Mk 9

1Zezi dir zot ankor, “Laverite, laverite mo dir zot, ena detrwa isi ki pa pou konn lamor tanki zot pa trouv Rwayom Bondie desann avek pwisans.”

Transfigirasion Zezi

(Mt 17:1-13; Lk 9:28-36)

2Sis zour apre, Zezi pran zis Pier, Zak ek Zan tousel avek li e li amenn zot lao lor montagn. Li transfigire devan zot. 3So linz vinn blan-blan-blan, enn kalite blan ki okenn dobi lor later pankor kapav reysi ariv fer. 4Zot trouv Eli ek Moiz paret devan zot. Bannla ti pe koz ar Zezi. 5Alor Pier rant dan konversasion, li dir ar Zezi, “Rabi, li bien bon ki nou isi avek twa; anou ranz trwa latant, enn pou twa, enn pou Moiz ek enn pou Eli.” 6Li pa ti kone ki pou dir telman zot ti finn sezi. 7Lerla enn niaz rekouver zot e enn lavwa dan niaz dir, “Samem mo Garson ki mo bien kontan, ekout li.” 8Enn ti moman apre, kan zot get kat kote, zot pa trouv personn, res zis Zezi tousel. 9Ler zot pe desann lor montagn, Zezi rekomann zot pa rakont personn seki zot finn trouve tanki Garson Limanite pa ankor resisite parmi bann mor. 10Zot gard sa parol la dan zot leker, mem si zot ti pe dimann zotmem, “Ki savedir ‘Resisite parmi bann mor’?”

11Apre bann disip dimann li, “Kifer bann dokter lalwa dir fode Eli revini avan?” 12Li reponn zot, “Premie dabor, Eli pe vini pou dres tou e met tou dan lord; alor kifer finn ekrir ki Garson Limanite pou soufer boukou e pou gagn maltrete?” 13Li kontigne, “Eli finn vini, zot finn fer tou saki zot ti anvi avek li, dapre seki ti finn ekrir lor li.”

Zezi geri enn tigarson

(Mt 17:14-21; Lk 9:37-43b)

14Kan zot rezwenn lezot disip, zot trouv enn gro lafoul pe antour bannla; bann dokter lalwa ti pe diskit ar zot. 15Kouma lafoul trouv Zezi, zot exsite. Zot galoupe pou akeyir li. 16Li dimann zot, “Ki zot pe diskite ar bannla?” 17Enn boug dan lafoul reponn li, “Met, mo finn amenn mo garson ar ou, li posede par enn lespri ki anpes li koze. 18Sak fwa lespri la trap li, li fwet li anba, zanfan la kime, li grins so ledan, li redi. Mo finn dimann ou disip pous sa lespri la, selman zot pa ase for.” 19Zezi reponn zot, “Sa zenerasion la, enn zenerasion ki pena lafwa; ziska kan mo pou res ar zot? Ziska kan mo pou siport zot? Amenn li ar mwa.” 20Zot amenn li ar Zezi; kouma lespri la trouv li, li fer zanfan la rant antrans, li tom anba, li fer li roule, li kime. 21Zezi dimann so papa, “Depi komie letan li gagn sa?” Li reponn, “Depi li zanfan. 22Plizir fwa, lespri la finn zet li dan dife ek dan dilo pou fini li; si ou kapav fer kiksoz pou nou, sap nou, pran par dan nou maler.” 23Zezi dir li, “To pe dir si ou kapav? Be tou kiksoz posib pou dimoun ki ena lafwa.” 24Deswit papa garson la kriye, “Mo krwar; ed mwa, mo lafwa pa ase gran.” 25Kan Zezi trouv enn latroupman, li menas move lespri la, li dir li, “Twa, lespri ki anpes koze, ki anpes tande, mo komann twa, sort dan sa zanfan la, pa revinn ankor ar li.” 26Lespri la kriye, li sakouy-sakouy zanfan la, li sorti, li ale. Zanfan la pa bouze, li ti parey kouma enn dimoun mor. Dimoun dir li finn fini mor. 27Zezi trap so lame, fer li leve, li deboute. 28Letan Zezi finn rant lakaz, bann disip ris li enn kote, zot dimann li, “Kifer nou pa finn kapav pous sa lespri la, nou?” 29Li dir zot, “Zis ar lapriyer ki sa kalite lespri la kapav sorti.”

