Juan 13

Nakete Jesús jie̱ꞌe̱ꞌ rá te̱e súkuáꞌa re̱ꞌ ráa

1Saájee chi̱ji viko Pascua jee ya̱ jíníꞌ Jesús ya̱ nkenta ki̱vɨ̱ꞌ ya̱ kene re̱ꞌ iniꞌ ñɨ̱vɨ́ yaꞌá kɨ̱ꞌɨ̱nꞌ re̱ꞌ nu̱u̱nꞌ Tátáꞌ re̱ꞌ. Jee ñúnúunꞌ re̱ꞌ rá ñɨvɨ maáréꞌ [ya̱ súkuáꞌa re̱ꞌ ráa] ya̱ nééꞌ iniꞌ ñɨ̱vɨ́, jee ñúnúunꞌ re̱ꞌ ráa ne̱ ki̱vɨ̱ꞌ nu̱u̱nꞌ nɨ́ꞌɨ ntekuꞌ re̱ꞌ iniꞌ ñɨ̱vɨ́ yaꞌá. 2Jee viko Pascua ni kúxíní Jesús jín rá te̱e súkuáꞌa re̱ꞌ ráa, jee ya nchuꞌun kui̱ꞌna̱ꞌ kúñáꞌnú iniꞌ ánímaꞌ Judas ya̱ naku̱ꞌva re̱ꞌ Jesús xi̱ntíín rá te̱e kánéꞌén. Judas kúvi se̱ꞌya Simón Iscariote. 3Jee jíníꞌ Jesús ya̱ máá Tátáꞌ re̱ꞌ Ndiosíꞌ njia̱ꞌa nu̱u̱nꞌ re̱ꞌ nta̱ká ya̱ íyó sáva kɨꞌɨ xi̱ntíín re̱ꞌ. Jee suni jíníꞌ re̱ꞌ ya̱ ne̱ nu̱u̱nꞌ Ndiosíꞌ nkene re̱ꞌ va̱ji re̱ꞌ nu̱u̱nꞌ ñɨ̱vɨ́ yaꞌá jee jíníꞌ re̱ꞌ ya̱ yukuán kɨ̱noꞌonꞌ re̱ꞌ nu̱u̱nꞌ Ndiosíꞌ. 4Jee sáá nkuvi nku̱xíní, jee nna̱kuiñɨꞌ re̱ꞌ, jee nxi̱tá re̱ꞌ saꞌma níji re̱ꞌ, jee nkeꞌen re̱ꞌ ɨɨn saꞌma xínáchi jee niꞌniꞌ re̱ꞌ maa chi̱ji re̱ꞌ. 5Jee kuíre nchuꞌun re̱ꞌ nute iniꞌ ɨɨn ñenkóꞌó, jee nka̱jiéꞌé re̱ꞌ nakete re̱ꞌ jie̱ꞌe̱ꞌ rá te̱e súkuáꞌa re̱ꞌ ráa, jee xínáchi re̱ꞌ jie̱ꞌe̱ꞌ ráa jín saꞌma vá ya̱ núꞌníꞌ chi̱ji re̱ꞌ. 6Jee sáá nkenta re̱ꞌ nu̱u̱nꞌ Simón Pedro, jee nkachiꞌ Pedro nu̱u̱nꞌ re̱ꞌ:

―I̱toꞌoꞌ, ¿á saꞌ maánú nakete jie̱ꞌe̱ꞌ nuꞌuꞌ? ―nkachiꞌ Simón.

7Jee nna̱xiníkó Jesús, jee nkachiꞌ re̱ꞌ nu̱u̱nꞌ‑u:

―Ya̱ sáꞌá ni̱ꞌ vitan jee ntiáꞌan ki̱ku̱ꞌun iniꞌ nú maa vitan. Soo ne̱ kuéé ka̱ꞌ jee ki̱ku̱ꞌun iniꞌ nú maa.

8Soo nkachiꞌ Pedro:

―Ni nsáꞌ nakete kuitɨꞌ nú jie̱ꞌe̱ꞌ ni̱ꞌ ―nkachiꞌ re̱ꞌ.

