Mark 16
16
1Soṉo vya, Marya yi Magdala, ni Marya, ngwè yi Yakobu, ni Salôme, w’agôli yom̃a yi nkangô, gô kènda gô sagya yô gôre Yesu. 2Gô ntyugu nônga yi soṉo w’aṽyeṉi g’ôrôngiṉô, ibanga butu, gw’arongwi nkômbe. 3Awulyaṉi waô inè: Mande be kaṽalya zwè idô avila g’ôrôngiṉô? 4Na gw’avôni waô, w’ayeṉi nè, idô ny’aliwô ny’akaṽalyô, ny’avegagi kèivôlô. 5Gw’ayingiṉi waô g’ôrôngiṉô, w’ayeṉ’iwanjo baru g’ôgo ôṉôm̃yè, bora p’ôṉamb’ôla wa pupu, n’aryeṉi waô. 6N’awulinyi yè waô inè: Aryaṉi; aṉwè bute Yesu yi Nazarèt, y’aṽanyô gô krosi; atôngwi, e zele vèṉo, vônaṉi mbôra y’alimbiṉi waô yè. 7Ndô gèndaṉi gô buliny’iṉèngi yè ni Pyère inè, e kènda gô bôsô yaṉi gô Galile: gôgô be jeṉa ṉwè yè, ga nt’awulinyi yè ṉwè. 8Agogwi waô avila g’ôrôngiṉô awanga. Konde w’aryeṉi ayègèrya; ndô wi pa buliny’ôma igamba konde w’aryeṉi.
9Yesu, tôngwa pa avila gw’ijuwa ibanga si ntyugu nônga yi soṉo, alônge bôm̃unyi gôre Marya yi Magdala, y’arômbyô yè aṉiṉ’ambe ôrwageṉô. 10Arwaṉi yè ntyangô gôre waô w’alwaṉagi ni Yesu, gw’ayeṉagi waô ekèṽa, aleṉa. 11Gw’ayogyô waô inè, are bo, na inè, ajenyô ne yè, wi pa jivira.
12Avila vovo, awôm̃unyi n’edidi ezèṉè gôr’aṽaṉi gôre waô, gw’agèndi waô g’ômpindi. 13N’awinyi waô gô myez’am̃ori, ndô wi re jivire waô.
14N’avila vovo, awôm̃unyi gôr’igôm̃i n’ôm̃ori, gw’avegagi waô baru gw’inya, n’azèmbi yè waô g’ômwanja w’itwaṽekelyi saô na g’ômwanja wi njoliṉi y’irèm̃i yaô, konde wi pa jivira waô w’ayeṉi yè tôngwa pa avila gw’ijuwa.
15N’awulinyi yè waô inè: Gèndagaṉi gô ntye yôdu, ko kambiṉaṉi ntyangô mbya gôr’ôm’edu. 16Ayè yi be bekelya, aṽatizô, e be sungiṉô, ndô ayè yi re aṽekelya e be p’ôgara. 17Lemba yiṉo yi be sônga waô wi bekelya inè: gw’ini nyam̃ wi be tômb’aṉiṉ’ambe; wi be kamb’inkambiṉi sinyoṉa; 18wi be kôt’im̃amba; na ja w’ajong’ezom̃y’edu zi jôṉ’aṉaga, z’alende waô mpongo; wi be taly’ago gôre mongi jogo, ko waô tôla.
19Vovo, Rerè Yesu kamba pa na waô, awongyô g’ôrôṽa alwaṉa baru g’ôgo ôṉôm̃yè w’Anyambyè. 20N’agèndagi waô, agambiṉe mbôry’edu. Rerè ayanjagi na waô, ni lemba y’azôngagi gô joliz’igamba.
Currently Selected:
Mark 16: MYE
Highlight
Share
Copy
Want to have your highlights saved across all your devices? Sign up or sign in
Published by the British and Foreign Bible Society in 1927.