Zezi koz ankor enn fwa lor so lamor ek so rezireksion

(Mt 17:22-23; Lk 9:43b-45)

30Zot sorti landrwa kot zot ti ete, zot travers Galile. Zezi pa ti anvi ki dimoun konn sa. 31Li ti pe kontigne ansegn so bann disip e li ti pe dir zot, “Zot pou trap Garson Limanite, zot pou livre li dan lame bann dimoun; zot pou touy li, me trwa zour apre so lamor, li pou resisite.” 32Zot pa ti konpran saki li ti pe rod dir; zot ti gagn per poz li kestion.

Kisannla pli gran?

(Mt 18:1-5; Lk 9:46-48)

33Zot ariv Kafarnaom; kouma zot rant lakaz, Zezi dimann zot, “Ki zot ti pe diskite lor sime?” 34Zot tou, zot res trankil parski lor sime, zot ti pe diskite for-for pou kone kisannla pli gran. 35Li asize, li apel Ledouz, li dir zot, “Si kikenn anvi vinn premie, fode li vinn dernie e li bizin vinn serviter tou dimoun.” 36Lerla li pran enn ti zanfan, li met li dan milie, li pran li dan so lebra, apre li dir zot, 37“Dimoun ki akey enn sa bann ti zanfan la, lor mo nom, li pe akeyir momem; e dimoun ki akeyir mwa, pa mwa li pe akeyir me seki finn avoy mwa la.”

Saki pa kont nou, ar nou

(Lk 9:49-50)

38Zan dir li, “Met, nou finn trouv kikenn servi to nom pou pous enn demon; nou finn sey anpes li parski li pa mars ar nou.” 39Zezi dir, “Pa anpes li; dimoun ki servi mo nom pou fer enn mirak, pa kapav mal parl mwa apre; 40Saki pa kont nou, ar nou. 41Dimoun ki donn zot enn ver dilo, lor mo nom, parski zot krwar dan Lekris, laverite, laverite mo dir zot, li pa pou perdi so rekonpans.”

Fer atansion

(Mt 18:6-9; Lk 17:1-2)

42“Dimoun ki fer enn sa bann ti zanfan ki krwar dan mwa la tonbe, ti a preferab atas enn gro ros otour so likou e zet li dan lamer. 43Si to lame fer twa tonbe, koup li; preferab to mank enn lame kan to rant dan lavi, ki to ena de lame dan lanfer, la kot dife napa tegn. [La, 44lever ki detrir lekor pa mor, ek dife pa tegn zame #9:44 Pena sa verse la dan plizir ansien tex.] 45Si to lipie fer twa tonbe, koup li; preferab to mank enn lipie kan to rant dan lavi, ki to al avek to de lipie dan lanfer. [La, 46lever ki detrir lekor pa mor, ek dife pa tegn zame #9:46 Pena sa verse la dan plizir ansien tex.] 47Si to lizie fer twa tonbe, aras li; preferab to mank enn lizie kan to rant dan Rwayom Bondie, ki to rant avek to de lizie dan lanfer, 48la, kot lever pa mor e kot dife pa tegn. 49Nou tou, nou pou sale ar dife.

50Disel enn bon zafer, sa, selman si disel finn perdi so gou, ki ou pou servi pou asezone? Met disel dan zot lavi, viv dan lape avek tou dimoun.”

Currently Selected:

Mk 9: NTKM2009

Highlight

Copy