Jee nna̱xiníkó Jesús nu̱u̱nꞌ re̱ꞌ:

―Retú nsáꞌ nakete ni̱ꞌ noꞌó, nsáꞌ koo nú jín ni̱ꞌ.

9Jee nkachiꞌ Simón Pedro nu̱u̱nꞌ re̱ꞌ:

―I̱toꞌoꞌ, retú sukuán jee nsú kua̱chi kuitɨꞌ rá jie̱ꞌe̱ꞌ ni̱ꞌ ni nakete nú, chisaꞌ suni rá naꞌá ni̱ꞌ jín xi̱ni̱ꞌ ni̱ꞌ ranika̱ꞌ ―nkachiꞌ re̱ꞌ.

10Soo nkachiꞌ Jesús nu̱u̱nꞌ re̱ꞌ:

―Retú ɨɨn ñɨvɨ ya̱ ya nichi‑i, jee ntu̱ví jíniñúꞌún‑u ya̱ nakete‑e maáa, chisaꞌ kua̱chi jie̱ꞌe̱ꞌ re̱ꞌ ni, chi ya̱ íyó noo kua̱íyó ñɨvɨ vá. Jee ránoꞌó chi ya̱ íyó noo ánímaꞌ rán, sú nsáꞌ ntáká kuitɨꞌ rán íyó noo.

11Nkachiꞌ Jesús sukuán chi jie̱ꞌe̱ꞌ ni ka̱ꞌ ya̱ jíníꞌ re̱ꞌ né ɨɨn ráa vá naku̱ꞌva‑a maáréꞌ nu̱u̱nꞌ rá te̱e kánéꞌén. Saáva nkachiꞌ re̱ꞌ ya̱: “Sú nsáꞌ ntáká kuitɨꞌ rán íyó noo.”

12Jee sáá nnɨꞌɨ nkuvi nna̱kete re̱ꞌ jie̱ꞌe̱ꞌ ráa, jee nna̱keꞌen tuku re̱ꞌ saꞌma níji re̱ꞌ nna̱kuniji re̱ꞌ maa, jee nna̱kuneeꞌ tuku re̱ꞌ yuꞌú mesa, jee nkachiꞌ re̱ꞌ nu̱u̱nꞌ ráa:

―¿Á jiáku̱ꞌun iniꞌ rán tiñu ya̱ nsa̱ꞌá ni̱ꞌ jín rán sukuán? 13Chi ránoꞌó jee káchíꞌ rán ya̱ Mestrúꞌ jín I̱toꞌoꞌ kúvi ni̱ꞌ. Soo va̱tu̱ni káchíꞌ nijia rán maa, chi maáníꞌ kúvi nijia sukuán. 14Chi retú nuꞌuꞌ, ya̱ kúvi ni̱ꞌ I̱toꞌoꞌ rán, jín ya̱ kúvi ni̱ꞌ Mestrúꞌ rán, jee nna̱kete ni̱ꞌ jie̱ꞌe̱ꞌ rán. Jee suni sukuán íyó nakete rán jie̱ꞌe̱ꞌ ɨɨn inka táꞌán rán. 15Chi ɨɨn ichi kúvi ya̱ ntaji ni̱ꞌ nu̱u̱nꞌ rán, sáva kuéntáꞌ kua̱ꞌ nchi̱neí ni̱ꞌ ránoꞌó sukuán kuéntáꞌ musúꞌ, jee suni sukuán chineí rán jín rá táꞌán rán kuéntáꞌ musúꞌ. 16Máá nááꞌ vá káchíꞌ ni̱ꞌ nu̱u̱nꞌ rán ya̱ ɨɨn ya̱ kúvi musúꞌ ntu̱ví kúñáꞌnú‑u ka̱ꞌ nu̱u̱nꞌ ñɨvɨ ya̱ kúvi i̱toꞌoꞌ‑o. Jee ñɨvɨ ya̱ jíka jín tiñu sáꞌá re̱ꞌ ya̱ njia̱ꞌa inka ñɨvɨ tiñu vá nu̱u̱nꞌ re̱ꞌ, jee ntu̱ví kúñáꞌnú ka̱ꞌ ñɨvɨ vá nu̱u̱nꞌ ñɨvɨ ya̱ nchu̱ichí‑i maa jín tiñu vá. 17Retú jiáku̱ꞌun iniꞌ rán rá tu̱ꞌun yaꞌá, jee na̱ ka̱ꞌ va̱ꞌa ka̱ꞌ kúvi rán retú sikúnkuvi rán maa.

