लूका 5

शुरू के चैले बईदे

(मत्ती 4:18-22; मरकुस 1:16-20)

1ऐक देस जबे लोगो के भीड़ पंण्मिश्वर के बचनों का बखाँण शुण्णो खे प्रभू यीशू गाशी पड़्दे लागी, तअ प्रभू यीशू गन्नेसरत के झीलो की टिराँव्टी दे खह्ल़ी रूऐ थिऐ, तबे ऐशो हईयों, 2के प्रभू यीशू ऐ झीलो के टिराँटी दी दो नाव लागी अंदी दे:खी, अरह् तिनू मछवारे नाव शे ऊँदे धनियों आऐयों आप्णें जाल़ौ धोऐ लुऐ थिऐ। 3तबे प्रभू यीशू ऐकी नाव गाशी हुटे जू शमौन नाँव के आदमी के थै, प्रभू ऐं तेसी शमौन खे बुलो, के ऐजी नाव टिराँव्टी शी पाँडी किऐ दुर्की नींऊँ; तबै प्रभू यीशू तियों नाव गाशी बंऐठियों लोगो खे बचन की शिक्क्षा का बखाँण कर्दे लागे। 4जबे प्रभू यीशू ऐ बचन का बखाँण करी पाया, तबे प्रभू ऐ शमौन खे बुलो, नाव “नींगुऐं दे नींऊँ अरह् माछी थाँह्बड़णों खे आप्णों जाल़ौ का पंणकाव पाऐयों दे:ख।” 5शमौन ऐ प्रभू यीशू खे जबाब दिता, “हे सवामी! आँमें बादी रात्ती जाल़ौ पाऐयों बैजाऐ मेंह्नत्त करी थऐ, परह् अमाँरे हाथै ऐक भे माँछ़ी ने लागी; परह् जबै तुँऐं बुली लो, तअ तुवाँरे कंऐणें गाशी हजो भे जाल़ौ का पंणकाव आगु पाऊँबै।” 6जबे शमौन अरह् तैस्के साथी ऐं तैष्णों ही करो, तअ जाल़ पाँदे ही तिन्को जाल़ माँछ़ी लई ऐत्रों भरियों के सेजो जाल़ फाट्दो लागो। 7तबे तिन्ऐ आप्णे साथियों खे जू ओकी नाव गाशी थिऐ, तिन्खे ईशारा करा के आऐयों अमाँरी मंद्त्त करह्, अरह् तबै तिन्ऐ माछी लई दूईनै नाव ऐत्री भरी के सेजी नाव भे डूब्बदी लागी। भअईती माछी लई नाव डूब्दे लागी 8ऐजो दे:खियों शमौन-पतरस प्रभू यीशू के लातो गाशी पड़ा अरह् बुलो, “हे प्रभू मुँह कैई शे आगू ज़ाव किन्देंखे के हाँव पापी आदमी असो।” 9किन्देंखे के ऐत्री माँछी जाल़ौ दी लागियों थाँह्बड़ी के तैस्के अरह् तैस्के साथियों के तूरंबाणच़ूंटे। 10अरह् तैष्णेंं ही जब्द्दी के बैटे याकूब अरह् यूहन्ना के भे जू शमौन के साथी थिऐ, तिनके भे तुर्बाणच़ूटे, अरह् तबे प्रभू यीशू ऐ शमौन खे बुलो, डरे ने; “मुँह पाछी आओं, तअ हाँव तुँओं आप्णे चैले बंणाँणों वाल़े बाँणूबा।” 11तबे तिन्ऐं आप्णीं नाव झीलो की टिराँव्टी दी आँणी, सब कुछ छुड़ियों प्रभू यीशू पाछी हुटे।

कोढ़ी का कोढ़ झाड़ा

(मत्ती 8:1-4; मरकुस 1:40-45)

