Ipakilya 34
34
1Dina, y’ômwaṉ’ômwantô w’ayanyô ne Lea gôre Yakob, agogwi gô jeṉ’awaṉ’antô wi ntye. 2N’ayenyô yè ne Sikèm, y’ômwaṉ’ôṉôm̃e w’Amor, ya mwô’Èvi, y’ôvangiṉi wi ntye. N’awongyè yè, alèwa na yè, ko yè fwevizè. 3N’alwaṉi ôrèm̃i wè gôre Dina, y’ômwaṉ’ômwantô wi Yakob; n’arondi yè ôlèngwaṉi agamba ni nkèngo g’ôrèm̃i wè. 4N’awulinyi Sikèm Amor, ya reri yè, inè: Va myè ômwaṉ’ômwantô wiṉo gô jômbè. 5Ndô Yakob ayogyô inè, ayè afwevizi Dina, y’ômwaṉi wè ômwantô; na gw’avegagi awaṉi wè aṉôm̃e gô ntyaga n’ôlembi wè, Yakob alwaṉi do kwanga gw’awinyi waô.
6N’agèndi Amor, ya rerè yi Sikèm, gôre Yakob, gô kamba na yè. 7N’aṽyeṉi awaṉ’aṉôm̃e wi Yakob avila gw’intyaga, gw’ayogyô waô isam̃u mè, aṉôm̃e mèwoṉo w’aṽendi, w’aṽendi pôlômè, konde nè Sikèm alend’ôsam̃u wi ntyoṉi gw’Israèl, gô dèwa n’ômwaṉ’ômwantô wi Yakob, ôsam̃u wi re wi ze kwèkwè gô dendô. 8N’agambi Amor na waô inè: Ôrèm̃a wi Sikèm, y’ômwaṉi wam̃, wi tond’ômwaṉi waṉi ômwantô; kokoloṉi, vaṉi yè gôre yè gô jômbè. 9Azwè ga yômbaṉeṉi na ṉwè, vaṉi zwè awaṉi waṉi awantô, ko bongaṉi awaṉi wazô antô gôre ṉwè. 10Aṉwè be dwaṉa na zwè, ni ntye yi be dwaṉa gw’azô maṉi; lwaṉaṉi, ko ṉwè kôl’ôkita gô yô, alèng’igumba gô yô.
11N’awulinyi Sikèm rerè n’awarerè wi Dina inè: Mi ga lèng’imèpiṉô gw’antyo maṉi, na mi be pa ezom̃y’edu zi be bulyô ṉwè; 12ṽambyaṉi myè ôgoli ômpôlô wi mpagaga, gambèṉè mi be pa ga nte be tetiṉa ṉwè myè; ndô vaṉi myè gô jômb’ômwaṉ’ômwantô. 13N’awiṉiz’awaṉa wi Yakob agamba n’itemiza gôre Sikèm na gôr’Amor, ya reri yè, konde nè Sikèm aliwô afwevizi Dina, y’ezombi zaô. 14W’awulinyi waô inè: Wiṉo ne ôsam̃u wi re zwè ayolye gô denda, inè, gô pa ezombi zazô ômwantô gôr’ôṉôm̃e wi r’ôzombè; konde wi be dwaṉ’ôsam̃u wi ntyoṉi gôre zwè. 15Ndô azw’ayivire ibeli saṉi kaô ndwaṉi yaṉi y’adwaṉa ga zwè, ko ôṉôm̃y’edu gôre ṉwè kèrô. 16Gambèṉè azwè be pa ṉwè awaṉi wazô antô, ko zwè bong’awaṉi waṉi antô gôre zwè, ko ṉwè dwaṉa na zwè, ko zwè dwaṉ’iṉongw’imô. 17Ndô j’aṉw’ayivira gô jogiṉô zwè ko ṉwè kèrô, gambèṉè azwè be bong’ômwaṉi wazô ômwantô, agèndaga.
18N’agambi maô m’arondyi Amor ni Sikèm, y’ômwaṉ’ôṉôm̃e w’Amor. 19N’iwanjo e pa dinga gô dend’ôsam̃u mè, konde arondagi ômwaṉ’ômwantô wi Yakob. Alubyô ne aṉaga waôdu gô nagô ya reri yè. 20N’agèndi Amor ni Sikèm, y’ômwaṉi wè, g’ômpômbala wi nkali yaô, agamba n’aṉôm̃e wi nkali yaô inè: 21Aṉôm̃e wiṉo wi re na zwè mbyambye, wi ga lwaṉe gô ntye, ko waô kôl’ôkita gô yô; ntye yi re mpôlô kwèkwè gôre waô. Azwè be jômb’awaṉi waô antô, ko zwè pa waô awaṉi wazô antô. 22Ndô anôm̃e wiṉo w’ayivire gô dwaṉa na zwè, gô pang’iṉongw’im̃ori, kaô ôṉôm̃y’edu gôre zwè akèrô, ga nt’are waômè kèrô pa. 23Ilembi yaô, igumbi nyaô, n’inyam̃i saô sôdu, s’alwaṉe gôre zwè? Azwè ga wonge dadyè ndwaṉi yaô, ko waô dwaṉa na zwè.
24Waôdu w’avegagi bya pa g’ômpômbala wi nkala w’avôganyô Amor ni Sikèm, y’ômwaṉi wè ôṉôm̃e; n’agèryô aṉôm̃e waôdu, waôdu w’avegagi bya pa g’ômpômbala wi nkala. 25Ndô gô ntyugu yi ntyarô, gw’avegagi waô ni nkaza, awaṉ’aṉôm̃e aṽaṉi wi Yakob, Simeôn ni Levi, awarerè wi Dina, w’awongi ôm’edu ôkwari wè w’iwora, aṽya gô nkala y’avikilyagi inè yi re mbyambye, n’ayôṉi waô aṉôm̃e waôdu. 26N’ayôṉi waô kè Amor ni Sikèm, y’ômwaṉi wè, n’ôkwara; awongi waô Dina avila gô nagô yi Sikèm, agogwa. 27N’aṽyeṉi awaṉ’aṉôm̃e wi Yakob gô bende, agweri waô nkala mpôlô, konde w’aliwô w’afwevizi ezombi zaô. 28Awongi waô ilembi yaô y’inyam̃a, inyare saô n’iburu saô, ezom̃y’edu z’avegagi gô nkala n’ezom̃y’edu z’avegagi gw’intyaga. 29Agwèri waô igumbi nyaô nyôdu, awaṉi waô, n’antu waô, n’ezom̃y’edu z’alèngyô gw’inagô.
30N’awulinyi Yakob Simeôn ni Levi inè: Aṉwè sokolya myè, gô panga myè gô bikô gôr’alwaṉi wi ntye, gôre mongi Kanaan ni mongi Ferès. Ndô my’are kaô ni ntangô nyèwo y’aṉaga; gambèṉè wi be dataṉa gôre myè, ko waô bôla myè, ko myè jilizô, myè ni nagô yam̃. 31N’awiṉizi waô inè: ezombi zazô e ga lendiṉô ga evôvevôve?
Currently Selected:
Ipakilya 34: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
