YOHANE 1

Nuntu anu mawai katuwu

1:1-18

1Ri uyu-uyunya, ri kabareʼepanya ndapapewali lino, reʼemo Nuntu.

Nuntu seʼe sangkani-ngkani

pai i Pue Ala pai Nuntu setu i Pue Alamo seʼe.

2Ungka ri pontepuʼunya Nuntu seʼe lawi sangkani-ngkanimo pai i Pue Ala.

3Nuntu seʼe mewali puʼu mpengaya-ngaya,

pai mampapewali pura-puranya,

bereʼe anu tepewali ane banya Sira.

4Nuntu seʼe pebete ngkatuwu,

pai katuwu anu mawai reme ri tolino.

5Reme setu merara ri kawaninya,

pai bareʼe nakoto mbani mamporo peraranya.

6 # Mat. 3:1, Mrk. 1:4, Luk. 3:1-2 Ratamo sambaʼa tau anu ndapokau i mPue Ala,

i Yohane toʼonya.

7Siʼa rata mampobambarika kakononya reme setu,

da naka naaya ntau pura-pura.

8Banya siʼa reme setu, paikanya siʼa podo mampobambarika.

9Reme anu monco, anu mampakareme tolino

pura-pura rata ri lino.

10Nuntu reʼemo ri lino,

lawi Sira woʼu anu mampapewali lino

paikanya bareʼe naincani lino.

11Sira rata ri tana-A ngkalio-A,

paikanya bancaa bareʼe mantarima Sira.

12Paikanya mau ewanceʼe reʼe woʼu waʼa ntau anu mantarima

pai maaya Sira;

tau seʼe napapewali ana i mPue Ala.

13Sira ndapoana banya ua elo ndaya ntolino,

maka katuwu anu dawoʼu ungka ri Pue Ala puʼunya.

14Nuntu mewalimo tolino,

ri oyotamo peari-A,

takitamo peawa-A.

Peawa setu ndatarima

ua ka-Siranya Ana mPapa anu sambaʼa-mbaʼa.

Mampojaya Sira kita mangkita i Pue Ala

pai towe ndaya-A ri kita.

15I Yohane rata mewali sabi,

siʼa mampobambarika,

“Siramo seʼi anu roomo kutoʼoka komi,

Sira da rata ri puri mantonda yaku,

paikanya Sira meruu ngkabangke-A pai yaku,

maka ri kabareʼepanya reʼe yaku, Sira lawi reʼemo.”

16Sira buke pai towe;

bereʼe kapusanya,

Sira mangadonco kita.

17Padika i mPue tatarima mampoliu i Musa.

Paikanya towe pai katodo i mPue Ala,

ndapatongawa mampojaya i Yesu Kerisitu.

18Bereʼe tau anu mangkitamo i Pue Ala,

jawaʼanya Ana i mPapa anu sambaʼa-mbaʼa,

anu siwia pai Papa pai mokenta pai Sira.

Siramo anu mampatongawa i Papa ri kita.

Posabi i Yohane

1:19-28

(Mat. 3:1-12, Mrk. 1:1-8, Luk. 3:1-18)

19Waʼa ntau makuasa nto Yahudi ri Yerusale, mampokau waʼa ntadu mpanyomba pai waʼa nto Lewi njoʼu ri Yohane da mampeoasi ri siʼa, “Isema kojo siko seʼi?”

20Nasono mpayoa i Yohane, natoʼo, “Yaku seʼi banya Mokole Tadungkadago.”

21 # Paw. 18:15, 18, Mal. 4:5 Meoasi woʼu tau seʼe natoʼo, “Ane ewanceʼe isema siko? Bara i Elia siko?”

Mesono i Yohane, “Banya.”

Meoasi woʼu tau seʼe natoʼo, “Bara siko Nabi?”

Mesono i Yohane, “Banya.”

22Natoʼo ntau seʼe, “Ane ewanceʼe toʼoka kami isema kojo siko seʼi, da naka reʼe sononya anu da katoʼoka tau anu mampokau kami kaʼisemanya siko seʼi.”

23 # Yes. 40:3 Mesono i Yohane, “Yakumo seʼi anu natoʼo i Nabi Yesaya:

‘Tau anu meboo-boo ri pada bone,

ndipalenekamo i Pue jaya-A.’ ”

24Waʼa ntau anu napokau nto Parisi setu, 25meoasi natoʼo, “ane siko banya Mokole Tadungkadago, banya i Elia, banya woʼu nabi, wenu painaka mopariu siko?”

26Mesono i Yohane natoʼo, “Yaku seʼi podo mampopariuka ue. Paikanya laumo ri oyomi tau sambaʼa anu bareʼe ndiincani. 27Sira rata mantonda yaku, paikanya sako da malede soʼo ntalupa-A yaku seʼi bareʼe sintinaja.”

28Pura-pura setu tepewali ri Betania, tondo mpebetea ngKoro Yarade, kareʼe mpopariu i Yohane.

