लूका 4

प्रभू यीशू के परख

(मत्ती 4:1-11; मरकुस 1:12-13)

1तबे प्रभू यीशू, पबित्र-आत्त्मा के भरपुरी लई यरदन नंदी शे पाछू आऐ, अरह् च़ाल़ीष देसो तोड़ी जैष्णें तिनू पबित्र-आत्त्मा ऐ चलाऐं तैष्णेंं ही से खाल़ो-नाँल़ो दे फीरे अदें रूऐ। 2अरह् दुष्टो का राजा शैतान तिनू पर्खोंदा रूवा। अरह् तिनू च़ाल़ीष देसो दो प्रभू ऐ किऐ ने खाई, अरह् जबे सेजे च़ाल़ीष देसो बिती गुऐ तबे तिनू किऐ भूख लागी। 3तबे दुष्टो के राजा शैतान ऐ तिनखे बुलो, के “जे तू पंण्मिश्वर का बैटा असो, तअ ईनू पाथरो खे बुल, जू ऐ रोटी बण्ली।” 4प्रभू यीशू ऐ शैतान खे जबाब दिता, के “जे पबित्र-ग्रन्थों दो ऐजो लिखो अंदो असो” के आदमी सिर्फ रोटी लई ही ने जिऊँदा। 5तबे शैतान ऐं प्रभू यीशू आप्णी गईलो ऊगले दे नींऐ अरह् ऐग्ड़िखे तिन कैईं शो बादी संईसारी को राज-पाट दे:खाओ, 6अरह् ऐशो बुलो, हाँव ऐजा हंक अधिकार ताँव खे देऊँबा किन्देंखे के ऐजो बादा सब-कुछ मुँखे देऐ थो; अरह् जैस्खे हाँव देणों चहाऊँबा तैस्खे हाँव देऐ सकू। 7जे तू मुँखे ढाल-अरज करियों मेरी मान्ता करे, तअ ऐजो बादो सब-कुछ हाँव ताँव्खे

देऊँबा। 8तबे प्रभू यीशू ऐ तैस्खे ऐजा जबाब दिता, “के पबित्र-ग्रन्थों दो ऐजो लिखो अंदो असो, के तू आप्णें प्रभू पंण्मिश्वर खे प्रणाँम कर, अरह् सिर्फ तिन्हीं के सेंवा करह्।” 9तबे शैतान ऐं प्रभू यीशू यरूशलेम बईजारंह् की देऊँठी के छापरह् गाशी नींऐं अरह् तिन्खे ऐशो बुलो, “जे तू पंण्मिश्वर का बैटा असो, तअ ईथै शी ऊँदे दे। 10से ईन्देंखे के पबित्र-ग्रन्थों दो लीखो अंदो असो, तुवाँरे बारे दा पंण्मिश्वर आप्णें दूत्तो खे हुक्म देला जू से तुवाँरी रंक्क्षा कर्ले। 11अरह् से ताँव हाथै-हाथ थाग्लै जू तेरी लातो दे पाथरो लह्ई भे ढेस-ठोकर ने लागो।” 12तबे प्रभू यीशू ऐ तैस्खे जबाब दिता, “के ऐजो भे लिखो अंदो असो, के तू आप्णें प्रभू पंण्मिश्वर के परख ने करे।” 13जबे शैतान ऐ तिनू पर्खी पाऐ; तबे से तिन कैई शा ऐग्ड़ी खे आगू हुटा।

प्रभू यीशू ऐ गलील दे सेंवा शुरू करी

(मत्ती 4:12-17; मरकुस 1:14-15)

14तबे प्रभू यीशू पबित्र-आत्त्मा के शक्त्ति लई पाछू गलील ईलाके दे आऐ, अरह् तिन्दे के चर्चा चऊँ ढबे बादे प्रदेशो दे फय्ली। 15प्रभू यीशू लोगो के यहूदी-च़ोंत्रै दे हुटे अरह् तिन कैई बचनों का ब्खाण कर्दे लागे, अरह् प्रभू की बादे झोणें बड़ियाऐं करह् थिऐ, तिन की आच्छ़ी बातो शुणियों।

नासरत नगर दे प्रभू यीशू के बैस्ती

(मत्ती 13:53-58; मरकुस 6:1-6)

