Luka 9

Yesu soma asuafo dumien no

(Mateo 10.1; 10.7; 10.9-11; 10.14; Marko 6.7-13)

1Na ɔfrɛɛ dumien no hyiae maa wɔn ahonhommɔne nyinaa ne ayaresa so tumi ne ahoɔden. 2Na ɔsomaa wɔn sɛ wɔnkɔka Onyankopɔn ahenni ho asɛm, na wɔnsa yare. 3Na ɔka kyerɛɛ wɔn sɛ: Mommfa biribiara nntu kwan, mommfa poma anaa bɔtɔwa anaa aduan anaa sika anaa ntade abien abien. 4#Luka 10.5-7 Na ofi biara a mobɛkɔ mu no, ɛhɔ ara na montena, na moafi hɔ akɔ. 5#Luka 10.11 Na wɔn a wɔrennye mo no, mufi kurom hɔ rekɔ a, momporoporow mo anan ase tutuw mfa nni adanse ntia wɔn. 6Na wosiim hɔ faa nkuraa nyinaa ase mmiako mmiako kaa asɛmpa no, na wɔsaa yare baabiara.

Herode pɛ sɛ ohu Yesu

(Mateo 14.1-2; Marko 6.14-16)

7Na ɔmansinhene Herode tee nea ɔyɛe nyinaa; na ne tirim yɛɛ no keserenee sɛ ebinom se: Wɔanyan Yohane afi awufo mu, 8na ebinom se: Elia ayi ne ho akyerɛ, na afoforo se: Tete adiyifo no mu biako asɔre. 9#Luka 23.8 Na Herode kae sɛ: Yohane de, matwa ne ti, na hena ne oyi a mete ne ho nsɛm a ɛte sɛɛ yi? Na ɔhwehwɛe sɛ ohu no.

Nnipa mpemnum aduanma

(Mateo 14.13-21; Marko 6.30-44; Yohane 6.1-13)

10Na asomafo no san bae, na wɔbɛkaa nea wɔakɔyɛɛ nyinaa kyerɛɛ no. Na ɔfaa wɔn de wɔn kɔɔ ɔfa baabi, kurow a wɔfrɛ no Betsaida no ho. 11Na nkurɔfo akuwakuw no hui no, wodii n’akyi; na ogyee wɔn kaa wɔn Onyankopɔn ahenni ho asɛm, na ɔsaa wɔn a ehia wɔn yare. 12Na ade reyɛ asa; na dumien no bae besee no sɛ: Gya nkurɔfokuw no kwan na wɔnkɔ nkurow ne nkuraase a atwa ahyia yi mu nkɔtena hɔ, na wɔanya aduan; efisɛ nea yɛwɔ ha yi yɛ sare so. 13Na ɔka kyerɛɛ wɔn sɛ: Momma wɔn biribi nni! Na wose: Yenni biribiara sɛ abodoo anum ne mpataa abien pɛ, gye sɛ yɛkɔtɔ aduan ma nkurɔfo yi nyinaa. 14Na wɔbɛyɛ sɛ mmarima mpemnum. Na ɔka kyerɛɛ n’asuafo no sɛ: Momma wɔntenatena ase akuwakuw bɛyɛ aduonum aduonum. 15Na wɔyɛɛ sa, na wɔmaa wɔn nyinaa tenatenaa ase. 16Na ɔfaa abodoo anum ne mpataa abien no hwɛɛ ɔsoro hyiraa so, na obubui de maa asuafo no sɛ wɔnkyɛ mma nkurɔfokuw no. 17#2 Ah 4.44 Na wodii, na wɔn nyinaa meemee, na wɔtasee mporoporowa a ɛkae no nkɛntɛn dumien.

Petro mpaemuka

(Mateo 16.13-28; Marko 8.27—9.1)

18Na ɛbae sɛ ne nko wɔ hɔ rebɔ mpae no, na n’asuafo no ka ne ho; na obisaa wɔn sɛ: Nkurɔfo akuwakuw no sɛ: Mene hena? 19Na wobuae sɛ: Yohane suboni, na ebinom se: Elia, na afoforo se: Tete adiyifo no mu bi na wasɔre. 20Na obisaa wɔn sɛ: Mo de, muse mene hena? Na Petro buae sɛ: Onyankopɔn Kristo no.

