मरकुस 10
10
तलाक-लिख्त्त के बारेदे प्रभू यीशू की शिक्क्षा
(मत्ती 19:1-12; लूका 16:18)
1तबे प्रभू यीशू मसीया तेथै शे बींऊँजियों यहूदिया के सियाने गाशी यरदन नंदी की टीराँव्टी दे आऐ, अरह् लोगो के भीड़ तिन कैई कठी हऐ। अरह् से आप्णें ढंग के मुँताबिक हजो तिनखे शिक्क्षा देंदे लागे। 2यहूदी भाट-बाँम्ण प्रभू यीशू कैई आऐयों, तिनकी परख-अजमाऐष करियों पुछ़दे लागे, “कियों ऐजो यहूदी-निय्म के मुताबिक ऐजो ठीक आथी ने, के मरोद् आप्णी घरवाल़ी शी तलाक-लिख्त्त लों?” 3प्रभू यीशू ऐ तिनखे जबाब दिता, “ऋषी-मूसा ऐ तुँओं खे का अज्ञाँ देऐ थऐ।” 4तिन्ऐ बुलो, “ऋषी-मूसा ऐ तलाक-लिख्त्त बाण्णों खे बुली थो, के तियों खे तलाक-लिख्त्त दिऐ।” 5प्रभू यीशू ऐ तिनखे बुलो, “तुवाँरें सासो के कुठरता अरह् हठाव्णें दिल सुभाव के कारण ऋषी-मूसा ऐ तुँओं खे ऐजी अज्ञाँ दिती। 6परह् संईसारी की रंच्णा के शुरू शो पंणमिश्वर ऐ नंर-नाँरीं करियों बंणाऐ। 7तबे ही आदमी आप्णे माँ-बाबा शे ज़ई आप्णी तिरंई आरी रंह्। 8अरह् से दुईनें ऐक तंन हले, ईन्देंखे से ऐबे दो ने परह् ऐक तंन असो। 9ईन्देंखे जिनू पंणमिश्वर ऐ जूड़ी थुऐं, तिनू कुँऐं भे आदमी ज़ई ने करे।” 10घरे जाऐयों चैले ऐ ईन्दें के बारे दो प्रभू यीशू मसीया शो हजो पुछो। 11प्रभू यीशू मसीया ऐ चैले खे बुलो, “जू कुँऐं आप्णी घरवाल़ी छुड़ियों हजो जाज्ड़ा बाँणों, तअ से तियों आगली तिरोंई आरी चोरी-जारी करह्। 12अरह् जे सेजी घरवाल़ी आप्णा घरवाल़ा छुड़ियों हजो शाऊरे ज़ाली तअ से भे चोरी-जारी करह्।”
नहाँन्ड़िया खे आशिर्बाद
(मत्ती 19:13-15; लूका 18:15-17)
13तबे लोगे आप्णे नहाँन्ड़िया प्रभू यीशू कैई आँणें, के प्रभू आप्णा हाथ ईन गाशी थँऐयों ईनखे आशिर्बाद दियों, परह् चैले तिनू लोग डाँटो-झाड़ो थिऐ। 14प्रभू यीशू ऐ ऐजो दे:खियों, चैले खे घीपियों बुलो, “नहाँन्ड़ियाँ मुँह कैई आँणों दियों, ईनू रूके ने किन्देंखे के पंणमिश्वर को राज्य ऐष्णे को ही असो। 15हाँव तुँओं खे खास बात बुलू, के जू कुँऐं पंणमिश्वर को राज्य नहाँन्ड़िया जेष्णों ने माँन्दा, तअ सेजा आदमी कद्दी भे पंणमिश्वर के राज्य दा ज़ाऐं ने सक्दा।” 16प्रभू यीशू ऐ सेजे नहाँन्ड़िया आप्णी हंगाँल़ीं दे करे, अरह्, तिन गाशी आप्णा हाथ थह्ऐयों तिनखे आशिर्बाद दिता।
सेठ आदमी अरह् अमर हणों