Ana Bimba mPue Ala

1:29-34

29Bangke reme nakita i Yohane setumo i Yesu madadu siʼa. Nepa natoʼo i Yohane, “Peole, setumo Ana Bimba mPue Ala anu mangkoyo salaa ntolino. 30Siramo anu kutoʼo da rata mantondaraka yaku, paikanya Sira anu meruu ngkabangke pai yaku, maka ri kabareʼepanya ndapoana yaku Sira lawi reʼemo. 31Riu-riunya yaku seʼe bareʼe kuincani isema Sira setu. Ntanoka yaku rata mampopariuka ue da naka banca Isaraeli mangaincani Sira.”

32I Yohane woʼu mawai posabi ewaseʼi, natoʼo, “Kukita Inosa mPue Ala menaʼu ewa putiʼa ungka ri yangi metopa ri Sira. 33Ri tempo setu bareʼepa kuincani isema Sira. Paikanya i Pue Ala anu mampokau yaku mangariu pai ue, mantoʼokamo yaku, ‘Ane nukita Inosa mPue Ala menaʼu, nepa metopa ri tanoana tau sambaʼa, siʼamo anu da mampopariuka Inosa mPue Ala.’ 34Nakita mataku ngkalioku. Pai yaku mewali sabi kamonconya Sira Ana mPue Ala.”

Anaguru i Yesu anu uyu-uyunya

1:35-42

35Bangke reme njau woʼu i Yohane mekakore pai anagurunya radua njairia. 36Pangkitanya i Yesu moliu, natoʼo, “Peole! Setumo Ana Bimba mPue Ala.”

37Butu nadonge anagurunya radua setu pompaunya ewanceʼe, liu-liu nalulu ntau seʼe i Yesu. 38Metorobaka i Yesu, ndakita tau anu mangalulu Sira setu ndatoʼo, “Nunjaa anu ndipepali?”

Mesono tau seʼe natoʼo, “Rabi, ri mbeʼi kareʼe mpeari-Mi Rabi?” (Rabi posokinya guru.)

39Ndatoʼo i Yesu, “Maʼimo ndipampeole ngkaliomi.” Tempo setu tinti aopo lauka reme. Ri eo setu tau seʼe maroo-roo sangkani-ngkani pai Sira.

40Sambaʼa ri oyo ntau radua anu malulu i Yesu setu madongemo pompau i Yohane, i Andaria toʼonya, kasangkompo i Simo Peturu. 41Ganggara napepali i Andaria kasangkomponya i Simo, natoʼoka siʼa, “Kami momberatamo pai i Mesia!” (Mesia siwia pai Kerisitu posokinya: Mokole Tadungkadago.) 42I Andaria mampoyunu i Simo njoʼu ri Yesu.

Ndapatomata i Yesu i Simo, ndatoʼo, “Siko i Simo ana i Yona. Siko da ndatoʼo i Kepa.” (Kepa siwia pai Peturu ri basa Yunani, posokinya roka mbatu.)

I Yesu mampeboo i Pilipu pai Natanae

1:43-51

43Bangke reme ndapakanotomo i Yesu Sira malai njoʼu ri Galilea. Ndapomberataka i Pilipu ndatoʼoka siʼa, “Maʼi lulumo yaku!” 44I Pilipu to Besaida salipu-lipu pai Andaria pai Peturu. 45Napomberataka i mPilipu i Natanae, natoʼoka, “Kami momberatamo pai tau anu natoʼo i Musa ri raya ncura mPadika i mPue Ala, pai anu napowatika waʼa nabi. Sira setu i Yesu ungka Nasare, ana i Yusu.”

46Paikanya mesono i Natanae, natoʼo, “Ara da reʼemo sangaya anu madago da rata ungka ri Nasare?”

Mesono i Pilipu natoʼo, “Maʼi peole ngkaliomu.”

47Pangkita i Yesu kajela i Natanae, ndatoʼo, “Peole, setumo to Isaraeli mpuʼu. Bereʼe mbamba ri rayanya.”

48Meoasi i Natanae ri Yesu, natoʼo, “Ewambeʼi ndipaincani yaku?”

Mesono i Yesu, ndatoʼo, “Bareʼepa napeboo i mPilipu siko, kukitamo siko memou ri moko ngkaju ara sinjau.”

49Mesono i Natanae, natoʼo, “Guru, Komi Ana mPue Ala! Manoto komi Mokole banca Isaraeli!”

50Ndatoʼo i Yesu, “Siko meaya, podo ua Kupangantoʼo Kukitamo siko memou ri moko ngkaju ara sinjau? Maria ngayapa anu meruu ngkabangke ungka ri nceʼe anu da nukita!” 51#Pal. 28:12 Ndatoʼo woʼu i Yesu, “Monco Kutoʼoka siko, da nukita yangi teloka, pai waʼa malaʼeka mPue Ala pone panaʼu ri Ana Manusia.”

Currently Selected:

YOHANE 1: LAIPMF

Highlight

Copy