Yôan 14
14
1Irèm̃i yaṉi y’ayeṉe njuke. Ṽekelyaṉi Anyambyè, ko bekelyaṉi myè kè.
2Gô nagô ya Reri yam̃ ar’alwaṉô am̃enge. Arwe nè yi zele yeṉo, gavoṉo my’atô bulinya ṉwè. Vo mi kènda gô kekiza ṉwè mbôra. 3Na ja my’akènda, agekiza ṉwè mbôra, gambèṉè mi be tô fwinya, awonga ṉwè gôre myèmè, inè, mbôra yi re myè aṉwè ga lwaṉe vovo kè. 4Aṉw’avôrô mbôra yi kèndô myè, aṉw’avôrô kè mpoṉo.
5Tôma awulinyi yè inè: Rera, azwè pa mye mbôra yi kèndô wè, azwè ko mye mpoṉo sèṉi? 6Awulinyô yè ne Yesu inè: Myè ne mpoṉo, n’ôrèti, n’em̃èṉo. E zel’ôma wi bya gôre Rerè kaô vo myè. 7Arwe nè aṉwè amyeṉi myè, gavoṉo aṉw’amyeṉi Reri yam̃ kè. N’avila vèṉo aṉw’amyeṉi yè, n’aṉw’are yè jeṉa pa kè.
8Filipi awulinyi yè inè: Rera, rum̃inya zwè Rerè, gambèṉè azw’adwaṉa dwèrè. 9Awulinyô yè ne Yesu inè: Ôling’ôla wiṉo wi re myè dwaṉa pa na ṉwè, ndô ô pa mya myè Filipi! Ayè yi re jeṉa pa myè are jeṉa pa kè Rerè; ô bulya nè, rum̃inya zwè Rerè sèṉi? 10Ô pa bekelya inè, my’are gôre Rerè, ni Rerè kè gôre myè? Agamba mi bulinya myè ṉwè, mi pa bulya mô myèmè, ndô Rerè yi dwaṉa gôre myè, ayè dende ṽilô. 11Ṽekelyaṉi myè inè, my’are gôre Rerè, ni Rerè kè gôre myè; j’aranga yeṉo ṽekelyaṉi myè g’ômwanja wi ṽilô yiṉo.
12Giligili mi bulinya ṉwè inè, ayè yi bekelya myè, e be denda kè ṽilô yi dendô myè, ni ṽilô vôlô vyagaṉô na yiṉo yi be dendô yè, konde mi kènda gôre Rerè; 13n’ezom̃’edu zi be bambyô ṉwè gôre Rerè gw’ini nyam̃, mi be denda zô, ko Rerè pendizyô gôr’Ômwaṉa. 14J’aṉw’abamby’ezom̃’edu gw’ini nyam̃, mi be denda zô.
15J’aṉw’atonda myè, venjavenjaṉ’isômbyi sam̃. 16Na mi be kambiṉe Rerè, ko yè pa ṉwè ôzindy’ômwèṉè, ko wô dwaṉa na ṉwè pèkèpèkè, 17wô n’Iṉiṉa ny’ôrèti, nyi re ntye y’ayolye bonge nyô, konde yi pa jeṉa nyô ge mya nyô; ndô aṉw’avôrô nyô konde nyi dwaṉa na ṉwè, nyi be dwaṉa kè gw’irèm̃i yaṉi. 18Mi ze tige ṉwè inyam̃uṉa, mi be fwinya gôre ṉwè. 19Kwè, gambèṉè ntye y’arô jeṉe myè nyèṉè; ndô aṉwè be jeṉa myè, konde my’are bo, n’aṉwè kè aṉwè be dwaṉa bo. 20Gô ntyugu mèyoṉo, aṉwè be mya inè, my’are gôre Rerè, n’aṉwè gôre myè, na myè gôre ṉwè. 21Ayè yi re n’isômbyi sam̃ avenjavenja sô, ne yè yi tonda myè; n’ayè yi tonda myè e be tondô kè ne Reri yam̃, myè kè mi be tondè, arum̃inyè ôkuṽi wam̃.
22Awulyi Yudi, aranga Iskaryot, inè: Rera, ezom̃a nde zi re nè, ô be tum̃iny’ôkuṽi wo gôre zwè, n’aranga gô ntye? 23Awiṉizyô yè ne Yesu inè: Jog’ôma atonda myè, e be penjavenj’igambi nyam̃, ni Reri yam̃ kè e be tondè, ko zwè bya gôre yè, avang’elumbi zazô gôre yè. 24Ayè yi re pa tonda myè e pa penjavenj’agambi mam̃. N’igamba nyi jogo ṉwè arang’inyam̃, ndô nya Rerè y’arôm̃i myè.
25My’are kambiṉa pa ṉwè isam̃u yiṉo gô p’are myè na ṉwè. 26Ndô ôzindyô mè wô n’Iṉiṉ’Iṽya, nyi be tôm̃ô ne Rerè gw’ini nyam̃, nyô be nènja ṉwè isam̃u yôdu, ayônginya ṉwè isam̃u yôdu y’awulinyi myè ṉwè.
27Mi dèkiza ṉwè am̃ènjè, mi pa ṉwè am̃ènjè mam̃. Mi pa pa ṉwè mô ga nte pe ntye yiṉo. Irèm̃i yaṉi y’ayeṉe njuke, ge tya.
28Aṉw’ajogyô nt’abulinya myè ṉwè inè: Vo mi kènda, na mi be tô fwinya gôre ṉwè. Arwe nè aṉwè tonda myè, gavoṉo aṉw’atô jene mbya konde mi kènda gôre Rerè; konde Rerè ar’ômpôlô vyagaṉô na myè. 29Na vèṉo my’are ṉwè bulinya p’isam̃u yiṉo, yô ṽyagaga ro inè, gô be bya yô, ko ṉwè bekelya. 30My’arô kambe na ṉwè nyèṉè agamb’am̃enge; konde ôvangiṉi wi ntye yiṉo e bya. Ayolye dend’ezom̃a gôre myè; 31ndô inè, ntye yi ga mye inè, mi tonde Rerè, na inè, mi denda ga nt’ar’ôzômbyô w’aveṉô myè ne Rerè.
Gum̃aṉaṉi, azwè ga lubweṉi avila vèṉo.
Currently Selected:
Yôan 14: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