(मत्ती 19:16-30; लूका 18:18-30)
17जबे तेथै शे प्रभू यीशू निक्ल़े, अरह् बाटो पूडे ज़ाँदे लागे, तअ ऐक आदमी आया, अरह् घूडकुँणिऐं तिनके लातो गाशी पड़ियों पुछो, “हे शुद्ध गुरू जी! अमर-जीवन पाणों खे का कर्णो पड़ो?” 18प्रभू यीशू ऐ तेस्खे बुलो, “तू मुँखे शुद्ध कैई बुले? कुँऐ, शुद्ध ने आथी, शुद्ध ऐक असो सिर्फ ‘पंणमिश्वर’। 19तू अज्ञाँ-निय्म तअ जाँणें ऐ, के ‘हंत्त्या ने करे, चोरी-जारी ने करे, चोरी ने करे, झूठी गुवाऐ-शाज़्त ने दिऐ, छल़-कप्ट, ने करे, आप्णी माँ-बाबा के आदर-ईज्जत करे।’” 20तबे तेने प्रभू यीशू मसीया खे बुलो, “हे गुरू जी! ऐजी बादी बातो मुँऐ नहाँन्ड़े शुभी ही शुणी अरह् माँनी थई।” 21प्रभू यीशू ऐ तेसी पियार शा तेसी टक-टकी लाऐयों दे:खा; अरह् तेस्खे बुलो, “ताँव दे ऐक कमी हजो भे असो, ज़ा जू किऐ ताँव कैई असो, तैथू बिकियों गरीब कंगालो खे बाँडी दे, अरह् मुँह पाछी चाल, अरह् ताँव स्वर्गो दो धंन भेंट्दो,” 22ईयों बात शुणियों ही तेसी आदमी के मुँहों दी छाँई ढल़ी; अरह् से तबे तेथै शा मुँढो नाऐंयो आगू हुटा। किन्देंखे के से बैजाऐ सेठ आदमी थिया। 23प्रभू यीशू मसीया ऐ चफेर दे:खियों आप्णे चैले खे बुलो, “सेठो को पंणमिश्वर के राज्य दो ज़ाणों बैजाऐ कठींण असो।” 24चैले के तिनकी बातो शुणियों तूरंबाणच़ूंटे, ईन्दें गाशी प्रभू यीशू ऐ हजो तिनखे बुलो, “हे नहाँन्ड़िया, जुण्जा धंन गाशी भूर्षा करह्, तिनखे पंणमिश्वर के राज्य दो ज़ाणों केष्णों कठीण असो! 25सेठ आदमी को पंणमिश्वर के राज्य दो ज़ाणों ऐत्रो कठीण असो, जेष्णों के ऊँटो को सियोंणी के पाषी दो लिंम्बणों तिन्दे शो असाँन असो!” 26चैले बैजाऐ हरान हऐयों आपु मूँजी बुल्दे लागे, तअ तबे कस्की मुँक्त्ति अरह् कुँण बंची सको। 27प्रभू यीशू ऐ तिनके ढबे दे:खियों बुलो, “आदमी के जाँणे तअ हई ने सक्दो, परह् पंणमिश्वर शो हऐ सको, किन्देंखे के पंणमिश्वर शो सब-कुछ हऐ सको।” 28संत्त-पतरसे प्रभू यीशू खे बुल्दा लागा, “दे:खो आँमें तअ सब-कुछ छुड़ियों तुँओं पाछी चाली रूऐ?” 29प्रभू यीशू ऐ बुलो, “हाँव तुँओं खे खास बात बुलू, ऐशा कुँऐं ने आथी, जेने मेरी ताँईऐं अरह् खुषख्बरी की ताँईऐं घर, के भाऐ, बंईण, के माँ-बाबा के आप्णे बाल-बच्चे अरह् आप्णी बादी पराँपटी-जजाऐत छुड़ियों मुँह पाछी आला। 30तअ ऐबे ऐसी बख्त्ते तेसी षौह् गुणाँ भेंट्दो ने थी, जेष्णों घर-बार, भाऐ-बईण, माँ-बाबा बाल-बच्चे अरह् जजाऐत-पराँपटी अरह् ईयों संईसारी के संतावें का साँम्णा करणा पढ़ला। अरह् तेसी तबे परलोक दा अमर-जीवन भेंट्ला। 31परह् बैजाऐ भहुते लोग जू आगे-आगे असो, से पाछू दाँई रंह्दें, अरह् जुण्जे पाछे असो से आगू दाँई हंदे।”
