Juan 21

Nstúvi Jesús maáréꞌ nu̱u̱nꞌ u̱xa̱ꞌ rá ni uxúꞌ u̱vi̱ꞌ (12) rá te̱e súkuáꞌa re̱ꞌ ráa

1Sáá njia̱ꞌa yaꞌá, jee nna̱stúvi tuku Jesús maáréꞌ nu̱u̱nꞌ rá te̱e súkuáꞌa re̱ꞌ ráa yuꞌú nteñúꞌún Tiberias. Jee nstúvi re̱ꞌ maáréꞌ suꞌva: 2Íñɨ́ nkáá Simón Pedro, jín Tomás ya̱ káꞌánꞌ ráa kuatíꞌ, jín Natanael ya̱ kúvi re̱ꞌ te̱e ñuunꞌ Caná ya̱ kúvi ñuunꞌ tɨ́ɨn Galilea, jín rá se̱ꞌya Zebedeo, jín u̱vi̱ꞌ ka̱ꞌ rá te̱e súkuáꞌa Jesús ráa. 3Jee nkachiꞌ Simón Pedro nu̱u̱nꞌ ráa:

―Kɨ̱tɨɨn ni̱ꞌ tia̱ká.

Jee nkachiꞌ ráa nu̱u̱nꞌ re̱ꞌ:

―Suni kɨ̱ꞌɨ̱nꞌ ránꞌ jín noꞌó ―nkachiꞌ ráa.

Jee kua̱ꞌa̱nꞌ ráa jee nkaa ráa iniꞌ barkúꞌ, soo yakuááꞌ ki̱vɨ̱ꞌ yukuán ni ntu̱náꞌ tia̱ká nníꞌínꞌ ráa tɨɨn ráa.

4Jee sáá va̱kunijinꞌ, jee ntu̱vi Jesús íñɨ́ re̱ꞌ yuꞌú nteñúꞌún, soo rá te̱e súkuáꞌa re̱ꞌ ráa jee ntu̱ví nákuniꞌ ráa re̱ꞌ ya̱ maáréꞌ kúvi Jesús. 5Saájee nkachiꞌ Jesús nu̱u̱nꞌ ráa:

―Te̱e kuáchí, ¿á ntu̱ví nníꞌínꞌ rán tia̱ká? ―nkachiꞌ re̱ꞌ nu̱u̱nꞌ ráa.

Jee nna̱xiníkó ráa nu̱u̱nꞌ re̱ꞌ:

―¡Ntu̱ví ná íyó!

6Saájee nkachiꞌ Jesús nu̱u̱nꞌ ráa:

―Chuꞌun rán ñunu tɨ́ɨn tia̱ká ichi kuáꞌá barkúꞌ, jee ni̱ꞌi̱nꞌ rán tia̱ká.

Saájee nchuꞌun ráa maa, jee ni ntu̱ví nkúneí ráa tavaꞌ ráa ñunu tɨ́ɨn ráa tia̱ká vá nu̱u̱nꞌ nute, jie̱ꞌe̱ꞌ ya̱ kue̱ꞌe̱ꞌ víꞌí tia̱ká ña̱ku̱ꞌun iniꞌ ñunu vá. 7Saájee te̱e ya̱ súkuáꞌa Jesús maa ya̱ nñunu̱u̱nꞌ re̱ꞌ nkachiꞌ te̱e vá nu̱u̱nꞌ Pedro:

―¡Máá I̱toꞌoꞌ‑ó kúvi‑i!

Sáá nteso̱ꞌo Simón Pedro ya̱ suvire̱ꞌ ví I̱toꞌoꞌ, jee nna̱ku̱ꞌun Pedro saꞌma re̱ꞌ (chi ntavaꞌ re̱ꞌ maa), jee íchíni nnava re̱ꞌ nu̱u̱nꞌ nute. 8Rá inka ka̱ꞌ rá táꞌán súkuáꞌa Jesús ráa va̱ji nene ráa nu̱u̱nꞌ nute stákaa ráa ñunu ñúꞌún chitú tia̱ká, chi nsáꞌ jíká íñɨ́ ráa chi kúvi yatin ɨɨn sientúꞌ (100) metro ya̱ jíká yuꞌú nute yaꞌá. 9Sáá nnu̱un ráa nkene ráa iniꞌ barkúꞌ nu̱u̱nꞌ ñuꞌun íchí, jee niniꞌ ráa ya̱ káyúꞌ ñuꞌunꞌ ti̱ka̱yɨ, jee ñúꞌún ɨɨn tia̱ká chíꞌyóꞌ‑o nu̱u̱nꞌ tíkáyɨ vá, jee yósóꞌ ɨɨn i̱xta̱tíláꞌ. 10Jee nkachiꞌ Jesús nu̱u̱nꞌ ráa:

―Kínaka rán sava tia̱ká rán ya̱ sukuáni ntɨɨn rán nu̱u̱nꞌ nute.