16तबे प्रभू यीशू नासरत नगर दे आऐ, जेथै तिन का पाल़्ण-पोष्ण हऐ रूवा थिया; तेथै से बिषाँव के देसे यहूदी-च़ोंत्रै दे पबित्र-ग्रन्थों पढ़दे खल़िऐ। 17अरह् ऋषी-यशायाह का लिखा अंदा सेजा चर्म-पत्र का रोल़ प्रभू यीशू कैई दिया गुवा, अरह् तिन्ऐं चर्म-पत्र को सेजो पाँनों खुलो जिन्दो सेजो लिखों अंदो थियों:

18“प्रभू के आत्त्मा मुँह गाशी असो; इंन्देखे के गरीब कंगाल खे खुषख्बरी का बखाँण कर्णो के ताँईऐं प्रभू ऐ मुँह छाँटी थुवा; अरह् मुँह ईन्देंखे डियाल़ी थुवा, के कय्दी खे मुँक्त्ति, अरह् शैड़े खे नंजर देणों का बखाँण करू, अरह् दबाऐं अंदें छुड़ाऊँ।

19अरह् प्रभू के कृपा कर्णों के सालो का प्रचार बखाँण करू।”

20तबे प्रभू यीशू ऐ सेजा चंर्म-पत्र का रोल़ पाछ़ू मेंठियों तेसी देऊँठी के जगवाल़े के हाथों दा पाछ़ू दिता, अरह् आपु ऊदे बईठे, अरह् तेसी यहूदी-च़ोंत्रै के बादे लोग तिनू दे:ख्दें लागे। 21तबे प्रभू यीशू ऐ तिनखे बुलो, के “ऐजो जू पबित्र-ग्रन्थों दो लिखों अंदो असो, से ऐतलो तुँवारी साम्णिऐं पूरोह् हुओ।” 22बादे लोगे प्रभू के बड़ियाऐं करी, अरह् प्रभू के मुँहों शे कृपामंऐं बचन शुणियों तिनू सोभी के तूरंबाणच़ूंटे, अरह् आपु मुँझी बुल्दे लागे “कियो रें, ऐजा यूसुफ का बैटा आथी ने?” 23तबे प्रभू यीशू ऐ तिनखे बुलो, “तुँऐं मुँखे ऐजा ताँना जरूर मार्दें के ‘हें जड़यारे आगे आपु तअ चाँगा करो! जुण्जो आँमें शुण्णों के कफरनहूम दो तुँऐं का कोरो, सेजो ईथै आप्णें गाँव-नंगर दो भे करह्।’” 24अरह् प्रभू यीशू ऐ बुलो, “हाँव तुँओं खे खास बात बुलू, के कोसी भे (ऋषी) आप्णें गाँव-नंगर दा माँन-समाँन ने भेंट्दा। 25हाँव तुँओं खे खास बात बुलू, के जबे ऋषी-एलिय्याह के ज़ुगौ दो झोड़ पाँणी ने लागी, अरह् जीमी दा ऐक दाँणा ने जाँमी तअ साड़े च़ींन सालो तोड़ी बादे प्रदेश दा भैयानंक काल़ पड़ा, अरह् इस्राएल दे तेसी बख्ते बैजाऐ बिधवा थी। 26प्रभू ऐ ऋषी-एलिय्याह तिन मुझ्षा कोसी भे बिधवा कागी ने डियाल़ी सिर्फ सेदा के सार्फत दा ऐकी बिधवा कागी डेयाल़ा। 27अरह् ऋषी एलीशा के ज़ुगौ दे भे इस्राएल दे बैजाऐ कुढ़ी थिऐ, परह् सीरियावासी नाँमान के सुवाऐ ओके कोसी कोड़ी ने शुद्ध करी।” 28ईनू बातो शुणियों जै-तोड़े आदमी यहूदी-च़ोंत्रै दे थिऐ, सेजे बादे लोग घीपी गुऐ। 29अरह् तेथै बईठे अंदें लोग बिऊँजे अरह् प्रभू यीशू तिनू लोगे नगर शे बाँईडे गाड़े, अरह् जियों धारंह् गाशी सेजा नगर बसा अंदा थिया, तिन्दे की ऊँची टिम्ब्ड़ी गाशी नीईयों से प्रभू यीशु तेथै शे ऊँदे पाँणें चहाँव थिऐ। 30परह् प्रभू यीशू तिनके बिचो शे निक्ल़ी गुऐ, अरह् तेथै शे आगू हुटे।

दुष्टो का भूचा च़ूड़ा अंदा आदमी चाँगा करह्

(मरकुस 1:21-28)