18’Nsú jie̱ꞌe̱ꞌ ntáká rán káꞌánꞌ ni̱ꞌ. Chi jíníꞌ ni̱ꞌ né ɨɨn ví ránoꞌó ya̱ nka̱ji ni̱ꞌ. Soo sáva sikúnkuvi rá tu̱ꞌun ya̱ nééꞌ nu̱u̱nꞌ Tutuꞌ níso Tu̱ꞌun Ndiosíꞌ ya̱ káꞌánꞌ‑a jie̱ꞌe̱ꞌ nuꞌuꞌ, jee káchíꞌ‑i:

Te̱e ya̱ yájíꞌ nkáá jín nuꞌuꞌ,

jee nkenta re̱ꞌ si̱kɨ̱ꞌ ni̱ꞌ,

káchíꞌ nu̱u̱nꞌ Tutuꞌ. 19Jee ne̱ vitan jee ya̱ káchíꞌ ya̱chi̱ꞌ ni̱ꞌ na̱ kúvi ya̱ kuvi sú ne̱ ntiáꞌan ka̱ꞌ kuvi‑i, sáva sáá kuvi rá tu̱ꞌun nkachiꞌ ni̱ꞌ yaꞌá, jee i̱nu̱ꞌ iniꞌ rán ya̱ Nuꞌuꞌ Ví ya̱ íyó nɨ́ɨ́nkání. #13:19 Tu̱ꞌun yaꞌá ví Nuꞌuꞌ Ví‑i. Ɨɨn súví máá ñáꞌnú ka̱ꞌ Ndiosíꞌ kúvi Nuꞌuꞌ Ví‑i. 20Máá nááꞌ vá káchíꞌ ni̱ꞌ nu̱u̱nꞌ rán: néni ɨɨn ñɨvɨ ya̱ íyó maniꞌ iniꞌ‑i nákuatáꞌví‑i ñɨvɨ ya̱ chuichí ni̱ꞌ jee íyó maniꞌ iniꞌ‑i nákuatáꞌví‑i nuꞌuꞌ ranika̱ꞌ. Jee ñɨvɨ vá ya̱ íyó maniꞌ iniꞌ‑i nákuatáꞌví nuꞌuꞌ, jee suni íyó maniꞌ iniꞌ‑i nákuatáꞌví‑i ne̱ Ndiosíꞌ ranika̱ꞌ ya̱ nchu̱ichí re̱ꞌ nuꞌuꞌ va̱ji ni̱ꞌ.

Káchítu̱ꞌún Jesús ya̱ Judas naku̱ꞌva‑a re̱ꞌ

(Mateo 26:20-25; Marcos 14:17-21; Lucas 22:21-23)

21Jee sáá nkuvi nkachiꞌ Jesús rá tu̱ꞌun yaꞌá, jee nnu̱kuéká nasɨ́kuitɨꞌ iniꞌ ánímaꞌ re̱ꞌ jee njia̱ꞌa re̱ꞌ ya̱ naáꞌ jee nkachiꞌ re̱ꞌ:

―Máá nááꞌ vá káchíꞌ ni̱ꞌ nu̱u̱nꞌ rán ya̱ ɨɨn ránoꞌó naku̱ꞌva‑a nuꞌuꞌ nu̱u̱nꞌ rá te̱e kua̱chi ―nkachiꞌ Jesús.

