Mt 11

1Ler Zezi fini donn instriksion so douz disip, li kit sa landrwa la pou al prese ek ansegne dan lavil kot zot reste.

Bann mesaze Zan Batis

(Lk 7:18-35)

2Dan prizon, ler Zan tann travay ki Zezi pe fer, li avoy detrwa disip, 3pou dimann Zezi, “Eski tomem Sa-Enn ki sipoze vini la, oubien nou bizin atann enn lot?” 4Zezi reponn zot, “Al rakont Zan seki zot finn tande ek trouve: 5bann aveg pe trouv kler, bann andikape pe marse, bann lepre pe pirifie, bann sourd pe tande, bann mor pe resisite e bann pov pe tann Bonn Nouvel ki pe anonse. 6Bienere, sa dimoun ki pa tom dan pese akoz mwa.”

7Apre ki bann disip Zan finn ale, Zezi koz ar lafoul lor size Zan, e li dir: “Ki zot finn al gete dan dezer? Enn fatak balanse dan divan? 8Ki zot finn al gete? Enn zom bien abiye? Me bann ki met zoli linz, res dan pale lerwa. 9Abe ki zot finn al gete? Enn profet? Wi, les mo dir zot, li plis ki enn profet. 10Parski lor Zan mem ki finn ekrir: ‘Gete, mo pe avoy mo mesaze avan twa pou prepar to sime.’ 11Laverite mo dir zot, parmi tou dimoun ki finn ne lor later, pena enn pli gran ki Zan Batis; pourtan sa ki pli tipti dan rwayom lesiel, pli gran ki li. 12Depi lepok Zan Batis ziska zordi, rwayom lesiel finn toultan sibir violans e bann dimoun violan finn akapar li. 13Tou bann profet ek lalwa Moiz finn anons sa rwayom la ziska lepok Zan. 14E si zot anvi kone, ala mo dir zot. Zan, limem Eli ki sipoze vini. 15Seki ena zorey, ava tande.

16Koman mo pou konpar sa zenerasion la? Li parey kouma bann zanfan ki pe asize lor laplas piblik ki pe koze ant zot, 17‘Nou finn zwe zoli lamizik pou zot e zot pa finn danse; nou finn zwe kantik lanterman e zot pa finn plore.’ 18Zan finn vini, li pa finn manze ni bwar, e zot finn dir, ‘Li enn posede!’ 19Garson Limanite finn vini, li manze, li bwar e zot dir, ‘Li enn gourman, li soular, li frekant bann ramaser tax ek bann move dimoun.’ Pourtan li finn demontre lasazes Bondie par so bann bonaksion.”

Bann lavil ki refiz krwar

(Lk 10:13-15)

20Alor Zezi koumans fer repros ar sa bann lavil kot li finn fer boukou mirak parski dimoun pa finn konverti. 21“Maler pou tom lor twa, lavil Korazin! Maler pou twa, lavil Betsaida! Parski si bann mirak ki finn arive kot zot, ti ariv dan Tir ek Sidon, depi lontan sa bann lavil la ti pou finn montre piblikman ki zot finn sanz zot leker. 22Les mo dir zot, zour zizman, Tir ek Sidon pou gagn enn meyer tretman ki zot. 23Twa Kafarnaom, eski to krwar to pou mont drwat dan lesiel? To pou desann ziska dan lanfer parski si sa bann mirak ki finn arive kot twa la, ti deroul dan Sodom, ziska zordi sa lavil la ti pou ankor existe. 24Akoz samem, mo dir zot, zour zizman li pou pli dir pou zot ki pou Sodom.”

Vinn kot mwa, repoz zot

(Lk 10:21-22)

25Samem lepok la Zezi dir “Mo remersie twa, Papa, Segner lesiel ek later, parski to pa finn montre sa bann kiksoz la bann saz ek bann intelizan, me to finn revel zot ar bann pli tipti. 26Wi, Papa samem ti to volonte. 27Mo Papa finn donn mwa tou e personn pa kapav konn so garson exsepte so Papa, personn pa kapav konn so Papa exsepte so Garson ek dimoun ar ki so garson anvi revel li. 28Vinn kot mwa zot tou ki fatige, ki pe sarye enn fardo bien lour, mo pou donn zot repo. 29Met mo fardo lor zot ledo, e vinn aprann ar mwa parski mo karakter li dou e mo leker ranpli ar imilite 30Mo zoug li fasil sarye e mo fardo li leze.”

Currently Selected:

Mt 11: NTKM2009

Highlight

Copy