Juan 14

Jesús kúvi kuéntáꞌ ɨɨn ichi nu̱u̱nꞌ kɨ̱ꞌɨ̱nꞌ‑ó jee kenta‑ó nu̱u̱nꞌ Tátáꞌ re̱ꞌ Ndiosíꞌ

1Jee nkachiꞌ tuku ka̱ꞌ Jesús:

―Koto nániꞌvɨꞌ iniꞌ ánímaꞌ rán, chisaꞌ ya̱ ya kúneí iniꞌ rán Ndiosíꞌ jee suni íyó kuneí iniꞌ rán nuꞌuꞌ. 2Chi nu̱u̱nꞌ nééꞌ Tátáꞌ ni̱ꞌ jee íyó kue̱ꞌe̱ꞌ víꞌí nu̱u̱nꞌ íyó kuneeꞌ ñɨvɨ. Jee retánꞌ ntu̱ví íyó, jee nsáꞌ kachiꞌ ni̱ꞌ maa sukuán nu̱u̱nꞌ rán. Jee saáva kɨ̱ꞌɨ̱nꞌ ni̱ꞌ saꞌá túꞌva ni̱ꞌ nu̱u̱nꞌ kuneeꞌ rán. 3Jee sáá kɨ̱ꞌɨ̱nꞌ ni̱ꞌ jee saꞌá túꞌva ni̱ꞌ nu̱u̱nꞌ kuneeꞌ rán, jee kiji tuku ni̱ꞌ, jee kinake̱ꞌen ni̱ꞌ ránoꞌó, sáva suni kuneeꞌ rán nu̱u̱nꞌ kuneeꞌ ni̱ꞌ. 4Jee ya̱ jíníꞌ rán ne̱ nu̱u̱nꞌ kɨ̱ꞌɨ̱nꞌ ni̱ꞌ, jee suni ya̱ jíníꞌ rán ichi kua̱ꞌa̱nꞌ yukuán ―nkachiꞌ Jesús.

5Saájee nkachiꞌ Tomás nu̱u̱nꞌ re̱ꞌ:

―I̱toꞌoꞌ, ntu̱ví jíníꞌ rán ne̱ nu̱u̱nꞌ kɨ̱ꞌɨ̱nꞌ nú jee, ¿na̱sa kúvi kuniꞌ rán ichi vá rúja? ―nkachiꞌ‑i.

6Jee nkachiꞌ Jesús nu̱u̱nꞌ‑u:

―Nuꞌuꞌ kúvi ni̱ꞌ ichi ya̱ nátuꞌva ñɨvɨ nu̱u̱nꞌ Ndiosíꞌ, jín nu̱u̱nꞌ nuꞌuꞌ va̱ji ya̱ naáꞌ, jín maáníꞌ ví ya̱ sáꞌá‑a ya̱ kutekuꞌ ñɨvɨ jín Ndiosíꞌ nɨ́ɨ́nkání. Ntu íyó inka ka̱ꞌ ichi ya̱ kenta ñɨvɨ nu̱u̱nꞌ Tátáꞌ ni̱ꞌ Ndiosíꞌ, chi métúꞌún nuꞌuꞌ ví‑i ya̱ sáꞌá ya̱ nkénta ñɨvɨ nu̱u̱nꞌ Ndiosíꞌ. 7Retú jíníꞌ rán iniꞌ nuꞌuꞌ, jee suni ya̱ niniꞌ rán iniꞌ Tátáꞌ ni̱ꞌ. Jee ne̱ vitan jee ya jíníꞌ rán iniꞌ re̱ꞌ jee ya néꞌyá rán maa.

8Jee nkachiꞌ Felipe:

―I̱toꞌoꞌ, xinéꞌénꞌ Tátáꞌ nú nu̱u̱nꞌ ránuꞌuꞌ, jee jia̱ꞌa iniꞌ ránꞌ ―nkachiꞌ re̱ꞌ.