11Jee nkaa Simón Pedro iniꞌ barkúꞌ jee nstakaa re̱ꞌ ñunu ñúꞌún chitú tia̱ká nkene ne̱ ñuíchí. Jee iniꞌ ñunu vá ñúꞌún ɨɨn sientúꞌ u̱vi̱xiko u̱xu̱ni̱ꞌ (153) tia̱ká káꞌnú, jee súnika̱ꞌ kue̱ꞌe̱ꞌ nasɨ́kuitɨꞌ ti̱ꞌ ñúꞌún soo ntu̱ví ntéꞌnéꞌ ñunu vá. 12Saájee nkachiꞌ Jesús nu̱u̱nꞌ ráa:

―Neꞌenꞌ rán, kasini‑órán ―nkachiꞌ Jesús nu̱u̱nꞌ ráa.

Jee ni ɨɨn rá te̱e ya̱ súkuáꞌa re̱ꞌ ráa ntu̱ví nkíji iniꞌ ráa katu̱ꞌún ráa né ɨɨn ví re̱ꞌ, chi jíníꞌ ráa ya̱ maáréꞌ kúvi I̱toꞌoꞌ. 13Kuíre nku̱yatin Jesús nu̱u̱nꞌ ráa, jee ntɨɨn re̱ꞌ i̱xta̱tíláꞌ vá jee njia̱ꞌa re̱ꞌ maa nu̱u̱nꞌ ráa, jee suni sukuán nsa̱ꞌá re̱ꞌ jín tia̱ká. 14Yaꞌá nkuvi ya̱ uníꞌ íchí ya̱ nna̱stúvi Jesús maáréꞌ nu̱u̱nꞌ rá te̱e ya̱ súkuáꞌa re̱ꞌ ráa ne̱ sáá nna̱tekuꞌ i̱i̱ꞌ re̱ꞌ nnako̱o re̱ꞌ nene re̱ꞌ nteñu rá níꞌiꞌ.

Tu̱ꞌun káꞌánꞌ Jesús jín Simón Pedro

15Sáá nkuvi nya̱siniꞌ ráa, jee nkachiꞌ Jesús nu̱u̱nꞌ Simón Pedro:

―Simón, se̱ꞌya Jonás, ¿á ñúnúunꞌ nú ka̱ꞌ nuꞌuꞌ nsú káꞌ rá yaꞌá?

Jee nkachiꞌ Pedro nu̱u̱nꞌ re̱ꞌ:

―Saá I̱toꞌoꞌ, ya̱ jíníꞌ nú ya̱ ñúnúunꞌ ni̱ꞌ noꞌó.

Jee nkachiꞌ Jesús nu̱u̱nꞌ re̱ꞌ:

―Kumí rá ñɨvɨ yɨ́ꞌɨ́ xi̱ntíín ni̱ꞌ ya̱ kúvi kuéntáꞌ rá lanchi lúlí ni̱ꞌ.

16Jee tukuni nkachiꞌ re̱ꞌ nu̱u̱nꞌ Pedro ya̱ uvíꞌ íchí:

―Simón, se̱ꞌya Jonás, ¿á ñúnúunꞌ nú nuꞌuꞌ?

Jee nkachiꞌ Pedro nu̱u̱nꞌ re̱ꞌ:

―Saá I̱toꞌoꞌ, ya̱ jíníꞌ nú ya̱ ñúnúunꞌ ni̱ꞌ noꞌó.

Jee nkachiꞌ Jesús nu̱u̱nꞌ re̱ꞌ:

―Kumí nú rá ñɨvɨ yɨ́ꞌɨ́ xi̱ntíín ni̱ꞌ ya̱ kúvi ráa kuéntáꞌ rá lanchi ni̱ꞌ.

17Jee ya̱ uníꞌ íchí nkachiꞌ re̱ꞌ nu̱u̱nꞌ Pedro:

―Simón, se̱ꞌya Jonás, ¿á ñúnúunꞌ nú nuꞌuꞌ?

Jee nnu̱kuéká víꞌí iniꞌ Pedro chi ya̱ uníꞌ íchí ni̱ka̱tu̱ꞌún re̱ꞌ maa: “¿Á ñúnúunꞌ nú nuꞌuꞌ?”, jee nkachiꞌ Pedro nu̱u̱nꞌ re̱ꞌ:

―I̱toꞌoꞌ, noꞌó jíníꞌ nú nɨꞌɨ, noꞌó jíníꞌ ya̱ ñúnúunꞌ ni̱ꞌ noꞌó.

