Juan 20

Veꞌi ni̱yɨ íyó saɨn

(Mateo 28:1-10; Marcos 16:1-8; Lucas 24:1-12)

1Jee ki̱vɨ̱ꞌ xíꞌnañúꞌún semana, jee María ya̱ kúvi ñaꞌan ñuunꞌ Magdala, jee íyó neenꞌ ka̱ꞌ ya̱neꞌenꞌ jee ña̱ꞌa̱nꞌ ña nu̱u̱nꞌ yaviꞌ vá, jee niniꞌ ña ya̱ nkuiyo yu̱u̱ꞌ násɨ́ꞌ yuꞌú yaviꞌ vá. 2Saájee ninu ña kua̱ꞌa̱nꞌ ña nu̱u̱nꞌ nééꞌ Simón Pedro jín inka ka̱ꞌ te̱e ya̱ nku̱táꞌán nsu̱kuáꞌa Jesús maa, ya̱ nñunu̱u̱nꞌ víꞌí Jesús maa, jee nkachiꞌ ña nu̱u̱nꞌ ráa:

―Ntavaꞌ rá ñɨvɨ ñunéꞌyúꞌ I̱toꞌoꞌ‑ó yaviꞌ ni̱yɨ re̱ꞌ jee kua̱ꞌa̱nꞌ ráa jín re̱ꞌ, jee ntu̱ví jíníꞌ ráníꞌ né núꞌ ñakɨnꞌ ráa maa ―nkachiꞌ ña.

3Saájee Pedro jín inka te̱e ya̱ nsu̱kuáꞌa Jesús maa nkene ráa kua̱ꞌa̱nꞌ ráa nu̱u̱nꞌ nééꞌ yaviꞌ ni̱yɨ vá. 4Jee ni núvíꞌ rá te̱e vá ninu nkáá ráa, soo inka te̱e ya̱ nsu̱kuáꞌa Jesús maa ninu ya̱chi̱ꞌ re̱ꞌ ka̱ꞌ nsú káꞌ Pedro jee xíꞌnañúꞌún re̱ꞌ ka̱ꞌ nkenta re̱ꞌ yuꞌú yaviꞌ veꞌi ni̱yɨ vá. 5Jee ña̱xin re̱ꞌ maáréꞌ yuꞌú yaviꞌ veꞌi ni̱yɨ vá, jee niniꞌ re̱ꞌ rá saꞌma nyɨ́sukunꞌ ñunéꞌyúꞌ yósóꞌ yukuán, soo ntu̱ví nkívɨ re̱ꞌ ka̱ꞌ iniꞌ yaviꞌ vá. 6Kuéé ka̱ꞌ nkenta Simón Pedro ya̱ta̱ꞌ te̱e vá nki̱vɨ re̱ꞌ iniꞌ yaviꞌ ni̱yɨ vá. Jee niniꞌ re̱ꞌ rá saꞌma yósóꞌ yukuán. 7Jee saꞌma ya̱ nyɨ́sukunꞌ xi̱ni̱ꞌ Jesús ntu̱ví káá tútú‑u jín rá saꞌma vá íyó ti̱yu̱ꞌ i̱i̱ꞌ‑i jee káá sɨ́ɨ́n‑ɨ inka ka̱ꞌ nu̱u̱nꞌ. 8Saájee suni nki̱vɨ inka te̱e nsu̱kuáꞌa Jesús maa ya̱ nkenta ya̱ xíꞌnañúꞌún nu̱u̱nꞌ yuꞌú yaviꞌ ni̱yɨ vá jee niniꞌ‑i ya̱ nkuvi sukuán, jee ni̱nu̱ꞌ iniꞌ‑i ya̱ nna̱tekuꞌ i̱i̱ꞌ Jesús. 9Chi ni ntiáꞌan ki̱ku̱ꞌun iniꞌ ráa tu̱ꞌun káchíꞌ nu̱u̱nꞌ Tutuꞌ níso Tu̱ꞌun Ndiosíꞌ, ya̱ saá íyó natekuꞌ i̱i̱ꞌ re̱ꞌ jee nako̱o re̱ꞌ kene re̱ꞌ nteñu rá níꞌiꞌ. 10Saájee ni núvíꞌ rá te̱e nsu̱kuáꞌa Jesús vá nni̱kó ráa kua̱noꞌonꞌ ráa nu̱u̱nꞌ nééꞌ ráa.