Yesu hyɛ ne wu ne ne wusɔre ho nkɔm

21Na ɔhyɛɛ wɔn nyinaa ketee braa wɔn sɛ wɔnnka eyi nnkyerɛ obiara 22#Luka 9.44; 18.32-33 se: Ɛsɛ sɛ Onipa Ba no hu amane pii, na mpanyimfo, asɔfo mpanyin ne kyerɛwfo apo no, na wɔakum no, na da a ɛto so abiɛsa no, wanyan.

Ahopakyi

23Na ɔka kyerɛɛ wɔn nyinaa sɛ: Sɛ obi pɛ sɛ odi m’akyi a, ɔmpa ne ho akyi, na ɔmfa n’asɛnnua daa, na onni m’akyi. 24#Luka 17.33; Mat 10.39; Yoh 12.25 Na obiara a ɔpɛ sɛ obegye ne kra no, ebefi ne nsa, na nea me nti ne kra befi ne nsa no, obegye no nkwa. 25Na sɛ onipa nya wiase nyinaa, na ɔyera anaasɛ ɔhwere ne kra a, mfaso bɛn na obenya? 26#Mat 10.33 Na obiara a n’ani bewu me ne me nsɛm ho no, ɔno nso ho bɛyɛ Onipa Ba no aniwu ɛda a ɔde ɔne n’agya ne n’abɔfo kronkron anuonyam bɛba no. 27Na nokware mise mo sɛ: Wɔn a wogyina ha yi mu binom wɔ hɔ a wɔrenka owu nhwɛ kosi sɛ wobehu Onyankopɔn ahenni ansa.

Yesu anuonyam haran

(Mateo 17.1-9; Marko 9.2-9)

28Na ɛbae sɛ nsɛm yi akyi bɛyɛ sɛ nnawɔtwe no, ɔfaa Petro ne Yohane ne Yakobo, na ɔne wɔn kɔɔ bepɔw so mpaebɔ. 29Na ɔrebɔ mpae no, n’anim tebea sakrae, na n’atade yɛɛ fitaa, na ɛharanee. 30Na hwɛ, mmarima baanu a ɛyɛ Mose ne Elia ne no bɛkasae; 31#Luka 9.22 na woyii wɔn ho adi anuonyam mu, na wɔkaa ne wu a obewu wɔ Yerusalem ho asɛm. 32Na nna faa Petro ne wɔn a wɔka ne ho no; na wonyanee no, wohuu n’anuonyam no ne mmarima baanu no sɛ wɔne no gyina hɔ. 33Na ɛbae sɛ wɔrefi ne nkyɛn akɔ no, Petro ka kyerɛɛ Yesu sɛ: Owura, eye sɛ yɛtena ha, na ma yɛmmɔ asese abiɛsa, wo de biako, Mose de biako, na Elia de biako; efisɛ na onnim nea ɔreka. 34Na ɔreka saa no, omununkum bae bɛkataa wɔn so; na wɔrekɔ omununkum no mu no, wosuroe. 35#Luka 3.22 Na ɛnne bi fi mununkum no mu kae sɛ: Oyi ne me ba a mayi no, muntie no! 36Na ɛnne no twaam no, wohuu Yesu nko ara. Na womuamuaa so, na nna no mu no, wɔanka nneɛma a wohui no ankyerɛ obiara.

Abofra otwafo bi ayaresa

(Mateo 17.14-23; Marko 9.14-32)

37Na ɛbae sɛ n’adekyee a wofii bepɔw no so sii fam no, nkurɔfokuw bebree behyiaa no. 38Na hwɛ, ɔbarima bi a ofi nkurɔfo no mu teɛɛm sɛ: Kyerɛkyerɛfo, mesrɛ wo, hwɛ me ba yi, na ɔyɛ me ba koro. 39Na hwɛ, honhom bi kyere no, na ɔpatuw teɛm su, na esinsen no ma n’ano po ahuru, na obu fa so, na ɛden no ansa na egyaa no. 40Na mesrɛɛ w’asuafo no sɛ wontu no, wɔantumi. 41Na Yesu buae sɛ: O nnɛ mma a wonni gyidi na wɔakyeakyea, mentena mo nkyɛn na mentɔ me bo ase mo ho nkodu da bɛn? Fa wo ba no bra ha! 42#Luka 7.15 Na ɔreba no, honhommɔne no him no hwee fam, na esinsen no. Na Yesu teɛteɛɛ honhom fi no, na ɔsaa abofra no yare, na ɔde no maa n’agya.