9Jee nkachiꞌ Jesús nu̱u̱nꞌ re̱ꞌ:

―Ya nku̱kueꞌeꞌ víꞌí tiempúꞌ ya̱ nééꞌ ni̱ꞌ jín rán ví, Felipe, jee, ¿á ni ntiáꞌan kuniꞌ nú né ɨɨn kúvi nuꞌuꞌ résa? Chi ɨɨn ya̱ niniꞌ‑i nuꞌuꞌ, jee suni ya̱ niniꞌ‑i Tátáꞌ ni̱ꞌ. Saájee, ¿na̱ kuvi chi kachiꞌ nú ya̱: “Xinéꞌénꞌ Tátáꞌ nú nu̱u̱nꞌ ránuꞌuꞌ”, résa? 10¿Á ntu̱ví jínúꞌ iniꞌ nú ya̱ yɨ́ꞌɨ́ Tátáꞌ ni̱ꞌ iniꞌ ni̱ꞌ jín ya̱ yɨ́ꞌɨ́ ni̱ꞌ iniꞌ Tátáꞌ ni̱ꞌ résa? Chi ntáká rá tu̱ꞌun ya̱ káchíꞌ ni̱ꞌ nu̱u̱nꞌ rán, jee nsú rá tu̱ꞌun ya̱ jiáni xi̱ni̱ꞌ maáníꞌ kúvi ya̱ káchíꞌ ni̱ꞌ. Chisaꞌ jie̱ꞌe̱ꞌ ni ka̱ꞌ ya̱ yɨ́ꞌɨ́ Tátáꞌ ni̱ꞌ iniꞌ ni̱ꞌ, jee saáva maáréꞌ sáꞌá ntáká tiñu ya̱ sáꞌá nuꞌuꞌ. 11Íyó i̱nu̱ꞌ iniꞌ rán nuꞌuꞌ ya̱ yɨ́ꞌɨ́ ni̱ꞌ iniꞌ Tátáꞌ ni̱ꞌ, jín ya̱ yɨ́ꞌɨ́ Tátáꞌ ni̱ꞌ iniꞌ ni̱ꞌ. Jee retú ntu̱ví jínúꞌ iniꞌ rán ya̱ káchíꞌ ni̱ꞌ, íyó ji̱nu̱ꞌ iniꞌ rán jie̱ꞌe̱ꞌ rá tiñu ya̱ sáꞌá ni̱ꞌ. 12Jee máá naáꞌ vá káchíꞌ ni̱ꞌ nu̱u̱nꞌ rán: Ɨɨn ñɨvɨ ya̱ kúneí iniꞌ‑i nuꞌuꞌ, jee rá tiñu ya̱ sáꞌá nuꞌuꞌ, jee suni saꞌá‑a rá tiñu vá. Jee saꞌ víꞌí káꞌ saꞌá‑a tiñu ñáꞌnú ka̱ꞌ nsú káꞌ tiñu yaꞌá, chi nuꞌuꞌ jee kɨ̱ꞌɨ̱nꞌ noꞌonꞌ ni̱ꞌ nu̱u̱nꞌ Tátáꞌ ni̱ꞌ. 13Jee néni ɨɨn ya̱ ka̱ka̱nꞌ rán nu̱u̱nꞌ Tátáꞌ ni̱ꞌ nu̱u̱nꞌ súví nuꞌuꞌ jie̱ꞌe̱ꞌ yɨ́ꞌɨ́ rán nu̱u̱nꞌ ni̱ꞌ, jee saꞌá ni̱ꞌ maa, sáva stúvi ni̱ꞌ ya̱ máá kúñáꞌnú nasɨ́kuitɨꞌ kúvi Tátáꞌ ni̱ꞌ jie̱ꞌe̱ꞌ ya̱ sáꞌá ni̱ꞌ. 14Retú ná kúvi ya̱ ka̱ka̱nꞌ rán nu̱u̱nꞌ Tátáꞌ ni̱ꞌ nu̱u̱nꞌ súví nuꞌuꞌ jie̱ꞌe̱ꞌ yɨ́ꞌɨ́ rán nu̱u̱nꞌ ni̱ꞌ, jee saꞌá ni̱ꞌ maa.

Chísóyuꞌú Jesús ya̱ chuichí re̱ꞌ Ta̱chi̱ꞌ Ííꞌ kiji‑i

15’Retú ñúnúunꞌ rán nuꞌuꞌ, jee kaníjiá rán sikúnkuvi rán rá tu̱ꞌun ya̱ nta̱túníꞌ ni̱ꞌ nu̱u̱nꞌ rán. 16Jee nuꞌuꞌ, jee ka̱ka̱nꞌ táꞌvíꞌ ni̱ꞌ nu̱u̱nꞌ Tátáꞌ ni̱ꞌ, jee chuichí re̱ꞌ ɨɨn ya̱ chineí chituvi‑i nachuꞌun neí‑i iniꞌ ránoꞌó, sáva koo‑o jín rán nɨ́ɨ́nkání. 17Máá Ta̱chi̱ꞌ Ííꞌ Ndiosíꞌ ví ya̱ chuichí re̱ꞌ, jee xínéꞌénꞌ‑e ya̱ naáꞌ jie̱ꞌe̱ꞌ Ndiosíꞌ. Jee rá ñɨvɨ ñɨ̱vɨ́ yaꞌá ya̱ ntu yɨ́ꞌɨ́ ráa nu̱u̱nꞌ Ndiosíꞌ, jee ntu̱ví kúvi ni̱ꞌi̱nꞌ ráa maa, chi ntu̱ví néꞌyá nijinꞌ ráa maa, jee ni ntu̱ví jíníꞌ ráa iniꞌ‑i. Soo ránoꞌó chi ya̱ jíníꞌ rán iniꞌ‑i chi ya̱ íyó‑o jín rán jee kɨꞌɨ‑ɨ iniꞌ rán.