Jesús ntu̱vi re̱ꞌ nu̱u̱nꞌ María ñaꞌan ñuunꞌ Magdala

(Marcos 16:9-11)

11Soo íñɨ́ María chíkéꞌi yuꞌú yaviꞌ vá jee náꞌyúꞌ ña, jee ni náꞌyúꞌ ña ña̱xin ña maáña yuꞌú yaviꞌ ni̱yɨ vá sáva kune̱ꞌyá ña iniꞌ‑i. 12Jee niniꞌ ña u̱vi̱ꞌ rá najiáꞌáꞌ ííꞌ Ndiosíꞌ ñúꞌún ráa saꞌma kuíjín, jee nééꞌ ráa nu̱u̱nꞌ nka̱a ñunéꞌyúꞌ Jesús, ɨɨn nééꞌ nu̱u̱nꞌ nkuvi ichi xíníꞌ re̱ꞌ jee inka ka̱ꞌ nééꞌ nu̱u̱nꞌ nkuvi ichi jiéꞌéꞌ re̱ꞌ. 13Jee nkachiꞌ ráa nu̱u̱nꞌ ña:

―Nánáꞌ, ¿na̱ kuvi chi náꞌyúꞌ nú? ―nkachiꞌ ráa nu̱u̱nꞌ ña.

Jee nkachiꞌ ña nu̱u̱nꞌ ráa:

―Nna̱keꞌen ráa I̱toꞌoꞌ ni̱ꞌ kua̱ꞌa̱nꞌ ráa jín re̱ꞌ, jee ntu̱ví jíníꞌ ni̱ꞌ né núꞌ nchi̱só ráa maa.

14Sáá sukuán nkuvi nkachiꞌ ña sukuán, jee sáá nna̱koto yátá ña jee niniꞌ ña ya̱ íñɨ́ Jesús yukuán, soo ntu̱ví nákuniꞌ ña ya̱ maáréꞌ kúvi Jesús. 15Nkachiꞌ Jesús nu̱u̱nꞌ ña:

―Nánáꞌ, ¿na̱ kuvi chi náꞌyúꞌ nú? ¿Né ɨɨn nánukú nú? ―nkachiꞌ re̱ꞌ nu̱u̱nꞌ ña.

Soo káꞌvi iniꞌ ña ya̱ kúvi re̱ꞌ ɨɨn te̱e ya̱ kúmí tataꞌ sáꞌá káá yukuán, jee nkachiꞌ ña nu̱u̱nꞌ re̱ꞌ:

―Tátáꞌ, retú suvinú kua̱ꞌa̱nꞌ nú jín re̱ꞌ, jee kachiꞌ nú né núꞌ nsa̱ꞌá nú maa sáva nakeꞌen ni̱ꞌ maa kɨ̱ꞌɨ̱nꞌ ni̱ꞌ jín‑i ―nkachiꞌ ña.

16Nkachiꞌ Jesús nu̱u̱nꞌ ña:

―¡María!

Jee nna̱koto ña jee káꞌánꞌ ña tu̱ꞌun hebreo jee nkachiꞌ ña:

―¡Raboni! ―ya̱ kuíni káchíꞌ Mestrúꞌ.

17Jee nkachiꞌ Jesús nu̱u̱nꞌ ña:

―Koto tɨ́ɨn nú nuꞌuꞌ chinetu nú, chi ntiáꞌan kɨ̱naa ni̱ꞌ nu̱u̱nꞌ Tátáꞌ ni̱ꞌ. Soo kuáꞌán nu̱u̱nꞌ rá ñaniꞌ ni̱ꞌ, ya nsu̱kuáꞌa ni̱ꞌ ráa, jee kachiꞌ nú nu̱u̱nꞌ ráa ya̱ kɨ̱naa ni̱ꞌ nu̱u̱nꞌ Tátáꞌ maáníꞌ ya̱ kúvi Tátáꞌ ránoꞌó ranika̱ꞌ, jín ya̱ kúvi Ndiosíꞌ ni̱ꞌ jín Ndiosíꞌ ránoꞌó ―nkachiꞌ Jesús.