22Saájee rá te̱e súkuáꞌa re̱ꞌ ráa nna̱kune̱ꞌyá ráa nu̱u̱nꞌ ɨɨn inka táꞌán ráa, jee nku̱naan nku̱suꞌva iniꞌ ráa ntu nkútúníꞌ iniꞌ ráa jie̱ꞌe̱ꞌ né ɨɨn ráa vá nkachiꞌ re̱ꞌ. 23Jee ɨɨn rá te̱e súkuáꞌa re̱ꞌ ráa, ya̱ ñúnúunꞌ víꞌí re̱ꞌ, ya̱ nééꞌ‑e xiín re̱ꞌ yuꞌú mesa nu̱u̱nꞌ kúxíní ráa. 24Jee Simón Pedro nsa̱ꞌá re̱ꞌ seña jín xi̱ni̱ꞌ re̱ꞌ nu̱u̱nꞌ te̱e yaꞌá, sáva katu̱ꞌún‑u Jesús né ɨɨn ráa xí xi̱ni̱ꞌ vá nkaꞌanꞌ re̱ꞌ. 25Saájee nsa̱ꞌá xiín te̱e vá maáa nu̱u̱nꞌ Jesús, jee nkachiꞌ‑i:

―I̱toꞌoꞌ, ¿né ɨɨn ví‑i? ―nkachiꞌ‑i.

26Saájee nna̱xiníkó Jesús:

―Te̱e ya̱ ku̱ꞌva ni̱ꞌ nu̱u̱nꞌ re̱ꞌ ɨɨn yuꞌú i̱xta̱tíláꞌ ya̱ chu̱náji ni̱ꞌ, jee te̱e yukuán kúvi‑i ―nkachiꞌ Jesús.

Jee nchu̱náji re̱ꞌ i̱xta̱tíláꞌ vá jee njia̱ꞌa re̱ꞌ maa nu̱u̱nꞌ Judas, se̱ꞌya Simón Iscariote. 27Jee sáá nkuvi ntɨɨn Judas i̱xta̱tíláꞌ vá, jee ntañúꞌún kuitɨꞌ nki̱vɨ Satanás, ya̱ kúvi ta̱chi̱ꞌ kíni kúñáꞌnú, iniꞌ Judas. Saájee nkachiꞌ Jesús nu̱u̱nꞌ Judas:

―Tiñu saꞌá nú, jee ñamani saꞌá maa.

28Soo ni ɨɨn ráa ya̱ nééꞌ yuꞌú mesa, ni ntu̱ví ñáku̱ꞌun iniꞌ ráa na̱ jie̱ꞌe̱ꞌ chi nkachiꞌ re̱ꞌ sukuán nu̱u̱nꞌ Judas. 29Chi sava ráa nkaꞌvi iniꞌ ráa ya̱ nkachiꞌ Jesús sukuán, chi Judas kúvi te̱e ya̱ nééꞌ si̱kɨ̱ꞌ re̱ꞌ ya̱ kúmí váꞌa re̱ꞌ ñunu xu̱ꞌún ráa, jee saáva nkaꞌvi iniꞌ ráa ya̱ nkachiꞌ Jesús ya̱ kikeꞌen‑e nantíñú ya̱ jíniñúꞌún ráa ki̱vɨ̱ꞌ viko, áxí ya̱ ku̱ꞌva‑a ntíꞌ xu̱ꞌún nu̱u̱nꞌ rá ñɨvɨ láꞌví. 30Jee sáá nkuvi ntɨɨn Judas nyajiꞌ re̱ꞌ ɨɨn yuꞌú i̱xta̱tíláꞌ vá, jee kuíre nkene re̱ꞌ kua̱ꞌa̱nꞌ re̱ꞌ. Jee yankuaaꞌ ví‑i.

Tu̱ꞌun nta̱túníꞌ jiáá Jesús

31Jee sáá nkene Judas kua̱ꞌa̱nꞌ re̱ꞌ, jee nkachiꞌ Jesús:

―Nuꞌuꞌ, ya̱ nta̱jí Ndiosíꞌ nu̱u̱nꞌ ñɨ̱vɨ́ sáva kuvi ni̱ꞌ Se̱ꞌya Ñɨvɨ, jee vitan jee ya̱ túvi nijinꞌ nu̱u̱nꞌ rá ñɨvɨ na̱sa kúñáꞌnú nasɨ́kuitɨꞌ ni̱ꞌ jín tiñu níso ni̱ꞌ, jee túvi ya̱ kúñáꞌnú nasɨ́kuitɨꞌ ka̱ꞌ Ndiosíꞌ jie̱ꞌe̱ꞌ tiñu saꞌá ni̱ꞌ. 32Retú nuꞌuꞌ stúvi ni̱ꞌ na̱sa kúñáꞌnú nasɨ́kuitɨꞌ Ndiosíꞌ, máá Ndiosíꞌ stúvi na̱sa kúñáꞌnú nuꞌuꞌ, jee ya̱chi̱ꞌ ni stúvi re̱ꞌ maa.