Jee nkachiꞌ Jesús nu̱u̱nꞌ re̱ꞌ:

―Kumí nú rá ñɨvɨ yɨ́ꞌɨ́ xi̱ntíín ni̱ꞌ ya̱ kúvi ráa kuéntáꞌ rá lanchi ni̱ꞌ. 18Máá nááꞌ vá káchíꞌ ni̱ꞌ nu̱u̱nꞌ nú ya̱ sáá súchí nú ka̱ꞌ, jee nákúꞌun maánú saꞌma nú jee kua̱ꞌa̱nꞌ nú nu̱u̱nꞌ kuíni maánú. Soo sáá kujííꞌ nú jee sikáa nú naꞌá nú jee nachuꞌun inka ñɨvɨ saꞌma noꞌó, jee kɨ̱na̱ka ráa noꞌó nu̱u̱nꞌ ntu̱ví kuini nú kɨ̱ꞌɨ̱nꞌ nú.

19Nkachiꞌ Jesús rá tu̱ꞌun yaꞌá sáva stúvi‑i na̱ja kuviꞌ Pedro, jee jie̱ꞌe̱ꞌ na̱ja kuviꞌ Pedro stúvi‑i ya̱ kúñáꞌnú nasɨ́kuitɨꞌ Ndiosíꞌ. Jee sáá nkuvi nkachiꞌ Jesús rá tu̱ꞌun yaꞌá, jee kuíre nkachiꞌ tuku re̱ꞌ nu̱u̱nꞌ Pedro:

―¡Kunikɨnꞌ nuꞌuꞌ!

Ɨɨn rá te̱e súkuáꞌa ya̱ nñunu̱u̱nꞌ víꞌí Jesús

20Jee nna̱koto yátá Pedro jee niniꞌ re̱ꞌ ya̱ níkɨ́nꞌ táꞌán te̱e ya̱ súkuáꞌa Jesús maa ya̱ ñúnúunꞌ ka̱ꞌ Jesús maa. Jee suni te̱e vá ví ya̱ ña̱kuyatin ka̱ꞌ xiín‑i Jesús sáá nku̱xíní ráa jee nkachiꞌ‑i nu̱u̱nꞌ Jesús: “¿Né ɨɨn kúvi te̱e ya̱ naku̱ꞌva‑a noꞌó?” 21Saájee sáá niniꞌ Pedro nu̱u̱nꞌ te̱e vá ya̱ ñúnúunꞌ ka̱ꞌ Jesús, jee nkachiꞌ re̱ꞌ nu̱u̱nꞌ Jesús:

―I̱toꞌoꞌ, jee te̱e yaꞌá, ¿ná kúvi ya̱ kunoꞌo re̱ꞌ rúsa?

22Jee nkachiꞌ Jesús nu̱u̱nꞌ Pedro:

―Retú kuíni ni̱ꞌ ya̱ kino̱o re̱ꞌ kutekuꞌ re̱ꞌ ne̱ ki̱vɨ̱ꞌ nikó tuku ni̱ꞌ niji ni̱ꞌ, ¿na̱ kuvi chi jítú iniꞌ nú maa? Noꞌó, kunikɨnꞌ nuꞌuꞌ ―nkachiꞌ Jesús.

23Saájee nteñu rá ñanitáꞌán, ya̱ kúneí iniꞌ ráa Jesús, ñe̱te̱nuun tu̱ꞌun yaꞌá ya̱ nsáꞌ kuviꞌ te̱e vá ya̱ súkuáꞌa Jesús maa. Soo nsáꞌ nkachiꞌ Jesús ya̱ nku̱víꞌ‑i, chisaꞌ nkachiꞌ re̱ꞌ ya̱: “Retú kuíni ni̱ꞌ ya̱ kino̱o re̱ꞌ ya̱ kutekuꞌ re̱ꞌ ne̱ ki̱vɨ̱ꞌ nikó tuku ni̱ꞌ niji ni̱ꞌ, ¿na̱ kuvi chi jítú iniꞌ nú maa?” nkachiꞌ Jesús.

24Jee te̱e súkuáꞌa Jesús vá ya̱ ñúnúunꞌ víꞌí ka̱ꞌ Jesús kúvi ya̱ jiáꞌa ya̱ naáꞌ jie̱ꞌe̱ꞌ rá tiñu yaꞌá, jee ntee‑e rá tu̱ꞌun yaꞌá jie̱ꞌe̱ꞌ rá tiñu yaꞌá, jee jíníꞌ ráníꞌ ya̱ íyó na̱a̱ꞌ rá tu̱ꞌun jiáꞌa‑a.

25Jee suni íyó kue̱ꞌe̱ꞌ víꞌí ka̱ꞌ rá inka tiñu ya̱ nsa̱ꞌá Jesús, jee retánꞌ tee jie̱ꞌe̱ꞌ ta ɨɨn ɨɨn rá tiñu nsa̱ꞌá re̱ꞌ, jee káꞌvi iniꞌ ni̱ꞌ ya̱ ni nkénta iniꞌ ñɨ̱vɨ́ yaꞌá koo rá tutuꞌ ya̱ kuneeꞌ rá tu̱ꞌun jie̱ꞌe̱ꞌ tiñu nsa̱ꞌá re̱ꞌ.

Sukuán koo.

Currently Selected:

Juan 21: meh

Highlight

Copy