18Saájee María ñuunꞌ Magdala kua̱ꞌa̱nꞌ ña kua̱nakani ña nu̱u̱nꞌ rá nsu̱kuáꞌa Jesús ráa, ya̱ niniꞌ ña I̱toꞌoꞌ‑ó jín rá tu̱ꞌun nkachiꞌ re̱ꞌ nu̱u̱nꞌ ña.

Jesús ntu̱vi re̱ꞌ nu̱u̱nꞌ rá te̱e súkuáꞌa re̱ꞌ ráa

(Mateo 28:16-20; Marcos 16:14-18; Lucas 24:36-49)

19Sáá nkua̱a̱ꞌ máá ki̱vɨ̱ꞌ yukuán, ya̱ kúvi máá ki̱vɨ̱ꞌ xíꞌnañúꞌún jiákui̱ñɨ̱ꞌ semana, jee nnu̱tútú rá te̱e ya̱ nsu̱kuáꞌa Jesús ráa ɨɨn iniꞌ veꞌi jee násɨ́ꞌ kutú yuvéꞌí chi yúꞌví ráa rá te̱e kúñáꞌnú nu̱u̱nꞌ ñɨvɨ Israel. Sa̱naanꞌ ni jee nkenta Jesús nna̱kui̱ñɨ̱ꞌ re̱ꞌ ma̱ꞌñú ráa jee nkachiꞌ re̱ꞌ nu̱u̱nꞌ ráa:

―Va̱ne̱ꞌ va̱ꞌa kino̱o iniꞌ ánímaꞌ rán.

20Sáá nkuvi nkachiꞌ Jesús tu̱ꞌun yaꞌá, jee nxi̱néꞌénꞌ re̱ꞌ rá naꞌá re̱ꞌ jín yɨkɨ íkáꞌ re̱ꞌ nu̱u̱nꞌ ntúfiꞌ re̱ꞌ nu̱u̱nꞌ ráa jee saájee nnusɨ̱ɨ̱ꞌ víꞌí iniꞌ ánímaꞌ rá te̱e súkuáꞌa re̱ꞌ ráa néꞌyá ráa I̱toꞌoꞌ‑ó. 21Saájee tukuni nkachiꞌ Jesús nu̱u̱nꞌ ráa:

―Va̱ne̱ꞌ va̱ꞌa kino̱o iniꞌ ánímaꞌ rán. Kuéntáꞌ nchu̱ichí Tátáꞌ ni̱ꞌ nuꞌuꞌ jee suni sukuán tájí ni̱ꞌ ránoꞌó jín tiñu táji ni̱ꞌ nu̱u̱nꞌ rán.

22Jee saájee ntivɨꞌ ta̱chi̱ꞌ Jesús jee nkachiꞌ re̱ꞌ nu̱u̱nꞌ ráa:

―Yaꞌá rán maáréꞌ ya̱ kúvi Ta̱chi̱ꞌ Ííꞌ ni̱ꞌ. 23Néni ɨɨn ñɨvɨ ya̱ kunekáꞌnú iniꞌ rán kua̱chi sáꞌá ñɨvɨ vá, jee ya̱ nne̱káꞌnú iniꞌ jie̱ꞌe̱ꞌ kua̱chi‑i, jee ñɨvɨ ya̱ ntu̱ví kunekáꞌnú iniꞌ rán kua̱chi ñɨvɨ vá, jee kino̱o‑o jín kua̱chi‑i.

Niniꞌ Tomás ya̱ nna̱tekuꞌ i̱i̱ꞌ Jesús

24Soo Tomás ya̱ kúvi re̱ꞌ ɨɨn rá ni uxúꞌ u̱vi̱ꞌ (12) rá te̱e nsu̱kuáꞌa Jesús ráa, ya̱ káꞌánꞌ ráa maa kuatíꞌ, ntu̱ví íyó re̱ꞌ jín ráa sáá nnenta Jesús. 25Jee kuíre rá inka te̱e ya̱ nsu̱kuáꞌa Jesús ráa nkachiꞌ ráa nu̱u̱nꞌ Tomás.

