Zis 24
24
Akizasion ki ena kont Pol
1Sink zour apre, gran pret Ananias ar detrwa ansien desann Sezare ansam ek zot avoka Tertoulous pou met enn sarz lor Pol devan gouverner. 2Letan Pol pas lakour, Tertoulous koumans so akizasion koumsa: “Onorab Felix, gras a ou nou pe konn enn long peryod lape, ek par ou bon administrasion nou pe konn bann reform ki fer sa nasion la dibien. 3Exselans, toultan, partou, nou akeyir ou reform avek boukou rekonesans.
4Me mo pale pran plis ou letan, akoz samem mo dimann ou ena labonte ekout nou detrwa minit selma, ar latansion ki nou kone ou ena. 5Nou finn dekouver ki sa boug la bien danzere. Li enn sef parti Nazareen, li provok dezord parmi bann Zwif dan lemonn antie. 6Li finn mem rod profann tanp, akoz sa nou finn aret li. 7#24:7 Ena detrwa ansien maniskri ki azout ‘Nou ti pou ziz li dapre nou lalwa. 7 Me komandan Lizias ti vini e ti aras li ar nou dan enn fason violan, 8 e li donn lord bann ki pe akiz li vinn devan ou.’ 8Si ou poz li kestion, oumem ou pou trouve seki nou pe dir vre.”
9Pou soutenir sa sarz la, bann Zwif osi ti deklare ki tou seki finn dir li vre.
Pol prezant so defans devan Felix
10Gouverner fer enn sign pouki Pol pran laparol. Lerla Pol dir, “Mo kone ki depi boukou banane ou finn enn ziz pou sa pep la, alors mo bien kontan pou defann mwa devan ou. 11Ou kapav verifie, ki pena plis ki douz zour ki mo finn al Zerizalem pou ador Bondie. 12Bannla pa finn trouv mwa pe diskit ar personn dan tanp, ou bien pe eksit lafoul ni dan sinagog, ni dan lavil. 13E zot pa kapav prouv tou bann sarz zot inn met lor mwa. 14Me mo rekonet ki dapre Vre Sime (ki bannla pe dir fos) mo pe ador Bondie nou bann anset. Mo krwar dan lalwa ek seki bann profet finn ekrir. 15Parey kouma bannla, mwa osi mo ena mem lesperans dan Bondie ki pou ena rezireksion bann move kouma bann bon. 16Akoz samem mo finn toultan fer tou mo posib pouki mo konsians kler devan Bondie ek devan bann zom.
17Apre plizir lane, mo finn retourn Zerizalem; mo finn amenn larzan pou ed mo pep e pou prezant bann ofrand Bondie. 18Lerlamem ki detrwa Zwif sorti Lazi finn trouv mwa dan tanp apre ki mo finn fer seremoni pirifikasion. Pa ti ena okenn lafoul ni okenn tapaz. 19Sa bann Zwif la ti bizin la devan ou pou akiz mwa si zot ti ena prev kont mwa. 20Sinon, ki bann dimoun ki la dir ki ofans zot finn trouve dan mwa letan mo ti al devan konsey. 21Kikfwa zot pe anvi koz lor sa deklarasion ki mo ti fer la: ‘Akoz mo krwar dan rezireksion bann mor ki mo devan ou zordi.’ ”
22Me Felix ki ti bien informe lor Vre Sime, ti ranvway zafer la e li dir, “Kan komandan Lisias vini mo va pran enn desizion lor to ka.” 23Felix ti donn lord gard prizon pou vey Pol, me ki li donn Pol enn sertenn liberte e les so bann kamarad donn li touseki li bizin.
Pol dan prizon
24Apre detrwa zour Felix ti amenn so madam Drisil, ki ti enn Zwiv. Li fer amenn Pol e li ekout li koz lor lafwa dan Zezi Kris. 25Kan Pol abord size lor kimanier bizin viv enn lavi zis, kimanier enn dimoun bizin kontrol limem, ek lor size zizman dernie, Felix ti malalez, alor li dir Pol, “To kapav ale aster. Kan mo gagn letan, mo pou apel twa ankor.” 26Anmemtan, li ti pe atann ki Pol pou donn li kas. Akoz samem li ti fer li vini souvan pou koz ar li.
27De-zan finn pase koumsa, apre sa Porkyis Festis finn regne dan plas Felix. Parski Felix ti anvi gagn faver bann Zwif, li ti les Pol dan kaso.
Currently Selected:
Zis 24: NTKM2009
Highlight
Share
Copy
Want to have your highlights saved across all your devices? Sign up or sign in
Mauritian Kreol New Testament © Bible Society of Mauritius, 2009.