18’Jee ni nsáꞌ xinóo métúꞌún ni ránoꞌó kuéntáꞌ rá ñɨvɨ kínóo láꞌví, chi niji ni̱ꞌ nu̱u̱nꞌ rán. 19Yakuꞌ ni ka̱ꞌ ki̱vɨ̱ꞌ jee nku̱níꞌ ka̱ꞌ rá ñɨvɨ ñɨ̱vɨ́ yaꞌá nuꞌuꞌ, soo ránoꞌó chi kuniꞌ rán nuꞌuꞌ. Chi jie̱ꞌe̱ꞌ tékúꞌ ni̱ꞌ nɨ́ɨ́nkání, jee saáva suni sukuán ránoꞌó ranika̱ꞌ kutekuꞌ rán nɨ́ɨ́nkání jín ni̱ꞌ. 20Jee ki̱vɨ̱ꞌ yukuán jee kuniꞌ rán ya̱ yɨ́ꞌɨ́ ni̱ꞌ iniꞌ Tátáꞌ ni̱ꞌ jín ya̱ yɨ́ꞌɨ́ rán nu̱u̱nꞌ ni̱ꞌ, jín ya̱ yɨ́ꞌɨ́ ni̱ꞌ iniꞌ ránoꞌó. 21Chi néni ɨɨn ñɨvɨ ya̱ ñúꞌún iniꞌ‑i tu̱ꞌun ya̱ nta̱túníꞌ ni̱ꞌ jee sikúnkuvi‑i vá, jee ñɨvɨ yukuán ví ya̱ ñúnúunꞌ‑u nuꞌuꞌ, jee kunu̱u̱nꞌ Tátáꞌ ni̱ꞌ maa, jee nuꞌuꞌ kunu̱u̱nꞌ ni̱ꞌ maa, jee stúvi ni̱ꞌ na̱sa iniꞌ ni̱ꞌ nu̱u̱nꞌ ñɨvɨ vá ―nkachiꞌ Jesús.

22Jee nkaꞌanꞌ Judas, ya̱ ntu kúvi Iscariote, jee nkachiꞌ‑i nu̱u̱nꞌ re̱ꞌ:

―I̱toꞌoꞌ, ¿na̱ jie̱ꞌe̱ꞌ chi nu̱u̱nꞌ ránꞌ stúvi nú maánú jee ntu nu̱u̱nꞌ rá ñɨvɨ ñɨ̱vɨ́? ―nkachiꞌ‑i.

23Jee nna̱xiníkó Jesús, jee nkachiꞌ re̱ꞌ nu̱u̱nꞌ‑u:

―Ɨɨn ñɨvɨ ya̱ ñúnúunꞌ‑u nuꞌuꞌ, jee sikúnkuvi‑i tu̱ꞌun ni̱ꞌ, jee kunu̱u̱nꞌ Tátáꞌ ni̱ꞌ maa, jee ni núvíꞌ ni̱ꞌ jín Tátáꞌ ni̱ꞌ kiji ránꞌ nu̱u̱nꞌ ñɨvɨ vá, jee koo ránꞌ jín‑i. 24Jee ɨɨn ñɨvɨ ya̱ ntu̱ví ñúnúunꞌ‑u nuꞌuꞌ, jee ni ntu̱ví síkúnkuvi‑i tu̱ꞌun ni̱ꞌ. Jee rá tu̱ꞌun ya̱ tésóꞌo rán ya̱ káchíꞌ ni̱ꞌ, jee nsú tu̱ꞌun maáníꞌ kúvi‑i, chisaꞌ tu̱ꞌun maá Tátáꞌ ni̱ꞌ ya̱ nchu̱ichí re̱ꞌ nuꞌuꞌ kúvi rá tu̱ꞌun ya̱ káchíꞌ ni̱ꞌ.

