Luka 13
13
Asotwe ho asɛnka
1Saa bere no ara na nnipa bi a ɛwɔ hɔ kaa Galileafo a Pilato de wɔn mogya frafraa wɔn afɔre mu no ho asɛm kyerɛɛ no. 2#Yoh 9.2 Na obua see wɔn sɛ: Mususuw sɛ Galileafo yi huu saa amane yi nti na wɔyɛ nnebɔneyɛfo sen Galileafo nyinaa? 3#Nnw 7.12 Mise mo sɛ: Ɛnte sa, na mmom sɛ moansakra mo adwene a, mo nyinaa bɛyera saa ara. 4Anaasɛ nnipa dunwɔtwe a Siloa abantenten no bu hwee wɔn so na ekum wɔn no, mususuw sɛ wɔyɛ nnebɔneyɛfo sen nnipa a wɔte Yerusalem nyinaa? 5Mise mo sɛ: Ɛnte sa, na mmom sɛ moansakra mo adwene a, mo nyinaa bɛyera saa ara.
Borɔdɔma a ɛnsow aba
6 #
Mat 21.19
Na obuu wɔn bɛ yi sɛ: Obi wɔ borɔdɔma a wadua wɔ ne bobe turom; na ɔbae bɛhwehwɛɛ so aba, na wannya bi. 7Na ɔka kyerɛɛ turomhwɛfo no sɛ: Hwɛ, mfirihyia abiɛsa ni a maba mabɛhwehwɛ borɔdɔma yi so aba, na mannya bi. Twa kyene! Adɛn nti na agye asase no akɛntɛn so? 8#2 Pe 3.9; 3.15 Na obua see no sɛ: Owura, ma ensi hɔ afe yi nso nkosi sɛ mefunufunu ho magugu ase sumina. 9Na ebia ɛbɛsow; na sɛ ansow ansa a, woatwa akyene.
Homeda bi ayaresa
10Na ɔkyerɛkyerɛe hyiadan bi mu homeda. 11Na hwɛ, ɔbea bi wɔ hɔ a ɔwɔ ahoɔmmerɛw honhom mfirihyia dunwɔtwe, na wapono a ontumi nteɛ ne mu koraa po. 12Na Yesu huu no no, ɔfrɛɛ no, na osee no sɛ: Ɔbea, wɔasan wo afi wo ahoɔmmerɛw mu. 13#Mar 7.32 Na ɔde ne nsa guu no so, na amonom hɔ ara na ɔteɛe ne mu, na oyii Nyankopɔn ayɛ. 14Na hyiadan no mu panyin a ɛyɛɛ no ahi sɛ Yesu asa ɔyare homeda bua see nkurɔfokuw no sɛ: Nnansia wɔ hɔ a ɛsɛ sɛ nnipa yɛ mu adwuma; emu na mommra na wɔnsa mo yare, na ɛnyɛ homeda. 15#Luka 14.5 Na Awurade buaa no sɛ: Nyaatwomfo! So mo mu biara nsan ne nantwi anaa n’afurum mfi n’adididaka ho mma ɔnkɔnom nsu homeda? 16#Luka 19.9 Na hwɛ, ɔbea yi a ɔyɛ Abraham babea a Satan akyekyere no mfirihyia dunwɔtwe yi, ɛnsɛ sɛ wɔsan no fi ɔhaw yi mu homeda? 17Na ɔkaa saa no, n’atamfo no nyinaa ani wui, na nkurɔfokuw no nyinaa ani gyei anuonyanne a ɔyɛe no nyinaa nti.
Sinapi aba ne mmɔkaw ho bɛ
(Mateo 13.31-33; Marko 4.30-32)
18Na ɔkae sɛ: Ade bɛn na Onyankopɔn ahenni sɛ no anaasɛ dɛn ho na mede mɛto? 19Ɛte sɛ sinapi fua a onipa fa koduaa ne turom; na enyinii, na ɛyɛɛ dua, na wim nnomaa besisii mman so. 20Na ɔkae bio sɛ: Dɛn ho na mede Nyankopɔn ahenni bɛto? 21Ɛte sɛ mmɔkaw a ɔbea bi fae kɔfɔtɔw asikresam korokuma abiɛsa mu de kosii sɛ ne nyinaa kawee.
Ɔpon teateaa no
22Na ɔnenam nkurow mu ne nkuraa ase rekyerɛkyerɛ, a na ɔnam so rekɔ Yerusalem. 23Na obi bisaa no sɛ: Awurade, wɔn a wobegye wɔn yɛ kakraa bi anaa? 24#Mat 7.13-14; Flp 3.12 Na ɔka kyerɛɛ wɔn sɛ: Mompere nhyɛn ɔpon teateaa no mu! Na mise mo sɛ: Nnipa pii bɛhwehwɛ mu ahyɛn, na wɔrentumi. 25#Mat 25.11-12 Efi bere a ofiwura no bɛsɔre ato pon mu no ara na mubefi ase agyina akyiri, na moabɔ ɔpon akyi sɛ: Owura, hiɛ yɛn! Na obebua mo sɛ: Mo de, minnim nea mufi. 26#Mat 7.22-23 Ɛnna mubefi ase aka sɛ: Yɛadidi na yɛanom w’anim, na woakyerɛkyerɛ wɔ yɛn mmɔnten so pɛn. 27Na obese mo sɛ: Mo de, minnim nea mufi. Mumfi me so, mo a moyɛ nea ɛnteɛ nyinaa!
(Mateo 8.11-12)
28 Ɛhɔ na mubesu atwɛre mo se sɛ muhu Abraham, Isak ne Yakob ne adiyifo no nyinaa Onyankopɔn ahenni mu, na mo de, wɔapam mo afi mu. 29#Luka 14.15 Na wobefi apuei ne atɔe, atifi ne anafo aba abɛtena adidii Onyankopɔn ahenni mu. 30#Mat 19.30 Na hwɛ, akyikafo bi wɔ hɔ a wobedi kan, na adikanfo bi wɔ hɔ a wɔbɛka akyiri.
Herode Antipa
31Ɛdɔn no ara mu na Farisifo bi bae besee no sɛ: Fi ha kɔ! Na Herode pɛ wo akum wo. 32Na osee wɔn sɛ: Monkɔka nkyerɛ saa sakraman no sɛ: Hwɛ, mitu ahonhommɔne, na mesa yare nnɛ ne ɔkyena, na n'adekyee na mawie.
Yesu twa Yerusalem ho adwo
(Mateo 23.37-39)
33 Nanso ɛsɛ me sɛ menantew nnɛ ne ɔkyena ne n’adekyee; na enni ho kwan sɛ odiyifo bi bɛtɔ baabi, gye Yerusalem. 34O! Yerusalem, Yerusalem a wukum adiyifo na wusiw wɔn a wɔsomaa wɔn wo nkyɛn no abo! Mpɛn ahe ni a mepɛe sɛ meboaboa wo mma ano sɛ akokɔbaatan boaboa ne mma ano wɔ ne ntaban ase, nanso moampɛ. 35#Nnw 118.26 Hwɛ, wobegyaw mo fi afituw ama mo. Na mise mo sɛ: Morenhu me, gye da a ɛbɛba sɛ mobɛka sɛ: Nhyira ne nea ɔnam Awurade din so reba no!
Currently Selected:
Luka 13: ATWDB
Highlight
Share
Copy
Want to have your highlights saved across all your devices? Sign up or sign in
Revised Akuapem Twi DC Bible © Bible Society of Ghana, 2017.
