Rôm̃i 3
3
1Pyère ni Yôan w’avandi mpo mô gô nagô y’Anyambyè, gw’igwèra ny’ikambiṉa: nyô n’igwèra ny’eṉôgôm̃i.
2Avegagi vovo ôṉôm̃e w’avegag’ebôke avila gw’ayanyô yè, arwaṉôgô alimbiṉôgô n’aṉaga ntyugw’edu g’ômpômbala wi nagô y’Anyambyè w’aweyôgô inè, eranga, gô nègira waô w’ayingiṉagi gô nagô y’Anyambyè. 3Ôṉôm̃e mè gw’ayeṉi yè Pyère ni Yôan wi kènda gô jingiṉa gô nagô y’Anyambyè, aṽambyi waô ezom̃a zi mpagaga. 4N’avônyô yè ne Pyère ni Yôan awulya inè: Vôna zwè. 5N’avôni yè waô mpinkilyaga inè, wi be pè ezom̃a. 6Ndô Pyère awulinyi yè inè: My’azele ni sika ya pupu ge ya teṉateṉa; ndô ezom̃a zi re na myè, zô pa myè wè: gw’ina nyi Yesu‐Krist yi Nazarèt gum̃aṉa ko kènda. 7N’agôtyè yè g’ôg’ôṉôm̃yè, agum̃anyè gôre. N’alèng’intyôzô sè ni pa y’impende ngulu pelè; 8agazangaṉi yè agum̃aṉa gôre, avakilya gô kènda. N’ayingiṉi yè na waô gô nagô y’Anyambyè, nkèndaga, ni ndôgwaga, ni nsum̃inyag’Anyambyè.
9N’aṉaga waôdu w’ayeṉi yè nkèndaga ni nsum̃inyag’Anyambyè. 10N’amyeṉi waô inè, ayè ne yè y’alwaṉagi baru aṉègiraga g’ômpômbala w’eranga wi nagô y’Anyambyè, n’am̃ami waô pôlô g’ômwanja w’igamba ny’arweṉi gôre yè. 11Gw’agôtagi yè Pyère ni Yôan aṉaga waôdu w’am̃ami pôlô avale mangô gôre waô, gw’evungu zi fweyô inè, zi Salômôn.
12Gw’ayeṉi Pyère yeṉo, awuliny’aṉaga inè:
Aṉôm̃e w’Israèl, ntiṉa nde yi mama ṉwè g’ômwanja w’igamba nyiṉo? Ntiṉa nde yi pôna ṉwè zwè ngolongolo, mpaṉi ga igamba mè ny’atwa vo ngulu yazô ge vo ômbyi wazô wô apang’ôma wiṉo gô kènda? 13Anyambyè y’Abraam, na y’Izaak na yi Yakob, Anyambyè y’ireri sazô, are pendiza pe nyôngô yè, Yesu, y’agôtizyô ṉwè na y’alandyô ṉwè g’ôzô wi Pilatu gw’aṽeli yè gô dèkizè dyè. 14Aṉw’alandi Ôma w’ôrunda n’ôgôre, ko ṉwè bamby’ôyôṉisi w’aṉaga gô pô gôre ṉwè. 15Aṉw’ayôṉ’Ôveṉisi w’em̃èṉo, w’arôngunyô n’Anyambyè avila gw’ijuwa; azwè n’iyeṉi y’igamba. 16N’ini nyè nyi re pa pe ngulu gôr’ôma wiṉo wi jeṉô ṉwè amya, v’ibekelya s’ini nyè; n’ibekelya gôre yè si re panga p’ôma wiṉo mbyambye yeṉo gw’azô maṉi aṉwèdu.
17Ndô vèṉo, awarera, my’avôrô inè, aṉw’alend’igamba mè imya fo, ga nt’alendi kè ivangiṉi yaṉi. 18Ndô yeṉo alwaṉiz’Anyambyè isam̃u y’aliwô y’amyezô yè egômbe ṽyagaga ro n’agwaṉa m’ivogisi yè yôdu inè, Krist e be jeṉ’azingô.
19Sambô, ṉigaṉi nkôndi agalwa, ko ibe saṉi sizô, 20ko gômbe y’ôzaviṉô bya avila gôre Rerè, ko yè tôm̃a kè ôma mè wi re dôṽyô pa gôre ṉwè, ayè ne Yesu‐Krist, 21are bongô pa g’ôrôṽa kwanga gw’egômbe zi be tô fwizô isam̃u yôdu y’agambyô n’Anyambyè n’agwaṉa m’ivogisi yè iyombwi yi re dwaṉa pa avila gw’ipakilya si ntye. 22Môsès awulyi nè: Rerè, Anyambyè yaṉi, e be nonguny’ôvogisi gôre ṉwè avila gôr’awareri yaṉi, egolaṉi ga myè: yogiṉôṉi yè gw’isam̃u yôdu yi be bulinyè ṉwè; 23e be twa inè, ôm’edu are ayogiṉ’ôvogisi mèwoṉo, e be jilizô avila gôr’aṉaga. 24Ivogisi yôdu yi re kamba pa avila gôre Samuèl, na waô w’azôngi yè, w’agambi g’ômwanja w’intyugu siṉo. 25Aṉwè n’awaṉa w’ivogisi na wi njeka y’ayekyô n’Anyambyè n’ireri sazô, mbulinyag’Abraam inè: Inagô s’imbuṽe sôdu si ntye si be saviṉô gôr’awaṉi wo. 26Anyambyè tôngunya p’ômwaṉi wè gôre ṉwè, alônge tôm̃i yè gô saviṉa ṉwè, gô keguny’ ôm’edu gôre ṉwè avila gw’ibe sè.
Currently Selected:
Rôm̃i 3: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