12ऐकी बई जबे प्रभू यीशू कोसी नगर दे थिऐ, तबे तिन कैई ऐक आदमी आया। तैस्का बादा देह्-शरीर कोढ़ो लई भरा अंदा अरह् से छुटी-छुटियों पड़ी रूवा थिया; अरह् से प्रभू यीशू दे:खियों तिन के साम्णें लाँम्बा पसरियों तेने तिन्कैई शी आप्णी बिन्त्ती करी, के “हे प्रभू! जे तुऐं चहाँव, तअ मुँह चाँग्गा शुद्ध करी सको।” 13प्रभू यीशू ऐ तैस्दा आप्णा हाथ लाया, अरह् बुलो, “हाँव चहाऊँ, के तू चंग्गा शुद्ध हऐ ज़ाऐं” तैख्णी तैस्का कोढ़ झड़ी गुवा। 14प्रभू यीशू ऐ तैस्खे अज्ञाँ दिती, के ऐजो “कोसी कैई ने बुले; अरह् हेभी ज़ा अरह् आपु याजक कैईं शा दे:खाऊ अरह् आप्णे शुद्ध हणों के बारे दो जू किऐ ऋषी-मूसा ऐ चड़ावा थऐ थुवा, तैसी चढ़ावे के मुँताबिक शो दे, जू सेजी तिन्दे के गुवाह्-शाज़्त हली।” 15परह् तिन्दे के चर्चा तबे भे बादे दे फऐल्दे लागी, अरह् लोगो के बैशुमार बडी भीड़ तिन्कै बचन का बखाँण शुण्दे, अरह् आप्णी बीमारी शी चंग्गाई पाँणों की हिछ़्या शे आँदें लागे। 16परह् प्रभू यीशू तियों लोगो के भीड़ छ़ुड़ियों ज़ई ऐकाँन्त्त दे प्रार्थना करह् थिऐ।

अदरंगो का दु:खिया चाँग्गा करा

(मत्ती 9:1-8; मरकुस 2:1-12)

17ऐक देस ऐशो हईयों, के प्रभू यीशू ऐ शिक्क्षा देऐ लंऐ थी। अरह् यहूदी भाट-बाँम्ण, अरह् यहूदी-निय्म ले शिखाँणों वाल़े, तिनके ही नंजीक बऐठी रूऐ थिऐ; से गलील अरह् यहूदिया के बादे गाँव शे, अरह् यरूशलेम शे आऐ रूऐ थिऐ; अरह् चंग्गाई कर्णो खे प्रभू-पंण्मिश्वर के शक्त्ति तिन की गईलो थी। 18तैख्णी किऐ लोगे ऐक अदरंगो का दु:खिया लोह्थों दा टीपियों आँणा, अरह् सेजे लोग तैसी दु:खिया आदमी भितोर प्रभू यीशू के साम्णें थंहणा चाँव थिऐ। 19परह् जबे भीड़-भड़ाके के कारण तिनू लोगो के सेजा दु:खिया तेथै तिन कैई भिंठा ने नीईयों थिया, तअ तबे तिन्ऐ तेसी घर को छापर ऊपाड़ो जैसी घर दे प्रभू यीशू थिऐ, अरह् सीऊँ लोह्थों आरी सेजा अदरंगो का दु:खिया तिन्ऐं प्रभू यीशु के साम्णें ऊदा लट्काऐयों छुड़ा। 20अरह् प्रभू यीशू ऐ तिन का सेजा बिश्वाष दे:खियों तैसी अदरंगों के दु:खिया खे बुलो, “हे दोस्त्त तेरे पाप माँफ हुऐ।” 21तबे यहूदी-निय्म शिखाँणों वाल़े, अरह् यहूदी भाट-बाँम्ण आपु मुँझी ऐजा बाद-बिबाद कर्दे लागे, के “ऐजा कुँण असो? जू आपु-आप्खे पंण्मिश्वर आरी सनाँईयों? किन्देंखे के पंण्मिश्वर के सुवाँऐं ओका कुँण असो? जू कोसी ओकी के पाप माफ करी सको।” 22प्रभू यीशू ऐ तिनके मंन के बात जाँणियों तिन्खे बुलो, “तुँऐं आप्णे सासो दो का सोच्ची लो? 23कियो ऐजो बुल्णों सुखो असो? के तेरे पाप माँफ हुऐ, ‘बीऊँज अरह् आगू हाँड्दा लाग?’ 24परह् ऐजो ईन्देंखे के तुऐं भे जाँणी पाँव के ‘आदमी के बैटे’ कैई धर्ती गाशी पाप माफ कर्णो का भे हंक-अधिकार असो”; तबे प्रभू यीशू ऐं तैसी अदरंगो के दु:खिया खे बुलो, “मुँऐ ताँव खे बुली लो बीऊँज, अरह् आप्णी लोह्थ टीपियों आप्णे घरे ज़ा।” 25सेजा अदरंगो का दु:खिया तैख्णी लोगो के साम्णें बीऊँजा; अरह् जियों लोह्थो गाशी से पड़ा अंदा थिया, सेजी लोह्थ टीपियों, से पंण्मिश्वर के बड़ियाऐंं कर्दिऐ आप्णे घरे हुटा। अदरंगो का दु:खिया लहोथो मेठियों घरे हुटा 26सोभी के तूरंबाणच़ूंटे, अरह् पंण्मिश्वर के बड़ियाऐंं कर्दें लागे; अरह् बैजाऐ डरियों से बुल्दे लागे, “ऐतलो आँमें ऐजी नोंखी बात दे:खी!”