Yesu hyɛ ne yima ne ne wu ho nkɔm

43Na Onyankopɔn ahoɔden kɛse yi yɛɛ wɔn nyinaa ahodwiriw. Na nneɛma a Yesu yɛe no nyinaa yɛɛ wɔn nwonwa no, ɔka kyerɛɛ n’asuafo no sɛ: 44#Luka 9.22 Momma nsɛm yi nkɔ mo asom; na wɔrebeyi onipa ba no ahyɛ nnipa nsa. 45#Luka 18.34 Na wɔante asɛm yi ase, efisɛ na wɔde ahintaw wɔn na wɔanhu. Na wosuroe sɛ wobebisa no asɛm yi.

Ahobrɛase ne onuadɔ

(Mateo 18.1-5; Marko 9.33-40)

46Na asɛm bi baa wɔn mu sɛ wɔn mu hena na ɔbɛyɛ kɛse? 47Na Yesu huu wɔn komam nsusuwii no, ɔfaa abofra bi begyinaa ne nkyɛn, 48#Mat 10.40 na osee wɔn sɛ: Obiara a obegye abofra yi me din mu no, wagye me; na obiara a obegye me no, na wagye nea ɔsomaa me no. Na nea ɔyɛ mo nyinaa mu akumaa no, ɔno ara na ɔbɛyɛ ɔkɛse. 49Na Yohane buae sɛ: Owura, yehuu sɛ obi de wo din tu ahonhommɔne; na yɛbraa no, efisɛ ɛnyɛ ɔne yɛn na ɛnam. 50#Luka 11.23; Flp 1.18 Na Yesu ka kyerɛɛ no sɛ: Mommmara no! Na nea ɔnyɛ biribi ntia mo no na ɔwɔ mo afa.

Samariafo atirimmɔdenfo

51 # Mar 10.32 Na ɛbae sɛ nna a wɔrebɛfa no akɔ ɔsoro reyɛ awie du no, ɔde sii n’anim sɛ ɔrekɔ Yerusalem. 52#Yoh 4.4 Na ɔsomaa abɔfo dii n’anim; na wɔkɔe no, wɔkɔhyɛn Samariafo akuraa bi ase sɛ wɔrekosiesie hɔ ama no. 53Na wɔannye no, efisɛ na n’ani kyerɛ Yerusalem. 54#2 Ah 1.10; 1.12 Na n’asuafo Yakob ne Yohane hui no, wɔkae sɛ: Awurade, wopɛ sɛ yɛka na ogya fi soro bɛhyew wɔn? 55Na ɔdan ne ho kaa wɔn anim.#9.55-56 Tete akyerɛwfo binom de ka ho sɛ: Munnim honhom ko a moyɛ ne dea. Onipa ba no amma ammɛsɛe nnipa akra na mmom obegyee wɔn nkwa. 56#Yoh 3.17; 12.47 Onipa ba no amma ammɛsɛe nnipa kra, na obegyee wɔn. Na wɔkɔɔ akuraa foforo bi ase.

Wɔn a wɔpɛ biribi ayɛ ansa na wɔadi Kristo akyi

(Mateo 8.19-22)

57Na ɛbae sɛ wɔnam kwan mu rekɔ no, obi ka kyerɛɛ no sɛ: Awurade, baabiara a wobɛkɔ no, medi w’akyi. 58Na Yesu see no sɛ: Sakraman wɔ atu, na wim nnomaa wɔ mmerebuw; na onipa ba no de, onni nea ɔde ne ti to. 59Na ɔka kyerɛɛ ɔfoforo sɛ: Di m’akyi! Na ɔno de, ose: Ma me kwan na minkosie m’agya ansa. 60Na Yesu see no sɛ: Ma awufo nsie wɔn awufo, na wo de, kɔ na kɔka Onyankopɔn ahenni ho asɛm! 61#1 Ah 19.20 Na ɔfoforo nso kae sɛ: Awurade, medi w’akyi, na ma me kwan na menkɔkra me fifo ansa. 62Na Yesu ka kyerɛɛ no sɛ: Obiara a ɔde ne nsa koso funtumdade mu na ɔhwɛ n’akyi no mfata Onyankopɔn ahenni no mu.

Currently Selected:

Luka 9: ATWDB

Highlight

Copy