आप्णी मऊँत्ती अरह् ऊबे जींऊँणों के बारे दे च़ीज़ी बरंम्बाणीं
(मत्ती 20:17-19; लूका 18:31-34)
32प्रभू यीशू यरूशलेम खे ज़ादे लागे, तअ बाटो पूडे प्रभू यीशू चैले शे आगे-आगे थिऐ: चैले हरान थिऐ, अरह् जुण्जे तिनू पाछी थिऐ, से डरी रूऐ थिऐ। तबे प्रभू यीशू ऐ सेजे आप्णे बारंह् चैले ज़ई नींऐं, अरह् तिन कैई सेजी बातो लाई जुण्जी तिनू आरी हंदी थी। 33“दे:खो, आँमें यरूशलेम खे ज़ाँदे लागे, अरह् आदमी का बैटा प्रधान-याजकों अरह् यहूदी भाट-बाँम्ण के हाथे थँम्ब्ड़ाऐ देईदा, अरह् से तेसका नियाँव करियों तेसी मंऊँती की सजा खे अज्ञाँ देंदे, अरह् तेसी गऐर यहूदी के हाथो दा देऐ देंदे। 34से तेसी ठाठे खे कर्ले, तेंस्दो थूक्ले, से तेसी चाँम्बड़े की बैड़ी लई मारले जियों बैड़ी दे कींल लागे अंदे हले, अरह् तेसी जीयाँनिऐं मार्दे, परह् से च़ीज़े का ऊबा जिऊँदा।”
याकूब अरह् यूहन्ना की ढाल-अरज
(मत्ती 20:20-28)
35तबे जब्दी के बैटे याकूब अरह् यूहन्ना ऐ प्रभू यीशू कैई आऐयो बुलो, “हे गुरू जी! आँमें जाँणों के जुण्जो किऐ आँमें तुँओं कैई शो माँगूबे सेजो तुँऐं आँमों खे ऊँडो देंदे।” 36प्रभू यीशू मसीया ऐ तिनखे बुलो, “तुँऐं का चहाँव के हाँव तुँओं खेे देऊँ”? 37तिनू दूई भाईऐं प्रभू यीशू मसीया खे बुलो, “आँमों खे ऐशो दियो, के आँमें तुँवारी गईलो, जबे के तुँऐं आप्णें राज सिंगास्हणों गाशी बड़ियाई आरी बईठो तअ आँमें दुईनें भाऐ तुँओं आरी, ऐक सोऐं ढबे अरह् ओका तुँवारी डेरे ढबे बईठो।” 38प्रभू यीशू ऐ तिनखे बुलो, “तुँऐं ने जाँण्दे के तुँऐं का माँगी लो? सेजा दु:ख का बैलुवा पीं पाँदें, जुण्जा मेरे पींणा, अरह् तुओं दे तेसी नहाँण-नहाँणों के हिम्मत असो, ऐ जुण्जों नहाँण मेरे नहाँणों। 39तिन्ऐ जबाब दिता (जरूर) प्रभू यीशू ऐ तिनखे जबाब दिता, सेजा बैलुवा जू हाँव पीऊँबा सेजा तुऐं भे पी पाँदे, किन्दें खे के तुवाँरो भे तैष्णों ही नहाँण-नुवाँईदो जैष्णों मुँह कैई शो नुहाँईदो। 