Yohane 19

Wɔhwe Yesu di ne ho fɛw

1Ɛnna afei Pilato faa Yesu, na ɔkaa no mpire. 2Na asraafo no nwenee nsɔe abotiri na wɔde bɔɔ ne ti, na wɔde ntama kɔkɔɔ bi guguu no so, 3na wɔkɔɔ so ara baa ne nkyɛn, na wɔkae sɛ: Yudafo hene, mo oo! Na wɔbobɔɔ no asotɔre.

Pilato di ma Yesu

4Ɛnna Pilato fii adi bae bio, na osee wɔn sɛ: Hwɛ, mede no rebrɛ mo, na moahu sɛ minhu no mu afobusɛm biara. 5Ɛnna Yesu fii adi bae, na ɔhyɛ nsɔe kyɛw hyɛ atade kɔkɔɔ no. Na osee wɔn sɛ: Hwɛ, onipa no ni! 6Ɛnna asɔfo mpanyin ne asomfo no huu no no, wɔteɛteɛɛm sɛ: Bɔ no asɛnnua mu, bɔ no asɛnnua mu! Pilato see wɔn sɛ: Mo ankasa momfa no nkɔbɔ no asɛnnua mu! Na me de, minhu no mu afobusɛm biara. 7#Yoh 10.33; Lew 24.16 Yudafo no buaa no sɛ: Yɛn de, yɛwɔ mmara, na yɛn mmara no nti etwa sɛ owu, efisɛ ɔyɛɛ ne ho Nyankopɔn ba.

Pilato bisa no nsɛm bio

8Ɛnna Pilato tee asɛm yi no, osuroe pii, 9na ɔhyɛn amrado aban no mu bio, na osee Yesu sɛ: Wufi he? Na Yesu ammua no. 10Ɛnna Pilato see no sɛ: Wo ne me nkasa? Wunnim sɛ mewɔ tumi sɛ migyaa wo, na mewɔ tumi sɛ mebɔ wo asɛnnua mu? 11Yesu buae sɛ: Sɛ wɔamfa amma wo amfi soro a, anka wunni me so tumi biara; eyi nti nea oyii me maa wo no na ne bɔne so.

Pilato bu no kumfɔ

12Efi hɔ no, Pilato hwehwɛe sɛ ogyaa no; na Yudafo no teɛɛm sɛ: Sɛ wugyaa oyi a, wonyɛ Kaesare adamfo; obiara a ɔyɛ ne ho hene no tia Kaesare. 13Na Pilato tee saa asɛm no, ɔde Yesu fii adi, na ɔbɛtenaa atemmu agua so baabi a wɔfrɛ hɔ sɛ Abo-sɛwee, na Hebri mu wɔfrɛ no Gabata. 14Na ɛyɛ Twam ho siesie da, na ɛbɛyɛ sɛ dɔn a ɛto so asia. Na osee Yudafo no sɛ: Hwɛ, mo hene ni! 15#Yoh 19.6 Na wɔteɛɛm sɛ: Fa no kɔ, fa no kɔ! Bɔ no asɛnnua mu! Pilato see wɔn sɛ: Memmɔ mo hene asɛnnua anaa? Asɔfo mpanyin no buae sɛ: Yenni hene bi sɛ Kaesare. 16Ɛno na afei oyii no maa wɔn hyɛe sɛ wɔnkɔbɔ no asɛnnua mu.

Yesu asɛnnua mu bɔ

(Mateo 27.31-50; Marko 15.20-37; Luka 23.26-46)

Na wɔfaa Yesu de no kɔe. 17Na ɔso n’asɛnnua fii adi koduu baabi a wɔfrɛ hɔ Tikwankoraa beae a Hebri mu wɔfrɛ no Golgota. 18Ɛhɔ na wɔbɔɔ no asɛnnua mu a nnipa baanu ka ne ho n’afanu, na Yesu wɔ ntam. 19Na Pilato kyerɛw ɛho asɛm nso, na ɔde fam asɛnnua no atifi, na ɛka sɛ: Yesu, Nasareni, Yudafo hene. 20Saa kyerɛw yi na Yudafo no mu pii kanee, efisɛ faako a wɔbɔɔ Yesu asɛnnua mu hɔ bɛn kurow no; na wɔakyerɛw no Hebri ne Roma ne Hela kasa mu. 21Na Yudafo asɔfo mpanyin no see Pilato sɛ: Nkyerɛw sɛ: Yudafo hene, na kyerɛw sɛ: Ɔno na ɔkae sɛ: Mene Yudafo hene. 22Pilato buae sɛ: Nea makyerɛw no, makyerɛw.

