai katsiunia. [28Kisedda te ipuaili sitususurat ka Surat Sipunenan, “Raaddeake nia kele sirimanua sijo.”]

29 # Psalm. 22:8, 109:25; Mrk. 14:58; Joh. 2:19 Sangamberi situsasabau sedda masipaloloi Jesus. Pagilikrangan utera kuarangan, “Ekeu sioba masiragatnake Uman Taikamanua samba masirioake nia minca ka bagat telu ngagogoi! 30Belaake tubum, gorosotnake ekeu ka siliktenga!”

31Tai imam sabeu leu, siagaisurat samba tai bajara tai Jahudi masigegei Jesus, kuarangan pasasambada, “Sabagei airimanuaake, tubunia geti ta momoi irimanuaake! 32Kristus, Rimatada tai Israel, gorosotnake ekeu ka siliktenga, kuitco kai nia, bule imatonem bagamai.”

Beri sia sirua leu alei Jesus tusiliktengaake masipaloloi Jesus.

Kamateiat Jesus

(Mat. 27:45-56; Luk. 23:44-49; Joh. 19:28-30)

33Bobo pulu rua tugge, magepgepnangan sangalio polak teret bobo telu. 34#Psalm. 22:2 Bobo telu pugereinangan Jesus sabeu nganga, “Eloi, Eloi, lama sabakhtani?” tibonannia, “Taikamanuangku, Taikamanuangku, nukakaddiuake kodda aku?”

35Ai piga pa sia sipuririo sedda; kele araarep nia kuarangan, “Arep kam, aisosogai si Elia!” 36#Psalm. 69:22 Pabalaunangan sara sirimanua iei masiala romot, somakenangan nia ka anggur simalaga, lepa kokkokngakenangan nia ka buttet manggea, totoiakenangan nia ka ngungun Jesus kuanangan, “Bola, taitcoake kam nia boiki, baleu moi si Elia igorosotnake nia.”

37Pugereinangan Jesus sabeu nganga, sege isegeake engania.

38 # 2Mos. 26:31-33 Mabiritnangan komang kekere ka Uman Taikamanua baraniaka pata aili ka epe bailiu rua. 39Kele aiitco nia kapiten saladdu sipuririo ipot Jesus pagalaiat katatakat Jesus, kuanangan, “Bulat Togat Taikamanua leu bai sinene!”

40 # Luk. 8:2, 3 Ai leu sedda tainanalep sipuririo ka simareunan, ka talagada ai si Maria Magdalena, si Maria inan Jakobus sisule samba si Joses samba si Salome. 41Sia te nene tainanalep sipasitutut samba sipuuku Jesus ai pei le nia ka Galilea. Maigi pei le tainanalep bagei siooi ka Jerusalem masipaaleiake Jesus.

Pasirateiat Jesus

(Mat. 27:57-61; Luk. 23:50-56; Joh. 19:38-42)

42Kele aimasoibo, gogoi nenda ia te gogoi panarengan kei bara Sabat, 43oi si Josep tai Arimatea, ia te sara laddou Rapat Sabeu simatopit, samba singenaake Purimataat Taikamanua; emeakenangan tubunia mei kai Pilatus masitiddou tubut Jesus. 44Makiseinangan ka bagania si Pilatus aiarep atataan Jesus. Sogainangan kapiten saladdu, nounounangan nia ele bulatnia atataan Jesus. 45Kele aiarep katukolobat sibara kai kapiten saladdu si Pilatus, obaakenangan iala tubut Jesus si Josep. 46Sakinangan komang juto si Josep, gorosotnakenangan tubut Jesus ka siliktenga, tabuninangan nia juto. Galakngakenangan nia ka bagat ratei silepa kailu ka bulat. Lepa guilunangan sara bukku sabeu matatbaliu ratei takkenia. 47Ka teteret nenda si Maria Magdalena samba si Maria inan Joses airaiitcoake kudduat katugalangan Jesus.

Currently Selected:

Mrk. 15: MWV

Highlight

Copy