Lk 13

Sanz zot leker

1Detrwa dimoun vinn rakont Zezi kouma Pilat finn masakre bann Galileen ki ti pe ofer sakrifis. 2Zezi reponn zot, “Eski zot panse ki sa bann Galileen la pli gran peser ki tou lezot Galileen parski zot finn soufer koumsa? 3Mo dir zot, pa ditou! Me si zot pa repanti, zot pou mor parey. 4Ki zot panse lor latour Siloe ki finn kraz lor dizwit dimoun e finn touy zot tou? Eski zot krwar ki bannla ti pli koupab ki tou lezot abitan Zerizalem? 5Mo dir zot, pa ditou! Me si zot pa repanti, zot pou mor parey.

Parabol pie fig san fig

6Zezi rakont enn parabol, “Enn dimoun ti plant enn pie fig dan enn karo rezin. Li vinn rod fri lor so pie fig me li pa gagn nanye. 7Li dir ar planter rezin la, ‘Get sa, sa fer trwa-zan ki mo finn rod fri lor sa pie fig la me mo pa gagn nanye. Koup li. Kifer li bar plas pou nanye?’ 8Me li reponn propriyeter la, ‘Misie, donn li enn sans sa lane la ankor. Mo pou bim later la e mo pou met fimie ar li. 9Lerla li pou raporte lane prosenn. Sinon nou ava koup li.’ ”

Zezi geri enn fam bosi zour saba

10Zezi ti pe ansegne dan sinagog enn zour saba. 11Ti ena la, enn madam ki ti ena enn infirmite pandan dizwit-an akoz enn move lespri. Li ti kourbe e li pa ti kapav dres drwat. 12Letan Zezi trouv li, li apel madam la e li dir li, “Fam, to finn delivre depi to maladi.” 13Zezi poz lame lor li, e toutswit madam la redrese e li glorifie Bondie. 14Me sef sinagog ti ankoler parski Zezi ti fer sa gerizon la enn zour saba. Alors li dir, “Ena sis zour pou travay; vinn rod gerizon dan sa bann zour la, me pa zour saba.” 15Alor Zezi dir li, “Ipokrit! Eski zour saba, zot pa larg zot toro oubien zot bourik depi dan lekiri pou amenn li bwar dilo deor? 16Eski zour saba, pa ti bizin liber sa madam la, ki enn tifi Abraam, e ki Satan finn atase pandan dizwit-an?” 17Letan li dir sa, tou so bann adverser perdi lafas. Tou bann dimoun ti dan lazwa akoz bann mervey ki Zezi ti pe fer.

Parabol lagrin moutard

(Mt 13:31-32; Mk 4:30-32)

18Zezi dir, “Kouma Rwayom Bondie ete, ek ar ki mo kapav konpar li? 19Li parey kouma enn lagrin moutard ki enn dimoun finn pran pou plant dan so zardin. Li grandi e li vinn gran kouma enn pie. Lerla bann zwazo dan lesiel vinn fer zot nik dan so brans.”

Parabol levin

(Mt 13:33)

20Zezi rakont ankor, “Ar ki mo pou konpar Rwayom Bondie? 21Li parey kouma levin ki enn fam inn pran e finn azout avek trwa goble lafarinn pou fer lapat la monte.”

Laport sere

(Mt 7:13-14, 21-23)

22Zezi ti pe travers lavil ek vilaz e li ti pe al dan direksion Zerizalem. Lor larout li ti pe ansegne. 23Enn dimoun dimann li, “Segner eski pou ena enn tigit dimoun mem ki pou sove?”

Li reponn zot, 24“Fer tou zot posib pou rant par ti laport parski boukou pou rod rantre me zot pa pou kapav.

25Kan propriyeter lakaz leve e ferm laport, zot pou deor. Zot ava bon tape e zot ava bon dir, ‘Segner, ouver laport pou nou,’ li pou reponn zot, ‘Mo pa kone kot zot sorti.’ 26Alors, zot pou dir li, ‘Nou finn manze-bwar ar twa; to finn ansegn nou lor laplas piblik.’ 27Li pou redir zot, ‘Zot tou ki komet lemal, mo pa kone kot zot sorti. Sorti devan mwa ale.’ 28Laba pou ena plore, kriye, e ledan pou grinse, letan zot pou trouv Abraam, Izaak, Zakob ek tou bann profet dan Rwayom Bondie alor ki zot, pou zet zot deor. 29Dimoun pou sorti depi les ek lwes, depi lenor ek lesid, e zot pou asiz atab dan Rwayom Bondie. 30Marke garde, ena dernie pou vinn premie, ena premie pou vinn dernie.”

Zezi ek Zerizalem

(Mt 23:37-39)

31Sa moman la, detrwa Farizien vinn get Zezi pou dir li, “Ale pa res la, parski Erod pe rod touy twa.” 32Zezi dir zot, “Al dir sa renar la, ‘Gete, mo pe pous demon e mo pe fer gerizon zordi ek dime, me lor trwaziem zour, mo ava finn fini mo mision. 33Selman mo bizin kontign mo sime zordi, dime ek apre dime, parski li pa posib ki enn profet mor andeor Zerizalem.’

34Zerizalem, Zerizalem, twa ki touy bann profet e twa ki touy kout ros seki Bondie finn avoy ar twa, komie fwa mo ti anvi rasanble to bann zanfan kouma enn mama poul ramas so tipousin anba so lezel, me zot pa finn oule! 35Krwar mwa, zot lakaz pou vid e mo pe dir zot, zot pa pou trouv mwa ankor ziska ler vini kot zot pou dir, ‘Sa-Enn ki vinn lor nom Lesegner la finn beni.’ ”

Currently Selected:

Lk 13: NTKM2009

Highlight

Copy