Yohane 12

Maria de ngohuam sra Yesu

(Mateo 26.6-13; Marko 14.3-9)

1 # Yoh 11.1; 11.43 Afei aka nnansia na Twam no adu no, Yesu baa Betania, faako a Lasaro a onyan no fii awufo mu no wɔ hɔ. 2Ɛnna wɔtow no pon wɔ hɔ, na Marta somee; na Lasaro de, na ɔyɛ wɔn a wɔne no te adidii no mu biako. 3#Luka 7.38 Ɛnna Maria faa ngo huamhuam kronkron a ne bo yɛ den karibo biako de bɛsraa Yesu nan ho, na ɔde ne ti nwi popaa ne nan ho; na ngo no huam yɛɛ ɔdan no mu ma. 4Ɛnna n’asuafo no mu biako, Yuda Iskariot (a ɔrebeyi no ama no,) kae sɛ: 5Adɛn nti na wɔantɔn ngo huamhuam yi annye denare ahasa, na wɔamfa amma ahiafo? 6#Luka 8.3 Ɛnyɛ sɛ odwen ahiafo ho nti na ɔkaa eyi, na mmom ɔyɛ owifo, na okura kotoku no, na owiawia nea wɔde gu mu ntia. 7Ɛnna Yesu kae sɛ: Munnyaa no, na ɔde eyi asie ama me sie da. 8#Deut 15.11 Na ahiafo de, mowɔ wɔn mo nkyɛn daa; na me de, munni me daa. 9Ɛnna Yudafo no mu nkurɔfokuw pii tee sɛ ɔwɔ hɔ, na wɔbae, ɛnyɛ Yesu nko nti, na sɛ wobehu Lasaro a onyan no fii awufo mu no nso ntia. 10Na asɔfo mpanyin no tuu agyina sɛ wobekum Lasaro nso, 11efisɛ ne nti na Yudafo pii kɔe kogyee Yesu dii.

Yesu kɔ Yerusalem

(Mateo 21.1-11; Marko 11.1-10; Luka 19.29-40)

12Ade kyee no, nkurɔfokuw pii a wɔbaa afahyɛ no ase tee sɛ Yesu reba Yerusalem no, 13#Nnw 118.25-26 wɔfofaa berɛw, na wofii adi sɛ wɔrekohyia no, na wɔteɛteɛɛm sɛ:

Hosiana!

Nhyira ne nea ɔreba Awurade din mu no,

Israel hene no!

14 # Sak 9.9 Na Yesu huu afurum ba bi no, ɔtenaa no so, sɛnea wɔakyerɛw sɛ:

15 Nsuro, Sion babea;

hwɛ, wo hene reba,

ɔte afurum ba so.

16Nso n’asuafo no ante eyinom ase kan no; na Onyankopɔn hyɛɛ Yesu anuonyam akyi no, ɛno na wɔkaee sɛ wɔakyerɛw eyinom ne ho, na wɔayɛ ama no. 17Ɛnna nkurɔfokuw a wɔne no wɔ hɔ bere a ɔfrɛɛ Lasaro fii ɔdamoa mu na onyan no fii awufo mu no dii adanse. 18Eyi nti nso na nkurɔfokuw no kohyiaa no, efisɛ wɔate sɛ wayɛ saa sɛnkyerɛnne no. 19#Yoh 11.48 Ɛnna Farisifo no ka kyerɛɛ wɔn ho wɔn ho sɛ: Muhu sɛ muntumi nyɛ ho hwee; hwɛ, wiase atu adi n’akyi.

Nkwa a efi owu mu

20Na Helafo bi wɔ wɔn a wɔbae sɛ wɔbɛsɔre afahyɛ no ase no mu; 21#Yoh 1.45 ɛnna eyinom baa Filipo a ofi Betsaida a ɛwɔ Galilea no nkyɛn, na wɔbɛsrɛɛ no sɛ: Owura, yɛpɛ sɛ yehu Yesu. 22Filipo bae bɛka kyerɛɛ Andrea, na afei Andrea ne Filipo bɛka kyerɛɛ Yesu. 23Na Yesu buaa wɔn sɛ: Dɔn no adu sɛ wɔbɛhyɛ Onipa Ba no anuonyam. 24#Rom 14.9 Mereka akyerɛ mo nokware mu pa ara sɛ: awifua antɔ fam anwu a, ɛwɔ hɔ koro no ara; na sɛ ewu a, ɛsow aba pii. 25#Mat 10.39; Luka 17.33 Nea ɔdɔ ne kra no, ebefi ne nsa; na nea ɔtan ne kra wɔ wiase ha yi no, ɔbɛkora no akɔ daa nkwa mu. 26#Yoh 14.3; 17.24 Sɛ obi som me a, ma onni m’akyi, na faako a mewɔ no, ɛhɔ na me somfo nso bɛba; na sɛ obi som me a, m’Agya bedi no ni. 27#Mat 26.38 Afei me kra ho yeraw no; na ɛdɛn na menka? Agya, gye me fi dɔn yi mu! Nanso eyi nti na mebaa dɔn yi mu.

