लूका 18

प्रार्थना करह् अरह् दीड़-हिम्मत ने हारे

1तबे प्रभू यीशू ऐ तेसी बारे दो बुलो, के रोज प्रार्थना करह्, अरह् दीड़-हिम्मत ने हारे, अरह् तिनखे ऐजो अनाँणों दितो: 2“कोसी नंगर दा ऐक सियाँणा रंह् थिया, जू ना पंण्मिश्वर दा डरह् थिया, अरह् ना कोसी आदमी के किऐ परवा मारो थिया। 3तेसी ही नंगर दे ऐक बिधवा भे रंह् थी, जू तेस्कैई आऐयों ऐजी ढाल-अरज करह् थी, के मेरा नियाँव करह्, मुँह मुद्ई शी बचाऐ दे। 4किऐ बख्तो तोड़ी तअ तेने सियाँणें तियारी बात मानी ने, परह् जबे तिऐं अंन्त्ती करी; तअ तेने आप्णे सासो दो ऐजो सूँचियों बुलो, के ‘हाँव ना तअ पंण्मिश्वर दा डरदा, अरह् ना कोसी आदमी की किऐ परवा करदा; 5परह् तबे भे ऐजी बिधवा तिरंऐ मुँह बैगे तँग करह्, ईन्देंखे हाँव ईयाँरा नियाँव जरूर करूबा; किन्देंखे के कदी ऐशो ने हऐयों के ऐ बार-बार ईथै आऐयों मेरी जीयाँन ने खाँव।’”

6प्रभू यीशू ऐ बुलो, “शुँणों, तैने अपराधि सियाँणें ऐं का बुलो? 7ईन्देंखे कियो पंण्मिश्वर आप्णे छाँटे अंदें, का नियाँव करदा ने; जुण्जे लोग रात्ती-देसो प्रभू के नाँव का जाप कर्दे रंह? कियों से तिनू लोगो के बारे दी किऐ देर कर्दे? ऐशो ने हंदी। 8हाँव तुँओं खे बुलू, के पंण्मिश्वर बिना देर करे बिना, ही तैख्णी तिन का नियाँव कर्ले; अरह् जबे आदमी का बैटा आला, तअ कियों से धर्ती गाशी कोसी दा बिश्वाष दे:ख्ला?”

यहूदी भाट-बाँम्ण अरह् चूँगी लहणो वाल़े को अनाँणों

9किऐ लोग आपु खे आप्णें आत्त्मबिश्वाष आरी धर्मी जाँणों थिऐ, अरह् से ओकी लोगो खे पापी अरह् छूत्त जाँणों थिऐ; तिनू लोगो के बिचार दे:खियों, प्रभू यीशू ऐ तिनखे ऐक अनाँणों दितो। 10“दो आदमी देऊँठी दे प्रार्थना कर्दें लागे, ऐक यहूदी भाट-बाँम्ण थिया, अरह् ओका चूंगी लोणों वाल़ा थिया। 11यहूदी भाट-बाँम्णें खह्ल़ियों आप्णे सासो दे ऐजी प्रार्थना करी, ‘हे पंण्मिश्वर, हाँव तेरा धन्यबाद करू, के हाँव ओकी आदमी जेष्णाँ पापी अ-नियाँऐं कर्णो वाल़ा, के चोरी-जारी कर्णो वाल़ा, अरह् ना ऐसी चूँगी लोंणो वाल़े, जेष्णाँ आथी। 12अरह् हाँव हफ्त्ते दा दू: बई बरत्त करू, अरह् हाँव आप्णी बादी कंमाई का दषंवाँ-भागँ भे दाँण देऊँ।’

13“परह् सेजा चूँग्गी लणों वाल़ा दूरका ही खह्ड़ा हुवा, अरह् तेने स्वर्गो के ढबै भे आप्णों मुँह ऊँबो ने करी, अरह् तेने आप्णी छ़ात्ती पीटी-पीटियों ऐजो बुलो; के ‘हे, पंण्मिश्वर मुँह पापी गाशी दया-रंयम करह्!’” 14प्रभू यीशू ऐं बुलो, “हाँव तुँओं खे बुलू; के सेजा यहूदी भाट-बाँम्ण ने, परह् सेजा चूंग्गी लणों वाल़ा, आदमी ही धर्मीं बणियों, आप्णे घरेह् हुटा; किन्देंखे के जुण्जा कुँऐं आपु आप्खे बड़ा बंणला, तेसी ही छुटा बाँणा ज़ाला, परह् जुण्जा कुँऐ आपु आप्खे छुटा बाँण्ला, तैसी ही बड़ा बाँणा ज़ाला।”