―Niniꞌ ráníꞌ I̱toꞌoꞌ‑ó ―nkachiꞌ ráa.

Soo nkachiꞌ Tomás nu̱u̱nꞌ ráa.

―Retú ntu̱ví néꞌyá ni̱ꞌ naꞌá I̱toꞌoꞌ‑ó rá nu̱u̱nꞌ ntúfiꞌ nu̱u̱nꞌ nyɨ́ꞌɨ rá nu̱yu, jee tuví ni̱ꞌ xi̱ntíín ni̱ꞌ nu̱u̱nꞌ nyɨ́ꞌɨ rá nu̱yu, jee tuví ni̱ꞌ naꞌá ni̱ꞌ yɨkɨ íkáꞌ re̱ꞌ, jee nsáꞌ ji̱nu̱ꞌ kuitɨꞌ iniꞌ ni̱ꞌ.

26Sáá njia̱ꞌa ki̱vɨ̱ꞌ u̱na̱ꞌ, jee rá te̱e nsu̱kuáꞌa Jesús ráa nnu̱tútú tuku ráa ɨɨn iniꞌ veꞌi, jee kútáꞌán Tomás jín ráa. Saájee, súnika̱ꞌ násɨ́ꞌ rá yuvéꞌí, jee nki̱vɨ Jesús, jee ña̱kui̱ñɨ̱ꞌ re̱ꞌ nteñu ráa jee nkachiꞌ re̱ꞌ:

―Va̱ne̱ꞌ va̱ꞌa kino̱o iniꞌ ánímaꞌ rán.

27Kuíre nkachiꞌ Jesús nu̱u̱nꞌ Tomás:

―Tuví xi̱ntíín nú yaꞌá, jee kune̱ꞌyá rá naꞌá ni̱ꞌ, jee saꞌá yatin naꞌá nú jee tuví naꞌá nú yɨkɨ íkáꞌ ni̱ꞌ. Koto kúkaꞌán nú ré ni̱núꞌ iniꞌ nú, chisaꞌ i̱nu̱ꞌ iniꞌ nú.

28Saájee nna̱xiníkó Tomás jee nkachiꞌ‑i nu̱u̱nꞌ re̱ꞌ:

―¡I̱toꞌoꞌ maáníꞌ jín Ndiosíꞌ maáníꞌ!

29Jee nkachiꞌ Jesús nu̱u̱nꞌ re̱ꞌ:

―Tomás, ¿á jínúꞌ iniꞌ nú chi niniꞌ nú nuꞌuꞌ? Na̱ ka̱ꞌ netuꞌ ka̱ꞌ kúvi rá ñɨvɨ ya̱ ntu néꞌyá ráa nuꞌuꞌ jee kúneí iniꞌ ránuꞌuꞌ.

Jie̱ꞌe̱ꞌ yaꞌá kúvi ya̱ ntee Juan tutuꞌ yaꞌá

30Saájee kue̱ꞌe̱ꞌ nasɨ́kuitɨꞌ ka̱ꞌ rá seña a̱nasɨ́ nsa̱ꞌá Jesús ichinúúnꞌ rá te̱e ya̱ nsu̱kuáꞌa re̱ꞌ ráa jee niniꞌ ráa maa, ya̱ nsú ntáká rá seña níso ráa nu̱u̱nꞌ tutuꞌ yaꞌá. 31Soo rá tu̱ꞌun yaꞌá ntee ni̱ꞌ nu̱u̱nꞌ tutuꞌ yaꞌá, sáva ránoꞌó ji̱nu̱ꞌ iniꞌ rán ya̱ Jesús kúvi re̱ꞌ Cristo, ya̱ nátavaꞌ‑a ñɨvɨ nu̱u̱nꞌ kua̱chi ráa, jín ya̱ kúvi re̱ꞌ Se̱ꞌya Ndiosíꞌ, jee sáva ni̱ꞌi̱nꞌ rán ya̱ kutekuꞌ rán nɨ́ɨ́nkání jín re̱ꞌ jie̱ꞌe̱ꞌ ya̱ kúneí iniꞌ rán re̱ꞌ.

Currently Selected:

Juan 20: meh

Highlight

Copy