Yohane 10
10
Nguannan ano pon no
1 Mereka akyerɛ mo nokware mu pa ara sɛ, nea ɔmfa ɔpon ano nkɔ nguannan mu, na ɔforo fa baabi no, yɛ owifo ne odwowtwafo; 2na nea ɔfa ɔpon ano kɔ mu no, ne nguan no hwɛfo. 3Ɔno na ɔponanohwɛfo hiɛ ma no, na nguan no te ne nne, na ɔbɔ n’ankasa nguan din frɛ wɔn de wɔn fi adi. 4Na ɔma n’ankasa nguan fi adi a, odi wɔn anim; na nguan no di n’akyi, efisɛ wonim ne nne. 5Na ɔhɔho de, wɔrenni n’akyi, wobeguan no, efisɛ wonnim ananafo nne. 6Yesu de bɛ yi buu wɔn; na wɔn de, wɔanhu asɛm ko a ɔkaa wɔn no.
7Ɛnna Yesu see wɔn bio sɛ: Mereka akyerɛ mo nokware mu pa ara sɛ: Mene nguan no pon no. 8#Yer 23.1-2 Wɔn a wodii me kan bae no nyinaa yɛ awifo ne adwowtwafo; na nguan no antie wɔn. 9Mene ɔpon no; sɛ obi fa me so kɔ mu a, wobegye no nkwa, na ɔbɛkɔ mu, na obefi adi, na obenya adidibea. 10#Nnw 23.1 Owifo mma, gye sɛ ɔrebewia, na wakum, na wasɛe; na me de, mebae, na wɔanya nkwa, na wɔanya no mmoroso.
Oguanhwɛfo pa no
11 #
Yes 40.11; Hes 34.11-23; 37.24; Yoh 15.13 Mene guanhwɛfo pa no. Oguanhwɛfo pa de ne kra to hɔ ma nguan no; 12na ɔpaani a ɔnyɛ oguanhwɛfo na nguan no nyɛ ne dea no hu pataku sɛ ɔreba a, ogyaw nguan no guan; na pataku no bɛkyere wɔn bɔ wɔn hwete. 13Na ɔpaani guan, efisɛ ɔyɛ ɔpaani, na onnwen nguan no ho. 14#2 Tim 2.19 Mene guanhwɛfo pa no; na minim me de, na me de nso nim me, 15#Mat 11.27 sɛnea Agya no nim me, na me nso minim Agya no. Na mede me kra meto hɔ mema nguan no. 16#Yoh 11.52 Na mewɔ nguan foforo a womfi ban yi mu; wɔn nso na etwa sɛ mede wɔn meba, na wobetie me nne, na ayɛ kuw biako ne ɔhwɛfo biako.
17 Eyi nti na agya no dɔ me, efisɛ mede me nkwa meto hɔ, na mafa bio. 18#Yoh 5.26 Obi nnye me nsam, na m’ankasa na mede meto hɔ; mewɔ ho kwan sɛ mede meto hɔ, na mewɔ ho kwan sɛ mefa bio; ahyɛde yi na minyae m’Agya nkyɛn. 19#Yoh 7.43; 9.16 Ɛnna nsɛm yi nti mpaepaemu baa Yudafo no mu bio. 20#Yoh 7.20 Na wɔn mu bebree kae sɛ: Ɔwɔ honhommɔne, na wabɔ dam; adɛn nti na mutie no? 21Ebinom se: Nsɛm yi nyɛ nea ɔwɔ honhommɔne nsɛm. Honhommɔne betumi abue anifuraefo ani anaa?
Yesu nsɛnkyerɛnne
22Na Asɔrefidwira afahyɛ adu wɔ Yerusalem, na awɔw bere aba. 23#Aso 3.11 Na Yesu nenam asɔrefi Solomon abrannaa so. 24Ɛnna Yudafo betwaa ne ho hyiae, na wosee no sɛ: Wobɛma yɛatwɛn akosi da bɛn? Sɛ wone Kristo no a, pae mu ka kyerɛ yɛn pefee. 25#Yoh 5.36 Yesu buaa wɔn sɛ: Maka makyerɛ mo, na munnye nni; nnwuma a meyɛ m’agya din mu no, ɛno na edi me adanse. 26#Yoh 8.45 Na mo de, munnye nni; efisɛ mumfi me nguan no mu. 27#Yoh 10.3-4; 8.47 Me nguan tie me nne, na me nso minim wɔn, na wodi m’akyi; 28na mema wɔn daa nkwa, na wɔrenyera, na obi renhuam wɔn mfi me nsam da. 29M’agya a ɔde wɔn maa me no so sen nneɛma nyinaa; na obi rentumi nhuam wɔn m’agya nsam. 30Me ne agya no yɛ baako.
Yudafo no pɛ sɛ wokum Yesu
31 #
Yoh 8.59
Ɛnna Yudafo no tasee abo bio sɛ wɔde rebesiw no. 32Yesu buaa wɔn sɛ: Nnwuma pa pii na mayɛ makyerɛ mo a efi Agya no nkyɛn; emu nea ɛwɔ he nti na morebesiw me abo yi? 33#Yoh 5.18; Mat 26.65 Yudafo no buaa no sɛ: Ɛnyɛ adwuma pa nti na yɛrebesiw wo abo, na abususɛm nti, efisɛ wo a woyɛ onipa yɛ wo ho sɛ Onyankopɔn. 34#Nnw 82.6 Yesu buaa wɔn sɛ: Wɔnkyerɛw mo mmara mu sɛ: Mekae sɛ: Moyɛ anyame? 35Sɛ ɔfrɛɛ wɔn a Onyankopɔn asɛm baa wɔn nkyɛn no anyame na wontumi nsan kyerɛw no a, 36#Yoh 5.17-20 adɛn nti na moka nea Agya ayɛ no kronkron, na wasoma no wiase no ho sɛ: Woka abususɛm, sɛ mekae sɛ: Onyankopɔn Ba ne me nti? 37Sɛ menyɛ m’Agya nnwuma a, ɛnne munnnye me nnni; 38na sɛ meyɛ, na me de munnye me nni a, munnye nnwuma no nni, na moahwɛ ahu sɛ Agya no wɔ me mu, na me nso mewɔ no mu. 39#Yoh 8.59; Luka 4.30 Ɛnna wɔhwehwɛe bio sɛ wɔkyere no, na ofii wɔn nsa kɔe.
Yesu twa kɔ Yordan agya
40 #
Yoh 1.28
Na osiim kɔɔ Yordan agya noho bio wɔ faako a Yohane bɔɔ asu kan no, na ɔkɔtenaa hɔ. 41Na nnipa pii baa ne nkyɛn, na wɔkae sɛ: Yohane anyɛ sɛnkyerɛnne bi de, nanso nneɛma a Yohane kae wɔ oyi ho nyinaa no yɛ nokware. 42Na nnipa pii gyee no dii wɔ hɔ.
Currently Selected:
Yohane 10: ATWDB
Highlight
Share
Copy
Want to have your highlights saved across all your devices? Sign up or sign in
Revised Akuapem Twi DC Bible © Bible Society of Ghana, 2017.