Ɛnne a efi soro

28 Agya, hyɛ wo din anuonyam! Ɛnna ɛnne bi fi soro bae sɛ: Mahyɛ no anuonyam dedaw, na mɛhyɛ no bio! 29Ɛnna nkurɔfokuw a wogyina hɔ na wɔtee no kae sɛ: Ɔprannaa abom! Ebinom se: Ɔbɔfo ne no kasae. 30#Yoh 11.42 Yesu bua kae sɛ: Ɛnyɛ me nti na ɛnne yi bae, na mo nti. 31#Yoh 14.30; 16.11; Luka 10.18 Afei ne wiase atemmu; afei na wobeyi wiase sodifo no hɔ. 32#Yoh 8.28 Na me de, sɛ wɔma me so fi asase so a, mɛtwe nnipa nyinaa maba me nkyɛn. 33Eyi de, ɔkae de kyerɛɛ owu ko a ɔrebewu. 34#Nnw 110.4; Dan 7.14 Nkurɔfokuw no buaa no sɛ: Yɛn de, yɛate mmara no mu sɛ, Kristo no te hɔ daa; na adɛn na wuse: Etwa sɛ wɔma Onipa Ba no so? Hena ne Onipa Ba yi? 35#Yoh 8.12; 11.10 Ɛnna Yesu ka kyerɛɛ wɔn sɛ: Aka hann no bere tiaa bi wɔ mo mu. Mowɔ hann no yi, monnantew, na esum ammɛto mo; na nea ɔnam sum mu no nnim faako a ɔrekɔ. 36#Efe 5.8 Mowɔ hann no yi, munnye hann no nni, na moayɛ hann no mma.

Akyinnyegye

Yesu kaa eyinom, na ofii wɔn anim hɔ kohintawee. 37Na wayɛ saa nsɛnkyerɛnne bebree wɔ wɔn anim de, nanso wɔannye no anni, 38#Yes 53.1; Rom 10.16 na Odiyifo Yesaia asɛm a ɔkae no aba mu sɛ:

Awurade, hena na wagye yɛn kaseɛ adi,

na hena na woyii Awurade basa kyerɛɛ no?

39 # Yes 6.9-10; Mat 13.14-15 Eyi nti wɔantumi annye anni, sɛnea Yesaia kae bio sɛ:

40Wafura wɔn ani na wapirim wɔn koma,

na wɔamfa wɔn ani anhu,

na wɔamfa wɔn koma ante ase,

na wɔannan wɔn ho na mansa wɔn yare.

41 # Yes 6.1 Yesaia kaa eyinom, efisɛ ohuu n’anuonyam, na ne ho asɛm na ɔkae. 42#Yoh 9.22 Nanso mpanyimfo no mu pii nso gyee no dii; na Farisifo no nti wɔanka, na wɔantutu wɔn amfi hyiadan mu; 43#Yoh 5.44 efisɛ wɔpɛ nnipa anuonyam sen Nyankopɔn anuonyam.

Yesu ne ne soro agya

44Na Yesu teɛɛm sɛ: Nea ogye me di no, ɛnyɛ me na ogye me di, na ɛyɛ nea ɔsomaa me no; 45#Yoh 14.9 na nea ohu me no hu nea ɔsomaa me no. 46#Yoh 12.35 Maba wiase sɛ hann, na obiara a ogye me di no antena sum mu. 47#Yoh 3.17; Luka 9.56 Na sɛ obi te me nsɛm na wannye anni a, me de, mimmu no atɛn; na mamma sɛ merebebu wiase atɛn, na mebae sɛ merebegye wiase. 48Nea ommu me na onnye me nsɛm no wɔ nea obu no atɛn; asɛm a maka no, ɛno ara na ebebu no atɛn ɛda a edi akyiri no mu; 49efisɛ me de, ɛnyɛ me na mehyɛɛ me ho mekasae, na Agya a ɔsomaa me no na ɔhyɛɛ me nea menka ne sɛnea menkasa. 50Na minim sɛ n’ahyɛde no yɛ daa nkwa. Enti nea meka no, sɛnea Agya no aka akyerɛ me no, saa ara na meka.

Currently Selected:

Yohane 12: ATWDB

Highlight

Copy