Mk 4

Parabol enn planter

(Mt 13:1-9; Lk 8:4-8)

1Ankor enn fwa, Zezi ti pe ansegne dan borlamer. Telman ti ena enn gro lafoul ki ti pe antour li, li monte, li al asiz dan enn pirog ki ti lor lamer. Lafoul ti lor laplaz dan bor dilo. 2Tou so koze ti an parabol; dan so lansegnman li ti pe dir, 3“Ekout sa. Ala zistwar enn planter ki pe al seme. 4Letan li pe seme, enn parti lagrin tom lor sime. Zwazo vini, manz tou. 5Enn lot parti tom dan enn landrwa inpe ros-ros kot pa ti ena boukou later. Lagrin la pous vit parski later ti mins. 6Kouma soley tape, li griye, li mor, parski pa ti ena ase rasinn. 7Enn lot parti tom dan pikan. Letan pikan pouse, grandi, li touf li; li pa kapav raporte. 8Enn lot parti tom dan bon later. Li pouse, li vinn gran, li raport bien-bien mem: ena donn trant, ena swasant, ena donn ziska san fwa plis.” 9Zezi dir zot, “Saki ena zorey pou tande, li pou tande.”

Kifer Zezi koz an parabol

(Mt 13:10-17; Lk 8:9-10)

10Letan li ti tousel, bann ki ti pros ar li ek so group Douz dimann li explikasion lor bann parabol. Li dir zot, 11“Zot, finn fer zot konn sekre Rwayom Bondie. Pou bann saki andeor, tou pou res enn mister. 12Koumsa zot kapav gete, me zot pa pou trouv nanye, Zot kapav tande me zot pa pou konpran nanye, Lerla zot pa pou kapav sanz zot leker e zot pa pou gagn okenn pardon.”

Zezi explik parabol planter

(Mt 13:18-23; Lk 8:11-15)

13Li dir zot, “Si zot pa konpran sa parabol la, kouma zot pou konpran lezot parabol?” 14“Planter la, li sem laparol. 15Lagrin ki tom dan bor sime, savedir bann dimoun ki tann parol Bondie. Kouma zot tande, Satan vini, aras parol ki finn seme dan zot. 16Lagrin ki tom dan enn landrwa inpe ros-ros, vedir bann dimoun ki resevwar laparol dan lazwa kan zot tann li. 17Me kouma zot rasinn lao-lao, tou zafer zis pou enn letan; kouma zot gagn difikilte, persekision akoz parol Bondie, zot tonbe. 18Lagrin ki tom dan pikan, vedir bann dimoun ki zot ousi tann sa parol la. 19Me bann traka lavi, lanvi gagn touzour plis, tou sort kalite tantasion, tousala touf la parol. Li pa raport okenn fri. 20Saki tom lor bon later, vedir bann ki ekout parol Bondie, ki akey li. Zot finn raport trant, swasant ziska san fwa plis.”

Parabol lalanp

(Lk 8:16-18)

21Li koz ar bannla ankor. “Eski nou alim enn lalanp pou met li anba seo, anba lili ouswa nou met li anler lor enn stenn? 22Pena okenn sekre ki pa pou dekouver; tou saki finn kasiet pou devwale. 23Saki ena zorey pou tande, li pou tande.” 24Li dir zot ankor, “Pran kont saki zot pe tande. Mezir ki zot servi pou lezot, samem mezir pou servi pou zot; e pou zot, li pou inpe plis. 25Saki ena, pou gagn ankor; saki pena, mem sa tigit ki li ena la, pou repran.”

Lagrin ki pous tousel

26Li kontigne ankor, li dir, “Rwayom Bondie li parey kouma enn dimoun ki zet enn lagrin dan later. 27Ki li dormi, ki li leve, lanwit, lizour, lagrin la pou zerme, pou grandi san mem ki li kone kouma. 28Par limem, later fer so travay; premie dabor nou gagn lerb, apre li vinn enn zepi, anfin dible plin-plin dan zepi; 29letan so fri finn pare, nek pas enn sinp kout fosi kan sezon lakoup finn arive.”

Lagrin moutard

(Mt 13:31, 32-34; Lk 13:18-19)

30Li kontign koze, li dir, “Ar ki zafer nou konpar Rwayom Bondie? Ki kalite parabol nou kapav servi ankor? 31Li parey kouma enn lagrin moutard. Kan nou finn sem li, limem pli tipti semans ki existe lor later. 32Me selman, kouma ou sem li, li monte. Li vinn pli gran ki tou bann plant dan zardin. So bann brans telman gran ki bann zwazo partou kote kapav vinn fer zot nik dan so lonbraz.”

33Ar boukou parabol sa zar la, li ti pe anons laparol, dapre seki zot ti pe kapav konpran. 34Li ti koz ar zot zis an parabol, apre kan li ti tousel ar so bann disip, li ti explik zot tou kiksoz.

Zezi kalme koudvan

(Mt 8:23-27; Lk 8:22-25)

35Sa zour la, letan aswar finn arive, Zezi dir zot, “Anou travers lot kote.” 36Zot kit lafoul, zot rant dan bato kot Zezi ti ete. Lezot bato al ansam ar li. 37Enn gran koudvan leve; gro-gro vag vinn kraz lor bato. Enn timama, bato koumans pran dilo. 38Zezi limem, li ti pe dormi par deryer lor enn kousin. Zot lev li, zot dir li, “Met, sa pa fer twa nanye ki nou pe koule?” 39Li nek leve, li menas divan e li koz ar lamer, “Res trankil, kalme twa.” Labriz tonbe, letan kalme net. 40Lerla li dir zot, “Kifer zot kapon koumsa? Zot touzour pena lafwa?” 41Enn gran lafreyer pran zot. Sakenn dir ar so kamarad, “Kisannla sa? Mem divan ek lamer obeir li?”

Currently Selected:

Mk 4: NTKM2009

Highlight

Copy