25’Jee nkachiꞌ ni̱ꞌ rá tu̱ꞌun yaꞌá nu̱u̱nꞌ rán ni nééꞌ ni̱ꞌ jín rán. 26Soo nu̱u̱nꞌ súví nuꞌuꞌ chuichí Tátáꞌ ni̱ꞌ Ta̱chi̱ꞌ Ííꞌ re̱ꞌ kiji‑i ya̱ maáa ví ya̱ chineí chituvi‑i nachuꞌun neí‑i iniꞌ ránoꞌó. Jee maáa vá xinéꞌénꞌ‑e ránoꞌó jie̱ꞌe̱ꞌ ntáká tu̱ꞌun ni̱ꞌ jee xinákúꞌun‑u iniꞌ rán ntáká tu̱ꞌun ni̱ꞌ ya̱ nkachiꞌ ni̱ꞌ nu̱u̱nꞌ rán.

27’Xinóo ni̱ꞌ ránoꞌó jee kɨ̱ꞌɨ̱nꞌ ni̱ꞌ, soo ne̱ va̱ꞌa koo iniꞌ rán kino̱o rán saꞌá ni̱ꞌ. Sáꞌá ni̱ꞌ ya̱ ne̱ va̱ꞌa kino̱o ánímaꞌ ránoꞌó kuéntáꞌ kúváꞌa iniꞌ ánímaꞌ ni̱ꞌ. Chi ntu nuún nótaꞌan sáꞌá ni̱ꞌ kuéntáꞌ kua̱ꞌ sáꞌá rá ñɨvɨ ñɨ̱vɨ́ yaꞌá ya̱ ntu yɨ́ꞌɨ́ ráa xi̱ntíín Ndiosíꞌ, chi ntu sáꞌá ráa ya̱ ne̱ va̱ꞌa koo iniꞌ rán kuéntáꞌ sáꞌá ni̱ꞌ. Saáva koto nániꞌvɨꞌ iniꞌ ánímaꞌ rán ni koto yúꞌví rán.

28’Ya nteso̱ꞌo rán ya̱ nkachiꞌ ni̱ꞌ nu̱u̱nꞌ rán: “Kɨ̱ꞌɨ̱nꞌ ni̱ꞌ, jee niji ni̱ꞌ nu̱u̱nꞌ rán.” Jee retú ñúnúunꞌ rán nuꞌuꞌ, yukuán re íyó tu̱ꞌun kusɨ̱ɨ̱ꞌ iniꞌ ánímaꞌ rán ya̱ kɨ̱ꞌɨ̱nꞌ noꞌonꞌ ni̱ꞌ nu̱u̱nꞌ Tátáꞌ ni̱ꞌ. Chi Tátáꞌ ni̱ꞌ vá kúñáꞌnú nasɨ́kuitɨꞌ ka̱ꞌ nsú káꞌ nuꞌuꞌ. 29Vitan jee nkachiꞌ ya̱chi̱ꞌ ni̱ꞌ nu̱u̱nꞌ rán ya̱ kuvi, sú ne̱ ntiáꞌan ka̱ꞌ kuvi‑i, sáva sáá kenta kuvi ya̱ nkachiꞌ ni̱ꞌ yaꞌá, saájee ji̱nu̱ꞌ iniꞌ rán nuꞌuꞌ. 30Nka̱ꞌánꞌ kue̱ꞌe̱ꞌ ni̱ꞌ ka̱ꞌ jín rán, chi ya̱ va̱ji máá kui̱ꞌna̱ꞌ kúñáꞌnú ya̱ tátúníꞌ iniꞌ ñɨ̱vɨ́ yaꞌá. Asúnika̱ꞌ ntu̱náꞌ fesáꞌ níso‑o tatúníꞌ‑i nu̱u̱nꞌ nuꞌuꞌ. 31Soo íyó kuvi sukuán sáva kuniꞌ rá ñɨvɨ ñɨ̱vɨ́ yaꞌá ya̱ ñúnúunꞌ ni̱ꞌ Tátáꞌ ni̱ꞌ, jín ya̱ síkúnkuvi ni̱ꞌ sáꞌá ni̱ꞌ sánikua̱ꞌ nta̱túníꞌ Tátáꞌ ni̱ꞌ nu̱u̱nꞌ ni̱ꞌ. Nakuiñɨꞌ‑órán, jee nkɨ́ꞌɨ́nꞌ‑órán ―nkachiꞌ Jesús.

Currently Selected:

Juan 14: meh

Highlight

Copy