Mk 16

Rezireksion Zezi

(Mt 28:1-8; Lk 24:1-12; Zn 20:1-10)

1Letan saba finn fini pase, Marie-Madlenn, Marie, mama Zak ek Salome aste bann aromat pou vinn anbom lekor Zezi. 2Gramatin boner, premie zour lasemenn, zis apre ki soley finn leve, zot vinn lor tom. 3Zot ti pe dir ant zotmem, “Kisannla pou roul sa ros ki devan lantre tom la?” 4Kouma zot lev latet, zot gete, zot trouv sa gro ros la finn fini roule. 5Letan zot rant dan tonbo, zot trouv enn zennom ki ti pe asize adrwat. Li ti ena enn linz blan lor li. Zot gagn enn sok. 6Li dir zot, “Pa gagn per, zot ape rod Zezi Nazaret ki ti finn krisifie; li finn fini resisite, li pa isi. Get landrwa kot bannla ti met li. 7Aster, ale, al dir so bann disip ek Pier ki li pe atann zot Galile, parey kouma li ti dir zot. Zot pou trouv li laba.” 8Zot sorti dan tonbo, zot sove. Zot tranble, zot boulverse e zot pa ti dir personn nanye parski zot ti gagn per.

Zezi aparet devan so bann disip

(Mt 28:9-10; Zn 20:11-18)

[ 9Letan li finn resisite boner gramatin, premie zour lasemenn, Zezi ti aparet dabor devan Marie-Madlenn; lor limem Zezi ti pous set demon. 10Marie-Madlenn ti al anons tou saki ti finn ariv li, ar bann dimoun ki ti avek Zezi; bannla ti andey e zot ti pe plore. 11Me letan zot finn aprann ki Zezi ti vivan e ki li ti finn aparet devan li, zot pa ti oule krwar.

Zezi aparet devan de disip

(Lk 24:13-35)

12Apre sa, li finn aparet, dan enn lot manier, devan de parmi zot, letan zot ti pe marse dan lakanpagn. 13Zot ti retourne pou rakont lezot; me bannla pa ti oule krwar zot osi.

Zezi aparet devan onz disip

(Mt 28:16-20; Lk 24:36-49; Zn 20:19-23; Zis 1:6-8)

14Pli tar, li ti aparet devan Le-Onz, letan zot ti atab; li repros bannla ki zot pena lafwa e ki zot leker dir parski zot pa ti krwar dimoun ki ti finn trouv li apre so rezireksion. 15Li dir zot, “Al dan lemonn antie, al proklam Bonn Nouvel partou kote. 16Dimoun ki krwar ek resevwar batem pou sove, me dimoun ki pa krwar pou kondane. 17Ala bann sign ki pou fer dimoun rekonet bann ki krwar dan mwa: zot pou sas demon lor mo nom, zot pou koz bann nouvo langaz, 18zot pou trap serpan dan zot lame e si zot arive bwar pwazon, zot pa pou gagn nanye; zot pou inpoz lame lor bann malad, bannla pou geri.”

Lasansion Zezi

(Lk 24:50-53; Zis 1:9-11)

19Apre sa, Lesegner Zezi, letan li finn fini koz ar zot, li finn mont dan lesiel e li finn asiz kote drwat Bondie. 20So bann disip sorti e zot al proklam Bonn Nouvel partou kote; Lesegner ti pe travay avek zot e bann mirak ki ti pe arive ti pe montre ki zot predikasion ti vre.#16:9-20 Ena maniskri ek osi bann tradiksion bien ansien ki pena verse 9-20; Bonn Nouvel la aret avek verse 8.]

Currently Selected:

Mk 16: NTKM2009

Highlight

Copy