Lk 16

Enn sef kontab bien malin

1Zezi dir ar so bann disip, “Enn boug ris ti anplway enn sef kontab. Li ti gagn bann informasion ki so sef kontab ti pe gaspiy so dibien. 2Li ti apel li e li ti dir li, ‘Ki mo pe tande lor twa? Fer mwa enn rapor lor to administrasion parski to nepli kapav kontign travay pou mwa.’ 3Sef la dir ar limem, ‘Ki mo pou fer aster? Mo patron pe donn mwa demision. Pou piose mo pena lafors, dimann sarite mo onte. 4Mo kone ki mo bizin fer pouki dimoun kontign get mwa kan mo perdi mo travay.’ 5Enn par enn, li apel tou bann dimoun ki ti dwa so patron. Li dir ar premie la, ‘Komie to dwa mo patron?’ 6Li reponn, ‘San drom delwil zoliv.’ Kontab la dir li, ‘Degaze pran to karne, asize, mark sinkant.’ 7Apre li dir ar enn lot, ‘Twa, komie to dwa?’ Li reponn, ‘San bal dible.’ Li dir ar sannla, ‘Pran to karne, mark katrovin.’ 8Patron la felisit sef kontab malonet la parski li ti debrouyar. Bann zanfan lemonn pli debrouyar ki zanfan lalimier kan ena pou dres papie pou tras zot lavi.

9Mo dir zot, fer kamarad ar dibien ki ena lor later, koumsa kan dibien la pou nepli existe, zot pou gagn plas dan lakaz eternel. 10Seki fidel dan ti kiksoz, pou fidel dan seki gran; e seki malonet dan ti kiksoz, pou malonet dan seki gran. 11Si to pa finn fidel ar dibien ki ena lor later, kisannla pou konfie twa dibien ki dan lesiel? 12E si to pa finn fidel ar dibien ki pa pou twa, kisannla pou konfie twa to prop dibien?

13Enn serviter pa kapav servi de met; swa li air enn e li kontan lotla, swa li devoue pou enn e li mepriz lotla. To pa kapav servi Bondie ek dibien lor later.”

Detrwa parol Zezi

(Mt 11:12-13; 5:31-32; Mk 10:11-12)

14Letan bann Farizien ki ti bien kontan larzan tann sa, zot boufonn Zezi. 15Zezi dir zot, “Zot fer krwar ki zot ena lazistis zis pou lizie dimoun, me Bondie konn zot leker. Seki ena valer pou dimoun, enn abominasion pou Bondie.

16Lalwa ek profet finn fer lotorite ziska Zan; apre sa, pe proklam Bonn Nouvel Rwayom Bondie e sakenn pe fors limem pou rant ladan. 17Me li pli fasil ki later ek lesiel disparet, ki enn ti pwin dan lalwa disparet.

18Enn zom ki divors ar so fam e marye ar enn lot, komet adilter e seki marye ar enn fam ki finn kit so mari, komet adilter osi.

Parabol Lazar ek enn zom ris

19Ti ena enn zom ris, ki ti met bel-bel kostim, bien-bien ser. Li ti pe viv dan lix e toulezour li ti pe fer gran-gran fet. 20Ti ena enn pov malere ki ti apel Lazar. Li ti pe asize devan laport ris la, e so lekor ti kouver ar lagal. 21Li ti pou bien kontan manz bann restan ki tom anba latab. Pli terib ankor, bann lisien ti vinn lis so lagal. 22Arive ki pov malere la mor e bann anz amenn li pre kot Abraam. Ris la osi mor e zot anter li. 23Dan lemonn bann mor#16:23 Dan langaz Grek, sa landrwa apel Ades. Li enn landrwa kot bann mor ti ale anba later dapre krwayans bann Zwif. letan li ti pe soufer, li lev so lizie, li trouv Abraam delwin e pre ar li, ti ena Lazar. 24Li kriye, ‘Papa Abraam, papa Abraam, pitie mwa. Avoy Lazar tranp so bout ledwa dan dilo pou rafresi mo lalang parski mo pe soufer lagoni dan sa laflam la.’ 25Me Abraam dir, ‘Mo garson, rapel bien ki dan to lavi lor later to ti dan bien, alor ki Lazar ti gagn boukou maler; me asterla li dan bien isi, e twa to dan soufrans. 26Anplis, ant nou finn met enn gran separasion pou anpes zot vinn kot nou e nou al kot zot.’ 27Ris la dir li, ‘Mo sipliy twa, papa Abraam, avoy Lazar lakaz mo papa, 28parski mo ena sink frer laba. Averti zot pouki zot osi, zot pa vinn dan sa dife la.’ 29Me Abraam reponn li, ‘Zot ena Moiz e bann profet, les zot ekout bannla.’ 30Li reponn, ‘Non, papa Abraam, me si enn parmi bann mor al get zot, zot pou repanti.’ 31Abraam dir li, ‘Si zot pa ekout Moiz e bann profet, zot pa pou sanze, mem si enn mor ki finn resisite al get zot.’ ”

Currently Selected:

Lk 16: NTKM2009

Highlight

Copy