33’Ránoꞌó, ya̱ kúvi kuéntáꞌ se̱ꞌya ni̱ꞌ, vitan jee yakuꞌ ni tiempúꞌ ka̱ꞌ íyó kuneeꞌ ni̱ꞌ jín ránoꞌó. Jee kuíre nanukú rán nuꞌuꞌ, soo kuéntáꞌ ya̱ nkachiꞌ ni̱ꞌ nu̱u̱nꞌ rá te̱e kúñáꞌnú nu̱u̱nꞌ ñɨvɨ Israel, jee suni sukuán káchíꞌ ni̱ꞌ nu̱u̱nꞌ rán vitan ya̱: Nu̱u̱nꞌ kɨ̱ꞌɨ̱nꞌ ni̱ꞌ, jee nkúvi kɨ̱ꞌɨ̱nꞌ rán.

34’Jee vitan jee taji ni̱ꞌ ɨɨn tu̱ꞌun jiáá ya̱ tátúníꞌ ni̱ꞌ nu̱u̱nꞌ rán, ya̱ kunu̱u̱nꞌ rán ɨɨn inka rá táꞌán rán. Kuéntáꞌ ñúnúunꞌ ni̱ꞌ ránoꞌó, jee suni sukuán kunu̱u̱nꞌ rán ɨɨn inka táꞌán rán. 35Chi retú nu̱u̱nꞌ viiꞌ ñúnúunꞌ rán ɨɨn inka táꞌán rán, yukuán jee kuniꞌ ntáká rá ñɨvɨ ya̱ maárán kúvi te̱e súkuáꞌa ni̱ꞌ ―nkachiꞌ Jesús.

Stékútu̱ꞌún Jesús ya̱ kachiꞌ Pedro ya̱ ntu̱ví jíníꞌ‑i re̱ꞌ

(Mateo 26:31-35; Marcos 14:27-31; Lucas 22:31-34)

36Jee nkachiꞌ Simón Pedro nu̱u̱nꞌ Jesús:

―I̱toꞌoꞌ, ¿né núꞌ kɨ̱ꞌɨ̱nꞌ nú?

Jee nna̱xiníkó Jesús:

―Nu̱u̱nꞌ kɨ̱ꞌɨ̱nꞌ ni̱ꞌ, jee nkúvi kunikɨnꞌ nú nuꞌuꞌ ntañúꞌún. Soo ne̱ kuéé ka̱ꞌ jee kunikɨnꞌ nú nuꞌuꞌ ―nkachiꞌ Jesús.

37Jee nkachiꞌ Pedro nu̱u̱nꞌ re̱ꞌ:

―I̱toꞌoꞌ, ¿na̱ kuvi chi ntu kúvi kunikɨnꞌ ni̱ꞌ noꞌó ntañúꞌún? Chi íyó túꞌva ni̱ꞌ súka̱ꞌ kuviꞌ ni̱ꞌ jie̱ꞌe̱ꞌ nú ―nkachiꞌ Pedro.

38Jee nna̱xiníkó Jesús:

―¿Á nijia nú ya̱ íyó túꞌva nú kuviꞌ nú jie̱ꞌe̱ꞌ nuꞌuꞌ? Chi máá naáꞌ vá káchíꞌ ni̱ꞌ nu̱u̱nꞌ nú ya̱ ne̱ ntiáꞌan ka̱ꞌ kana stóꞌo jee u̱ni̱ꞌ íchí kachiꞌ nú ya̱ ntu jíníꞌ nú nuꞌuꞌ ―nkachiꞌ Jesús.

Currently Selected:

Juan 13: meh

Highlight

Copy