31तबे प्रभू यीशू गलील के कफरनहूम नगर दे हुटे, अरह् बिषाँव के देसे लोगों केंई बचनों का बखाँण कर्दे लागे। 32तेथै के लोग प्रभू यीशू के बचन शुणियों हरान हुऐ, किन्देंखे के तिन के शिक्क्षा बैजाऐ हकों-अधिकार वाल़े थी। 33तेसी चोंत्रै दा ऐक आदमी थिया जैस्दे बिच्की-आत्त्मा थी, से लेरंह् च़िगाटो मारियों बिऊँजा। 34“हे यीशू नासरी अमाँरें तुँओं शो का लणों? कियों तुँऐं आँमों नाँष कर्दें आऐ रूऐ? हाँव तुँओं जाँणूऐं के तुँऐं कुँण असो? तुँऐं पंण्मिश्वर के पबित्र जंण असो!” 35तबे प्रभू यीशू तैस्खे खाशिऐ अरह् बुलो, “चुप्पी रंह् अरह् ऐस्का पीण्डा छुड़ियों निक्ल़ी ज़ा!” तबे सेजी बिच्की-आत्त्मा ऐ सेजा आदमी बिचो ठाँई पट्का, परह् तैस्के किऐ ने गई, अरह् सेजी बिच्की-आत्त्मा तैच़्छी आगू हुटी। 36ईदे गाशी तिनू सोभी के तुर्बाणच़ूटे, अरह् से आपु मुँझी पलियों बोल़दे लागे “ऐजा कुँण ऐ अरह् ऐजा कैष्णा बचन असो? किन्देंखे के ऐ हंक-अधिकार अरह् शक्त्ति लई बिच्की-आत्त्मा खे अज्ञाँ दियों अरह् से आगू हुटो।” 37ऐशी दाईं चऊँ ढबे ढिक्को तिन के चर्चा हंदे लागी।

संत्त-पतरस के शाशू अरह् कऐयों ओके आदमी भे चाँगे करे

(मत्ती 8:14-17; मरकुस 1:29-34)

38प्रभू यीशू यहूदी च़ोंत्रै शे बींऊँजियों शमौन कागी हुटे, शमौन के शाशू दे ठोंह्-ऐकाँन्द्रें लागी रूऐ थिऐ, अरह् लोगे तियाँरी ताँईऐं ढाल-अरज करी। 39तबे प्रभू यीशू तियारें नंजीक खल़िऐं, अरह् तियारा ठोंह्-ऐकाँन्द्रा फिट्कारा अरह् तैख्णी तियाँरा ठोंह्-ऐकाँन्द्रा च़ूटा, अरह् से तैख्णी ऊबे बिऊजियों तिन के सेवा भगत्त कर्दे लागी। 40देसो उछाणों तोड़ी जीन-जीन कागी कुँऐं दु:खिया थिऐ, तिनू लोगे आप्णे कागशे आप्णें बादे दु:खिया प्रभू यीशू कंई लियाऐं, अरह् प्रभू यीशू ऐ तिन गाशी आप्णा हाथ थऐयों बादे लोग च़ाँगे करे। 41अरह् सेजी दुष्ट-आत्त्मा लेल्याँदू अरह् ऐजो बुलियों के “तुँऐं पंण्मिश्वर का बैटा असो” भहुते लोगो शी दुष्ट-आत्त्मा नीकल़ी, परह् प्रभू यीशू तिनू किऐ फिट्को थिऐ, अरह् बुल्णों ने दियों थिऐ, किन्देंखे के सेजी दुष्ट-आत्त्मा जाँणों थी, के ऐजा ही मसीया असो।

यहूदी च़ोंत्रै दा बचनों का बखाँण

(मरकुस 1:35-39)

42अरह् जबे देस हुओं, तबे प्रभू यीशू ऐक शून-शान जागें दे हुटे, तबे लोगो के बादी भिड़ जुंह्दी लागी, अरह् प्रभू कैई हुटे, अरह् तिन्शी बिन्ती कर्दें लागे के तुऐं आँमों छुड़ियों ईथै शे आगु ने ज़ाऐ। 43तबे प्रभू यीशू ऐ तिनू लोगो खे बुलो के “मुँखे ओकी नगर दा भे पंण्मिश्वर के राज्य का बखाँण करणा जरूरी असो, किन्देंखे के मुँह ईन्देखे ही डियाल़ी थुवा।” 44अरह् प्रभू यीशू गलील के यहूदी-च़ोंत्रै दे बचनों का बखाँण कर्दे रूऐ।

Currently Selected:

लूका 4: sri

Highlight

Copy