प्रभू यीशू ऐ लेवी बईदा

(मत्ती 9:9-13; मरकुस 2:13-17)

27तबे प्रभू यीशू बाँईडे हुटे, अरह् तिन्ऐ लेवी नाँव का ऐक चूंगी लअणों वाल़ा, चूंगी की गुम्टी दा बईठा अंदा दे:खा। अरह् तिन्ऐं तैस्खे बुलो, “मुँह पाछ़ी आ!” 28से तैख्णी खड़ा हुवा, अरह् आप्णों सब-कुछ छुड़ियों प्रभू यीशू पाछ़ी चाल्पड़ा। 29तेने लेबी ऐ आप्णे कागी प्रभू यीशू के आदर कर्णों खे ऐक बड़ी पाल़्टी दिती, अरह् तेथै ओके चूंगी लंअणों वाल़े भे बैजाऐ पाऊँणें कंट्ठै हुऐ; तेसी लेवी अरह् प्रभू यीशू आरी खाँणों खाँदे। 30ईन्दें गाशी यहूदी भाट-बाँम्ण अरह् यहूदी-निय्म के शिखाँणों वाल़े लोग, प्रभू यीशू के चैले कैई तुड़-खुड़ाँदे लागे, के “तुँऐं लोग चूंगी लअणों वाल़े; अरह् पापियों की गईलो खाँदे-पींदे कैई धूईयों?” 31प्रभू यीशू ऐ तिनखे जबाब दिता, के “बैद्द-जड़यारे के जरूरत्त आछे-भले आदमी के ने हंदी; परह् दु:खिया बीमार आदमी के जरूर हों, 32हाँव तिनू लोगो की ताँईऐ ने जुण्जै आप्खे धर्मी जाँणो; परह् तिन की ताईऐं जूण्जे आप्खे पापी जाँणों; तिन्कै पाप शा पंसतावा कराऐयों तिन्का मंन बद्ल़ियों तिनू बईद दा आऐ रूवा।”

परार्थना गाशी सवाल

(मत्ती 9:14-17; मरकुस 2:18-22)

33तिन्ऐ प्रभू यीशू खे बुलो, “संत्त-यूहन्ना के चैले तअ बख्तो-बख्तो गाशी बरत कर्दे, अरह् प्रार्थना दे लागे अंदें रंह्; अरह् यहूदी भाट-बाँम्णों के चैले भे तैष्णों ही करह्, परह् तुवाँरे चैले तअ खाँव-पींदें रंह्?” 34प्रभू यीशू ऐ तिनखे बुलो, के “जाँव तोड़ी दूल्हा बरात्ती आरी हों, ताँव तोड़ी कियों तुऐं तिनू बरातू लई बरत कराऐ सको? 35परह् सेजे देसो जरूर आँदे, जिंदा दूल्हा तिनू आरी शा दूरका करा ज़ाला; तबै तिन्दें पाछी से भे जरूर बरत कर्दे।” 36प्रभू यीशू ऐ तिन कैई शो ऐजो अंनाणों भे शुणाँव: के “कुँऐं आदमी नूऐं खोट्णों के टाली चीरियों पुराँणे खोट्णों दे ने लाँदा, ना तअ सेजो नूओं कपड़ा भे फाटी ज़ालो, अरह् सेजी नूऐ टाली पुराँणें दे ढब्दी भे आथी ने। 37अरह् ना कुँऐं नुवाँ अंगूरोह् का दाख्ह् रंस पुराँणी मंष्को दा भर्दा, ना तअ नुवाँ अंगूरोह् का रंस पुराँणी मंष्को फूटाल़ियों ऊँदा ज़ाँदा, अरह् सेजी मंष्क भे खत्त्म हऐ ज़ाँदी। 38परह् नुवाँ अंगूरोह् का दाख्ह् रंस नंई मंष्को दा थंणाँ पड़ला। 39कुँऐं पुराँणा अंगूरोह् का दाख्ह् रंस पींईयों नुवाँ ने चहाँदा। किन्देंखे के से बुलो, के ‘सेजा पुराँणा ही दाख्ह् रंस आछा असो।’”

Currently Selected:

लूका 5: sri

Highlight

Copy