नहाँन्ड़ियाँ खे आशिर्बाद

(मत्ती 19:13-15; मरकुस 10:13-16)

15तबे लोगे ऐ आप्णे नहाँन्ड़ियाँ प्रभू यीशू कैई लियाऐ, के प्रभू तिन गाशी आप्णा हाथ थऐयों तिन खे आशिर्बाद दियों; परह् चैले ऐ तिनू लोग दे:खियों डाँटे। 16अरह् प्रभू यीशू ऐ नहाँन्ड़ियाँ आपु कैई बईदे, अरह् आप्णें चैले खे बुलो; “नहाँन्ड़िया मुँह कैई आँणों दियों ईनू रूके ने; किन्देंखे के स्वर्गो का राज्य ईनू ऐष्णें ही लोगो को असो। 17हाँव तुँओं खे खास बात बुलू, के जू कुँऐं पंण्मिश्वर को राज्य नहाँन्ड़िया, छ़ैढ़ू जैष्णों ने माँन्ला, से कद्दी भे पंण्मिश्वर के राज्य दा ने ज़ाऐ सक्दा।”

सैठ आदमी अरह् अमर जीवन

18कोसी नंम्बरदारें प्रभू यीशू कैई शो पुछो, “हे भला गुरू! अमर जीवन का हंक-अधिकारी बंण्णों खे हाँव का करू?” 19प्रभू यीशू ऐ तैस्खे बुलो, “तू मुँखे भला कैई बुले? किन्देंखे के कुँऐं भे भला ने आथी; सिर्फ ऐक ही भला असो, मतल्व पंंण्मिश्वर। 20तू अज्ञाँ तअ जाँणे ऐ: के ‘चुरी-जारी ने करे, हंत्त्या ने करे, अरह् चोरी ने करे, झूट्ठी गुवाऐ-शाज़्त्त ने दिऐ, अरह् आप्णें माँ-बाबा की आदर-ईज्जत्त करे।’” 21तेने नंम्बरदारे जबाब दिता, के “ईनू बादी बातो का पाल़्ण तअ मुँऐं तेई करा जैई हाँव आप्णी होष-हाष दा आया।” 22ऐजो शुँणियों, प्रभू यीशू ऐ बुलो, “ताँव दे ऐबे भे ऐक कंम्मी असो, आप्णो बादो सब-कुछ बीकियों गरीब कंगालो खे बाँडी दे, अरह् मुँह पाछी चाल, तअ ताँव्खे स्वर्गो दो धंन भेट्लो।” 23ऐजो शुँणियों सेजा आदमी बैजाऐ दु:खी हुवा, किन्दें खे के से बैजाऐ सैठ-धंनवाँन थिया। 24प्रभू यीशू ऐ तेसी दे:खियों बुलो, “सैठ आदमी को पंण्मिश्वर के राज्य दो ज़ाणों कैत्रों कंठीण असो! 25सैठो लोगो खे पंण्मिश्वर के राज्य दो दाखिल हंणों; ऊँटो को सियोंणीं की पाशी बाटी लिम्णों शो भे जादा कंठीण असो।” 26ईन्दें गाशी बादे शुँण्णो वाल़े ऐं बुलो, “तअ तबे कस्का ऊद्धार छुटकारा हऐं सको?” 27प्रभू यीशू ऐ तिन्खे जबाब दिता, “जुण्जो आदमी के जाँणें ने हऐं सक्दो, सेजो पंण्मिश्वर शो हऐं सको।” 28संत्त-पतरस ऐ बुलो, “दे:खो आँमें तअ आप्णों घरह्-बार छुड़ियों तुँओं पाछी चाली रूऐ।” 29प्रभू यीशू ऐ तिनखे जबाब दिता, “हाँव तुँओं खे खास बात बुलू; के ऐष्णा कुँऐं ने आथी, जेने पंण्मिश्वर की ताँईऐं आप्णों घरह्-बार के आप्णी घरवाल़ी के भाऐ-बंईण, के आप्णें माँ-बाबा, के आप्णें नहाँन्ड़िया छुड़ी दिते हले। 30तअ तबे तेसी ऐसी ज़ूगौ दो कंऐ गुणाँ जरूर भेंट्दो, अरह् आँणों वाल़े ज़ूगौ दा तेसी अमर-जीवन भेट्दा।”

