Zis 15

Konsey dan Zerizalem

1Ti ena detrwa zom ki ti sorti Lazide e ti vinn Antios, e zot ti ansegn bann frer, “Zot pa pou sove si zot pa fer sirkonsizion dapre lalwa Moiz.” 2Pol ek Barnabas pa ti dakor ar zot, e finn ena gran diskision lorla. Lerla, finn swazir Pol ek Barnabas ek detrwa krwayan pou al get bann apot ek bann ansien dan Zerizalem pou regle sa kestion la. 3Apre ki Legliz finn ed zot pou zot vwayaz, zot ti travers Fenisi ek Samari, pou vizit bann krwayan; zot ti rakonte kouma bann payin finn krwar dan Lesegner. Sa nouvel la ti amenn boukou lazwa parmi bann frer. 4Kan zot ti ariv Zerizalem, Legliz, ek bann apot ek bann ansien ti akeyir zot. Zot ti rakont tou seki Bondie ti fer par zot.

5Alor detrwa parmi bann Farizien ki finn konverti, diboute dir, “Li neseser ki bann payin fer sirkonsizion e nou exize ki zot obeir lalwa Moiz.” 6Bann apot ek bann ansien ti reyni pou diskit lor sa size la. 7Apre enn long diskision Pier diboute e li dir, “Mo bann frer, zot kone ki depi lontan Bondie finn swazir mwa parmi zot pou al anons Bonn Nouvel ar bann non-Zwif pouki zot tande e ki zot krwar. 8Bondie konn leker tou dimoun. Pou montre ki li anvi ki bann non-Zwif osi krwar, li finn donn bannla Lespri Sin, parey kouma li finn donn nou. 9Li pa finn fer okenn diferans ant zot ek nou, li finn pirifie zot leker par lafwa. 10Alors, kifer nou bizin inpoz enn fardo lor ledo bannla pouki nou defie Bondie? Enn fardo ki ni nou bann anset, ni noumem pa finn kapav sarye. 11Me nou krwar ki nou, osi bien ki bannla, pou sove par lagras Lesegner Zezi.”

12Lasanble antie res trankil, e finn kontign ekout Barnabas ek Pol rakont bann sign ek bann mirak ki Bondie finn fer atraver zot parmi bann payin. 13Kan zot ti fini koze, Zak dir, “Bann frer ekout mwa. 14Simon finn explik nou kouma Bondie finn vizit bann non-Zwif pou swazir parmi zot enn pep ki pou port so nom. 15Parol bann profet dakor ar sa, parey kouma finn ekrir,

16‘Apre sa mo pou retourne

e mo pou rekonstrir lakaz David

ki finn tom anrwinn,

e mo pou redres li.

17Lerla leres limanite pou rod Bondie,

osi bien ki bann non-Zwif ki port mo nom.

18Ala seki Lesegner deklare,

limem ki realiz so bann proze, ki bien kler depi toultan.’

19Alors dapre mwa, nou bizin pa rann lavi difisil pou bann non-Zwif ki pe tourn ver Bondie. 20Okontrer nou bizin ekrir zot pou dimann zot pa manz manze ki finn ofer kouma sakrifis ar bann idol, pa viv dan limoralite, e pa manz laser zanimo ki finn trangle ek pa konsom disan. 21Depi lontan pe lir lalwa Moiz dan bann sinagog, ek pe anons li dan tou lavil, sak zour saba.”

Let pou bann Krwayan Non-Zwif

22Lerla bann apot avek bann ansien, e Legliz antie, ti desid pou swazir detrwa parmi zot pou avoy Antios avek Pol ek Barnabas. Zot ti swazir Zid ki ti osi apel Barsabas, ek Silas, de dimoun ki ti bien respekte parmi bann frer. 23Ti donn zot enn let pou amene. Dan let la ti ekrir: “Nou, bann apot ek bann ansien, nou salye zot bann frer parmi non-Zwif ki viv dan Antios, Siri ek Silisi. 24Nou finn tann dir ki detrwa dimoun ki sorti kot nou, finn trakas zot ek boulvers zot par seki zot finn dir. Nou pa ti donn bannla okenn instriksion. 25Nou finn tom dakor pou swazir detrwa zom e avoy zot ansam avek nou bann kamarad Pol ek Barnabas, 26ki finn riske zot lavi pou servi Lesegner Zezi Kris. 27Nou pe avoy Zid ek Silas ki pou dir zot anparol seki nou finn ekrir. 28Lespri Sin e nou mem finn pran enn desizion pou pa met pli gran fardo lor zot ledo. Ala saki nou pe dir: 29Pa manz seki finn ofer bann idol, ni disan; napa manz zanimo ki finn trangle; e prezerv zot kont pratik imoral. Zot pou bien fer si zot evit tou sa la. Orevwar.”

30Lerla delegasion la ti kit bann frer e ti al Antios, kot zot ti zwenn tou legliz ansam e zot ti donn let la. 31Bann dimoun ti lir sa let la e zot ti bien kontan par sa bann mesaz ankourazan la. 32Zid ek Silas, ki zotmem zot ti bann profet, ti explik boukou pou ankouraz ek ranforsi bann frer dan zot lafwa. 33Apre ki zot ti finn pas inpe letan la, bann frer ti donn zot benediksion ek finn retourn zot kot bann seki ti avoy zot. [ 34Silas ti desid pou res laba#15:34 Ena detrwa ansien maniskri ki azout verse 34, me ena ki pena sa verse la. ] 35Me Pol ek Barnabas ti res Antios. Ansam ar boukou lezot, zot ti pe ansegn ek pres parol Bondie.

Pol ek Barnabas separe

36Apre enn bon letan Pol dir Barnabas, “Nou al rann vizit tou bann frer dan tou lavil kot nou finn pres parol Bondie ek gagn inpe zot nouvel.” 37Barnabas ti anvi amenn Zan ki ti osi apel Mark ar zot, 38Me Pol pa ti dakor pou amenn li, parski Mark ti kit zot kan zot ti dan Panfili ek li pa ti kontign travay ar zot. 39Pol ek Barnabas ti gagn enn gran diskision e zot finn separe. Barnabas ti pran Mark ar li ek zot ti al Sip. 40Me Pol ti swazir Silas, e bann frer ti remet zot dan lame Bondie pouki li pran zot swin. 41Li ti al Lasiri ek Sisil pou fortifie bann legliz.

Currently Selected:

Zis 15: NTKM2009

Highlight

Copy