Asraafo no fa ne ntama

23Na asraafo no bɔɔ Yesu asɛnnua mu no, wɔfaa ne ntama, na wɔkyɛɛ mu anan maa ɔsraani biara nyaa biako, ne n’atade. Nso atade no nni mpamee, wɔnwenee fi soro besii fam. 24#Nnw 22.18 Ɛnna wosisee wɔn ho sɛ: Mommma yɛnnsunsuane mu, na momma yɛntwe so ntonto nhu nea ɛbɛyɛ ne dea. Na kyerɛwsɛm a ese:

Wɔkyɛɛ me ntama mu fae,

na m’atade so na wɔtwee so ntonto, no baa mu.

Enti asraafo no na ɛyɛɛ eyinom.

25Nso Yesu ne na ne ne na nuabea, Maria, Klopa yere, ne Maria Magdalene gyina Yesu asɛnnua no ho. 26#Yoh 13.23 Na Yesu huu ne na ne osuani a ɔdɔ no no sɛ ɔne no gyina hɔ no, osee ne na sɛ: Ɔbea, hwɛ, wo ba ni! 27Afei osee osuani no sɛ: Hwɛ, wo na ni! Na efi dɔn no ara mu no, osuani no de no kɔɔ n’ankasa fi.

Yesu wu

28 # Yoh 13.3; 18.4; Nnw 22.15 Eyi akyi a Yesu hui sɛ wɔanya awie nneɛma nyinaa no, (sɛnea ɛbɛyɛ na kyerɛwsɛm no aba mu nti), ɔkae sɛ: Osukɔm de me. 29#Nnw 69.21 Nso nsa nyinyanyinya ade bi ma si hɔ, na wɔde nsa no bi hyɛɛ posaw ma, na wɔde tuaa dua ano de kaa n’ano. 30Ɛnna Yesu gyee nsa nyinyanyinya no no, ɔkae sɛ: Wɔawie! Na ɔbɔɔ ne ti ase de ne honhom mae.

31 # Deut 21.23 Nso da no yɛ Ahosiesie da, na sɛnea ɛbɛyɛ na amu no renka asɛnnua no so homeda, efisɛ, na saa homeda no yɛ da kɛse nti, Yudafo no bɛsrɛɛ Pilato sɛ wonkobubu wɔn nnyawa na wonyi wɔn. 32Ɛnna asraafo no bae bebubuu nea odi kan no nnyawa ne nea ɔka ho a wɔbɔɔ ɔne no asɛnnua mu no de. 33Na woduu Yesu so na wohui sɛ wawu dedaw no, wɔammubu ne nnyawa. 34Na asraafo no mu biako de peaw wɔɔ ne mfem, na ntɛm ara na mogya ne nsu fii mu bae. 35Na nea ohui no adi adanse, na n’adanse no yɛ nokware, na ɔno de, onim sɛ ɔka nokware, na mo nso moagye adi. 36#Eks 12.46 Na wɔyɛɛ eyinom na kyerɛwsɛm a ese: Wommmu ne dompe bi, no aba mu. 37#Sak 12.10; Adi 1.7 Na kyerɛwsɛm foforo bio se: Wobɛhwɛ nea wɔwɔɔ no no.

Yesu sie

(Mateo 27.57-61; Marko 15.42-47; Luka 23.50-55)

38Na eyinom akyi no, Yosef a ofi Arimatea a ɔyɛ Yesu suani, na Yudafo ho hu nti ɔyɛ no kokoam no bɛsrɛɛ Pilato sɛ ɔmma onyi Yesu amu no; na Pilato maa no ho kwan. Na ɔba beyii n’amu no. 39#Yoh 3.2; Mat 2.11 Na Nikodemo nso a kan ɔbaa Yesu nkyɛn anadwo no bae, na ɔde kurobow ne pɛprɛ mfrafrae bɛyɛ sɛ nkaribo ɔha bae. 40Ɛnna wɔfaa Yesu amu no, na wɔde nwera ne nnuru kyekyeree ne ho, sɛnea Yudafo amusie te no. 41Nso faako a wɔbɔɔ no asɛnnua mu hɔ no, turo bi wɔ hɔ, na turo no mu na ɔboda foforo bi a wɔmfaa onipa ntoo mu da wɔ; 42na ɛhɔ na Yudafo Ahosiesie da no nti, wɔde Yesu kɔtoe, efisɛ ɔboda no na ɛbɛn.

Currently Selected:

Yohane 19: ATWDB

Highlight

Copy