40परह् कोसी सुऐं ढबे, अरह् डेरे ढबे बईठाल़्णा, मेरे बस दो ने आथी, किन्देंखे के ऐजी जागा तीनिहीं खे असो, जिनखे हीज़को फरमाँव अंदो असो।” 41ऐजो शुणियों प्रभू यीशू के सेजे पाछले दषं चैले के याकूब अरह् यूहन्ना के जिद् लागी। 42तबे प्रभू यीशू ऐ तिनू ओकी आप्णें दष चैले बऐदियों बुलो, “सेजे जुण्जे गऐर यहूदी लोगो मुँझी हाक्म माँने ज़ाँव, से तिनू दबाया करह्, अरह् तिनशे भे बड़े हाक्म तिनू गाशी आप्णा हंक-अधिकार दे:खाऐया करह्। 43परह् तुँओं मुँझी ऐष्णो ने हुओं चेंई, परह् जुण्जा तुँओं मुँझी बड़ो बंण्णों चहाँव, से तुवाँरा आगे दास बंणल़ा। 44अरह् जू कुँऐं तुँओं मुँझी प्रधान बण्णों चहाँव, से आगे तिनका दास-बैठू बंणों। 45किन्देंखे के आदमी का बैटा ईन्देखे ने आऐ रंई, के तेस्की के सेवा कर्ली, परह् से ईन्देंखे आया के जीवन दी आपु ओकी की सेवा भगत्त करला, अरह् भहीते लोगो पाप शे छुड़णों खे आप्णी जीन-पराँण बल़ीदाँण करह्।”
शैड़े बरतिमाई को अनाँणों
(मत्ती 20:29-34; लूका 18:35-43)
46प्रभू यीशू यरीहो दे आऐ, अरह् तिनके चैले भे भहीतें लोगो की भीड़ आरी यरीहो शे नींकल़े, तबे तिमाई का बैटा बरतिमाई ऐक शैड़ा भीखारी शड़की के कनाँरे दा बईठा अंदा थिया। 47जबे तेस कैई ऐजा पता लागा, के सेजा यात्री नासरत का यीशू असो, तअ से लेल्याऐ-लेल्याऐयों बुल्दा लागा, “हे दाऊद की अलाद प्रभू यीशू मसीया मुँह गाशी कृपा दया-रंय्म करह्।” 48तियों लोगो की भीड़ो मुँझ शे कंई लोगे तेसी शैड़े खे अज्ञाँ देऐयों झाड़ा के चुप्पी रंह्; परह् से हजो भे बैगे ही लेल्याँदा लागा के “हे दाऊद की अलाद मुँह गाशी कृपा दया-रंय्म करह्!” 49तबे प्रभू यीशू मसीया खड़े रूऐ, “अरह् बुलो” ऐसी ईथै मुँह कैई आँणों, लोगे तेस्खे बुलो, “आप्णें सासो दे ढेठ-हिम्मत थह्, बिऊँज! तिन्ऐ ताँव बऐदी लुवा।” 50तबे सेजा शैड़ा भीखारी आप्णे खाँद्ड़े फेरकाऐ छुड़ियों शट बिऊँजा, अरह् प्रभू यीशू कैई आया। 51ईन्दें गाशी प्रभू यीशू ऐ तेस्खे बुलो, “तू का चाँऐं, के हाँव ताँव्खे करू?” तेने तिनखे बुलो, “हे गुरू जी! हाँव ऐजो चहाऊँ के हाँव दे:ख्दा लागूँ।” 52प्रभू यीशू ऐ बुलो, “ज़ा, तेरे बिश्वाष ऐ ताँव बंचाऐयों चाँगा करा” अरह् से तैख्णी दे:ख्दा लागा, अरह् से प्रभू यीशू की गईलो हुटा।
Currently Selected:
मरकुस 10: sri
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