आप्णी मऊँत्ती के बारे दी प्रभू यीशू के बरंम्बाणीं

(मत्ती 20:17-19; मरकुस 10:32-34)

31तबे प्रभू यीशू ऐ आप्णे बारंह् खास-चैले आप्णी गईलो नींऐंयों बुलो, के “दे:खो, आँमें यरूशलेम खे ज़ाँदे लागे, अरह् जै-तोड़ी बातो आदमी के बैटे की बारे दी ऋषियों के जाँणें लिखी गंई थी, सेजी बादी बातो ऐबे पुरी हंदी। 32किन्देंखे के तेसी गऐर यहूदी के हाथो दा देंईदा, अरह् से तैसी ठाठै खे कर्ले; अरह् तैस्की बैस्ती कर्ले, अरह् से तैस्दो थुक्ले। 33अरह् से तैस्दे कोड़े मार्लें, अरह् तैसी जीयाँनिऐ माँरी देले, अरह् दाबी देले; परह् से च़ीज़े का ऊँबा जीऊँला।” 34परह् सैजी बातो तिनू खास-चैले के सम्झ दी ने आई; जुण्जी बातो तिन कैई बुली थी; सेजी बादी बातो तिन शी छ़ुप्पी रंई।

शैड़े भीखारी खे चंग्गाऐ दिती

(मत्ती 20:29-34; मरकुस 10:46-52)

35जबे प्रभू यीशू यरीहो नाँव के नंगर के नंजीक पऊँचे, तअ ऐक शैड़ा भीखारी शड़की के कनारे दा बईठा अंदा थिया; अरह् से लोगो कैई शी भीख माँगदा लागी रूवा थिया। 36अरह् तेने लोगो की तियों भीड़ के हाँड्णों का शाद्ह शुँणियों लोगों कैई शा पुछ़्दा लागा; के “ऐजो का हदो लागो?” 37लोगे तैस्खे बुलो, नासरत के “प्रभू यीशू नासरी ज़ाँदे लागे।” 38ऐजो शुँणियों सेजा शैड़ा भीखारी लेल्याऐयों बुल्दा लागा, “हे, प्रभू यीशू राजा दाऊद के अंष्-गड़ी के! मुँह गाशी दया-रंय्म करह्!” 39“जुण्जे लोग आगे-आगे थिऐ, से तैस्खे झीड़किऐ के चुप्पी रंह्; परह् से हजो भे बैगेही लेल्याँदा लागा, हे राजा दाऊद के गड़ी, का मुँह गाशी दया-रंय्म करह्!” 40तबे से खह्ल़ी गुऐ, अरह् ऐजी अज्ञाँ दिती, के ऐसी मुँह कैई आँणों, अरह् जबे सेजा शैड़ा भीखारी तिन के नंजीक आया, तअ प्रभू यीशू ऐ तैछ़ौ पुछो। 41“तू का चाँऐ के हाँव ताँव्खे का करू?” तेने बुलो, हे प्रभू “हाँव दे:ख्णों चहाऊँ!”

42प्रभू यीशू ऐ तैस्खे बुलो, “दे:ख्दा लाग: तेरे बिश्वाषे ताँव भला-चाँग्गा करी दिता।” 43तबे सेजा शैड़ा भीखारी तैख्णी दे:ख्दा लागा, अरह् पंण्मिश्वर के बड़ियाऐं करियों प्रभू यीशू पाछी चाला; अरह् सेजा चंम्त्तकार दे:खियों बादे लोग पंण्मिश्वर के बड़ियाऐं कर्दे लागे।

Currently Selected:

लूका 18: sri

Highlight

Copy